തേക്ക് , ഈട്ടി, ചന്ദനം, രക്തചന്ദനം തുടങ്ങിയവയുടെ തൈകള്‍ കുറഞ്ഞ വിലയില്‍ വാങ്ങാന്‍ അവസരമൊരുക്കുകയാണ് വനം വകുപ്പ്. സര്‍ക്കാരിന്റെ 1000 ദിനാഘോഷങ്ങളുടെ ഭാഗമായി സെന്‍ട്രല്‍ സ്റ്റേഡിയത്തില്‍ ഒരുക്കിയിരിക്കുന്ന വനംവകുപ്പിന്റെ സ്റ്റാളിലാണ് വൃക്ഷതൈകള്‍ വില്‍പ്പനയ്ക്കുള്ളത്. 45 രൂപമുതലാണ് വില ആരംഭിക്കുന്നത്. വനത്തില്‍ നിന്നും നേരിട്ട് ശേഖരിച്ച ശുദ്ധമായ ചെറുതേന്‍, മറയൂര്‍ ശര്‍ക്കര, കറി മഞ്ഞള്‍, പുല്‍തൈലം, കറുവപ്പട്ട, രാമച്ചം, കുരുമുളക്, കുന്തിരിക്കം,  ദന്തപ്പാലഎണ്ണ തുടങ്ങിയവയും സ്റ്റാളില്‍ നിന്നും മിതമായ നിരക്കില്‍ ലഭിക്കുന്നു.

പരമ്പരാഗതരീതിയില്‍ നെയ്‌തെടുത്ത സാരികളും ഷര്‍ട്ടുകളും ചുരിദാറുകളും 20 ശതമാനം വിലക്കുറവില്‍ വാങ്ങാന്‍ അവസരമൊരുക്കി സര്‍ക്കാരിന്റെ 1000 ദിനാഘോഷം. ഇതോടനുബന്ധിച്ച് സെന്‍ട്രല്‍ സ്റ്റേഡിയത്തില്‍ നടക്കുന്ന പ്രദര്‍ശ വിപണന മേളയിലെ ഖാദി ഗ്രാമവ്യവസായ ബോര്‍ഡിന്റെ സ്റ്റാളിലാണ് വസ്ത്രങ്ങളുടെ വിപുലമായ ശ്രേണി.

ഹരിതകേരളം മിഷനും കിലെയും സംയുക്തമായി ജില്ലാതല ഹരിതനിയമ ബോധവത്കരണ പരിശീലനം സംഘടിപ്പിച്ചു. കളക്ടറേറ്റ് കോണ്‍ഫറന്‍സ് ഹാളില്‍ നടന്ന പരിപാടി നവകരേളം കര്‍മ്മപദ്ധതി സംസ്ഥാന കോ-ഓഡിനേറ്റര്‍ ചെറിയാന്‍ ഫിലിപ്പ് ഉദ്ഘാടനം ചെയ്തു. ദൈനംദിനം മലിനമാക്കപ്പെടുന്ന പ്രകൃതിയെ രക്ഷിക്കാന്‍ ഹരിതനിയമത്തിന്റെ ആവശ്യകത വളരെ വലുതാണെന്ന് അദ്ദേഹം പറഞ്ഞു.

വൈദ്യുതി വിതരണം മെച്ചപ്പെടുത്തുന്നതിന് സന്‍ദ് ആദര്‍ശ് ഗ്രാമയോജന പ്രകാരം അഞ്ചുതെങ്ങ് ഗ്രാമപഞ്ചായത്തില്‍ നടപ്പിലാക്കിയ പദ്ധതിയുടെ ഉദ്ഘാടനം ഇന്ന് (ഫെബ്രുവരി 27) വൈദ്യുതിവകുപ്പ് മന്ത്രി എം.എം. മണി നിര്‍വ്വഹിക്കും. ഉച്ചയ്ക്ക് രണ്ടു മണിയ്ക്ക് അഞ്ചുതെങ്ങ് മത്സ്യസംഘം ഹാളില്‍ ചേരുന്ന ഉദ്ഘാടന ചടങ്ങില്‍ ഡോ.എ.സമ്പത്ത് എം.പി അദ്ധ്യക്ഷത വഹിക്കും. ചടങ്ങില്‍ ഡെപ്യൂട്ടി സ്പീക്കര്‍ വി.ശശി മുഖ്യപ്രഭാഷണം നടത്തും. ജില്ലാ പഞ്ചായത്ത് വൈസ് പ്രസിഡന്റ് ഷൈലജാബീഗം, ചിറയിന്‍കീഴ് ബ്ലോക്ക് പഞ്ചായത്ത് പ്രസിഡന്റ് ആര്‍ സുഭാഷ്, അഞ്ചുതെങ്ങ് ഗ്രാമപഞ്ചായത്ത് പ്രസിഡന്റ് ക്രിസ്റ്റി സൈമണ്‍ തുടങ്ങിയവര്‍ പങ്കെടുക്കും.

