നിയമസഭാ തെരഞ്ഞെടുപ്പുമായി ബന്ധപ്പെട്ട് സ്വീപ് (സിസ്റ്റമാറ്റിക് വോട്ടേഴ്സ് എജ്യുക്കേഷൻ ആൻഡ് ഇലക്ടറൽ പാർട്ടിസിപ്പേഷൻ) വോട്ടർ ബോധവൽക്കരണത്തിൻ്റെ ഭാഗമായി സമ്മതിദായക പ്രതിജ്ഞയെടുത്തു. ജില്ലാ തിരഞ്ഞെടുപ്പ് വിഭാഗത്തിന്റെ നേതൃത്വത്തിൽ കളക്ടറേറ്റ് കോമ്പൌണ്ടിൽ സംഘടിപ്പിച്ച ചടങ്ങിൽ പൊതുജനങ്ങൾ ജനാധിപത്യപ്രക്രിയയിൽ പങ്കാളികളാകണമെന്നും നിർഭയമായും ആലോചിച്ചും വോട്ട് രേഖപ്പെടുത്തണമെന്നും ഉറപ്പുനൽകുന്ന ഔദ്യോഗിക സമ്മതിദായക പ്രതിജ്ഞ ജില്ലാ ഇലക്ഷൻ ഡെപ്യൂട്ടി കളക്ടർ പി എൻ അനി ചൊല്ലികൊടുത്തു. കളക്ടറ്റേറ്റ് ജീവനക്കാരും കുടുംബശ്രീ അംഗങ്ങളും പൊതുജനങ്ങളും പ്രതിജ്ഞയെടുത്ത് പരിപാടിയിൽ പങ്കാളികളായി.

കിടങ്ങറ-കുന്നംകരി-കുമരങ്കരി-വലടി-മുളക്കാംതുരുത്തി റോഡില്‍ ബോക്‌സ് കലുങ്ക് പുനര്‍നിര്‍മ്മിക്കുന്നതിനാല്‍ ഈ റോഡിലൂടെയുള്ള വാഹന ഗതാഗതം ഏപ്രില്‍ ഒന്ന് മുതല്‍ മെയ് 30 വരെ പൂര്‍ണ്ണമായി നിരോധിച്ചതായി കെ.എസ്.റ്റി.പി. എക്‌സിക്യൂട്ടീവ് എഞ്ചിനീയര്‍ അറിയിച്ചു. വാഹനങ്ങള്‍ക്ക് ചങ്ങനാശ്ശേരി സെന്‍ട്രല്‍ ജംഗ്ഷനില്‍ നിന്നും മാര്‍ക്കറ്റ് റോഡ് വഴി കുന്നങ്കരിക്കും, വലടി ജംഗ്ഷനില്‍ നിന്നും കുറിച്ചി-ഈറ-കാവാലം റോഡു വഴി കുറിച്ചി ഔട്ട് പോസ്റ്റ് ജംഗ്ഷനിലും എത്തിച്ചേരാവുന്നതാണ്.

ആഹാരത്തിലൂടെ ആരോഗ്യം എന്ന സന്ദേശവുമായി ആരോഗ്യ വകുപ്പിന്റെയും ആരോഗ്യ കേരളത്തിന്റെയും കുടുംബശ്രീ മിഷന്റെയും പനമരം സിഡിഎസിന്റെയും ആഭിമുഖ്യത്തില്‍ പോഷകാഹാര ശില്‍പശാലയും പ്രദര്‍ശനവും സംഘടിപ്പിച്ചു. പനമരം ഗ്രാമപഞ്ചായത്ത് ഹാളില്‍ ജില്ലാ മെഡിക്കല്‍ ഓഫീസര്‍ ഡോ കെ.ടി രേഖ ഉദ്ഘാടനം ചെയ്തു. പനമരം സി ഡി എസ് ചെയര്‍പേഴ്‌സണ്‍ ജാനകി ബാബു അധ്യക്ഷയായി. സ്റ്റേറ്റ് ന്യൂട്രീഷന്‍ ആന്റ് ഡയറ്റ് റിലേറ്റഡ് ഇന്റര്‍വെന്‍ഷന്‍ പരിപാടിയുടെ ഭാഗമായി സംഘടിപ്പിച്ച ശില്‍പശാലയില്‍ ട്രൈബല്‍ മേഖലയില്‍ നിന്നുള്ള പോഷകാഹാരങ്ങള്‍ക്കാണ് പ്രാധാന്യം നല്‍കിയത്.

