കഴിഞ്ഞ ഒൻപത് വർഷത്തിനിടയിൽ സംസ്ഥാനത്തെ 409,995 കുടുംബങ്ങളെ ഭൂമിക്ക് അവകാശികളാക്കാൻ സർക്കാരിനായെന്ന് റവന്യൂ ഭവനനിർമ്മാണ വകുപ്പ് മന്ത്രി കെ. രാജൻ പറഞ്ഞു. കൂത്തുപറമ്പ് നിയോജകമണ്ഡലം പട്ടയമേള ഉദ്ഘാടനം ചെയ്യുകയായിരുന്നു മന്ത്രി. 

പാട്യം ഗ്രാമപഞ്ചായത്തിലെ ഹരിതകര്‍മ സേനാംഗങ്ങള്‍ക്കുള്ള ഉത്സവ ബത്തയും ബോണസിന്റെയും വിതരണോദ്ഘാടനം ഗ്രാമപഞ്ചായത്ത് പ്രസിഡന്റ് എന്‍.വി ഷിനിജ നിര്‍വഹിച്ചു. ആരോഗ്യ വിദ്യാഭ്യാസ സ്റ്റാന്‍ഡിംഗ്് കമ്മിറ്റി ചെയര്‍പേഴ്‌സണ്‍ ശോഭ കോമത്ത് അധ്യക്ഷയായി. കണ്‍സോര്‍ഷ്യം അക്കൗണ്ടില്‍ നിന്നുള്ള പതിനയ്യായിരം രൂപയും പഞ്ചായത്തില്‍ നിന്നും ഉത്സവ ബത്തയായി അനുവദിച്ച ആയിരത്തി ഇരുന്നൂറ്റി അന്‍പത് രൂപ യും ചേര്‍ത്ത് 16,250 രൂപയാണ് ബോണസ്. പഞ്ചായത്തിലെ ഇരുപത്തഞ്ച് ഹരിതകര്‍മസേന അംഗങ്ങള്‍ക്കാണ് ബോണസ്.

കേരള കാര്‍ഷിക വികസന കര്‍ഷക ക്ഷേമ വകുപ്പിന്റെ ഓണ വിപണി ഇടപെടലിന്റെ ഭാഗമായി നടത്തുന്ന ഓണ സമൃദ്ധി കര്‍ഷകചന്തയുടെ  ജില്ലാതല ഉദ്ഘാടനം എം വിജിന്‍ എം എല്‍ എ നിര്‍വഹിച്ചു. ചെറുതാഴം ഗ്രാമപഞ്ചായത്ത് കൃഷിഭവന്‍ ഇക്കോ ഷോപ്പില്‍ നടന്ന പരിപാടിയില്‍ ഗ്രാമപഞ്ചായത്ത് പ്രസിഡന്റ് എം ശ്രീധരന്‍ അധ്യക്ഷനായി. ബ്ലോക്ക് പഞ്ചായത്ത് വൈസ് പ്രസിഡന്റ് ഡി.വിമല ആദ്യ വില്‍പന നടത്തി. 
മാര്‍ക്കറ്റ് വിലയുടെ 30 ശതമാനം വിലക്കുറവിലാണ് പച്ചക്കറി ഉല്‍പന്നങ്ങള്‍ വിപണനം നടത്തുന്നത്. ഇത്തവണ കേരള ഗ്രോ ബ്രാന്‍ഡ് ഉല്‍പ്പന്നങ്ങള്‍ കൂടി കര്‍ഷകചന്ത വഴി ഗുണഭോക്താക്കളിലേക്ക് എത്തിക്കുന്നുണ്ട്.

വെള്ളമുണ്ട ഇലക്ട്രിക്കല്‍ സെക്ഷനിലെ വെള്ളമുണ്ട-കുഴല്‍കിണര്‍  റോഡ് പ്രദേശങ്ങളില്‍ ഇന്ന് (സെപ്റ്റംബര്‍ 2) രാവിലെ 8.30 മുതല്‍ വൈകിട്ട് അഞ്ച് വരെ  വൈദ്യുതി വിതരണം ഭാഗികമായി മുടങ്ങും

ജില്ലയില്‍ പച്ചത്തേയിലയുടെ ഓഗസ്റ്റ് മാസത്തെ വില 12.52 രൂപയായി നിശ്ചയിച്ചതായി അസിസ്റ്റന്റ് ഡയറക്ടര്‍ ആര്‍ വരുണ്‍ മേനോന്‍ അറിയിച്ചു. എല്ലാ ഫാക്ടറികളും പച്ചത്തേയിലയുടെ വില തീര്‍പ്പാക്കുമ്പോള്‍ ശരാശരി വില പാലിച്ച് വിതരണകാര്‍ക്ക് നല്‍കണമെന്നും അസിസ്റ്റന്റ് ഡയറക്ടര്‍ അറിയിച്ചു

ജില്ലാ ശിശു സംരക്ഷണ യൂണിറ്റിന്റെയും മാനന്തവാടി ഐ.സി.ഡി.എസിന്റെയും സംയുക്താഭിമുഖ്യത്തില്‍ ഔവര്‍ റെസ്‌പോണ്‍സിബിലിറ്റി ടു ചില്‍ഡ്രന്‍ പദ്ധതിയുടെ ഭാഗമായി  കുട്ടികള്‍ക്കായി ലഹരി വിരുദ്ധ ബോധവത്കരണ ക്ലാസ് നല്‍കി. മാനന്തവാടി ഗ്രീനന്‍സ് റസിഡന്‍സില്‍ നടന്ന പരിപാടി ബ്ലോക്ക്പഞ്ചായത്ത് പ്രസിഡന്റ് ജസ്റ്റിന്‍ ബേബി ഉദ്ഘാടനം ചെയ്തു. മാനന്തവാടി സി.ഡി.പി.ഒ സിന്ധു, ഒ.ആര്‍.സി പ്രൊജക്റ്റ് കോ -ഓര്‍ഡിനേറ്റര്‍  എം.വിന്ദുജ,  ഒ.ആര്‍.സി പരിശീലകാരായ  അബ്ദുല്‍ ഗഫൂര്‍, അബ്ദുല്‍ നിസാര്‍ എന്നിവര്‍ ക്ലാസുകള്‍ നയിച്ചു.

