തരിയോട് മൃഗാശുപത്രിയിൽ ഗ്രാമപഞ്ചായത്തിന്റെ നേതൃത്വത്തിൽ ആശുപത്രി വികസന സമിതി രൂപീകരിച്ച് പ്രവർത്തനം തുടങ്ങി. ക്ഷീര, മൃഗസംരക്ഷണ മേഖലകളിൽ സർക്കാർ തലത്തിലും തദ്ദേശസ്ഥാപന തലത്തിലും നടപ്പാക്കുന്ന വിവിധ പദ്ധതികളെക്കുറിച്ചും ആശുപത്രിയുടെ വികസന പ്രവർത്തനങ്ങളെ സംബന്ധിച്ചും കർഷക ക്ഷേമ പ്രവർത്തനങ്ങളെക്കുറിച്ചും യോഗം ചർച്ച ചെയ്തു. 

ആശുപത്രിയുടെ അടിസ്ഥാന സൗകര്യ വികസനത്തിനും വികസന സമിതി പ്രവർത്തനങ്ങൾക്കും ആവശ്യമായ ധന സമാഹരണ മാർഗങ്ങളെക്കുറിച്ചുള്ള നിർദ്ദേശങ്ങൾ തയ്യാറാക്കുന്നതിന് കർമ്മ പദ്ധതി തയ്യാറാക്കും. സമിതി അംഗങ്ങളും സ്ഥിരം ക്ഷണിതാക്കളും യോഗത്തിൽ സംബന്ധിച്ചു. 

ഈ സര്‍ക്കാരിന്റെ കാലത്ത് അനുമതി ലഭിച്ചത് 4 മെഡിക്കല്‍ കോളേജുകള്‍ക്ക്

2025 ഒക്ടോബര്‍ 17, 18, 19 തീയ്യതികളിൽ കൽപ്പറ്റയിൽ നടക്കാനിരിക്കുന്ന സംസ്ഥാന എക്സൈസ് കായിക മേളയുടെ സംഘാടക സമിതി യോഗം സെപ്റ്റംബര്‍ എട്ടിന് ഉച്ച രണ്ട് മണിക്ക് നടക്കും. സിവിൽ സ്റ്റേഷനിലെ എപിജെ അബ്ദുൽ കലാം മെമ്മോറിയൽ ഹാളിൽ ചേരുന്ന യോഗം പട്ടികജാതി പട്ടിക വര്‍ഗ പിന്നോക്ക ക്ഷേമ വകുപ്പ് മന്ത്രി ഒ ആര്‍ കേളു ഉദ്ഘാടനം ചെയ്യുമെന്ന് ഡെപ്യൂട്ടി എക്സൈസ് കമ്മീഷണര്‍ അറിയിച്ചു.

ജില്ലാ ശിശുക്ഷേമ സമിതിയുടെ ആഭിമുഖ്യത്തിൽ കുഞ്ഞോം ഉന്നതിയിൽ ഓണാഘോഷ പരിപാടികൾ സംഘടിപ്പിച്ചു. തൊണ്ടർനാട് ഗ്രാമപഞ്ചായത്ത് പ്രസിഡന്റ് അംബിക ഷാജി ഉദ്ഘാടനം ചെയ്തു. ഉന്നതിയിൽ പ്രവർത്തിക്കുന്ന സാമൂഹ്യ പഠന മുറിയിലെ കുട്ടികളും രക്ഷിതാക്കളും ചേർന്ന് പൂക്കളമൊരുക്കി. വട്ടക്കളി, സുന്ദരിക്ക് പൊട്ടു തൊടൽ, കസേര കളി, ബലൂൺ പൊട്ടിക്കൽ തുടങ്ങി  ഉന്നതിയിലെ അംഗങ്ങൾ പങ്കെടുത്ത വിവിധ കളികളും കലാപരിപാടികളും അരങ്ങേറി. സാക്ഷരത പ്രേരക്ക് ബൈജു ഐസകിന്റെ നേതൃത്വത്തിലുളള ഗാനമേളയും തുടർന്ന് ഓണസദ്യയും സംഘടിപ്പിച്ചു. 

നാഷണൽ ട്രസ്റ്റ് ആക്ട് മുഖേന രജിസ്റ്റർ ചെയ്ത സംഘടനകൾ വഴി സംസ്ഥാനത്തെ അംഗപരിമിതർക്ക് ആരോഗ്യ ഇൻഷുറൻസ് നൽകുന്ന നിരാമയ ഇൻഷൂറൻസ് പദ്ധതിയിലേക്കുള്ള അപേക്ഷകൾ നൽകാം. പദ്ധതിയുടെ പ്രീമിയം തുക സാമൂഹ്യനീതി വകുപ്പ് മുഖേന അനുവദിച്ചുവന്നിരുന്നത് പുനരാരംഭിച്ച സാഹചര്യത്തിൽ ന്യൂ രജിസ്ട്രേഷൻ/ റിന്യൂവൽ എന്നിവ എൻജിഒകൾ മുഖേന പ്രോസസ് ചെയ്യുന്നതിന് തീരുമാനിച്ചിട്ടുണ്ട്.  അപേക്ഷകൾ വകുപ്പിന്റെ സുനീതി പോർട്ടൽ suneethi.sjd.kerala.gov.in മുഖേനയാണ് സമർപ്പിക്കേണ്ടത്. ഒരു ലക്ഷം രൂപ വരെ വാർഷിക ചികിത്സാ ചെലവ് ലഭിക്കും.

