ചെങ്ങന്നൂർ ഗവ. വനിത ഐ.ടി.ഐ. യിലെ എൻസിവിടി ട്രേഡുകളിലെ ഒഴിവുള്ള സീറ്റുകളിലേക്ക് ആഗസ്റ്റ് എട്ട് വരെ സ്പോട്ട് അഡ്മിഷൻ നടത്തുന്നു.  ഫോണ്‍ : 0479 2457496, 9747454553

ഇടുക്കി ജില്ലയില്‍ മഴയുടെ ശക്തി കുറഞ്ഞു. നിലവില്‍ ഓറഞ്ച് അലര്‍ട്ടാണ് പ്രഖ്യാപിച്ചിട്ടുള്ളത്. ജില്ലയില്‍ നിലവില്‍ 13 ദുരിതാശ്വാസ ക്യാമ്പുകളാണ് പ്രവര്‍ത്തിക്കുന്നത്. 187 പേരാണ് ക്യാമ്പിലുള്ളത്. ഇതില്‍ 73 പുരുഷന്മാരും 81 സ്ത്രീകളും 33 കുട്ടികളുമാണുള്ളത്. തൊടുപുഴ താലൂക്കില്‍ 6 ക്യാമ്പുകളിലായി 116 പേരാണുള്ളത്. പുരുഷന്മാര്‍-48, സ്ത്രീകള്‍-50, കുട്ടികള്‍ - 18.

        തിരുവനന്തപുരം, വെള്ളനാട് ജി. കാർത്തികേയൻ സ്മാരക വൊക്കേഷണൽ ആൻഡ് ഹയർ സെക്കൻഡറി സ്‌കൂളിൽ എച്ച്.എസ്.എസ്.ടി (ജൂനിയർ) റഷ്യൻ തസ്തികയിലേക്കുള്ള താത്കാലിക അധ്യാപക നിയമനത്തിനുള്ള അഭിമുഖം ആഗസ്റ്റ് 14 രാവിലെ 11.30 ന് നടക്കും. താത്പര്യമുള്ളവർ അസൽ സർട്ടിഫിക്കറ്റുകളുമായി സ്‌കൂൾ ഓഫീസിൽ എത്തണം. കൂടുതൽ വിവരങ്ങൾക്ക്: 0472 2882032.

ആഗസ്റ്റ് 22 ന് പുന്നമടക്കായലിൽ നടക്കുന്ന  നെഹ്റു ട്രോഫി വള്ളംകളിയുടെ പന്തൽ നിർമാണത്തിന് ഔദ്യോഗിക തുടക്കമായി. പുന്നമട ഫിനിഷിംഗ് പോയിന്‍റിൽ  പന്തൽ കാൽനാട്ടുകർമം എൻ.ടി.ബി.ആർ. സൊസൈറ്റി ചെയർമാനും ജില്ലാ കളക്ടറുമായ 
ഷാജി വി നായർ നിർവഹിച്ചു.
ചടങ്ങിൽ എ ഡി എം സി പ്രേംജി,    ഇൻഫ്രാസ്ട്രക്ചർ കമ്മറ്റി കൺവീനറും ഇറിഗേഷൻ എക്സിക്യൂട്ടീവ് എൻജിനീയറുമായ പി എസ്  വിനോദ്, റെയ്സ് കമ്മറ്റിയംഗങ്ങളായ എസ്.എം.ഇക്ബാൽ, എ.വി.മുരളി, എം.വി. അൽത്താഫ്,  പ്രജിത്ത് പുത്തൻ വീട്ടിൽ, കെ എസ് റെജി എന്നിവർ സംസാരിച്ചു.

മഴക്കെടുതിയില്‍പ്പെട്ട കുടുംബങ്ങളെ മാറ്റിപ്പാര്‍പ്പിക്കുന്നതിനായി ജില്ലയില്‍ ക്യാമ്പുകള്‍ തുറന്നു. തൊടുപുഴ താലൂക്കില്‍ മുട്ടം പഞ്ചായത്ത് കമ്മ്യൂണിറ്റി ഹാളില്‍ തുറന്ന ക്യാമ്പില്‍ 2 കുടുംബങ്ങളിലെ ആറ് അംഗങ്ങളാണുള്ളത്. ആലക്കോട് ചവര്‍ണ അങ്കണവാടിയില്‍ 7 കുടുംബങ്ങളിലെ 33 പേരാണുള്ളത്. തട്ടേക്കണ്ണി കമ്മ്യൂണിറ്റി ഹാളിലെ ക്യാമ്പില്‍ 7 പേരാണുള്ളത്. ഇടുക്കി താലൂക്കില്‍ കീരിത്തോട് ഗവ. എല്‍പി സ്‌കൂളിലും ദേവികുളം മന്നാംകണ്ടം വില്ലേജില്‍ അടിമാലി ഗവ. ഹയര്‍ സെക്കന്‍ഡറി സ്‌കൂളിലും ക്യാമ്പ് തുറന്നിട്ടുണ്ട്. ഇവിടേക്ക് ജനങ്ങളെ മാറ്റിപ്പാര്‍പ്പിച്ച് തുടങ്ങിയിട്ടില്ല
 