നിയമസഭാ തെരഞ്ഞെടുപ്പ് ബോധവത്കരണ പരിപാടിയായ സ്വീപിന്റെ (സിസ്റ്റമാറ്റിക് വോട്ടേഴ്‌സ് എജുക്കേഷന്‍ ആന്‍ഡ് ഇലക്ടറല്‍ പാര്‍ട്ടിസിപ്പേഷന്‍ പ്രോഗ്രാം) ഭാഗമായി കളക്ടറേറ്റില്‍  ഐ വില്‍ വോട്ട് ചാലഞ്ച് സംഘടിപ്പിച്ചു. ജീവനക്കാര്‍ തങ്ങള്‍ വോട്ട് ചെയ്യാനുള്ള കാരണങ്ങള്‍ സ്റ്റിക്കി നോട്ടുകളില്‍ എഴുതി പ്രത്യേകം ഒരുക്കിയ ബോര്‍ഡില്‍ പതിപ്പിച്ചു.

നിയമസഭാ തെരഞ്ഞെടുപ്പിന്റെ ആവേശങ്ങള്‍ക്കൊപ്പം സ്വീപ്പ് വയനാടിന്റെ വോട്ട് ചിലപ്പന്‍ ഇനി അരങ്ങിലെത്തും. കരുത്തുറ്റ ജനാധിപത്യ വിപുലമായ പങ്കാളിത്തം എന്ന സന്ദേശവുമായി പൊതുജനങ്ങളില്‍ വോട്ടവകാശ വിനിയോഗത്തിന്റെ അവബോധവുമായാണ് 'ബാണാസുര ചിലപ്പന്‍ എന്ന വയനാടന്‍ പക്ഷി ഇലക്ഷന്‍ മസ്‌ക്കോട്ടായി തെരഞ്ഞെടുത്തത്. 2025 നവംബര്‍ ഒന്നിന് ജില്ലയുടെ ഔദ്യോഗിക പക്ഷിയായി പ്രഖ്യാപിക്കപ്പെട്ട പക്ഷിയാണിത്. സ്വീപ് ക്യാമ്പയിന്‍ ലോഗോയും സ്വീപ് ക്യാമ്പയിന്റെ ഔദ്യോഗിക മസ്‌കോട്ടും തെരഞ്ഞെടുപ്പ് ഓഫീസറായ ജില്ലാ കളക്ടര്‍ ഡി.ആര്‍. മേഘശ്രീ പ്രകാശനം ചെയ്തു.

നിയമസഭാ തെരഞ്ഞെടുപ്പുമായി ബന്ധപ്പെട്ട മാതൃകാ പെരുമാറ്റച്ചട്ട ലംഘനങ്ങള്‍ക്കെതിരെ ജില്ലയില്‍ നിരീക്ഷണ പ്രവര്‍ത്തനങ്ങള്‍ ശക്തമായി തുടരുന്നു. സി-വിജില്‍ ആപ്പിലൂടെ ജില്ലയില്‍ തിങ്കളാഴ്ച 150 പരാതികളാണ് ലഭിച്ചത്. ഇതില്‍ 146 പരാതികള്‍ പരിഹരിച്ചു. ലഭിക്കുന്ന പരാതികള്‍ ഉടന്‍ പരിശോധിച്ച് ആവശ്യമായ നടപടി സ്വീകരിക്കുന്നത് തിരഞ്ഞെടുപ്പ് ക്രമസമാധാനം നിലനിര്‍ത്താന്‍ സഹായിക്കുന്നതായി അധികൃതര്‍ അറിയിച്ചു. പെരുമാറ്റ ചട്ടലംഘനങ്ങള്‍ ശ്രദ്ധയില്‍പ്പെടുന്ന സാഹചര്യങ്ങളില്‍ പൊതുജനങ്ങള്‍ക്ക് തെളിവുകളോടെ സിവിജില്‍ ആപ് മുഖേന വിവരം അറിയിക്കാം.

