കോട്ടയം: കാഞ്ഞിരപ്പള്ളി താലൂക്കിലെ പാറത്തോട്, മുണ്ടക്കയം ഗ്രാമപഞ്ചായത്തുകളെ ബന്ധിപ്പിക്കുന്ന ചിറ്റടി - ഇഞ്ചിയാനി വട്ടക്കാവ് വെള്ളനടി റോഡിൽ അറ്റകുറ്റ പണികൾ നടക്കുന്നതിനാൽ ഓഗസ്റ്റ് 5, 6 തീയതികളിൽ ഗതാഗത നിയന്ത്രണം ഏർപ്പെടുത്തി.  വട്ടക്കാവ് ഭാഗത്തുനിന്നു വരുന്ന വാഹനങ്ങൾ നീലമ്പാറ ജംഗ്ഷനിൽനിന്നു തിരിഞ്ഞു വെള്ളനടി വഴിയും, ചിറ്റടി ഭാഗത്തുനിന്നുവരുന്നവർ  ശ്രാംബി ജംഗ്ഷനിൽ നിന്നും തിരിഞ്ഞ്  31 - ാം  മൈൽ വഴിയും പോകേണ്ടതാണന്ന് അധികൃതർ അറിയിച്ചു.

കോട്ടയം: അതിരമ്പുഴ ഗ്രാമപഞ്ചായത്തിന്റെയും ആയുഷ് ആയുർവേദ പ്രാഥമികാരോഗ്യകേന്ദ്രത്തിന്റെയും സംയുക്ത നേതൃത്വത്തിൽ ആയുർവേദ ഔഷധക്കൂട്ടുകൾ വിതരണം ചെയ്തു. ആയുർവേദ പ്രാഥമികാരോഗ്യകേന്ദ്രത്തിലെ രോഗികൾക്ക് ഔഷധകൂട്ട് വിതരണം ചെയ്തു ഗ്രാമപഞ്ചായത്ത് പ്രസിഡന്റ് സജി തടത്തിൽ ഉദ്ഘാടനം നിർവഹിച്ചു. അഞ്ചുകിലോയുടെ ഔഷധ കൂട്ടുകളാണ് വിതരണം ചെയ്തത്. കർക്കിടക മാസത്തിൽ രോഗപ്രതിരോധശേഷിയും ആരോഗ്യവും മെച്ചപ്പെടുത്തുക എന്ന ലക്ഷ്യത്തോടെയാണ് ഔഷധക്കൂട്ടുകൾ വിതരണം ചെയ്തത്. ആയുർവേദ ഡോക്ടർ എം.ശ്രീദേവി പങ്കെടുത്തു.

കോട്ടയം: സ്‌കഫോൾഡ് പദ്ധതിയുടെ തുണയിൽ ജീവിതവിജയത്തിലേയ്ക്കുള്ള പുതിയ പാതയിലാണ് ജില്ലയിൽ നിന്നുള്ള 25 ഹയർ സെക്കൻഡറി സ്‌കൂൾ വിദ്യാർഥികൾ. സംസ്ഥാനത്തെ പൊതുവിദ്യാലയങ്ങളിൽ പഠിക്കുന്ന സാമ്പത്തികമായി പിന്നോക്കം നിൽക്കുന്ന വിദ്യാർഥികളിൽ തിരഞ്ഞെടുക്കപ്പെട്ട 25 പേർക്കാണ് സമഗ്ര ശിക്ഷാ കേരളയുടെ സ്‌കഫോൾഡ് പദ്ധതി തുണയാകുന്നത്. ഈ വിദ്യാർഥികളുടെ നൈപുണ്യ വികസനവും മെച്ചപ്പെട്ട തൊഴിൽ സാഹചര്യം സൃഷ്ടിക്കലുമാണ് പദ്ധതിയിലൂടെ ലക്ഷ്യം വയ്ക്കുന്നത്.

