ക്ഷീരവികസന വകുപ്പിന്റെ 2025-26 വർഷത്തെ ജില്ലാക്ഷീര സംഗമത്തിന്റെ ഭാഗമായി നടക്കുന്ന 'നാട്ടിലെ ശാസ്ത്രം' പരിപാടിയിൽ കാർഷിക മേഖലയിലെ ചെറുകിട കർഷകർക്ക് ഫലപ്രദമായി ഉപയോഗിക്കാനായി പ്രാദേശികമായി വികസിപ്പിച്ചെടുത്ത സാങ്കേതിക വിദ്യ കൈവശമുള്ള ഉടമസ്ഥരിൽനിന്നും അപേക്ഷ ക്ഷണിച്ചു. സാങ്കേതികവിദ്യ സംബന്ധിച്ച ലഘുവിവരണം സെപ്റ്റംബർ 20നകം jillaksheerasangamam2526@gmail.com എന്ന ഇ-മെയിൽ വിലാസത്തിലോ അടുത്തുള്ള ക്ഷീരവികസന യൂണിറ്റിലോ ലഭിക്കണം. ഫോൺ: 0497 2707859 

 ജില്ലാ ഭരണകൂടവും ജില്ലാ ടൂറിസം പ്രൊമോഷൻ കൗൺസിലും ചേർന്നു നടത്തുന്ന ജില്ലാതല ഓണാഘോഷ പരിപാടികളുടെ ഭാഗമായുള്ള അത്തപ്പൂക്കള മത്സരം സെപ്റ്റംബർ മൂന്നിന്(ബുധൻ) രാവിലെ ഒൻപതു മുതൽ 12 വരെ വൈഎംസിഎ ഹാളിൽ നടക്കും.
കോട്ടയം വൈ.എം.സി.എ ഗാന്ധിനഗർ റോട്ടറി ക്ലബ്ബുമായി ചേർന്ന് വിവിധ സർക്കാർ വകുപ്പുകൾക്കും സ്ഥാപനങ്ങൾക്കും ക്ലബ്ബുകൾക്കുമായാണ് മത്സരം നടത്തുന്നത്.

ജില്ലാതല ഓണാഘോഷപരിപാടി ചിങ്ങനിലാവ് 2025ന് ബുധനാഴ്ച (സെപ്റ്റംബർ 3) തുടക്കം. ജില്ലാ ഭരണകൂടവും ജില്ലാ ടൂറിസം പ്രൊമോഷൻ കൗൺസിലും കോട്ടയം നഗരസഭയും സംയുക്തമായി സെപ്റ്റംബർ  എട്ടു വരെ തിരുനക്കര മൈതാനത്താണ് ഓണാഘോഷം സംഘടിപ്പിക്കുന്നത്.

നാളെ വൈകുന്നേരം ആറിന് നടക്കുന്ന ചടങ്ങിൽ  സഹകരണം-തുറമുഖം-ദേവസ്വം മന്ത്രി  വി.എൻ. വാസവൻ ഉദ്ഘാടനം നിർവഹിക്കും. തിരുവഞ്ചൂർ രാധാകൃഷ്ണൻ എംഎൽഎ. അധ്യക്ഷത വഹിക്കും.
ഗവൺമെൻറ് ചീഫ് വിപ് ഡോ.എൻ. ജയരാജ് ഓണസന്ദേശം നൽകും.

നാട്ടകം സർക്കാർ പോളിടെക്‌നിക് കോളജിലെ അഡ്മിനിസ്‌ട്രേറ്റീവ് ഓഫീസിലെ ആവശ്യത്തിനുപയോഗിക്കുന്ന 10 കെ.വി.എ. യു.പി.എസിന്റെ ഏഴു ബാറ്ററികൾ ബൈബാക് സിസ്റ്റം മുഖേന വാങ്ങിക്കുന്നതിന് ക്വട്ടേഷൻ ക്ഷണിച്ചു. പ്രിൻസിപ്പാൾ, സർക്കാർ പോളിടെക്‌നിക് കോളജ്, നാട്ടകം, പി.ഒ, കോട്ടയം-686013 എന്ന വിലാസത്തിൽ നേരിട്ടോ തപാൽ മുഖേനയോ നൽകണം. സെപ്റ്റംബർ 11 ഉച്ചയ്ക്ക് രണ്ടു മണിവരെ ക്വട്ടേഷൻ സ്വീകരിക്കും. അന്നേദിവസം മൂന്നു മണിക്ക് തുറക്കും. ഫോൺ:0481-2361884.
 

തിരുവല്ല കുന്നന്താനത്ത് പ്രവർത്തിക്കുന്ന അസാപ്പ് കമ്യൂണിറ്റി സ്‌കിൽ പാർക്കിൽ ആറുമാസ ഇലക്ട്രിക്ക് വാഹന സർവീസ് ടെക്‌നീഷ്യൻ കോഴ്‌സിലെ 10 സീറ്റുകളിലേയ്ക്കുള്ള അഡ്മിഷന് അപേക്ഷ ക്ഷണിച്ചു. ക്ലാസ്സുകൾ സെപ്തംബർ 29ന് ആരംഭിക്കും. യോഗ്യത: പ്ലസ് ടു/ഡിപ്ലോമ/ഐ.ടി.ഐ. ഹോസ്റ്റൽ സൗകര്യവും ഉണ്ടായിരിക്കും. കൂടുതൽ വിവരങ്ങൾക്ക് ഫോൺ: 9495999688,9496085912. 