ഓണം ഗ്രീന്‍ പ്രോട്ടോക്കോള്‍ ആഘോഷങ്ങളുടെ ഭാഗമായി സെപ്റ്റംബര്‍ ഒന്ന് മുതൽ ഏഴ് വരെ ശുചിത്വ പൂക്കളം 2025 എന്ന പേരില്‍ ഫോട്ടോ ചലഞ്ച് മത്സരം സംഘടിപ്പിക്കുന്നു. സമത്വം, ഐക്യം, പ്രകൃതിയോടുള്ള സമന്വയം എന്നീ മൂല്യങ്ങള്‍ ഉള്‍പ്പെടുത്തിയ മാലിന്യ പരിപാലനവുമായി ബന്ധപ്പെട്ട ക്രിയാത്മക ആശയങ്ങള്‍ പ്രോത്സാഹിപ്പിക്കാനാണ് മത്സരത്തിലൂടെ ലക്ഷ്യമിടുന്നത്.

സംസ്ഥാന വിനോദസഞ്ചാര വകുപ്പിന്റെ സഹായത്തോടെ  ജില്ലാ ടൂറിസം പ്രൊമോഷൻ കൗൺസിലിന്റെ ആഭിമുഖ്യത്തിൽ ജില്ലാ ഭരണകൂടവും ത്രിതല പഞ്ചായത്ത് സ്ഥാപനങ്ങളും ചേർന്ന് സംഘടിപ്പിക്കുന്ന ഓണം മെഗാ ഫെസ്റ്റിവൽ ഇന്ന് (സെപ്റ്റംബർ മൂന്ന്) ആരംഭിക്കും. സെപ്റ്റംബർ ഒൻപത് വരെ ജില്ലയിലെ വിവിധ കേന്ദ്രങ്ങളിലായാണ് പരിപാടികൾ നടക്കുക.ഡെസ്റ്റിനേഷൻ മാനേജ്‌മെന്റ് കൗൺസിലുകൾ, ടൂറിസം ക്ലബ്ബുകൾ, കുടുംബശ്രീ, വിവിധ ടൂറിസം സംഘടനകൾ, സന്നദ്ധ സംഘടനകൾ എന്നിവയുടെ സഹകരണത്തോടെയാണ് ആഘോഷ പരിപാടികൾ ഒരുക്കുക. മൂന്ന് താലൂക്ക് കേന്ദ്രങ്ങളിൽ ഓണം മെഗാ സാംസ്‌കാരിക കലാ-കായിക പരിപാടികൾ എന്നിവ അരങ്ങേറും.

കാലാവസ്ഥ വ്യതിയാനവും മനുഷ്യ ആരോഗ്യവും ദേശീയ പരിപാടിയുടെ ജില്ലാ ടാസ്ക് ഫോഴ്സ്, ജില്ലാ ക്ഷയരോഗ നിവാരണ ബോർഡ്, എച്ച് ഐ വി എയ്ഡ്സ് ഇന്റർ സെക്ടറൽ യോഗങ്ങൾ ജില്ലാ കലക്ടർ ഡി ആർ മേഘശ്രീയുടെ അദ്ധ്യക്ഷതയിൽ കലക്ടറേറ്റ് മിനി കോൺഫറൻസ് ഹാളിൽ ചേർന്നു. 

കാലാവസ്ഥ വ്യതിയാനം മൂലമുള്ള ആരോഗ്യ പ്രശ്നങ്ങൾ, പുതുതായി ആവിർഭവിക്കുന്നതും പുനരാവിർഭവിക്കുന്നതുമായ രോഗങ്ങൾ, അന്തരീക്ഷ മലിനീകരണം, കാർബൺ ന്യൂട്രൽ സ്ഥാപനങ്ങളിലേക്കുള്ള പരിവർത്തനം എന്നീ വിഷയങ്ങളിൽ വിവിധ വകുപ്പുകൾ ചേർന്ന് പ്രവർത്തിക്കണമെന്ന് ജില്ലാ കലക്ടർ പറഞ്ഞു. 

വെള്ളമുണ്ട ഇലക്ട്രിക്കൽ സെക്ഷൻ പരിധിയിൽ ഇന്ന് (സെപ്റ്റംബര്‍ 3) രാവിലെ 8.30 മുതൽ വൈകിട്ട് 5 വരെ എട്ടേന്നാൽ ട്രാൻസ്‌ഫോർമർ പരിധിയിൽ വൈദ്യുതി വിതരണം ഭാഗികമായി തടസപ്പെടും.

ജില്ലാ വനിത ശിശു വികസന ഓഫീസർക്കുവേണ്ടി കരാർ വ്യവസ്ഥയിൽ വാഹനം എടുക്കുന്നതിന് ടെൻഡർ ക്ഷണിച്ചു. ടെണ്ടറുകൾ സെപ്റ്റംബർ 15 ഉച്ച രണ്ട് വരെ സ്വീകരിക്കും. കൂടുതൽ വിവരങ്ങൾക്ക് കളക്ടറേറ്റിൽ പ്രവർത്തിക്കുന്ന ജില്ലാ വനിതശിശു വികസന ഓഫീസുമായി ബന്ധപെടണം. ഫോൺ: 04936 296362, 9497485854.