സ്വാതന്ത്ര്യസമര സേനാനി ആറന്മുള പരമൂട്ടില്‍ വീട്ടില്‍ ടി. എന്‍. പദ്മനാഭപിള്ളയുടെ ഭാര്യ ഗൗരിയമ്മ വനജാക്ഷിയമ്മയെ (96) ജില്ലാ പഞ്ചായത്ത് പ്രസിഡന്റ് അഡ്വ. ഓമല്ലൂര്‍ ശങ്കരന്‍ ആദരിച്ചു.
ആസാദി കാ അമൃത് മഹോത്സവത്തിന്റെ ഭാഗമായി സ്വാതന്ത്ര്യ സമരസേനാനികളെയും  അവരുടെ ഭാര്യമാരെയും ആദരിക്കുന്ന ചടങ്ങുകള്‍ സംസ്ഥാന വ്യാപകമായി നടന്നു വരുന്നു.

കോട്ടയം: സ്റ്റേറ്റ് റിസോഴ്സ് സെന്ററിന്റെ ഭാഗമായ എസ്.ആർ.സി കമ്മ്യൂണിറ്റി കോളേജിൽ നടത്തുന്ന ആറുമാസത്തെ സർട്ടിഫിക്കറ്റ് ഇൻ കമ്മ്യൂണിറ്റി ഡെവലപ്മെന്റ് കോഴ്സിലേക്ക് അപേക്ഷ ക്ഷണിച്ചു. പത്താം ക്ലാസ്സ് യോഗ്യതയുള്ളവർക്ക് അപേക്ഷിക്കാം. അവധി ദിവസങ്ങളിലാവും ക്ലാസുകൾ. https://app.srcc.in/register എന്ന ലിങ്കിലൂടെ ഓൺലൈനായി ഓഗസ്റ്റ് 10 വരെ അപേക്ഷിക്കാം. വിശദവിവരത്തിന് ഫോൺ: 9961323247

കോട്ടയം: 69-ാം നെഹ്‌റു ട്രോഫി വള്ളംകളിയുടെ പാസുകൾ കോട്ടയം ജില്ലാ ടൂറിസം പ്രൊമോഷൻ കൗൺസിലിന്റെ ഓഫീസിൽ ലഭിക്കും. 1000, 500, 300, 200,100 എന്നീ നിരക്കുകളിലുള്ള പാസുകൾ ഓഫീസ് പ്രവർത്തി ദിവസങ്ങളിൽ രാവിലെ 10 മുതൽ വൈകിട്ട് അഞ്ച് വരെ ലഭിക്കും. വിശദവിവരത്തിന് ഫോൺ : 0481 2560479

കോട്ടയം: ജില്ലാ പഞ്ചായത്ത് ഭരണങ്ങാനം ഡിവിഷനിലെ 25 കുടുംബശ്രീ സംരംഭങ്ങൾക്കുള്ള ധനസഹായ വിതരണോദ്ഘാടനം ജില്ലാ പഞ്ചായത്ത് പ്രസിഡന്റ് കെ.വി. ബിന്ദു നിർവഹിച്ചു. ളാലം ബ്ലോക്ക് പഞ്ചായത്ത് ഓഡിറ്റോറിയത്തിൽ നടന്ന ചടങ്ങിൽ ജില്ലാപഞ്ചായത്തംഗം രാജേഷ് വാളിപ്ലാക്കൽ അധ്യക്ഷനായി. ബ്ലോക്ക് പഞ്ചായത്ത് പ്രസിഡന്റ് റാണി ജോസ് മുഖ്യപ്രഭാഷണം നടത്തി. പുതിയതായി പ്രസിഡന്റ് സ്ഥാനത്തേയ്ക്ക് തിരഞ്ഞെടുക്കപ്പെട്ട കടനാട് പഞ്ചായത്ത് പ്രസിഡന്റ് ജിജി തമ്പി, മീനച്ചിൽ പഞ്ചായത്ത് പ്രസിഡന്റ് സാജോ പൂവത്താണി എന്നിവരെ ജില്ലാ പഞ്ചായത്ത് പ്രസിഡന്റ് ആദരിച്ചു.

