അക്കാദമിക നിലവാരത്തിനൊപ്പം കലാസാംസ്‌കാരിക മേഖലയിലും കലാലയങ്ങളെ ഉയര്‍ത്തുകയാണ്‌ സര്‍ക്കാരിന്റെ ലക്ഷ്യമെന്ന്‌ ഉന്നത വിദ്യാഭ്യാസ- ന്യൂനപക്ഷ ക്ഷേമ വകുപ്പ്‌ മന്ത്രി ഡോ. കെ ടി ജലില്‍ പറഞ്ഞു. പനമ്പിള്ളി സ്‌മാരക സര്‍ക്കാര്‍ കോളേജില്‍ പുതുതായി അനുവദിച്ച കോഴ്‌സുകളുടെയും ലൈബ്രറി മന്ദിരത്തിന്റെയും ഉദ്‌ഘാടനം നിര്‍വ്വഹിച്ചു കൊണ്ട്‌ സംസാരിക്കുകയായിരുന്നു മന്ത്രി. വിദ്യാര്‍ത്ഥികളില്‍ വായനാശീലം വളര്‍ത്തുന്നതിന്റെ ആവശ്യകതയെക്കുറിച്ചും പുതിയ സാഹചര്യങ്ങളില്‍ അധ്യാപകര്‍ അപ്‌ഡേറ്റ്‌ ആകേണ്ടതിനെക്കുറിച്ചും മന്ത്രി പറഞ്ഞു. ബി ഡി ദേവസ്സി എം എല്‍ എ അധ്യക്ഷനായി.

സംസ്‌ഥാന സര്‍ക്കാരിന്റെ 1000 ദിനകര്‍മ്മപദ്ധതിയില്‍ ഉള്‍പ്പെടുത്തി രണ്ടാം ഘട്ട വികസന പ്രവര്‍ത്തനങ്ങള്‍ നടത്തുന്ന വടക്കുംകര ഗവണ്മെന്റ്‌ യു പി സ്‌കൂളിന്റെ 5 ക്ലാസ്സ്‌ മുറികളുടെ നിര്‍മ്മാണോദ്‌ഘാടനം പ്രൊഫ കെ യു അരുണന്‍ എം എല്‍ എ നിര്‍വഹിച്ചു. പൂമംഗലം ഗ്രാമ പഞ്ചായത്ത്‌ പ്രസിഡന്റ്‌ വര്‍ഷരാജേഷ്‌ അദ്ധ്യക്ഷത വഹിച്ചു. ജില്ലാ പഞ്ചായത്ത്‌ വൈസ്‌ പ്രസിഡന്റ്‌ എന്‍ കെ ഉദയപ്രകാശ്‌ മുഖ്യാഥിതി ആയിരുന്നു. പൊതു വിദ്യാഭ്യാസ സംരക്ഷണ യജ്ഞത്തിന്റെ ഭാഗമായി 49 ലക്ഷം രൂപയാണ്‌ ക്ലാസ്സ്‌ റൂമുകളുടെ നിര്‍മാണത്തിനായി അനുവദിച്ചിട്ടുള്ളത്‌. ജനപ്രതിനിധികളും രാഷ്ട്രീയ സാമൂഹ്യരംഗത്തെ പ്രവര്‍ത്തകരും പങ്കെടുത്തു.

