അമ്പലവയൽ ഗ്രാമപഞ്ചായത്തിലെ പുതിയ ഓഫീസ് കെട്ടിടവും നവീകരിച്ച കുടുംബശ്രീ ഓഫീസ് കെട്ടിടവും സുൽത്താൻ ബത്തേരി ബ്ലോക്ക്‌ പഞ്ചായത്ത് പ്രസിഡന്റ്‌ സി. അസൈനാർ ഉദ്ഘാടനം ചെയ്തു. കുടുംബശ്രീ  തനത് ഫണ്ട് ഉപയോഗിച്ച് നവീകരിച്ച സി.ഡി.എസ് ഓഫീസിന്റെയും മാതൃകാ ജൻഡർ റിസോഴ്സ് സെന്ററിന്റെയും ഉദ്ഘാടനവും ചടങ്ങിൽവെച്ച് നടന്നു.

21-ാമത് സംസ്ഥാന എക്സൈസ് കലാകായിക മേള ഒക്ടോബര്‍ 17, 18, 19 തീയ്യതികളിൽ വയനാട് ജില്ലയിൽ നടക്കും. കലാമത്സരങ്ങൾ മുണ്ടേരി ജി.വി.എച്ച്.എസ്.എസിലും കായിക ഇനങ്ങൾ മരവയലിലെ എം.കെ ജിനചന്ദ്രൻ മെമ്മോറിയൽ ജില്ലാ സ്റ്റേഡിയത്തിലുമായിരിക്കും നടക്കുക. ഇതാദ്യമായാണ് സംസ്ഥാന കലാകായിക മേള വയനാട് ജില്ലയിൽ നടക്കുന്നത്. തിങ്കളാഴ്ച കൽപ്പറ്റ ജില്ലാ ആസുത്രണ ഭവൻ എപിജെ ഹാളിൽ ജില്ലാ പഞ്ചായത്ത് പ്രസിഡന്റ് സംഷാദ് മരക്കാറുടെ അധ്യക്ഷതയിൽ ചേര്‍ന്ന യോഗത്തിൽ സംഘാടക സമിതിക്ക് രൂപം നൽകി. ടി സിദ്ദീഖ് എംഎൽഎ യോഗം ഉദ്ഘാടനം ചെയ്തു.

ജില്ലാ സാക്ഷരതാ മിഷന്റെ നേതൃത്വത്തിൽ ലോക സാക്ഷരതാ ദിനാചരണം സംഘടിപ്പിച്ചു. ജില്ലാ പഞ്ചായത്ത് ഹാളിൽ നടന്ന പരിപാടി ജില്ലാ പഞ്ചായത്ത് പ്രസിഡന്റ് സംഷാദ് മരക്കാർ ഉദ്ഘാടനം ചെയ്തു. ജില്ലയിലെ നിരക്ഷരരെ സാക്ഷരരാക്കാൻ ലക്ഷ്യമിട്ട് ന്യൂ ഇന്ത്യാ ലിറ്ററസി പ്രോഗ്രാമിൻന്റെ ഭാഗമായി സംഘടിപ്പിക്കുന്ന 230 ക്ലാസുകൾക്ക് ലോക സാക്ഷരതാ ദിനത്തിൽ  തുടക്കം കുറിച്ചു. സന്നദ്ധരായ അധ്യാപകരാണ് ക്ലാസുകൾ നൽകുക.

സംസ്ഥാന സാമൂഹ്യനീതി വകുപ്പ് ഏര്‍പ്പെടുത്തിയ വയോസേവന പുരസ്കാരങ്ങൾക്ക് നാമനിര്‍ദേശങ്ങൾ ക്ഷണിച്ചു. വയോജനങ്ങളുടെ ക്ഷേമവും സംരക്ഷണവും  ഉറപ്പു വരുത്തുന്നതിനായി വിവിധ  പദ്ധതികളും  പ്രവര്‍ത്തനങ്ങളും നടപ്പാക്കി  മികച്ച  പ്രകടനം കാഴ്ച്ചവെച്ച  കോര്‍പറേഷൻ, മുനിസിപ്പാലിറ്റി, ജില്ലാ പഞ്ചായത്ത്, ബ്ലോക്ക് പഞ്ചായത്ത്, ഗ്രാമ പഞ്ചായത്ത് എന്നീ അഞ്ച് വിഭാഗങ്ങളിലായാണ് ഈ വര്‍ഷം പുരസ്കാരങ്ങൾ നൽകുന്നത്.   നാമനിര്‍ദേശങ്ങള്‍ 2025 സെപ്റ്റംബര്‍ 12നകം സാമൂഹ്യനീതി ഡയറക്ടറേറ്റിലോ അല്ലെങ്കിൽ ജില്ലാ സാമൂഹ്യനീതി ഓഫീസര്‍ക്കോ നൽകണം.

