നിപ്മര്‍ സ്ഥാപകന്‍ എന്‍.കെ. ജോര്‍ജ്ജിന്റെ മൂന്നാം സ്മൃതിദിന അനുസ്മരണം അഡ്വ. തോമസ് ഉണ്ണിയാടന്‍ എം.എല്‍.എ ഉദ്ഘാടനം ചെയ്തു. ആളൂര്‍ ഗ്രാമപഞ്ചായത്ത് പ്രസിഡന്റ് റോസിലി ഫ്രാന്‍സിസ് അധ്യക്ഷത വഹിച്ചു.

തൃശൂര്‍ ജില്ലയില്‍ ഓണാഘോഷ പരിപാടികള്‍ വിപുലമായി സംഘടിപ്പിക്കാന്‍ തീരുമാനിച്ചു. യുവജനക്ഷേമ, കായിക വകുപ്പ് മന്ത്രി ഒ.ജെ. ജനീഷിന്റെ അധ്യക്ഷതയില്‍ കളക്ടറേറ്റ് എക്സിക്യൂട്ടീവ് ഹാളില്‍ ചേര്‍ന്ന യോഗത്തിലാണ് തീരുമാനം.

തേക്കിന്‍കാട് മൈതാനത്തെ വിദ്യാര്‍ത്ഥി കോര്‍ണറിലാണ് ജില്ലാതല ഓണാഘോഷ പരിപാടികളും വിവിധ കലാസന്ധ്യകളും അരങ്ങേറുക. ഓഗസ്റ്റ് 29-ന്  പുലിക്കളിയോടെ ആയിരിക്കും ജില്ലയിലെ ആഘോഷങ്ങള്‍ക്ക് ഔദ്യോഗികസമാപനം. ഓണാഘോഷത്തിന്റെ ഭാഗമായി സംഘടിപ്പിക്കുന്ന വിവിധ മത്സരങ്ങളിലെ വിജയികള്‍ക്കുള്ള സമ്മാനങ്ങള്‍ സമാപന സമ്മേളനത്തില്‍ വിതരണം ചെയ്യും.
 

കനത്തമഴയെ തുടര്‍ന്ന് ചാലക്കുടി പുഴയില്‍ ജലനിരപ്പ് ഉയര്‍ന്നതിനാലും മലയോര മേഖലയില്‍ മണ്ണിടിച്ചില്‍ സാധ്യതയുള്ളതിനാലും, ശക്തമായ കാറ്റ് ഉളളതിനാലും സന്ദര്‍ശകരുടെ സുരക്ഷ മുന്‍നിര്‍ത്തി ഇന്ന് (ആഗസ്റ്റ് 1) അതിരപ്പിള്ളി, വാഴച്ചാല്‍ ഇക്കോടൂറിസം കേന്ദ്രങ്ങളിലേയ്ക്ക് പൊതുജനങ്ങള്‍ക്ക് പ്രവേശനം ഉണ്ടായിരിക്കുന്നതല്ലെന്ന് വാഴച്ചാല്‍ ഡിവിഷണല്‍ ഫോറസ്റ്റ്
ഓഫീസര്‍ അറിയിച്ചു.

ജില്ലയില്‍ ശക്തമായ മഴയെതുടര്‍ന്നുള്ള നീരൊഴുക്ക് മൂലം പൊരിങ്ങല്‍ക്കുത്ത് ഡാമിലെ ജലനിരപ്പ് ക്രമാതീതമായി ഉയര്‍ന്നുകൊണ്ടിരിക്കുകയാണ്. ആഗസ്റ്റ് 1 ന് ഉച്ചയ്ക്ക് 12 മണി സമയത്തെ പൊരിങ്ങല്‍ക്കുത്ത് ഡാമിലെ ജലനിരപ്പ് 421.00 മീറ്ററാണ്.

തൃശൂര്‍ ജില്ലാ എമര്‍ജന്‍സി ഓപ്പറേഷന്‍സ് സെന്ററില്‍ റോഡ് സേഫ്റ്റി വിഭാഗത്തില്‍ നിന്നുള്ള പ്രതിനിധിയെക്കൂടി അടിയന്തരമായി ഉള്‍പ്പെടുത്തി 24 മണിക്കൂറും പ്രവര്‍ത്തിക്കും. ഉത്തരവ് ലംഘിക്കുന്നവര്‍ക്കെതിരെ ദുരന്തനിവാരണ നിയമം 2005 പ്രകാരം കര്‍ശന നിയമനടപടികള്‍ സ്വീകരിക്കുന്നതായിരിക്കുമെന്നും ഉത്തരവില്‍ പറയുന്നു.