മെഡിക്കൽ/ എൻജിനീയറിംഗ് എൻട്രൻസ് പരീക്ഷാ പരിശീലനത്തിന് ആറു മാസത്തിൽ കുറയാത്ത കാലയളവിൽ പങ്കെടുത്ത് എൻട്രൻസ് പരീക്ഷ എഴുതിയ വിമുക്തഭടന്മാരുടെ (ആർമി/നേവി/എയർഫോഴ്‌സ്) മക്കൾക്കുള്ള സാമ്പത്തിക സഹായത്തിന് അപേക്ഷിക്കം. സർവീസ് പ്ലസിൽ serviceonline.gov.in/kerala എന്ന ലിങ്ക് മുഖേന ഓൺലൈനായി ഒക്ടോബർ 15ന് വൈകിട്ട് അഞ്ചു മണിക്ക് മുൻപായി അപേക്ഷിക്കണം. ഫോൺ: 0481 2371187.

കോട്ടയം മെഡിക്കൽ കോളജ് ആശുപത്രി എബിസി ബ്ലോക്കിലെ 2,6,9 വാർഡുകളോടുചേർന്നുള്ള ടോയ്ലറ്റ് ബ്ലോക്ക് പൊളിച്ചുവിൽക്കാൻ സെപ്റ്റംബർ മൂന്നിന് രാവിലെ 11.30ന് പരസ്യ ലേലം നടത്തും. പങ്കെടുക്കാൻ താത്പര്യമുള്ളവർ അന്നു രാവിലെ 11നു മുൻപായി അയ്യായിരം രൂപ നിരതദ്രവ്യമായി നൽകി ടോക്കൺ എടുക്കണം. ഫോൺ: 0481 2597279,2597284.

 പ്രീ-സ്‌കൂൾ കുട്ടികളുടെ പരിഷ്‌കരിച്ച മാതൃകാ ഭക്ഷണ മെനു അനുസരിച്ചുള്ള ജില്ലാതല പരിശീലനം പാലാ സെന്റ് ജോസഫ്സ് കോളജിലെ ഇൻസ്റ്റിറ്റ്യൂട്ട് ഓഫ് ഹോട്ടൽ മാനേജ്മെന്റ് ആൻഡ് ടെക്നോളജി സെന്ററിന്റെ ലാബിൽ വച്ച് നടത്തി. ജില്ലാതല ഐ.സി.ഡി.എസ്. സെൽ പ്രോഗ്രാം ഓഫീസിന്റെ നേതൃത്വത്തിൽ വനിതാ ശിശുവികസന വകുപ്പിലെ 60 പേർക്കാണ് പരിശീലനം നൽകിയത്. അങ്കണവാടികളിൽ വിതരണം ചെയ്യുന്ന ഭക്ഷണത്തിൽ പഞ്ചസാര പൂർണ്ണമായും ഒഴിവാക്കി വളരെ കുറഞ്ഞ അളവിൽ ശർക്കര ഉൾപ്പെടുത്തിയും ഉപ്പിന്റെയും എണ്ണയുടെയും അളവ് കുറയ്ക്കാനുമുള്ള കേന്ദ്രസർക്കാരിന്റെ മാർഗനിർദേശങ്ങൾ പാലിച്ചാണ് പരിഷ്‌കരിച്ച മാതൃകാ ഭക്ഷണ മെനു തയ്യാറാക്കിയിട്ടുള്ളത്.

പാമ്പാടി കമ്മ്യൂണിറ്റി സ്‌കിൽ പാർക്കും ജില്ലാ വനിത ശിശുവികസന വകുപ്പും ചേർന്ന് സ്‌കിൽ പാർക്കിൽ വി.ആർ. ഡെവലപ്പർ വിത്ത് യൂണിറ്റി എന്ന കോഴ്സിൽ സൗജന്യ തൊഴിൽ നൈപുണ്യ പരിശീലനം നടത്തുന്നു. യോഗ്യത: പ്ലസ് ടു. https://forms.gle/HBBKNDHsin3p26jp9 കൂടുതൽ വിവരങ്ങൾക്ക് ഫോൺ: 9495999731.

 പ്രഥമ ആയുഷ് കായകൽപ് പുരസ്‌കാരം ഹോമിയോപ്പതി ജില്ലാ വിഭാഗത്തിൽ 93.33 ശതമാനം മാർക്കോടെ ഒന്നാം സ്ഥാനം നേടി കാണക്കാരി ഗവൺമെന്റ് ഹോമിയോ ആശുപതി. തിരുവനന്തപുരത്ത് നടന്ന ചടങ്ങിൽ ആരോഗ്യവകുപ്പ് മന്ത്രി വീണാ ജോർജിൽ നിന്ന് കാണക്കാരി ഗ്രാമപഞ്ചായത്ത് പ്രസിഡന്റ് അംബിക സുകുമാരൻ, സ്ഥിരം സമിതി അധ്യക്ഷരായ ലൗലിമോൾ വർഗ്ഗീസ്, കാണക്കാരി അരവിന്ദാക്ഷൻ, ഗ്രാമപഞ്ചായത്തംഗങ്ങളായ വി.ജി. അനിൽകുമാർ, തമ്പി ജോസഫ്, മെഡിക്കൽ ഓഫീസർ ഡോ. എസ്. അഭിരാജ് എന്നിവർ ചേർന്ന് ഏറ്റുവാങ്ങി. ആരോഗ്യസ്ഥാപനങ്ങളിലെ ശുചിത്വം, ഫലപ്രദമായ മാലിന്യസംസ്‌കരണം, അണുബാധ നിയന്ത്രണം എന്നിവ പ്രോത്സാഹിപ്പിക്കാൻ സർക്കാർ ആവിഷ്‌കരിച്ചതാണ് കായകൽപ പുരസ്‌കാരങ്ങൾ.