ഇലക്ഷൻ പെരുമാറ്റ ചട്ടലംഘനങ്ങൾ കൂടുതൽ കാര്യക്ഷമമായി കണ്ടെത്തുന്നതിനും സി വിജിലിലൂടെ ലഭിക്കുന്ന പരാതികൾ സമയബന്ധിതമായി തീർപ്പാക്കുന്നതിനുമായി ജില്ലയിൽ കൂടുതൽ സ്‌ക്വാഡുകൾ സജ്ജീകരിച്ചു. നിലവിൽ 117 ഫ്‌ളൈയിങ് സ്‌ക്വാഡുകളും അത്രയും തന്നെ സ്റ്റാറ്റിക് സർവെയലൻസ് ചെക്ക് പോസ്റ്റുകളും നിലവിൽ പ്രവർത്തിക്കുന്നുണ്ട്. 

കൂടാതെ ഇതോടൊപ്പം 14 ആന്റി ഡീഫെസ്മെന്റ് സ്‌ക്വാഡുകളും, 13 വീഡിയോ സർവെയലൻസ് ടീമും പ്രവർത്തിച്ചുവരുന്നു. ഇന്നലെ രാത്രി 12 മണി വരെ ലഭിച്ച 6912 പരാതികളിൽ6743 എണ്ണം പരിഹരിച്ചു.

നിയമസഭാ തെരഞ്ഞെടുപ്പില്‍ ജില്ലയില്‍ പോളിംഗ് ഡ്യൂട്ടിക്ക് നിയോഗിച്ചിട്ടുള്ള ഉദ്യോഗസ്ഥരുടെ ആദ്യഘട്ട റാന്‍ഡമൈസേഷന്‍ പൂര്‍ത്തിയായി. തെരഞ്ഞെടുപ്പ് പൊതുനിരീക്ഷകന്‍ ഡോ. ശ്രീധര്‍ ബാബു അധാന്‍കിയുടെ സാന്നിധ്യത്തില്‍ ജില്ലാ തെരഞ്ഞെടുപ്പ് ഓഫീസറായ ജില്ലാ കളക്ടര്‍ ഡി.ആര്‍ മേഘശ്രീ റാന്‍ഡമൈസേഷന്‍ പ്രക്രിയക്ക് നേതൃത്വം നല്‍കി. റാന്‍ഡമൈസേഷനിലൂടെ മൂന്നു മണ്ഡലങ്ങളിലേക്കുമായി 40 ശതമാനം റിസര്‍വ് ഉള്‍പ്പെടെ 4008 ഉദ്യോസ്ഥരെ തിരഞ്ഞെടുത്തു. ജില്ലയില്‍ ആകെ 715 പോളിംഗ് സ്റ്റേഷനുകളാണുള്ളത്.

നിയമസഭാ പൊതുതെരഞ്ഞെടുപ്പിനോടനുബന്ധിച്ച് ജില്ലയിലെ പോളിംഗ് ഉദ്യോഗസ്ഥര്‍ക്കുള്ള ഒന്നാം ഘട്ട പരിശീലനം ആരംഭിച്ചു. തൃശൂർ ടൗൺ ഹാളിൽ നടന്ന പരിശീലന പരിപാടിയുടെ ജില്ലാ തല ഉദ്ഘാടനവും തൃശൂർ നിയോജക മണ്ഡലം പരിശീലന പരിപാടിയുടെ ഉദ്ഘാടനവും ജില്ലാ കളക്ടർ ശിഖ സുരേന്ദ്രൻ നിർവഹിച്ചു. 

സംസ്ഥാന നിയമസഭ തിരഞ്ഞെടുപ്പിൽ കണ്ണൂർ ജില്ലയിലെ വോട്ടുകൾ എണ്ണുക മൂന്നു കേന്ദ്രങ്ങളിൽ. 
കണ്ണൂർ ചാല ചിന്മയ ഇൻസ്റ്റിറ്റ്യൂട്ട് (ചിൻടെക്),  തളിപ്പറമ്പ് സർ സയ്യിദ് ഹയർ സെക്കൻഡറി സ്കൂൾ, തലശ്ശേരി ഗവൺമെൻറ് ബ്രണ്ണൻ കോളേജ് എന്നിവിടങ്ങളിലാണ് മെയ്‌ നാലിന് വോട്ടെണ്ണുക. 