നവകേരള നിര്‍മ്മിതിക്ക്‌ പ്രാധാന്യം നല്‍കി ഇരിങ്ങാലക്കുട ബ്ലോക്ക്‌ പഞ്ചായത്ത്‌ 2019-20 സാമ്പത്തിക വര്‍ഷത്തെ ബജറ്റ്‌ വൈസ്‌ പ്രസിഡന്റ്‌ നളിനി ബാലകൃഷ്‌ണന്‍ അവതരിപ്പിച്ചു. ലൈഫ്‌ ഭവന നിര്‍മ്മാണ പദ്ധതിക്ക്‌ 1,0393,000 രൂപ വകയിരുത്തി. ഉല്‌പാദന മേഖലയില്‍ വനിതാ തൊഴില്‍ സംരംഭകര്‍ക്ക്‌ 3200000 രൂപയും വനിതകള്‍ക്ക്‌ ഓട്ടോറിക്ഷ/പിക്‌അപ്പ്‌ ഓട്ടോറിക്ഷ വാങ്ങുന്നതിനു 3250000 രൂപയും മാറ്റിവെച്ചു. നെല്‍കൃഷി കൂലി ചെലവ്‌ സബ്‌ സിഡിക്കായി 18 ലക്ഷം രൂപ വകയിരുത്തി. കാട്ടൂര്‍ പഞ്ചായത്ത്‌ ഹോസ്‌പിറ്റലില്‍ ഡോക്ടര്‍, പാരാമെഡിക്കല്‍ സ്റ്റാഫ്‌ നിയമനത്തിന്‌ 590000 രൂപ വകയിരുത്തി.

പൊയ്യ ഗ്രാമപഞ്ചായത്ത്‌ ഓഫീസില്‍ അക്കൗണ്ടന്റ്‌ കം ഡാറ്റ എന്‍ട്രി ഓപ്പറേറ്റര്‍ തസ്‌തികയില്‍ നിയമനം നടത്തുന്നു. ബി.കോമും പിജിഡിസിഎ ആണ്‌ യോഗ്യത. താല്‍പര്യമുളളവര്‍ മാര്‍ച്ച്‌ 2 നകം അപേക്ഷ നല്‍കണം. കൂടുതല്‍ വിവരങ്ങള്‍ക്ക്‌ ഫോണ്‍ : 0480-2890263.

ദേശമംഗലം ഐ ടി ഐ യില്‍ ഇലക്‌ട്രീഷ്യന്‍ ട്രേഡില്‍ ഗസ്റ്റ്‌ ഇന്‍സ്‌ട്രക്‌ടറെ താല്‍ക്കാലിക അടിസ്ഥാനത്തില്‍ നിയമിക്കുന്നു. താല്‍പര്യമുളളവര്‍ പ്രായം, യോഗ്യത, പ്രവര്‍ത്തിപരിചയം എന്നിവ തെളിയിക്കുന്ന സര്‍ട്ടിഫിക്കറ്റിന്റെ അസ്സലും രണ്ട്‌ പകര്‍പ്പും സഹിതം ഫെബ്രുവരി 25 രാവിലെ 10.30 ന്‌ അഭിമുഖത്തിന്‌ എത്തണം. കൂടുതല്‍ വിവരങ്ങള്‍ക്ക്‌ ഫോണ്‍ : 04884-279944.

ജില്ലയിലെ വിവിധ വകുപ്പുകളിലെ ലാസ്റ്റ്‌ ഗ്രേഡ്‌ സര്‍വ്വന്റ്‌സ്‌ തസ്‌തികയിലേക്ക്‌ (കാറ്റഗറി നമ്പര്‍ 567/2013) 2015 ജൂണ്‍ 30 ന്‌ നിലവില്‍ വന്ന റാങ്ക്‌പട്ടിക നിശ്ചിത കാലാവധി പൂര്‍ത്തിയായതിനെ തുടര്‍ന്ന്‌ 2018 ജൂണ്‍ 29 ന്‌ അര്‍ദ്ധരാത്രി മുതല്‍ റാങ്ക്‌ പട്ടിക റദ്ദായതായി പി എസ്‌ സി ജില്ലാ ഓഫീസര്‍ അറിയിച്ചു.
 

മഞ്ചേരി സര്‍ക്കാര്‍ മെഡിക്കല്‍ കോളേജ്‌ ആശുപത്രി കാര്‍ഡിയാക്‌ കത്തീറ്ററൈസേഷന്‍ ലാബിലേക്ക്‌ വിവിധതരം കണ്‍സ്യൂമബിള്‍സ്‌ വിതരണം ചെയ്യുന്നതിന്‌ ടെണ്ടര്‍ ക്ഷണിച്ചു. ടെണ്ടര്‍ സ്വീകരിക്കുന്ന അവസാന തീയതി ഫെബ്രുവരി 28. കൂടുതല്‍ വിവരങ്ങള്‍ക്ക്‌ ഫോണ്‍ : 0483-2766425, 2762037.
 

