സംസ്ഥാന  പട്ടികജാതി പട്ടികവര്‍ഗ്ഗ വികസന കോര്‍പ്പറേഷന്‍ നടപ്പാക്കുന്ന വിവാഹ വായ്പാ പദ്ധതിക്ക്  കീഴില്‍ വായ്പാ അനുവദിക്കുന്നതിനായി കണ്ണൂര്‍  ജില്ലയിലെ  പട്ടികജാതി  പട്ടികവര്‍ഗ്ഗത്തില്‍പ്പെട്ട  യുവതികളുടെ രക്ഷിതാക്കളില്‍ നിന്നും അപേക്ഷ ക്ഷണിച്ചു. പരമാവധി 3.5 ലക്ഷം രൂപയാണ്  വായ്പ. അപേക്ഷകര്‍ 18 നും 65 ഇടയില്‍ പ്രായമുള്ളവരായിരിക്കണം. കുടുംബവാര്‍ഷിക  വരുമാനം ഏഴ് ലക്ഷം രൂപയില്‍ കവിയരുത്. പലിശ  നിരക്ക് ഏഴ് ശതമാനം. തുക 60 തുല്ല്യ മാസ ഗഡുക്കളായി   (പിഴപ്പലിശയുണ്ടെങ്കില്‍ അതും സഹിതം) തിരിച്ചടക്കണം.  തുകക്ക്  കോര്‍പ്പറേഷന്റെ  നിബന്ധനകള്‍ക്കനുസരിച്ച്  ആവശ്യമായ ഉദ്യോഗസ്ഥ ജാമ്യം ഹാജരാക്കണം.

കോട്ടയം ജില്ലയിലെ ഒരു അർദ്ധസർക്കാർ സ്ഥാപനത്തിൽ സീനിയർ മാനേജർ (സിവിൽ എഞ്ചിനീയറിംഗ് ) തസ്തികയിൽ ഒരു സ്ഥിരം ഒഴിവുണ്ട്. ശമ്പളം 55350 -101400. സിവിൽ എഞ്ചിനീയറിംഗ് ബിരുദവും 7 വർഷത്തെ തൊഴിൽ പരിചയവുമുള്ള 45 വയസ്സിൽ താഴെയുള്ള (ഇളവുകൾ അനുവദനീയം) നിശ്ചിത യോഗ്യതയുള്ള ഉദ്യോഗാർത്ഥികൾ യോഗ്യത തെളിയിക്കുന്നതിനുള്ള അസ്സൽ സർട്ടിഫിക്കറ്റുകൾ സഹിതം ഓഗസ്റ്റ് 10നു മുൻപ് ബന്ധപ്പെട്ട പ്രൊഫഷണൽ ആൻഡ് എക്സിക്യൂട്ടീവ് എംപ്ലോയ്‌മെന്റ് എക്സ്ചേഞ്ചിൽ പേര് രജിസ്റ്റർ ചെയ്യേണ്ടതാണ്. നിലവിൽ ജോലി ചെയ്തുകൊണ്ടിരിക്കുന്നവർ ബന്ധപെട്ട നിയമനാധികാരിയിൽ നിന്നുമുള്ള എൻ ഒ സി ഹാജരാക്കേണ്ടതാണ്.

ആഘോഷങ്ങളാകട്ടെ, ഉത്സവങ്ങളാകട്ടെ ....ബാൻഡ് മേളം തീര്‍ക്കാന്‍ സജ്ജമായി കായക്കൊടി പഞ്ചായത്തിലെ ഹല്ലാബോല്‍ ബാൻഡ് ട്രൂപ്പ് സംഘം. കുന്നുമ്മല്‍ ബ്ലോക്ക് പഞ്ചായത്ത് 2022-23 വര്‍ഷത്തെ വാര്‍ഷിക പദ്ധതിയില്‍ അനുവദിച്ച ഫണ്ട് ഉപയോഗിച്ചാണ് ഹല്ലാബോല്‍ ബാൻഡ് സെറ്റ് ട്രൂപ്പ് ബാൻഡ് മേളത്തില്‍ പരിശീലനം പൂര്‍ത്തിയാക്കിയത്.  കുടുംബശ്രീ പ്രവര്‍ത്തകരായ വീട്ടമ്മമാരാണ് ബാൻഡ് സെറ്റിലെ അംഗങ്ങള്‍.