ജില്ലയില്‍ ശക്തമായ മഴ തുടരുന്ന സാഹചര്യത്തില്‍ പൊതുജനങ്ങളും വിനോദസഞ്ചാരികളും അതീവ ജാഗ്രത പാലിക്കണമെന്ന് ജില്ലാ കളക്ടര്‍ ഡോ. ദിനേശന്‍ ചെറുവാട്ട് അറിയിച്ചു. അത്യാവശ്യ ആവശ്യങ്ങള്‍ ഒഴികെ ഇടുക്കിയിലേക്കുള്ള യാത്രകള്‍ പൂര്‍ണമായും ഒഴിവാക്കണം. നിലവില്‍ ജില്ലയിലുള്ള എല്ലാ വിനോദസഞ്ചാരികളും സുരക്ഷിതമായ താമസസ്ഥലങ്ങളില്‍ തന്നെ തുടരുകയും അനാവശ്യ യാത്രകളും വിനോദസഞ്ചാര കേന്ദ്രങ്ങളിലേക്കുള്ള സന്ദര്‍ശനവും ഒഴിവാക്കുകയും വേണം.

മഴക്കെടുതിയിൽപ്പെട്ട കുടുംബങ്ങളെ മാറ്റിപ്പാർപ്പിക്കുന്നതിനായി ജില്ലയിൽ രണ്ട് ദുരിതാശ്വാസ ക്യാമ്പുകൾ തുറന്നു. ചെങ്ങന്നൂർ താലൂക്കിൽ തിരുവൻവണ്ടൂർ വില്ലേജിൽ ഗവ. ഹൈസ്കൂളിൽ ആരംഭിച്ച ക്യാമ്പിൽ ഒരു കുടുംബത്തിലെ രണ്ട് അംഗങ്ങളാണുള്ളത്.  മുളക്കുഴ വില്ലേജിലെ പുത്തൻകാവ് എംഡി എൽപിഎസിൽ ആരംഭിച്ച ക്യാമ്പിൽ ഒരു കുടുംബത്തിലെ ഒരംഗമാണുള്ളത്.

ജില്ലയിൽ കഴിഞ്ഞ മണിക്കൂറുകളിൽ ശക്തമായ മഴ പെയ്യുകയും ഓറഞ്ച് അലർട്ട് നിലനിൽക്കുകയും ചെയ്യുന്നതിനാലും സമീപ ജില്ലകളായ പത്തനംതിട്ടയിലും കോട്ടയത്തും ശക്തമായ മഴ തുടരുന്നതിനാലും ജില്ലാ ഭരണകൂടം പ്രത്യേക ജാഗ്രത നിർദേശം പുറപ്പെടുവിച്ചു. പത്തനംതിട്ട, കോട്ടയം ജില്ലകളിലെ കനത്ത മഴയെത്തുടർന്ന് പമ്പ, അച്ചൻകോവിൽ, മണിമലയാർ എന്നീ നദികളിലൂടെ ഒഴുകിയെത്തുന്ന ജലത്തിന്റെ അളവ് വർധിക്കാൻ സാധ്യതയുള്ളതിനാൽ നദീതീരങ്ങളിലും താഴ്ന്ന പ്രദേശങ്ങളിലും താമസിക്കുന്നവർ അതീവ ജാഗ്രത പാലിക്കണം. 

കേരളം, കർണാടക, ലക്ഷദ്വീപ് തീരങ്ങളിൽ ഇന്നും നാളെയും (ആഗസ്റ്റ് 2, 3) മത്സ്യബന്ധനത്തിന് പോകരുതെന്ന് കേന്ദ്ര കാലാവസ്ഥാ വകുപ്പ് അറിയിച്ചു. ഈ തീരങ്ങളിൽ മണിക്കൂറിൽ 40 മുതൽ 50 കിലോമീറ്റർ വരെയും, ചില അവസരങ്ങളിൽ 60 കിലോമീറ്റർ വരെയും വേഗതയിൽ ശക്തമായ കാറ്റിനും മോശം കാലാവസ്ഥയ്ക്കും സാധ്യതയുള്ളതിനാലാണ്  മുന്നറിയിപ്പ് നൽകിയത്.

മധ്യ പടിഞ്ഞാറൻ അറബിക്കടലിലും അതിനോട് ചേർന്ന മധ്യ കിഴക്കൻ അറബിക്കടലിലും ആഗസ്റ്റ് 2 മുതൽ 6 വരെ മണിക്കൂറിൽ 45 മുതൽ 55 കിലോമീറ്റർ വരെയും, ചിലപ്പോൾ 65 കിലോമീറ്റർ വരെയും വേഗതയിൽ ശക്തമായ കാറ്റിന് സാധ്യതയുണ്ട്.  

ചിറയിൻകീഴ് താലൂക്കിൽ കിഴുവിലം കൂന്തള്ളൂർ വില്ലേജിൽ വൈദ്യന്റെ മുക്ക് ഭാഗത്തു വാമനപുരം നദിയിൽ ജലനിരപ്പുയർന്നു വീടുകളിലേക്ക് വെള്ളം കയറിയതിനാൽ,  അഞ്ചു കുടുംബങ്ങളെ പടനിലം എൽ പി സ്കൂളിലേക്ക് മാറ്റിപ്പാർപ്പിച്ചു. 23 പേരെയാണ് പടനിലം എൽ പി സ്കൂളിലെ ക്യാമ്പിലേക്ക് മാറ്റിയത്. 2 പുരുഷന്മാർ, 13 സ്ത്രീകൾ, 8 കുട്ടികൾ ഉൾപ്പെടെയുള്ളവരാണ്  ക്യാമ്പിൽ ഉള്ളത്.