തെരഞ്ഞെടുപ്പ് ചട്ടങ്ങള്‍ ലംഘിച്ച് പൊതുസ്ഥലങ്ങളില്‍ സ്ഥാപിച്ചിരുന്ന പ്രചാരണ സാമഗ്രികള്‍ നീക്കം ചെയ്യുന്നതില്‍ ജില്ലയില്‍ നടപടി ശക്തം. വിവിധ ഭാഗങ്ങളിലായി ആന്റി ഡീഫേസ്മെന്റ് സ്‌ക്വാഡിന്റെ നേതൃത്വത്തില്‍ നടത്തിയ പരിശോധനയില്‍ 134 സാമഗ്രികള്‍ തിങ്കളാഴ്ച നീക്കം ചെയ്തു. പൊതു ഇടങ്ങളില്‍ സ്ഥാപിച്ച 98 പോസ്റ്ററുകള്‍, ഒന്‍പത് ബാനറുകള്‍, അഞ്ച് മറ്റ് പ്രചാരണ സാമഗ്രികള്‍, സ്വകാര്യ ഇടങ്ങളിലായി സ്ഥാപിച്ച 21 പോസ്റ്ററുകള്‍ ഒരു ബാനര്‍ ഉള്‍പ്പടെയാണിത്. ജില്ലയില്‍ ഇതുവരെ 10,126 പ്രചരണ സാമഗ്രികളാണ് നീക്കം ചെയ്തത്. 

നിയമസഭാ പൊതുതെരഞ്ഞെടുപ്പുമായി ബന്ധപ്പെട്ട് മാതൃകാ പെരുമാറ്റച്ചട്ടം ഫലപ്രദമായി നടപ്പാക്കുന്നതിനും തെരഞ്ഞെടുപ്പുമായി ബന്ധപ്പെട്ട പരാതികളില്‍ അടിയന്തിര പരിഹാരം കാണുന്നതിനും എംസിസി ജില്ലാ നോഡല്‍ ഓഫീസറുടെ കീഴില്‍ 24 മണിക്കൂറും പ്രവര്‍ത്തിക്കുന്ന കണ്‍ട്രോള്‍ റൂം പ്രവര്‍ത്തനമാരംഭിച്ചു. ഫോണ്‍ -04936 284055

നിയസമഭാ തെരഞ്ഞെടുപ്പില്‍ പ്രിസൈഡിംഗ് ഓഫീസര്‍, ഫസ്റ്റ് പോളിംഗ് ഓഫീസര്‍ ഡ്യൂട്ടി ലഭിച്ചവര്‍ പോസ്റ്റല്‍ ബാലറ്റിനുള്ള അപേക്ഷ ഫോറം 12 പൂരിപ്പിച്ച് പോസ്റ്റിംഗ് ഓര്‍ഡര്‍ സഹിതം ഒന്നാംഘട്ട പരിശീലന കേന്ദ്രങ്ങളില്‍ സമര്‍പ്പിക്കണം. ഒന്നാം ഘട്ട പരിശീലനം മാര്‍ച്ച് 24ന് ആരംഭിക്കും. മാനന്തവാടി സെന്റ് പാട്രിക്സ് ഹൈസ്‌കൂള്‍, കല്‍പ്പറ്റ സെന്റ് ജോസഫ്സ് കോണ്‍വെന്റ് സ്‌കൂള്‍, ബത്തേരി അസംപ്ഷന്‍ ഹൈസ്‌കൂള്‍ എന്നിവിടങ്ങളിലാണ് പരിശീലനം. രണ്ടാം ഘട്ട പരിശീലനം ഏപ്രില്‍ ഒന്ന് മുതല്‍ ആരംഭിക്കും.