കാക്കൂരിൽ ആധുനിക സൗകര്യങ്ങളോടെയുള്ള സ്റ്റേഡിയം നിർമ്മിക്കുന്നതിനായി ജനകീയ സംഘാടക സമിതി രൂപീകരിച്ചു. കാക്കൂർ സഹകരണ ബാങ്ക് ഓഡിറ്റോറിയത്തിൽ നടന്ന ചടങ്ങ് വനം വന്യജീവി സംരക്ഷണ വകുപ്പ് മന്ത്രി എ. കെ ശശീന്ദ്രൻ ഉദ്ഘാടനം ചെയ്തു. ജനകീയ കൂട്ടായ്മയോടെ സ്റ്റേഡിയം നിർമ്മിക്കാൻ ആവശ്യമായ ഇടപെടൽ എല്ലാവരിൽ നിന്നും ഉണ്ടാവണമെന്ന് മന്ത്രി പറഞ്ഞു. മാസ്റ്റർ പ്ലാൻ അനുസരിച്ച് നിർമ്മാണം പൂർത്തിയായാൽ സമീപപ്രദേശങ്ങളിൽ ഒന്നുമില്ലാത്ത വിധത്തിലുള്ള മികച്ച സ്റ്റേഡിയമായിരിക്കും കാക്കൂരിലേതെന്നും മന്ത്രി പറഞ്ഞു.

പുത്തൂർ, അറക്കിലാട് പ്രദേശത്തെ വെള്ളക്കെട്ടിന് ശാശ്വത പരിഹാരം കാണുമെന്ന് കെകെ രമ എംഎൽഎ പറഞ്ഞു. വടകര പുത്തൂർ - വയൽപ്പീടിക റോഡിനോട് ചേർന്നുള്ള കുഴിച്ചാൽ തോട് നവീകരണത്തിന് സംസ്ഥാന ബജറ്റിൽ അനുവദിച്ച 75 ലക്ഷം രൂപ വിനിയോഗിച്ച് ഡ്രൈനേജ് നിർമാണ പ്രവർത്തനങ്ങൾ നടത്തുന്നതുമായി ബന്ധപ്പെട്ട് അടക്കാതെരു ലയൺസ് ഹാളിൽ ചേർന്ന പരിസരവാസികളുടെയും സംഘടനാ പ്രതിനിധികളുടെയും യോഗത്തിൽ സംസാരിക്കുകയായിരുന്നു എംഎൽഎ.

കോടഞ്ചേരി പുലിക്കയത്ത് നാളെ (ആഗസ്റ്റ് 4 ) ആരംഭിക്കുന്ന മലബാർ റിവർ ഫെസ്റ്റിവലിന്  മുന്നോടിയായി പൂവാറംതോട് നടന്ന പട്ടം പറത്തൽ മലനാടിന് ആവേശമായി. വൺ ഇന്ത്യ കൈറ്റ് ടീമിന്റെ നേതൃത്വത്തിലായിരുന്നു  പട്ടം പറത്തൽ സംഘടിപ്പിച്ചത്. കൂടരഞ്ഞി ഗ്രാമപഞ്ചായത്ത് പ്രസിഡന്റ് ആദർശ് ജോസഫ് പട്ടം പറത്തി ഉദ്ഘാടനം നിർവഹിച്ചു. വാർഡ് മെമ്പർ ജെറീന റോയ് അധ്യക്ഷത വഹിച്ചു. മലയോര മേഖലയുടെ ടൂറിസം സാധ്യതകൾ കൂടുതൽ വികസിപ്പിക്കാൻ ഉദ്ദേശിച്ചാണ് പട്ടം പറത്തൽ ഉത്സവം സംഘടിപ്പിച്ചത്.