തരിയോട് ഗ്രാമപഞ്ചായത്തിലെ ഹരിതകര്‍മ സേനാംഗങ്ങള്‍ക്ക് ഓണം ബോണസ്  വിതരണം ചെയ്തു. സേനാംഗങ്ങള്‍ക്ക് 12 ശതമാനം ഓണം ബോണസും ഗ്രാമപഞ്ചായത്തിന്റെ വിഹിതം ഉള്‍പ്പെടെ 13,000 രൂപ വരെയാണ് ബോണായി നല്‍കിയത്. ബോണസ് വിതരണം തരിയോട് ഗ്രാമപഞ്ചായത്ത് പ്രസിഡന്റ് ഷമീം പാറക്കണ്ടി നിര്‍വഹിച്ചു. വൈസ് പ്രസിഡന്റ് പുഷ്പ മനോജ് അധ്യക്ഷയായി.

കുടുംബശ്രീ ജില്ലാ മിഷന്‍ ബാലസഭ കുട്ടികള്‍ക്കായി മഴയുത്സവം ജില്ലാകലാ സാഹിത്യ മത്സരങ്ങളും സാഹിത്യ ക്യാമ്പും സംഘടിപ്പിച്ചു. മാനന്തവാടി ഗവ വൊക്കേഷണല്‍ ഹയര്‍സെക്കന്‍ഡറി സ്‌കൂളില്‍  സംഘടിപ്പിച്ച ഏകദിന ക്യാമ്പ്  ജില്ലാപഞ്ചായത്ത് ക്ഷേമകാര്യ സ്റ്റാന്റിങ് കമ്മിറ്റി ചെയര്‍മാന്‍ ജുനൈദ് കൈപ്പാണി ഉദ്ഘാടനം ചെയ്തു.  കുട്ടികള്‍ക്കായി കഥാ- കവിതരചന, അടിക്കുറിപ്പ്, പെന്‍സില്‍ ഡ്രോയിങ്, വാട്ടര്‍ കളര്‍, കാര്‍ട്ടൂണ്‍, കൊളാഷ് മത്സരങ്ങള്‍ സംഘടിപ്പിച്ചു.

തൃശ്ശിലേരി ഗവ മോഡല്‍ ഡിഗ്രി കോളെജില്‍ (റൂസ) മലയാള വിഭാഗത്തിലേക്ക് അധ്യാപക നിയമനം നടത്തുന്നു. കോളെജ് വിദ്യാഭ്യാസ വകുപ്പ് കോഴിക്കോട് ഉപ ഡയറക്ടറേറ്റില്‍ രജിസ്റ്റര്‍ ചെയ്ത ഉദ്യോഗാര്‍ത്ഥികള്‍ക്ക് അപേക്ഷിക്കാം.  താത്പര്യമുള്ളവര്‍ ബയോഡേറ്റയും സര്‍ട്ടിഫിക്കറ്റുകളുടെ അസലും പകര്‍പ്പുമായി സെപ്റ്റംബര്‍ എട്ടിന് രാവിലെ 11 ന് കോളെജ് ഓഫീസില്‍ നടത്തുന്ന കൂടിക്കാഴ്ച്ചയില്‍ പങ്കെടുക്കണം.നെറ്റ്/പിഎച്ച്ഡിക്കാരുടെ അഭാവത്തില്‍ മറ്റുള്ളവരെയും പരിഗണിക്കും. ഫോണ്‍- 9496704769

മന്ത്രി ഒ.ആര്‍ കേളുവിന്റെ പ്രത്യേക വികസന നിധിയിലുള്‍പ്പെടുത്തി തൊണ്ടര്‍നാട് ഗ്രാമപഞ്ചായത്തിലെ ഉദിരിച്ചിറ റോഡ് ടാറിങ്
പ്രവര്‍ത്തിക്ക് 30 ലക്ഷം രൂപയുടെ ഭരണാനുമതി ലഭിച്ചു. ഐ.സി ബാലകൃഷ്ണന്‍ എം.എല്‍.എയുടെ പ്രതേക വികസന നിധിയിലുള്‍പ്പെടുത്തി മീനങ്ങാടി ഗ്രാമപഞ്ചായത്തിലെ സി.സി ഭൂദാനം സ്‌കൂള്‍ കെട്ടിട നിര്‍മാണത്തിന് 20 ലക്ഷം രൂപയുടെയും പൂതാടി ഗ്രാമപഞ്ചായത്തിലെ വാകേരി-പാണുവേലില്‍ റോഡ് കോണ്‍ക്രീറ്റ് പ്രവര്‍ത്തിക്ക് അഞ്ച് ലക്ഷം രൂപയുടെയും ഭരണാനുമതി ലഭിച്ചു.