സംസ്ഥാന തെരഞ്ഞെടുപ്പ് കമ്മീഷന്‍ ആസ്ഥാനത്ത് ഓഫീസ് അറ്റന്‍ഡന്റിന്റെ ഒരു ഒഴിവിലേയ്ക്ക് ഡെപ്യൂട്ടേഷന്‍ വ്യവസ്ഥയില്‍ നിയമനത്തിന് അപേക്ഷിക്കാം. സെക്രട്ടേറിയറ്റിലും മറ്റ് സര്‍ക്കാര്‍ വകുപ്പുകളിലും സമാന തസ്തികകളില്‍ ജോലി നോക്കുന്നവര്‍ ഉചിത മാര്‍ഗേണ മാര്‍ച്ച് 20-നകം സെക്രട്ടറി, സംസ്ഥാന തെരഞ്ഞെടുപ്പ് കമ്മീഷന്‍, കോര്‍പ്പറേഷന്‍ ഓഫീസ് സമുച്ചയം, എല്‍.എം.എസ് ജംഗ്ഷന്‍, തിരുവനന്തപുരം-695633 എന്ന വിലാസത്തില്‍ അപേക്ഷിക്കണമെന്ന് തെരഞ്ഞെടുപ്പ് കമ്മീഷന്‍ സെക്രട്ടറി അറിയിച്ചു. കൂടുതല്‍ വിവരങ്ങള്‍ക്ക് 0471-2321233, 82811000127.
(പി.ആര്‍.പി. 302/2019)

ശ്രീ മുത്താരമ്മന്‍ ക്ഷേത്രത്തിലെ അമ്മന്‍കൊട മഹോത്സവത്തോടനുബന്ധിച്ച് നെടുമങ്ങാട് മാര്‍ച്ച് 12 നും മേലേത്തെരുവ് ശ്രീ മുത്താരമ്മന്‍ കോവിലിലെ അമ്മന്‍കൊട മഹോത്സവത്തോടനുബന്ധിച്ച് നെയ്യാറ്റിന്‍കരയില്‍ ഏപ്രില്‍ ഒന്‍പതിനും പ്രാദേശിക അവധി പ്രഖ്യാപിച്ച് ജില്ലാ കളക്ടര്‍ ഉത്തരവിട്ടു.നെടുമങ്ങാട് നഗരസഭാ പ്രദേശത്തെയും നെയ്യാറ്റിന്‍കര മുന്‍സിപ്പല്‍ പ്രദേശത്തെയും എല്ലാ സര്‍ക്കാര്‍ ഓഫീസുകള്‍ക്കും വിദ്യാഭ്യാസ സ്ഥാനപങ്ങള്‍ക്കും അവധിയായിരിക്കും. നേരത്തെ നിശ്ചയിച്ചിട്ടുള്ള പൊതു പരീക്ഷകള്‍ക്ക് അവധി ബാധകമല്ല.
(പി.ആര്‍.പി. 301/2019)

കോവളം മുതല്‍ ബേക്കല്‍ വരെ നിര്‍മിക്കുന്ന സംസ്ഥാന ജലപാത വിനോദസഞ്ചാര മേഖലയില്‍ അത്ഭുതങ്ങള്‍ സൃഷ്ടിക്കുമെന്ന് ടൂറിസം മന്ത്രി കടകംപള്ളി സുരേന്ദ്രന്‍. ടൂറിസം രംഗത്ത് പുതിയ കേന്ദ്രങ്ങള്‍ കണ്ടെത്തി വികസിപ്പിക്കാന്‍ തുടങ്ങിയതോടെ കേരളത്തിലേക്കു കൂടുതല്‍ വിനോദസഞ്ചാരികള്‍ എത്തിത്തുടങ്ങിയതായും മന്ത്രി പറഞ്ഞു. കാപ്പില്‍ ബോട്ട് ക്ലബില്‍ പൂര്‍ത്തീകരിച്ച ടൂറിസം പദ്ധതികളുടെ ഉദ്ഘാടനം നിര്‍വഹിക്കുകയായിരുന്നു മന്ത്രി.

·    സമാപന സമ്മേളനം സെന്‍ട്രല്‍ സ്റ്റേഡിയത്തില്‍ മുഖ്യമന്ത്രി ഉദ്ഘാടനം ചെയ്യും
·    1000 കലാകാരന്മാര്‍ പങ്കെടുക്കുന്ന സര്‍ഗോത്സവം അരങ്ങേറും