സംസ്ഥാന സർക്കാറിന്റെ 'ഓണത്തിന് ഒരുലക്ഷം തൊഴിൽ' പദ്ധതിയുടെ ഭാഗമായി കുടുംബശ്രീ മിഷൻ സംഘടിപ്പിക്കുന്ന തൊഴിൽ മേള ജില്ലയിൽ ആരംഭിച്ചു.സിഡിഎസ് തലത്തിലാണ് തൊഴിൽ മേളകൾ സംഘടിപ്പിക്കുന്നത്. പനമരം, സുൽത്താൻ ബത്തേരി, പടിഞ്ഞാറത്തറ സിഡിഎസുകളിൽ തൊഴിൽ മേള സംഘടിപ്പിച്ചു. ജില്ലയിലെ മറ്റു സിഡിഎസുകളിൽ ഓണത്തിന് മുമ്പ് തൊഴിൽ മേളകൾ പൂർത്തിയാക്കും. 

ജില്ലാ പഞ്ചായത്ത് സാക്ഷരത മിഷന്റെ സഹകരണത്തോടെ നടപ്പാക്കുന്ന ശ്രീനാരായണഗുരു ഓപ്പൺ യൂണിവേഴ്സിറ്റിയുടെ ഡിഗ്രി കോഴ്സുകളിലേക്ക് അപേക്ഷ ക്ഷണിച്ചു. ഹയർ സെക്കൻഡറി തുല്യത കോഴ്സ് വിജയിച്ച ഗ്രാമപഞ്ചായത്ത് പരിധിയിലുള്ളവർക്ക് അപേക്ഷിക്കാം. ഇന്ത്യയിൽ ആദ്യമായാണ് ജില്ലാ പഞ്ചായത്ത് പദ്ധതി തുക ഉപയോഗിച്ച് ഡിഗ്രി പഠനത്തിന് അവസരമൊരുക്കുന്നത്. 2024-25 സാമ്പത്തിക വർഷം
പത്തുലക്ഷം രൂപയാണ് പദ്ധതിക്ക് വേണ്ടി നീക്കിവെച്ചത്. 100 പഠിതാക്കൾക്ക് അഡ്മിഷൻ നൽകുകയും ഒന്ന് രണ്ട് സെമസ്റ്റർ ഫീസുകളും പരീക്ഷ ഫീസും യൂണിവേഴ്സിറ്റിക്ക് കൈമാറുകയും ചെയ്തു

സുൽത്താൻ ബത്തേരി നിയോജക മണ്ഡലത്തിൽ ഐസി ബാലകൃഷ്ണൻ എംഎൽഎയുടെ പ്രത്യേക വികസന നിധിയിൽ ഉൾപ്പെടുത്തി നൂൽപ്പുഴ ഗ്രാമപഞ്ചായത്തിലെ നായ്ക്കട്ടി എഎൽപി സ്കൂളിന് 10 ലക്ഷം രൂപ ചെലവിൽ ടോയിലറ്റ് നിര്‍മിക്കാനുള്ള പ്രവൃത്തികൾക്ക് ജില്ലാ കളക്ടര്‍ ഭരണാനുമതി നൽകി.

റേഷൻ കടകൾ ഇന്ന് (സെപ്റ്റംബര്‍ 4) തുറന്നു പ്രവര്‍ത്തിക്കുമെന്ന് ജില്ലാ സപ്ലൈ ഓഫീസര്‍ അറിയിച്ചു. തുടര്‍ന്ന് വെള്ളി, ശനി, ഞായര്‍ ദിവസങ്ങൾ അവധിയായിരിക്കും. ഓണക്കിറ്റ് വാങ്ങാനുള്ള എഎവൈ കാര്‍ഡ് ഉടമകൾ ഓണത്തിന് മുമ്പായി കിറ്റ് വാങ്ങണമെന്നും അറിയിപ്പിൽ പറഞ്ഞു.

