കേരള സംസ്ഥാന വെയര്‍ ഹൗസിംഗ് കോര്‍റേഷന്‍ നബാര്‍ഡ് പദ്ധതിയില്‍ ഉള്‍പ്പെടുത്തി പയ്യന്നൂര്‍ വെയര്‍ ഹൗസില്‍ നിര്‍മ്മാണം പൂര്‍ത്തിയാക്കിയ 1300 മെട്രിക് ടണ്‍ സംഭരണ ശേഷിയുള്ള പുതിയ ഗോഡൗണുകളുടെ ഉദ്ഘാടനം ഫെബ്രുവരി 22ന് വൈകീട്ട് അഞ്ചിന് റവന്യു വകുപ്പ് മന്ത്രി ഇ. ചന്ദ്രശേഖരന്‍ നിര്‍വഹിക്കും. കൃഷി മന്ത്രി വി.എസ് സുനില്‍കുമാര്‍ മുഖ്യാതിഥിയാവും. സി. കൃഷ്ണന്‍ എം.എല്‍.എ അധ്യക്ഷത വഹിക്കും. പി. കരുണാകരന്‍ എം.പി മുഖ്യപ്രഭാഷണം നടത്തും.

       ആര്‍ദ്രം പദ്ധതിയിലുള്‍പ്പെടുത്തി പ്രാഥമികാരോഗ്യ കേന്ദ്രങ്ങളെ കുടുംബാരോഗ്യ കേന്ദ്രങ്ങളാക്കി മാറ്റുന്ന പദ്ധതിയുടെ ആദ്യ ഘട്ടം ജില്ലയില്‍ പൂര്‍ത്തിയായി. 11 ആശുപത്രികളെയാണ് ജില്ലയില്‍ നിന്ന് തെരഞ്ഞെടുത്തിരുന്നത്. പതിനൊന്നാമത് കുടുംബാരോഗ്യ കേന്ദ്രത്തിന്റെ ഉദ്ഘാടനം തില്ലങ്കേരിയില്‍ ആരോഗ്യ വകുപ്പ് മന്ത്രി കെ കെ ശൈലജ ടീച്ചര്‍ നിര്‍വഹിക്കും.  ഫെബ്രുവരി 22ന് വൈകീട്ട് 6.30 ന് നടക്കുന്ന ചടങ്ങില്‍ ഇരിട്ടി ബ്ലോക്ക് പഞ്ചായത്ത് പ്രസിഡന്റ്  എന്‍ ടി റോസമ്മ അധ്യക്ഷത വഹിക്കും.

 അടുത്ത വര്‍ഷത്തോടെ ജില്ലയിലെ എല്ലാ സര്‍ക്കാര്‍ സ്‌കൂളുകളും ആശുപത്രികള്‍ ഉള്‍പ്പെടെയുള്ള ഘടക സ്ഥാപനങ്ങളും ജില്ലാ പഞ്ചായത്തും സോളാര്‍ പദ്ധതിയുടെ ഭാഗമാകുമെന്ന് ജില്ലാ പഞ്ചായത്ത് പ്രസിഡന്റ് കെ വി സുമേഷ് അറിയിച്ചു. വിദ്യാലയങ്ങളടക്കം 150 ല്‍ അധികം സ്ഥാപനങ്ങളാണ് പദ്ധതിയുടെ ഭാഗമാകുന്നത്. സൗരോര്‍ജ നിലയങ്ങള്‍ സ്ഥാപിക്കുന്നത് വഴി സ്ഥാപനങ്ങള്‍ക്ക് ആവശ്യമായ വൈദ്യുതി ഉല്‍പാദിപ്പിക്കുകയും അധികമായി വരുന്ന വൈദ്യുതി കെ എസ് ഇ ബി ക്ക് കൈമാറി വരുമാനമുണ്ടാക്കുകയും ചെയ്യുക എന്ന ലക്ഷ്യത്തോടെയാണ് പദ്ധതി നടപ്പാക്കുന്നത്.