കനത്ത കാറ്റിനും കടലാക്രമണത്തിനും സാധ്യതയുള്ളതിനാല്‍ മല്‍സ്യത്തൊഴിലാളികള്‍ കടലില്‍ പോകുന്നത് പൂര്‍ണ്ണമായും ഒഴിവാക്കേണ്ടതാണ്. ഫിഷറീസ് വകുപ്പും കോസ്റ്റ് ഗാര്‍ഡും തീരദേശ മേഖലകളില്‍ ജാഗ്രതാ നിര്‍ദ്ദേശം നല്‍കുകയും സ്ഥിതിഗതികള്‍ നിരന്തരം നിരീക്ഷിക്കുകയും ചെയ്യേണ്ടതാണ്.

ശക്തമായ കാറ്റില്‍ മറിഞ്ഞുവീഴാന്‍ സാധ്യതയുള്ള പരസ്യബോര്‍ഡുകള്‍/ ഫ്‌ലെക്‌സുകള്‍ യുദ്ധകാലാടിസ്ഥാനത്തില്‍ ബലപ്പെടുത്തുകയോ അഴിച്ചുമാറ്റുകയോ ചെയ്യേണ്ടതാണ്. റോഡരികിലും പൊതുഇടങ്ങളിലും അപകടഭീഷണിയുയര്‍ത്തുന്ന മരങ്ങളും മരച്ചില്ലകളും അടിയന്തരമായി മുറിച്ചുമാറ്റാന്‍ തദ്ദേശസ്വയംഭരണ സ്ഥാപനങ്ങള്‍ക്കും കെഎസ്ഇബിയ്ക്കും നിര്‍ദ്ദേശം നല്‍കി.

ദേശീയപാത, സംസ്ഥാനപാതകള്‍, മറ്റ് ജില്ലാ റോഡുകള്‍ എന്നിവിടങ്ങളില്‍ നിര്‍മ്മാണ പ്രവര്‍ത്തനങ്ങളോ അറ്റകുറ്റപ്പണികളോ നടക്കുന്ന സ്ഥലങ്ങളില്‍ യാത്രക്കാര്‍ക്ക് വ്യക്തമായി കാണാവുന്ന വിധത്തില്‍ സുരക്ഷാ/ മുന്നറിയിപ്പ് ബോര്‍ഡുകളും റിഫ്‌ലക്ടറുകളും അടിയന്തരമായി സ്ഥാപിക്കേണ്ടതാണ്. പിഡബ്ല്യുഡി (റോഡ്സ് & എന്‍എച്ച്), എന്‍എച്ച്എഐ, തദ്ദേശസ്വയംഭരണ സ്ഥാപനങ്ങള്‍ എന്നിവര്‍ അടിയന്തര പരിശോധന നടത്തി ഇത് ഉറപ്പുവരുത്തണം. റോഡുകളിലെ അപകടകരമായ കുഴികളും മറ്റ് തടസ്സങ്ങളും പരിഹരിക്കുന്നതിന് ബന്ധപ്പെട്ട വകുപ്പുകള്‍ അടിയന്തര അറ്റകുറ്റപ്പണികള്‍ നടത്തേണ്ടതാണ്.

ജില്ലയിലെ മലയോര മേഖലകള്‍, വനപ്രദേശങ്ങള്‍ എന്നിവിടങ്ങളിലേക്കുള്ള ട്രക്കിംഗ്, വൈല്‍ഡര്‍നസ് ക്യാമ്പിംഗ് എന്നിവ താല്‍ക്കാലികമായി നിരോധിച്ചു. വിനോദസഞ്ചാര കേന്ദ്രങ്ങളില്‍ എത്തുന്ന സഞ്ചാരികള്‍ക്ക് സുരക്ഷാ മുന്നറിയിപ്പുകളും കൃത്യമായ മാര്‍ഗ്ഗനിര്‍ദ്ദേശങ്ങളും നല്‍കുന്നുണ്ടെന്ന് ജില്ലാ ടൂറിസം പ്രൊമോഷന്‍ കൗണ്‍സിലും (ഡിടിപിസി) വനം വകുപ്പും പോലീസ് വകുപ്പും ഉറപ്പാക്കണം.