മാനന്തവാടിയിലെ അസാപ് കമ്മ്യൂണിറ്റി സ്കിൽ പാര്‍ക്കിൽ ഫിറ്റ്നസ് ട്രെയിനര്‍ കോഴ്സിന്റെ രണ്ടാം ബാച്ചിലേക്കും പുതിയ എസൻഷ്യൽ ഇംഗ്ലീഷ് സ്കിൽസ് കോഴ്സിലേക്കും പ്രവേശനം തുടങ്ങി. ഫിറ്റ്നസ് ട്രെയിനിങ് മേഖലയിൽ അറിവും പ്രാഗത്ഭ്യവും വളര്‍ത്താൻ അനുയോജ്യമായ തരത്തിലുള്ള ഈ കോഴ്സിന്റെ ദൈര്‍ഘ്യം 450 മണിക്കൂറാണ്. ഫീസ് 18,000 രൂപ. തവണകളായി ഫീസ് അടയ്ക്കാനുള്ള സൗകര്യമുണ്ട്. 60 മണിക്കൂര്‍ ദൈര്‍ഘ്യമുള്ള എസൻഷ്യൽ ഇംഗ്ലീഷ് കോഴ്സിന് 2900 രൂപയാണ് ഫീസ്. 15 മുകളിൽ പ്രായമുള്ള പത്താം ക്ലാസ് യോഗ്യതയുള്ളവര്‍ക്ക് അപേക്ഷിക്കാം. ഫോൺ: 9495999669.

ദ്വാരകയിലെ മാനന്തവാടി ഗവ. പോളിടെക്നിക് കോളജിൽ കംപ്യൂട്ടര്‍ എഞ്ചിനീയിറിങ് ഗസ്റ്റ് ലക്ചറര്‍ തസ്തികയിലേക്കും ട്രേഡ് ടെക്നീഷ്യൻ ലാബ് തസ്തികയിലേക്കും ദിവസ വേതനാടിസ്ഥാനത്തിൽ നിയമനം നടത്തുന്നു. ലക്ചറര്‍ തസ്തികയിലേക്ക് ബന്ധപ്പെട്ട ബ്രാഞ്ചിൽ ഒന്നാം ക്ലാസ് ബിടെക് ബിരുദവും ട്രേഡ് ടെക്നീഷ്യൻ തസ്തികയിൽ ബന്ധപ്പെട്ട ട്രേഡിൽ ടിഎച്ച്എസ്എൽസി/ഐടിഐ/കെജിസിഇ/എൻടിസി/വിഎച്ച്എസ്ഇ എന്നിവയുമാണ് യോഗ്യത. യോഗ്യത തെളിയിക്കുന്ന അസ്സൽ രേഖകളുമായി സെപ്റ്റംബര്‍ 9ന് രാവിലെ 10 മണിക്ക് കോളജ് ഓഫീസിൽ കൂടിക്കാഴ്ചയ്ക്ക് എത്തണം. ഫോൺ: 04935 293024

ബാണാസുരസാഗര്‍ അണക്കെട്ടിൽ അപ്പർ റൂൾ ലെവൽ 775 മീറ്ററിൽ കൂടുതലായാൽ  ഇന്ന് (സെപ്റ്റംബർ 4) രാവിലെ ഒൻപതിന് ഷട്ടർ തുറക്കും. സ്‌പിൽവെ ഷട്ടറുകൾ വഴി 50 ഘന മീറ്റർ വെള്ളം ഘട്ടം ഘട്ടമായി പുഴയിലേക്ക് തുറന്നു വിടുമെന്ന് എക്സിക്യൂട്ടീവ് എൻജിനീയർ അറിയിച്ചു. കരമാൻ തോട്, പനമരം പുഴയോരങ്ങളിലും താഴ്ന്ന പ്രദേശങ്ങളിലും താമസിക്കുന്നവര്‍ ജാഗ്രത പാലിക്കണം.

കുഴിനിലം അഗതിമന്ദിരത്തിലെ അന്തേവാസികൾക്കും വിദ്യാർത്ഥികൾക്കും പട്ടികവർഗവികസന വകുപ്പ് ഓണക്കോടി വിതരണം ചെയ്തു. സബ് കളക്ടർ അതുൽ സാഗർ ഉദ്ഘാടനം നിർവഹിച്ചു. ഓണാഘോഷത്തിന്റെ ഭാഗമായി 30 അന്തേവാസികൾക്കും  മൂന്ന് പതിനൊന്നാം ക്ലാസ് വിദ്യാർത്ഥികൾക്കും മൂന്ന്, ഏഴ് ക്ലാസുകളിലെ ഓരോ വിദ്യാർത്ഥികൾക്കുമാണ് ഓണക്കോടി വിതരണം ചെയ്തത്.