കൊടുങ്ങല്ലൂര്‍ നഗരസഭയുടെ 2019 -20 വര്‍ഷത്തെ ബജറ്റ്‌ ഫെബ്രുവരി 23 ന്‌ നഗരസഭയില്‍ ചേരുന്ന കൗണ്‍സിലില്‍ അവതരിപ്പിക്കും. ഫെബ്രുവരി 23 രാവിലെ 11 ന്‌ നഗരസഭ ചെയര്‍മാന്‍ കെ. ആര്‍. ജൈത്രന്‍ അദ്ധ്യക്ഷത വഹിക്കും. വൈസ്‌ ചെയര്‍പേഴ്‌സണ്‍ ഹണി പീതാംബരനാണ്‌ ബജറ്റ്‌ അവതരിപ്പിക്കുക. ഫെബ്രുവരി 26 രാവിലെ 10.30 ന്‌ ബജറ്റ്‌ ചര്‍ച്ച നടക്കും. ചര്‍ച്ചയ്‌ക്ക്‌ ശേഷം ചെയര്‍മാനും വൈസ്‌ ചെയര്‍പേഴ്‌സണും മറുപടി പറയുമെന്ന്‌ ചെയര്‍മാന്‍ കെ.ആര്‍. ജൈത്രന്‍ അറിയിച്ചു.

ജില്ലാ ടൂറിസം പ്രൊമോഷന്‍ കൗണ്‍സില്‍ മുഖേന കുന്നംകുളം നിയോജകമണ്‌ഡലത്തിലെ കാക്കത്തുരുത്തില്‍ രണ്ടര കോടി ചെലവിട്ട്‌ നടപ്പാക്കുന്ന കിളിപ്പാടം ടൂറിസം പദ്ധതിയുടെ നിര്‍മ്മാണോദ്‌ഘാടനം ഫെബ്രുവരി 24 രാവിലെ 11 ന്‌ തദ്ദേശസ്വയംഭരണ വകുപ്പ്‌ മന്ത്രി എ സി മൊയ്‌തീന്‍ നിര്‍വഹിക്കും. കുന്നംകുളം മുനിസിപ്പല്‍ ചെയര്‍പേഴ്‌സണ്‍ സീത രവീന്ദ്രന്‍ അദ്ധ്യക്ഷത വഹിക്കും. ഡോ. പി കെ ബിജു എംപി, വി കെ ശ്രീരാമന്‍ തുടങ്ങിയവര്‍ മുഖ്യാതിഥികളാവും.

അസംഘടിത മേഖലയില്‍ തൊഴിലെടുക്കുന്നവര്‍ക്കായി കേന്ദ്രസര്‍ക്കാര്‍ ആരംഭിച്ച പ്രധാന്‍മന്ത്രി ശ്രംയോഗി മാന്‍ ധന്‍ (പിഎം-എസ്‌വൈഎം) പെന്‍ഷന്‍ പദ്ധതിയില്‍ ഈ മേഖലയില്‍ തൊഴിലെടുക്കുന്നവര്‍ക്ക്‌ അംഗത്വമെടുക്കാം. 18 മുതല്‍ 40 വയസുവരെ പ്രായമുള്ള തൊഴിലാളികള്‍ക്ക്‌ അംഗമാകാം. പങ്കാളിത്ത പെന്‍ഷന്‍ പദ്ധതിയായ പിഎം-എസ്‌വൈഎയില്‍ അംഗമാകുന്നവര്‍ക്ക്‌ 60 വയസിനുശേഷം മാസം 3000 രൂപ പെന്‍ഷന്‍ ലഭിക്കും. കേന്ദ്ര-സംസ്ഥാന തൊഴില്‍ വകുപ്പ്‌ ഓഫീസുകള്‍, എല്‍ഐസി, ഇഎസ്‌ഐസി, ഇപിഎഫ്‌ഒ ഓഫീസുകള്‍ എന്നിവ വഴി പദ്ധതിയില്‍ അംഗമാകാം.