തലശ്ശേരി ജില്ലാ കോടതി, കണ്ണൂര്‍, കൂത്തുപറമ്പ്  മുന്‍സിഫ് കോടതികള്‍ എന്നിവിടങ്ങളില്‍ ഒരു വര്‍ഷത്തേക്ക് ഫോട്ടോകോപ്പിയര്‍ സ്ഥാപിച്ച് പരിപാലിക്കുന്നതിന് ക്വട്ടേഷന്‍ ക്ഷണിച്ചു. ക്വട്ടേഷനുകള്‍ ബഹു.പ്രിന്‍സിപ്പല്‍ ജില്ലാ ജഡ്ജ്, ജില്ലാ കോടതി, തലശ്ശേരി - 670101 എന്ന വിലാസത്തില്‍ സെപ്റ്റംബര്‍ 27 ന് ഉച്ചയ്ക്ക് രണ്ടിനകം ലഭിക്കണം.

പയ്യന്നൂര്‍ താലൂക്ക് കാങ്കോല്‍ വില്ലേജിലുള്ള ശ്രീ വടശ്ശേരി ഊറ്റിത്തടം ശ്രീകൃഷ്ണമതിലകം ക്ഷേത്രത്തിലും എളമ്പിലാന്തട്ട മഹാവിഷ്ണു ക്ഷേത്രത്തിലും അഞ്ച് വീതം പാരമ്പര്യേതര ട്രസ്റ്റിമാരെ നിയമിക്കുന്നു. അപേക്ഷകള്‍ ഒക്ടോബര്‍ 10 ന് വൈകീട്ട് അഞ്ചിനകം മലബാര്‍ ദേവസ്വം ബോര്‍ഡ് നീലേശ്വരം അസിസ്റ്റന്റ് കമ്മീഷണറുടെ ഓഫീസില്‍ ലഭിക്കണം. അപേക്ഷ ഫോറം മലബാര്‍ ദേവസ്വം ബോര്‍ഡ് വെബ്സൈറ്റ്, നീലേശ്വരം അസിസ്റ്റന്റ് കമ്മീഷണറുടെ ഓഫീസ്, തളിപ്പറമ്പ് ഇന്‍സ്പെക്ടറുടെ ഓഫീസ് എന്നിവിടങ്ങളില്‍ ലഭിക്കും. 

പള്ളിക്കുന്ന് കോര്‍പറേഷന്‍ സോണലിലെ ഒന്നാം ഡിവിഷന്‍ ( പള്ളിയംമൂല) നെഹ്റുജി അങ്കണവാടിയില്‍ അങ്കണവാടി കം ക്രഷ് സെന്ററില്‍ ഹെല്‍പറെ നിയമിക്കുന്നു. പ്രസ്തുത ഡിവിഷണലില്‍ സ്ഥിരതാമസക്കാരായ എസ് എസ് എല്‍ സി പാസായ 18 നും 35 വയസിനും ഇടയില്‍ പ്രായമുള്ള വനിതകള്‍ക്ക് അപേക്ഷിക്കാം. അപേക്ഷകള്‍ കണ്ണൂര്‍ റൂറല്‍ ഐ സി ഡി എസ് ഓഫീസ്, കണ്ണൂര്‍ ബ്ലോക്ക് പഞ്ചായത്ത് കോംപ്ലക്സ്, പള്ളിക്കുന്ന്, കണ്ണൂര്‍ - 670004 വിലാസത്തില്‍ സെപ്റ്റംബര്‍ 25 ന് വൈകീട്ട് അഞ്ചിനകം ലഭിക്കണം. ഫോണ്‍: 0497 2749122

തലശ്ശേരി ഡെസ്റ്റിനേഷന്‍ മാനേജ്മെന്റ് കൗണ്‍സിലിന്റെയും തലശ്ശേരി നഗരസഭയുടെയും സംയുക്താഭിമുഖ്യത്തില്‍ ഇല്ലിക്കുന്നിലെ ഗുണ്ടര്‍ട്ട് മ്യൂസിയത്തില്‍ കുരുന്നുകള്‍ക്ക് ആദ്യാക്ഷരം കുറിക്കാം. ഒക്ടോബര്‍ രണ്ടിന് രാവിലെ എട്ട് മണിക്ക് ആരംഭിക്കുന്ന ചടങ്ങില്‍ നിയമസഭ സ്പീക്കര്‍ എ.എന്‍ ഷംസീര്‍, എഴുത്തുകാരി കെ.ആര്‍ മീര എന്നിവര്‍ ആദ്യാക്ഷരം പകര്‍ന്ന് നല്‍കും. മുന്‍കൂര്‍ രജിസ്ട്രേഷന് തലശ്ശേരി സബ് ട്രഷറിക്ക് മുന്‍വശത്തുള്ള ടൂറിസം ഓഫീസില്‍ ബന്ധപ്പെടാം. ഫോണ്‍: 9847506567, 9746223233
 

കണ്ണൂര്‍ താലൂക്ക് പരിധിയിലെ റവന്യൂ റിക്കവറി നടപടികള്‍ സ്വീകരിച്ച കേസുകള്‍ ഉള്‍പ്പെടുത്തിയുള്ള ബാങ്ക് അദാലത്ത് സെപ്റ്റംബര്‍ 22 ന് കണ്ണപുരം സര്‍വ്വീസ് കോ-ഓപ്പറേറ്റീവ്  ബാങ്ക് ഓഡിറ്റോറിയം, 23 ന് ചാല ഗവ. ഹയര്‍സെക്കന്‍ഡറി സ്‌കൂള്‍, 24 ന് കണ്ണൂര്‍ താലൂക്ക് ഓഫീസ് കോണ്‍ഫറന്‍സ് ഹാള്‍ എന്നിവിടങ്ങളില്‍ രാവിലെ 10 മണിമുതല്‍ നടക്കുമെന്ന് തഹസില്‍ദാര്‍ അറിയിച്ചു.