അഴീക്കോട്, കണ്ണൂർ, ധർമടം, മട്ടന്നൂർ, പേരാവൂർ എന്നീ അഞ്ച് നിയമസഭ മണ്ഡലങ്ങളിലെ വോട്ടുകളാണ് ചാല ചിന്മയ ഇൻസ്റ്റിറ്റ്യൂട്ടിൽ എണ്ണുക. 

വയനാട് ജില്ലയില്‍ ശനിയാഴ്ച (മാര്‍ച്ച് 21) ഏഴ് പേര്‍ നാമനിര്‍ദേശ പത്രിക ലഭിച്ചു. കല്‍പറ്റ നിയമസഭ മണ്ഡലത്തില്‍ പ്രശാന്ത് കുമാര്‍ (ബിജെപി), അനില്‍കുമാര്‍ (ആര്‍ജെഡി), റഫീക് സി.എ (എഎപി), രാമന്‍കുട്ടി സി (ബിഎസ്പി) എന്നിവര്‍ മണ്ഡലത്തിന്റെ റിട്ടേണിംഗ് ഓഫീസര്‍ എല്‍ ആര്‍ ഡെപ്യൂട്ടി കളക്ടര്‍ കെ.കെ ബിനിയുടെ മുന്‍പാകെ പത്രിക സമര്‍പ്പിച്ചു.

നിയമസഭാ തെരഞ്ഞെടുപ്പുമായി ബന്ധപ്പെട്ട് ജില്ലയില്‍ മാതൃക പെരുമാറ്റച്ചട്ടം നടപ്പാക്കുന്നതിന്റെ ഭാഗമായി അനധികൃത പരസ്യ സാമഗ്രികള്‍ നീക്കം ചെയ്യല്‍ നടപടികള്‍ ശക്തം. ആന്റി ഡീഫേസ്‌മെന്റ് സ്‌ക്വാഡിന്റെ നേതൃത്വത്തില്‍ ഇതുവരെ നീക്കം ചെയ്തത് 737 പ്രചാരണ സാമഗ്രികള്‍. വിവിധ രാഷ്ട്രീയപാര്‍ട്ടികളുടെ 186 പോസ്റ്ററുകള്‍, 19 ബാനറുകള്‍, 49 മറ്റ് പ്രചരണ ബോര്‍ഡുകള്‍എന്നിവയാണ് ഇന്ന് നീക്കം ചെയ്തത്.

നിയമസഭാ തെരഞ്ഞെടുപ്പ് ബോധവത്കരണ പരിപാടിയുടെ ഭാഗമായി ജില്ലയില്‍ സ്വീപ് (സിസ്റ്റമാറ്റിക് വോട്ടേഴ്‌സ് എജുക്കേഷന്‍ ആന്‍ഡ് ഇലക്ടറല്‍ പാര്‍ട്ടിസിപ്പേഷന്‍  പ്രോഗ്രാം) പ്രവര്‍ത്തനങ്ങള്‍ക്ക് തുടക്കമായി. വോട്ടവകാശത്തിന്റെ പ്രാധാന്യം ജനങ്ങളിലേക്ക് എത്തിക്കുക,  
തെരഞ്ഞെടുപ്പില്‍ സമ്മതിദായകരുടെ പങ്കാളിത്തം ഉറപ്പാക്കുക, വോട്ടര്‍ സാക്ഷരത വര്‍ധിപ്പിക്കുക എന്നിവയാണ് പദ്ധതിയുടെ ലക്ഷ്യം.

കല്‍പ്പറ്റ നഗരസഭാ മേഖലയില്‍ ശുദ്ധജല വിതരണ പൈപ്പ് ലൈനില്‍ അറ്റകുറ്റ പ്രവൃത്തി നടക്കുന്നതിനാല്‍ നാളെ (മാര്‍ച്ച് 23) കല്‍പ്പറ്റ നഗരസഭ പരിധിയില്‍ ഭാഗികമായോ, പൂര്‍ണമായോ ജലവിതരണം മുടങ്ങും.

