മലബാറിന്റെ മലയോര മേഖലയുടെ ഉത്സവമായ ഒൻപതാമത് മലബാർ റിവർ ഫെസ്റ്റിവലിന് നാളെ (ആഗസ്റ്റ് 4 ) തുടക്കം. ചാലിപ്പുഴയിലും ഇരുവഴിഞ്ഞിപ്പുഴയിലും നടക്കുന്ന അന്താരാഷ്ട്ര വൈറ്റ് വാട്ടർ കയാക്കിംഗ് ചാമ്പ്യൻഷിപ്പ് നാളെ  രാവിലെ 10 മണിക്ക് കായിക വകുപ്പ് മന്ത്രി വി. അബ്ദുറഹിമാൻ  ഉദ്ഘാടനം ചെയ്യും. പുലിക്കയത്താണ് പ്രധാന മത്സരങ്ങൾ നടക്കുക. വിനോദസഞ്ചാര വകുപ്പ്, ജില്ലാപഞ്ചായത്ത്, കോടഞ്ചേരി, തിരുവമ്പാടി ഗ്രാമപഞ്ചായത്തുകൾ, ഡി ടി പി സി, സ്പോൺസർമാർ എന്നിവരുടെ സഹകരണത്തോടെയാണ് പരിപാടികൾ സംഘടിപ്പിക്കുന്നത്.

ഈ വർഷത്തെ ഖാദി ഓണം മേളയുടെ ജില്ലാതല ഉദ്ഘാടനം നാളെ (ആഗസ്റ്റ് 4)  വൈകിട്ട് 5 മണിക്ക് തുറമുഖം മ്യൂസിയം പുരാവസ്തു വകുപ്പ് മന്ത്രി അഹമ്മദ് ദേവർകോവിൽ നിർവഹിക്കും. 

ജില്ലാ ഖാദി ഗ്രാമ വ്യവസായ ഓഫീസ് പരിസരത്ത് നടക്കുന്ന ചടങ്ങിൽ കോർപ്പറേഷൻ ഡെപ്യൂട്ടി മേയർ സി.പി. മുസാഫർ അഹമ്മദ് അധ്യക്ഷത വഹിക്കും. ആദ്യവില്പനയും, സമ്മാനകൂപ്പൺ വിതരണവും ജില്ലാ കലക്ടർ എ.ഗീത നിർവ്വഹിക്കും. ജനപ്രതിനിധികൾ, വിവിധ സർവ്വീസ് സംഘടന പ്രതിനിധികൾ, ഖാദിബോർഡിലെ ഉന്നത ഉദ്യോഗസ്ഥർ തുടങ്ങിയവർ പങ്കെടുക്കും

തൊഴിൽ തീരം പദ്ധതിയുടെ എലത്തൂർ നിയോജകമണ്ഡല തല സംഘാടക സമിതി രൂപീകരിച്ചു. വനം വന്യജീവി സംരക്ഷണ വകുപ്പ് മന്ത്രി എ.കെ ശശീന്ദ്രൻ യോഗം ഉദ്ഘാടനം ചെയ്തു. തൊഴിൽ തീരം പദ്ധതി തീരദേശ മേഖലയുടെ വളർച്ചക്ക് ഗുണം ചെയ്യുമെന്ന് മന്ത്രി പറഞ്ഞു. കൗൺസിലർ ഇ.കെ മോഹൻദാസ് അധ്യക്ഷത വഹിച്ചു.

മത്സ്യത്തൊഴിലാളി വിഭാഗത്തിൽപ്പെട്ട തൊഴിലന്വേഷകർക്കായി കേരള നോളജ് ഇക്കോണമി മിഷനും കുടുംബശ്രീയും ഫിഷറീസ് വകുപ്പിൻ്റെ സഹകരണത്തോടെ ആരംഭിക്കുന്ന വൈജ്ഞാനിക തൊഴിൽ പദ്ധതിയാണ് തൊഴിൽ തീരം. 

ആഗസ്റ്റ്  27 മുതൽ സെപ്റ്റംബർ 3 വരെ വിനോദസഞ്ചാര വകുപ്പും, ജില്ലാ ഭരണകൂടവും, കോഴിക്കോട് ജില്ലാ ടൂറിസം പ്രൊമോഷൻ കൗൺസിലും സംയുക്തമായി നടത്തുന്ന ഓണം വാരാഘോഷത്തിന്റെ ഭാഗമായി സംഘടിപ്പിക്കുന്ന ഓണാഘോഷ പരിപാടികളിൽ കലാപരിപാടികൾ അവതരിപ്പിക്കുന്നതിന് താല്പര്യമുള്ളവരിൽ നിന്ന് അപേക്ഷകൾ ക്ഷണിച്ചു. കലാപരിപാടികളിൽ പങ്കെടുക്കാൻ ആഗ്രഹിക്കുന്ന കലാ പ്രവർത്തകർക്കും സംഘടനകൾക്കും ഡി.ടി.പി.സിയുടെ അപേക്ഷ ഫോറം പൂരിപ്പിച്ചു അപേക്ഷ സമർപ്പിക്കാം. അപേക്ഷ ഫോറം ഡി.ടി.പി.സി വെബ്സൈറ്റിൽ (www.dtpckozhikode.com) ലഭിക്കുന്നതാണ്.