ജില്ലാ പോലീസ് പരാതി അതോറിറ്റിയുടെ സിറ്റിംഗ് സെപ്റ്റംബര്‍ 20 ന് രാവിലെ 11 മണിക്ക് കലക്ടറേറ്റ് ഓഡിറ്റോറിയത്തില്‍ നടക്കും. 

മലപ്പുറം താനൂര്‍ തൂവല്‍തീരം ബീച്ചില്‍ 2023 ല്‍ ഉണ്ടായ ബോട്ട് അപകടത്തിന്റെ പശ്ചാത്തലത്തില്‍ ഇത്തരത്തിലുള്ള അപകടങ്ങള്‍ ഒഴിവാക്കാനുളള നിര്‍ദേശങ്ങള്‍ നല്‍കുന്നതിനായി പ്രഗല്‍ഭ വ്യക്തികളുടെയും പൊതുജനങ്ങളുടെയും അഭിപ്രായങ്ങള്‍ തേടുന്നു. അഭിപ്രായങ്ങള്‍ ഓഫീസ് ഓഫ് ജസ്റ്റിസ് വി.കെ മോഹനന്‍, കമ്മീഷന്‍ ഓഫ് ഇന്‍ക്വയറി, കൊച്ചി - 682031 എന്ന വിലാസത്തില്‍ അയക്കാം. കൂടാതെ ഒക്ടോബര്‍ 14 ന് കണ്ണൂര്‍ കലക്ടറേറ്റ് കോണ്‍ഫറന്‍സ് ഹാളില്‍ കമ്മീഷന്‍ മുമ്പാകെ അഭിപ്രായങ്ങളും നിര്‍ദേശങ്ങളും നല്‍കാമെന്ന് ജില്ലാ ഫിഷറീസ് ഡെപ്യൂട്ടി ഡയറക്ടര്‍ അറിയിച്ചു. 

കുലുക്കല്ലൂര്‍ ഗ്രാമപഞ്ചായത്തില്‍ മുട്ടക്കോഴി വിതരണം നടത്തി. ഗ്രാമപഞ്ചായത്തിന്റെ 2025-26 സാമ്പത്തിക വര്‍ഷത്തിലെ പ്ലാന്‍ ഫണ്ടില്‍ നിന്നും 4,309,50 രൂപ വകയിരുത്തിയാണ് പദ്ധതി നടപ്പിലാക്കിയത്. ഗ്രാമപഞ്ചായത്തിലെ 663 കുടുംബങ്ങള്‍ക്ക് അഞ്ച് കോഴികളെ വീതമാണ് വിതരണം ചെയ്തത്. ഗ്രാമസഭകളിലൂടെ ഗുണഭോക്താക്കളെ കണ്ടെത്തി ബി.പി.എല്‍ കുടുംബങ്ങള്‍ക്ക് മുന്‍ഗണന നല്‍കിയാണ് കോഴികളെ വിതരണം ചെയ്തത്.

കണ്ണമ്പ്ര ഗ്രാമപഞ്ചായത്തില്‍ നിര്‍മാണം പൂര്‍ത്തിയാക്കിയ കൊളയക്കാട് മഞ്ഞപ്ര ആധുനിക വാതക ശ്മശാനം തുറന്നു. ജില്ലാ പഞ്ചായത്ത് പ്രസിഡന്റ് കെ. ബിനുമോള്‍ ശ്മശാനം ഉദ്ഘാടനം ചെയ്തു. ഗ്രാമ പഞ്ചായത്ത് പ്രസിഡന്റ് എം. സുമതി ടീച്ചര്‍ അധ്യക്ഷയായി. ജില്ല, ബ്ലോക്ക്, ഗ്രാമപഞ്ചായത്തുകളുടെ വികസന ഫണ്ടില്‍നിന്ന് 75 ലക്ഷം രൂപ ചെലവഴിച്ചാണ് ആധുനിക ശ്മശാനം നിര്‍മ്മിച്ചത്.

കേരള സ്റ്റേറ്റ് റൂട്രോണിക്സ് സര്‍ട്ടിഫിക്കറ്റോടെ ഒരു വര്‍ഷം, ആറ് മാസം, മൂന്ന് മാസം ദൈര്‍ഘ്യമുള്ള ലോജിസ്റ്റിക്സ് ആന്‍ഡ് സപ്ലൈ ചെയിന്‍ മാനേജ്മെന്റ് കോഴ്‌സിന് തിരുവനന്തപുരം, ആറ്റിങ്ങല്‍ അംഗീകൃത പഠന കേന്ദ്രങ്ങളില്‍ അപേക്ഷ ക്ഷണിച്ചു. എസ്എസ്എല്‍സി, പ്ലസ് ടു, ബിരുദം പാസായവര്‍ക്ക് അപേക്ഷിക്കാം. ഫോണ്‍: 7994926081.