ജില്ലയിൽ കോവിഡ് വ്യാപനം വർധിക്കുന്ന സാഹചര്യത്തിൽ പൊതുജനങ്ങൾ പ്രതിരോധ പ്രവർത്തനങ്ങളിൽ അലംഭാവം കാണിക്കരുതെന്ന് ജില്ലാ മെഡിക്കൽ ഓഫീസർ ഡോ. ആർ. രേണുക അറിയിച്ചു. ദിവസേന 200 മുതൽ 250 വരെ കേസുകളാണ് റിപ്പോർട്ട് ചെയ്യപ്പെടുന്നത്. കേരളത്തിലെ മറ്റു ജില്ലകളിൽ കേസുകളുടെ എണ്ണം കുറയുമ്പോഴും ജില്ലയിൽ  കേസുകൾ വർധിക്കുകയാണ്. പൊതുജനങ്ങൾ കോവിഡ് പ്രതിരോധ മാനദണ്ഡങ്ങൾ കർശനമായി പാലിക്കാത്തതിനാലാണ് എണ്ണത്തിൽ വർധനവുണ്ടാകുന്നതെന്ന് ഡി.എം.ഒ പറഞ്ഞു.

.179 പേര്‍ക്ക് രോഗമുക്തി

.247 പേര്‍ക്ക് സമ്പര്‍ക്കത്തിലൂടെ രോഗബാധ

വയനാട് ജില്ലയില്‍ ഇന്ന് (13.1.21) 248 പേര്‍ക്ക് കോവിഡ് സ്ഥിരീകരിച്ചതായി ജില്ലാ മെഡിക്കല്‍ ഓഫീസര്‍ ഡോ. ആര്‍. രേണുക അറിയിച്ചു. 179 പേര്‍ രോഗമുക്തി നേടി. നാല് ആരോഗ്യ പ്രവര്‍ത്തകര്‍ ഉള്‍പ്പെടെ 247 പേര്‍ക്ക് സമ്പര്‍ക്കത്തിലൂടെയാണ് രോഗബാധ. ഇതില്‍ 9 പേരുടെ സമ്പര്‍ക്ക ഉറവിടം വ്യക്തമല്ല. വിദേശത്ത് നിന്ന് എത്തിയ ഒരാള്‍ക്കും രോഗം സ്ഥിരീകരിച്ചു.

സി.കെ.ശശീന്ദ്രന്‍ എം.എല്‍.യുടെ പ്രത്യേക വികസന നിധിയില്‍ നിന്നും സൗത്ത് വയനാട് ഫോറസ്റ്റ് ഡിവിഷന് കീഴിലുള്ള ദ്രുത കര്‍മ്മ സേനയ്ക്ക് ഉപയോഗിക്കുന്നതിന് വാഹനം വാങ്ങുന്നതിന് 8 ലക്ഷം രൂപയും  ഐ.സി.ബാലകൃഷ്ണന്‍ എം.എല്‍.എ.യുടെ ആസ്തി വികസന ഫണ്ടില്‍ നിന്നും പൂതാടി പഞ്ചായത്തിലെ അതിരാറ്റ്കുന്ന് ഗവ.ഹൈസ്‌കൂളിന് കമ്പ്യൂട്ടറും അനുബന്ധ ഉപകരണങ്ങളും വാങ്ങുന്നതിന് ആറ് ലക്ഷം രൂപയും അനുവദിച്ച് ജില്ലാ കളക്ടര്‍ ഉത്തരവായി.

കോവിഡ് പ്രതിസന്ധി തുടരുന്ന സാഹചര്യത്തില്‍ കേരള തയ്യല്‍ തൊഴിലാളി ക്ഷേമനിധി ബോര്‍ഡില്‍ അംശാദായ കുടിശ്ശിക വരുത്തിയ അംഗങ്ങള്‍ക്ക് ജനുവരി ഒന്നു മുതല്‍ മാര്‍ച്ച് 31 വരെ പിഴ പലിശ ഒഴിവാക്കി അംഗത്വം പുനസ്ഥാപിച്ച് നല്‍കുന്നതാന്നെന്ന് ജില്ലാ എക്‌സിക്യൂട്ടീവ് ഓഫീസര്‍ അറിയിച്ചു.