കണ്ണൂര്‍ ഇന്റര്‍നാഷണല്‍ എയര്‍പോര്‍ട്ട് ജീവനക്കാരുടെ 2022-23 വര്‍ഷത്തെ ബോണസ് തര്‍ക്കം ജില്ലാ ലേബര്‍ ഓഫീസര്‍ എം മനോജിന്റെ നേതൃത്വത്തില്‍ ചേര്‍ന്ന തൊഴിലാളി-തൊഴിലുടമ യോഗത്തില്‍ തീരുമാനമായി. വ്യവസ്ഥയനുസരിച്ച് മുഴുവന്‍ തൊഴിലാളികള്‍ക്കും മൊത്ത വരുമാനത്തിന്റെ 8.33 ശതമാനം ബോണസ് നല്‍കും. യോഗത്തില്‍ എം സി പ്രവീണ്‍, പി പ്രണവ്, ഹരികൃഷ്ണന്‍, വി ഡെന്നി അഗസ്റ്റിന്‍, എം വേണുഗോപാല്‍, വി വി ശശീന്ദ്രന്‍, എം പി സജീഷ്, പി സി വിനോദന്‍, സുജിത്ത് കോയ്യാടന്‍ എന്നിവര്‍ പങ്കെടുത്തു.  

പരിയാരം ഗ്രാമപഞ്ചായത്തിൽ രോഗം സ്ഥിരീകരിച്ചിട്ടുള്ള പന്നിഫാമിന് ചുറ്റുമുള്ള ഒരു കിലോമീറ്റർ പ്രദേശം രോഗബാധിത പ്രദേശമായും 10 കിലോമീറ്റർ ചുറ്റളവ് രോഗ നിരീക്ഷണ മേഖലയായും പ്രഖ്യാപിച്ച് ജില്ല ദുരന്തനിവാരണ അതോറിറ്റി ചെയർപേഴ്സൺ കൂടിയായ ജില്ലാ കലക്ടർ ഉത്തരവിട്ടു. രോഗബാധിത പ്രദേശങ്ങളിൽ നിന്നും പന്നിമാംസം വിതരണം ചെയ്യുന്നതും വിതരണം ചെയ്യുന്ന കടകളുടെ പ്രവർത്തനവും പന്നികൾ, പന്നിമാംസം, തീറ്റ എന്നിവ ജില്ലയിലെ മറ്റു പ്രദേശങ്ങളിലേക്ക് കൊണ്ടുപോകുന്നതും മറ്റു പ്രദേശങ്ങളിൽ നിന്നും രോഗബാധിത മേഖലയിലേക്ക് കൊണ്ടുവരുന്നതും ഇനി ഒരു ഉത്തരവ് ഉണ്ടാകുന്നത് വരെ നിർത്തി വെച്ചു.

ജൽ ജീവൻ മിഷൻ പ്രവർത്തനങ്ങൾക്കായി കേരള ജല അതോറിറ്റി പ്രൊജക്റ്റ് ഡിവിഷൻ നാട്ടിക ഓഫീസിൽ ജൽ ജീവൻ മിഷൻ വളണ്ടിയർമാരെ നിയമിക്കുന്നു. പ്രതിദിനം 755 രൂപ. ചേലക്കര, മുള്ളൂർക്കര, കൊണ്ടാഴി, പാഞ്ഞാൾ, വേലൂർ, കണ്ടാണശ്ശേരി, കടപ്പുറം, തിരുവില്വാമല, തൃത്താല, തിരുമിറ്റക്കോട്, ദേശമംഗലം, വരവൂർ, കടങ്ങോട്, എരുമപ്പെട്ടി, ചൂണ്ടൽ എന്നീ പഞ്ചായത്തുകളിലെ ജൽ ജീവൻ മിഷൻ പ്രവർത്തങ്ങൾക്ക് വേണ്ടിയാണ് നിയമനം. പ്രദേശവാസികൾക്ക് മുൻഗണന.

യോഗ്യത : ഐടിഐ സിവിൽ, ഡിപ്ലോമ സിവിൽ, ബിടെക് സിവിൽ. കേരള വാട്ടർ അതോറിറ്റിയിൽ പ്രവൃത്തിപരിചയം അഭികാമ്യം. ഒഴിവുകളുടെ എണ്ണം 46.