മുട്ടില്‍ ഗ്രാമപഞ്ചായത്തിലെ പൈപ്പ് ലൈനില്‍ അറ്റകുറ്റ പ്രവൃത്തികള്‍ നടക്കുന്നതിനാല്‍ നാളെ (മാര്‍ച്ച് 23) ചേനംകൊല്ലി, പരിയാരം, പാറക്കല്‍, എടപ്പെട്ടി, ചിലഞ്ഞിച്ചാല്‍, മുട്ടില്‍ ടൗണ്‍, താഴെ മുട്ടില്‍, ചിറമൂലവയല്‍, അടുവാടിവയല്‍, തങ്ങള്‍കുന്ന്, സ്‌കൂള്‍കുന്ന്, കുഞ്ഞുണ്ണിപ്പടി, മാണ്ടാട് പ്രദേശങ്ങളില്‍ ജലവിതരണം താല്‍ക്കാലികമായി  മുടങ്ങും.

ജില്ലയില്‍ വന്യജീവി ശല്യം പരിഹരിക്കുന്നതിന്റെ ഭാഗമായി സ്വകാര്യ വക്തികളുടെ തോട്ടങ്ങള്‍ കാട് വെട്ടി വൃത്തിയാക്കാന്‍ ജില്ലാ ദുരന്ത നിവാരണ അതോറിറ്റി ചെയര്‍പേഴ്‌സണ്‍ കൂടിയായ ജില്ലാ കളക്ടര്‍ ഡി. ആര്‍. മേഘശ്രീ ഉത്തരവിട്ടു. സ്വകാര്യ വ്യക്തികള്‍, സ്ഥാപനങ്ങളുടെ കൈവശമുള്ള പരിപാലിക്കാത്ത തോട്ടങ്ങളില്‍ വന്യ മൃഗങ്ങളുടെ വിഹാരകേന്ദ്രമാകാന്‍ സാധ്യതയുള്ളവ കണ്ടെത്തി കാട് വെട്ടിതെളിച്ച് ദുരന്ത സാധ്യത ഒഴിവാക്കണം. ജില്ലയുടെ വിവിധ പ്രദേശങ്ങളില്‍ വന്യജീവികള്‍ ജനവാസ കേന്ദ്രങ്ങളിലെത്തി ജീവനും സ്വത്തിനും ഭീഷണിയാകുന്ന സാഹചര്യത്തിലാണ് നടപടി.

നിയമസഭാ തിരഞ്ഞെടുപ്പ് സമാധാനപരമായി നടത്തുന്നതിൻ്റെ ഭാഗമായി എറണാകുളം ജില്ലയിൽ കർശന നിയന്ത്രണങ്ങൾ ഏർപ്പെടുത്തി.
 വോട്ടെടുപ്പിനോടനുബന്ധിച്ച് ജില്ലയിൽ ആയുധങ്ങൾ കൈവശം വെക്കുന്നതും കൊണ്ടുനടക്കുന്നതും നിരോധിച്ചുകൊണ്ട് ജില്ലാ കളക്ടറും ജില്ലാ മജിസ്‌ട്രേറ്റുമായ ജി പ്രിയങ്ക  ഉത്തരവിട്ടു.

​ഭാരതീയ നാഗരിക് സുരക്ഷാ സംഹിത (BNSS) 2023-ലെ സെക്ഷൻ 163 പ്രകാരമാണ് നിരോധനാജ്ഞ പുറപ്പെടുവിച്ചിരിക്കുന്നത്. ഏപ്രിൽ 9-ന് നടക്കുന്ന വോട്ടെടുപ്പിന്റെ പശ്ചാത്തലത്തിൽ മാതൃകാ പെരുമാറ്റച്ചട്ടം നിലവിൽ വന്ന സാഹചര്യത്തിലാണ് ഈ നടപടി.