കേരള സര്‍ക്കാര്‍ സ്ഥാപനമായ ഐ.എച്ച്.ആര്‍.ഡി.യുടെ കീഴില്‍ നടത്തുന്ന ഡിപ്ലോമ ഇന്‍ കമ്പ്യൂട്ടറൈസ്ഡ് ഫിനാന്‍ഷ്യല്‍ അക്കൗണ്ടിംഗ് കോഴ്സിന്റെ സെമസ്റ്റര്‍ പരീക്ഷ (2020 സ്‌കീം) 2021 ജനുവരി മാസാവസാനവാരത്തില്‍  കോവിഡ് മാനദണ്ഡങ്ങള്‍ പൂര്‍ണ്ണമായും പാലിച്ചുകൊണ്ട് നടത്തും. പരീക്ഷാ ടൈംടേബിള്‍ ഇതോടൊപ്പം പ്രസിദ്ധീകരിച്ചിട്ടുണ്ട്. വിശദവിവരങ്ങള്‍ ഐ.എച്ച്.ആര്‍.ഡി. വെബ്സൈറ്റില്‍ (www.ihrd.ac.in) ലഭിക്കും.

*എത്തിയത് 9590 ഡോസ് കോവിഷീല്‍ഡ്*

കോവിഡ് പ്രതിരോധ പ്രവര്‍ത്തനങ്ങള്‍ക്ക് ആശ്വാസമേകി ആദ്യഘട്ട വിതരണത്തിനുള്ള കോവിഡ് വാക്‌സിന്‍ വയനാട് ജില്ലയിൽ എത്തി. കോഴിക്കോട് റീജിയണല്‍ വാക്‌സിന്‍ സ്റ്റോറില്‍ നിന്ന് 9590 ഡോസ് കോവിഡ് 19 വാക്‌സിന്‍ (കോവിഷീല്‍ഡ്) ഇന്ന് (14.1.2021) ഉച്ചകഴിഞ്ഞ് 3 മണിയോടെയാണ് ജില്ലാ വാക്സിൻ സ്റ്റോറിൽ എത്തിച്ചത്. 

ജില്ലാ ആശുപത്രിയിൽ അടിയന്തര ചികിത്സാ സൗകര്യങ്ങളുമായി അത്യാധുനിക മൊബൈൽ ഐ.സി.യു യൂണിറ്റ് എത്തി. ജില്ലയിലെ സർക്കാർ ആശുപത്രികളിലെ ഏക മൊബൈൽ യൂണിറ്റാണ് മാനന്തവാടി ജില്ലാ ആശുപത്രിയിൽ യാഥാർത്ഥ്യമായത്. ഒ. ആർ കേളു എം.എൽ.എയുടെ ആസ്തി വികസന ഫണ്ടിൽ ഉൾപ്പെടുത്തി 35 ലക്ഷം രൂപ ചെലവിലാണ് ആത്യാധുനിക സൗകര്യങ്ങളോട് കൂടിയ മൊബൈൽ യൂണിറ്റ് സജ്ജമാക്കിയത്. നിലവിൽ ജില്ലാ ആശുപത്രിയിൽ ആറ് ആംബുലൻസുകളാണ് ഉള്ളത് ഇതിനു പുറമെയാണ് അത്യാധുനിക സൗകര്യങ്ങളോട് കൂടിയ  മൊബൈൽ ഐ സി യു യൂണിറ്റ് സജ്ജമാകുന്നത്. ജീവൻ രക്ഷാ ഉപാധികളും 24 മണിക്കൂർ ഡോക്ടറുടെ സേവനവും മൊബൈൽ ഐ സി യുവിൽ ഉണ്ടായിരിക്കും