തൃശൂർ രാമവർമ്മപുരത്ത് പ്രവർത്തിക്കുന്ന മോഡൽ വിമൻ ആൻഡ് ചിൽഡ്രൻ ഹോം, എൻട്രി ഹോം എന്നീ സ്ഥാപനങ്ങളിലെ ഉപയോഗത്തിനായി മൂന്ന് വാഷിംഗ് മെഷീനുകൾ ( 18- 19 കെ ജി കപ്പാസിറ്റി, മുഴുവൻ ഓട്ടോമാറ്റിക് ) വിതരണം ചെയ്യുന്നതിന് താൽപര്യമുള്ള വ്യക്തികൾ / സ്ഥാപനങ്ങൾ എന്നിവരിൽ നിന്നും മുദ്ര വെച്ച ദർഘാസുകൾ ക്ഷണിച്ചു.
ദർഘാസ്  സ്വീകരിക്കുന്ന അവസാന തീയതി ഓഗസ്റ്റ് 18ന് ഉച്ചക്ക് രണ്ട് മണി വരെ. കൂടുതൽ വിവരങ്ങൾക്ക് ഓഫീസ് പ്രവൃത്തി സമയത്ത് തൃശൂർ അയ്യന്തോൾ സിവിൽ സ്റ്റേഷൻ രണ്ടാം നിലയിൽ പ്രവർത്തിക്കുന്ന ജില്ലാ വനിത ശിശു വികസന ഓഫീസിൽ ബന്ധപ്പെടുക. ഫോൺ: 0487 2361500.

കുന്നംകുളം സർക്കാർ പോളിടെക്നിക്ക് കോളേജിൽ 2023 - 24 അദ്ധ്യയന വർഷത്തെ നിലവിൽ ഒഴിവുള്ളതും  വരാൻ സാധ്യതയുള്ളതുമായ ലാറ്ററൽ എൻട്രി ഡിപ്ലോമ സീറ്റുകളിലേക്ക് ഓഗസ്റ്റ് നാലിന് (വെള്ളി) സ്പോട്ട് അഡ്മിഷൻ നടത്തുന്നു.

പ്രവേശനം നേടാൻ ആഗ്രഹിക്കുന്ന റാങ്ക് ലിസ്റ്റിൽ ഉൾപ്പെട്ട വിദ്യാർത്ഥികൾ അസ്സൽ സർട്ടിഫിക്കറ്റുകളുമായി സർക്കാരിലേക്ക് അടക്കേണ്ട ഫീസ് എ ടി എം കാർഡ്  മുഖേനയും ബാക്കി തുകകൾ ക്യാഷ് ആയും കൈവശം കരുതി രാവിലെ ഒമ്പത് മണിക്ക് നേരിട്ട് കോളേജിൽ ഹാജരാകണം. കൂടുതൽ വിവരങ്ങൾക്ക് - 9495204101.

കോഴിക്കോട് കോർപ്പറേഷൻ പരിധിയിൽ ബയോമെഡിക്കൽ മാലിന്യം ശേഖരിക്കാൻ 'ആക്രി' ആപ്പ് റെഡി. ആവശ്യക്കാർ ആപ്പിൽ രജിസ്റ്റർ ചെയ്ത് തിയ്യതി അറിയിച്ചാൽ കമ്പനിയുടെ ജീവനക്കാർ വാഹനവുമായെത്തി മാലിന്യം കൊണ്ടു പോകും. ഗൂഗിൾ പ്ലേ സ്റ്റോറിൽ നിന്നും ആപ്പ് സ്റ്റോറിൽ നിന്നും ആക്രി ആപ്പ് ഡൗൺലോഡ് ചെയ്യാം.

കേരള ഷോപ്പ്സ് ആൻഡ് കൊമേഴ്സ്യൽ എസ്റ്റാബ്ലിഷ്മെന്റ്സ് വർക്കേഴ്സ് വെൽഫെയർ ഫണ്ട് ബോർഡ് അംഗങ്ങളുടെ മക്കൾക്ക് 2023-24 അദ്ധ്യയന വർഷത്തെ പ്ലസ് വൺ മുതൽ പോസ്റ്റ് ഗ്രാജുവേറ്റ് കോഴ്സുകൾ വരെയും, പ്രൊഫഷണൽ കോഴ്സുകൾ ഉൾപ്പെടെയുള്ള വിവിധ കോഴ്സുകൾക്കും സ്കോളർഷിപ്പിനുള്ള അപേക്ഷകൾ ക്ഷണിച്ചു. 

അപേക്ഷാഫാറം ഓഫീസിൽ നിന്നും നേരിട്ടും peedika.kerala.gov.in എന്ന വെബ് സൈറ്റിൽ നിന്നും ലഭ്യമാണ്.