       പ്രായം ചെന്നവര്‍ക്കുള്ള മാതൃകാപകല്‍ വീടുകള്‍ കാലക്രമേണ സംസ്ഥാനത്തെല്ലായിടത്തും വ്യാപിപ്പിക്കുമെന്ന് ആരോഗ്യ-സാമൂഹ്യനീതി വകുപ്പ് മന്ത്രി കെ കെ ശൈലജ ടീച്ചര്‍ പറഞ്ഞു. കൂത്തുപറമ്പ് ബ്ലോക്ക് പഞ്ചായത്തിലെ പാട്യം പകല്‍വീട് ഉദ്ഘാടനം നിര്‍വ്വഹിച്ചു സംസാരിക്കുകയായിരുന്നു മന്ത്രി. പരീക്ഷണാര്‍ത്ഥം ജില്ലയില്‍ ഒന്നോ രണ്ടൊ സ്ഥലത്ത് പകല്‍വീട് നിര്‍മ്മിച്ചതിന് ശേഷം തദ്ദേശസ്വയംഭരണ സ്ഥാപനങ്ങളുടെ സഹായത്തോടെ മറ്റിടങ്ങളിലും വ്യാപിപ്പിക്കും. കൂത്തുപറമ്പ ബ്ലോക്ക് പഞ്ചായത്ത്് പ്രസിഡന്റ് എ അശോകന്‍ അധ്യക്ഷനായി. 

       രാജ്യത്തിലെ തന്നെ ആദ്യത്തെ അന്താരാഷ്ട്ര ആയുര്‍വേദ ഗവേഷണ ഇന്‍സ്റ്റിറ്റ്യൂട്ടിന് ഫെബ്രുവരി 22ന് വൈകീട്ട് അഞ്ചിന് കല്യാട് മുഖ്യമന്ത്രി പിണറായി വിജയന്‍ ശിലാസ്ഥാപനം നിര്‍വഹിക്കും. ആരോഗ്യ വകുപ്പ് മന്ത്രി കെ.കെ. ശൈലജ ടീച്ചര്‍ അധ്യക്ഷത വഹിക്കും.

സംസ്ഥാന സര്‍ക്കാരിന്റെ ആയിരം ദിനാഘോഷങ്ങളുടെ ഭാഗമായി ഇരിങ്ങാലക്കുട മണ്ഡലത്തില്‍ 33 കോടി രൂപയുടെ വികസന പദ്ധതികള്‍ നടപ്പിലാക്കുന്നു . 31 കോടി രൂപയുടെ നിര്‍മാണോദ്‌ഘടന പദ്ധതികള്‍ക്ക്‌ തുടക്കമാകും. ഒരു കോടി 13 ലക്ഷം രൂപ ചിലവഴിച്ചു നിര്‍മ്മിച്ച കല്ലേറ്റുംകര സബ്‌ രജിസ്‌ട്രാര്‍ ഓഫീസ്‌ മന്ദിരത്തിന്റെ ഉദ്‌ഘാടനം മുഖ്യമന്ത്രി പിണറായി വിജയന്‍ വീഡിയോ കോണ്‍ഫ്രന്‍സിലൂടെ നിര്‍വഹിച്ചു. 60 ലക്ഷം രൂപ ചിലവഴിച്ച ആസാദ്‌ റോഡ്‌ പുനരുദ്ധാരണീ പ്രൊഫ കെ. യു അരുണന്‍ എം എല്‍ എ ഉദ്‌ ഘാടനം ചെയ്‌തു. കോതച്ചിറ ലിഫ്‌റ്റ്‌ ഇറിഗേഷന്‍ പദ്ധതിയുടെ ഉദ്‌ഘാടനം കൃഷി വകുപ്പ്‌ മന്ത്രി വി എസ്‌ സുനില്‍ കുമാര്‍ നിര്‍വഹിച്ചു.