ജില്ലാ നിർമ്മിതി കേന്ദ്രത്തിൽ കരാറടിസ്ഥാനത്തിൽ സൈറ്റ് എൻജിനീയർ തസ്തികയിലേക്ക് നിയമനം നടത്തുന്നു. ബിടെക് സിവിൽ എൻജിനീയറിങ് യോഗ്യതയുള്ളവർക്ക് അപേക്ഷിക്കാം. താത്പര്യമുള്ള ഉദ്യോഗാർത്ഥികൾ സെപ്റ്റംബർ 25നകം മെമ്പർ സെക്രട്ടറി, ജില്ലാ നിർമ്മിതി കേന്ദ്രം, ആർ.ഡി.ഒ ഓഫീസ് പരിസരം, മാനന്തവാടി - 670 645 എന്ന വിലാസത്തിൽ അപേക്ഷ നൽകണം. ഫോൺ-04935  244700

വെള്ളമുണ്ട ഇലക്ട്രിക്കൽ സെക്ഷൻ പരിധിയിൽ അറ്റകുറ്റ പ്രവൃത്തി നടക്കുന്നതിനാൽ വെള്ളമുണ്ട - മംഗലശ്ശേരി മല റോഡ് ഭാഗങ്ങളിൽ ഇന്ന് (സെപ്റ്റംബർ 9) രാവിലെ 8.30 മുതൽ വൈകിട്ട് അഞ്ച് വരെ വൈദ്യുതി വിതരണം പൂർണമായോ ഭാഗികമായോ  മുടങ്ങും.

കൽപ്പറ്റ എൻ.എം.എസ്.എം ഗവ. കോളജിൽ എം.എ ഹിസ്റ്ററി, എം. കോം കോഴ്സുകളിൽ എസ്.സി വിഭാഗത്തിന് സീറ്റുകൾ ഒഴിവുണ്ട്.  കാലിക്കറ്റ് സർവകലാശാല പി.ജി പ്രവേശനത്തിന് രജിസ്റ്റർ ചെയ്തിട്ടുള്ള താത്പര്യമുള്ള വിദ്യാർത്ഥികൾ സെപ്റ്റംബർ 10ന് രാവിലെ 11ന് കോളജ് ഓഫീസിൽ എത്തണം. ഫോൺ - 04936 204569

തോൽപ്പെട്ടി ഗവ ഹൈസ്കൂളിൽ എച്ച്.എസ്.ടി ഇംഗ്ലീഷ് തസ്തികയിലേക്ക് താത്കാലിക നിയമനം നടത്തുന്നു. താത്പര്യമുള്ള ഉദ്യോഗാർത്ഥികൾ അസൽ സർട്ടിഫിക്കറ്റ് സഹിതം സെപ്റ്റംബർ 10 രാവിലെ 11.30ന്  സ്കൂൾ ഓഫീസിൽ നടക്കുന്ന കൂടിക്കാഴ്ചയിൽ പങ്കെടുക്കണം. ഫോൺ -9946598351

മാനന്തവാടി ഗവ. കോളേജിൽ ഇംഗ്ലീഷ് ഗസ്റ്റ് അധ്യാപക ഒഴിവിലേക്ക് സെപ്റ്റംബര്‍ 12 രാവിലെ 10.30ന് കോളേജ് ഓഫീസിൽ വെച്ച് അഭിമുഖം നടത്തുന്നു. കോഴിക്കോട് കോളേജ് വിദ്യാഭ്യാസ ഡെപ്യൂട്ടി ഡയറക്ടറുടെ ഓഫീസ് തയ്യാറാക്കിയിട്ടുള്ള പാനലിൽ ഉൾപ്പെട്ട താത്പര്യമുള്ള ഉദ്യോഗാര്‍ത്ഥികൾക്ക് യോഗ്യതാ സര്‍ഫിക്കറ്റുകളുടെ അസലും ഒരു പകര്‍പ്പുമായി അഭിമുഖത്തിൽ പങ്കെടുക്കാം. ഫോൺ - 04935 240351

കൽപ്പറ്റ ജി.വി.എച്ച്.എസ്.എസിൽ യു.പി.എസ്.ടി തസ്തികയിൽ ദിവസവേതനാടിസ്ഥാനത്തിൽ അധ്യാപക നിയമനത്തിന് അപേക്ഷ ക്ഷണിച്ചു. യോഗ്യരായ ഉദ്യോഗാര്‍ത്ഥികൾ സെപ്റ്റംബര്‍ 9 ഉച്ചയ്ക്ക് 2 മണിക്ക് അസൽ സര്‍ട്ടിഫിക്കറ്റുകളും അവയുടെ പകര്‍പ്പും സഹിതം ഹൈസ്കൂൾ ഓഫീസിൽ എത്തിച്ചേരേണ്ടതാണ്.