ജല ജീവൻ മിഷൻ പ്രവൃത്തി പുരോഗതി അവലോകന യോഗം സബ് കലക്ടർ വി ചെൽസാസിനിയുടെ അധ്യക്ഷതയിൽ   ചേർന്നു.  ജൽ ജീവൻ മിഷൻ പ്രകാരം ജില്ലയിൽ ഇതുവരെ 1,00, 553 കുടിവെള്ള കണക്ഷനുകൾ നൽകിയതായി അവലോകന യോ​ഗത്തിൽ വിശദീകരിച്ചു. പദ്ധതി നടപ്പാക്കുന്നതിൽ നേരിടുന്ന പ്രശ്നങ്ങൾ പരിഹരിക്കാനുള്ള മാർഗനിർദ്ദേശങ്ങളും യോഗത്തിൽ ചർച്ച ചെയ്തു. 

വ്യവസായ വാണിജ്യ വകുപ്പിന്റെ നേതൃത്വത്തിൽ ചേമഞ്ചേരി ഗ്രാമപഞ്ചായത്തിൽ സംരംഭകത്വ ശിൽപശാല  സംഘടിപ്പിച്ചു. ഗ്രാമപഞ്ചായത്ത് ഹാളിൽ നടന്ന ശില്പശാലയുടെ ഉദ്ഘാടനം ഗ്രാമപഞ്ചായത്ത് വികസനകാര്യ സ്റ്റാന്റിംഗ് കമ്മിറ്റി ചെയർപേഴ്സൺ സന്ധ്യ നിർവഹിച്ചു. ഗ്രാമപഞ്ചായത്ത് ആരോഗ്യ സ്റ്റാന്റിംഗ് കമ്മിറ്റി ചെയർപേഴ്സൺ അതുല്യ ബൈജു അധ്യക്ഷത വഹിച്ചു.

സംരംഭകമേള ആഗസ്റ്റ് 20 മുതൽ 26വരെ മറൈൻ ഗ്രൗണ്ടിൽ  

ഓണത്തോട് അനുബന്ധിച്ച് സംസ്ഥാന സർക്കാരിന്റെയും വനിതാ വികസന കോർപ്പറേഷന്റെയും ആഭിമുഖ്യത്തിൽ ആഗസ്റ്റ് 20 മുതൽ 26വരെ വനിതാ സംരംഭകമേള സംഘടിപ്പിക്കുന്നു. മേളയുടെ വിജയത്തിനായി കലക്ടറേറ്റ് കോൺഫറൻസ് ഹാളിൽ ചേർന്ന സ്വാഗതസംഘം രൂപീകരണ യോഗം കെ.എം സച്ചിൻ ദേവ് എം എൽ എ ഉദ്ഘാടനം ചെയ്തു. മുൻ എം എൽ എ കെ കെ ലതിക അധ്യക്ഷയായിരുന്നു. 

കുരുവട്ടൂർ ഗ്രാമപഞ്ചായത്തിൽ എം എൽ എ ഫണ്ട് ഉപയോഗിച്ച് നടപ്പാക്കുന്ന വിവിധ വികസന പ്രവർത്തനങ്ങളുടെ അവലോകന യോഗം ചേർന്നു. വനം വന്യജീവി സംരക്ഷണ വകുപ്പ് മന്ത്രി എ കെ ശശീന്ദ്രൻ യോഗം ഉദ്ഘാടനം ചെയ്തു. കുരുവട്ടൂർ ഗ്രാമപഞ്ചായത്ത് പ്രസിഡന്റ് സരിത എ അധ്യക്ഷത വഹിച്ചു. പഞ്ചായത്തിലെ വികസന പ്രവർത്തനങ്ങൾ വേഗത്തിലും സമയബന്ധിതവുമായി പൂർത്തിയാക്കാൻ നിർവഹണ അധികാരികൾക്ക് മന്ത്രി നിർദേശം നൽകി. 

കുന്നുമ്മൽ വോളിബോൾ അക്കാദമിക്ക് സർക്കാർ അനുവദിച്ച ഒരുകോടി രൂപയുടെ വികസന പ്രവൃത്തിയുടെ ഉദ്ഘാടനം നാളെ (ആഗസ്റ്റ് 4)  ഉച്ചക്ക് രണ്ട് മണിക്ക് കുന്നുമ്മൽ പഞ്ചായത്ത് ഓഫീസ് ഗ്രൗണ്ടിൽ നടക്കും. കായിക വകുപ്പ് മന്ത്രി വി അബ്ദുറഹ്മാൻ പ്രവൃത്തി ഉദ്ഘാടനം നിർവഹിക്കും. ചടങ്ങിൽ കെ പി കുഞ്ഞമ്മദ് കുട്ടി മാസ്റ്റർ എം എൽ എ അധ്യക്ഷത വഹിക്കും.

കുന്ദമംഗലം ഗ്രാമപഞ്ചായത്ത് 11-ാം വാർഡ് കുരിക്കത്തൂർ അയ്യപ്പൻകുളത്തിന്റെയും, കണ്ടംകുളത്തിന്റേയും ഉദ്ഘാടനം പൊതുമരാമത്ത് - ടൂറിസം വകുപ്പ് മന്ത്രി പി.എ. മുഹമ്മദ് റിയാസ് നിർവഹിച്ചു. ഏറ്റവും ആകർഷകമായ രീതിയിൽ കുളങ്ങളുടെ നിർമ്മാണ പ്രവൃത്തി പൂർത്തീകരിക്കാൻ നേതൃത്വം കൊടുത്ത ജനപ്രതിനിധികൾ വിവിധ രാഷ്ട്രീയ പാർട്ടി പ്രതിനിധികൾ തുടങ്ങിയവരെ മന്ത്രി അഭിനന്ദിച്ചു. പി ടി എ റഹീം എം.എൽ.എ അധ്യക്ഷത വഹിച്ചു. ജില്ലാ പഞ്ചായത്ത് പ്രസിഡന്റ് ഷീജ ശശി മുഖ്യാതിഥിയായി.