ഏറനാട് താലൂക്ക് വികസന സമിതി യോഗം സെപ്റ്റംബര്‍ എട്ടിന് രാവിലെ 10.30ന് ഏറനാട് താലൂക്ക് ഓഫീസില്‍ ചേരും. സെപ്റ്റംബര്‍ 10ന് ചേരാനായിരുന്നു നേരത്തെ നിശ്ചയിച്ചിരുന്നത്.

കരകൗശല വിദഗ്ധരെ ആദരിക്കുന്നതിന് സംസ്ഥാന ഗവണ്‍മെന്റ് നടപ്പിലാക്കിയിട്ടുള്ള 'സംസ്ഥാന കരകൗശല അവാര്‍ഡ് 2024' ലേക്കുള്ള  അപേക്ഷ ക്ഷണിച്ചു. ദാരു ശില്പങ്ങള്‍, പ്രകൃതിദത്ത നാരുകളില്‍ തീര്‍ത്ത ശില്‍പങ്ങള്‍, ചൂരല്‍, മുള, എന്നിവയില്‍ തീര്‍ത്ത ശില്‍പങ്ങള്‍, ചരട്, നാട, കസവ് ഇവ ഉപയോഗിച്ചുള്ള  ചിത്രത്തുന്നല്‍, ലോഹ ശില്‍പങ്ങള്‍, ചിരട്ട ഉപയോഗിച്ച് നിര്‍മിച്ച ശില്‍പങ്ങള്‍, മേല്‍പ്പറഞ്ഞവയില്‍ പെടാത്ത വിവിധ വസ്തുക്കളില്‍ നിര്‍മിച്ച കലാരൂപങ്ങള്‍ എന്നീ ഏഴു വിഭാഗങ്ങളിലുള്ള അപേക്ഷകളാണ് സ്വീകരിക്കുന്നത്.

കീഴുപറമ്പ് -നെല്ലാര്‍ കടവ് തൃക്കളയൂര്‍-കല്ലായി എന്നീ റോഡുകളുടെ ഉപരിതല പ്രവൃത്തികള്‍ ആരംഭിക്കുന്നതിനാല്‍ ആഗസ്റ്റ് 31 മുതല്‍ വലിയ വാഹനങ്ങള്‍ക്ക് ഗതാഗത നിയന്ത്രണം ഏര്‍പ്പെടുത്തി. കുനിയില്‍ ഭാഗത്തേക്ക് വരുന്ന വാഹനങ്ങള്‍ കുറ്റൂളി, കീഴുപറമ്പ് എന്നീ റോഡുകളിലുടെയും, തൃക്കളയൂര്‍ ഭാഗത്തേക്ക് വരുന്ന വാഹനങ്ങള്‍ കവിലട, കുറ്റൂളി, കീഴുപറമ്പ് എന്നീ റോഡുകളും ഉപയോഗിക്കണം.

മലപ്പുറം ജില്ലയില്‍ വിവിധ പ്രദേശങ്ങളില്‍ പ്രവത്തിക്കുന്ന ടൂറിസ്റ്റ് ബോട്ടുകളില്‍ ഓണത്തോടനുബന്ധിച്ച് യാത്രക്കാരുടെ സുരക്ഷ ഉറപ്പു വരുത്തുന്നതിനായി പരിശോധന ശക്തിപ്പെടുത്തുമന്ന് പൊന്നാനി സീനിയര്‍ പോര്‍ട്ട് കണ്‍സര്‍വേറ്റര്‍ അറിയിച്ചു.

തൊളിക്കോട് ഗ്രാമപഞ്ചായത്തിലെ പാമ്പാടി - കണ്ണങ്കര റോഡിന്റെ നവീകരണോദ്ഘടനം ജി. സ്റ്റീഫന്‍ എം എല്‍എ നിര്‍വഹിച്ചു. എം.എല്‍.എ.യുടെ 2024-25 നിയോജക മണ്ഡല ആസ്തി വികസന ഫണ്ടില്‍ നിന്നും 21 ലക്ഷം രൂപ ചെലവഴിച്ചാണ് റോഡ് നവീകരണം പൂര്‍ത്തിയാക്കിയത്. തൊളിക്കോട് ഗ്രാമപഞ്ചായത്ത് പ്രസിഡന്റ് വി.ജെ സുരേഷ് അധ്യക്ഷത വഹിച്ച ചടങ്ങില്‍ ഗ്രാമപഞ്ചായത്ത് സെക്രട്ടറി ജി.എസ് ഹരി, വിവിധ രാഷ്ട്രീയ പ്രതിനിധികള്‍ തുടങ്ങിയവര്‍ പങ്കെടുത്തു.

സംസ്ഥാന ഓണം വാരാഘോഷത്തിന്റെ ഒരുക്കങ്ങൾ പൂർത്തിയാകുന്നു.നാളെ (03.9.2025)  നിശാഗന്ധിയിൽ മുഖ്യമന്ത്രി തിരിതെളിക്കുന്നതോടെ സംസ്ഥാനം കാത്തിരുന്ന ഓണംവാരാഘോഷ പരിപാടികൾക്ക് തുടക്കമാവും. ഓണം വാരാഘോഷ ഉത്സവ പതാക ഇന്ന് കൊടിയേറുമെന്ന് പൊതുവിദ്യാഭ്യാസവും തൊഴിലും വകുപ്പ് മന്ത്രി വി ശിവൻകുട്ടി അറിയിച്ചു.

#മനുഷ്യ സ്നേഹത്തിന്റെ മാതൃകകളായ രണ്ടു വ്യക്തികളെ ആദരിച്ചു#

പതിവിൽ നിന്ന് വ്യത്യസ്തമായാണ് തിരുവനന്തപുരം കളക്ടറേറ്റിലെ ജീവനക്കാർ ഇത്തവണ ഓണം ആഘോഷിച്ചത്. കാരുണ്യത്തിന്റെയും മനുഷ്യ സ്നേഹത്തിന്റെയും മാതൃകകളായ രണ്ടു വ്യക്തികളെ ആദരിച്ചുകൊണ്ട് ജീവനക്കാർ ഓണം വേറിട്ട അനുഭവമാക്കി.
 
പ്ലാറ്റ് ഫോമിനും ട്രെയിനിനും ഇടയിൽപെട്ടുപോയ യാത്രക്കാരിയെ അത്ഭുതകരമായി ജീവിതത്തിലേക്ക് കൈപിടിച്ചുയർത്തിയ രാഘവനുണ്ണിയെയും വിവാഹ സംഘം ഓട്ടോറിക്ഷയിൽ മറന്നു വച്ച 18 പവൻ സ്വർണാഭരണങ്ങൾ വീട്ടിലെത്തി തിരികെ നൽകിയ  പ്രസന്നകുമാറിനെയും ജില്ലാ കളക്ടർ അനുകുമാരി ആദരിച്ചു.

നൈപുണ്യ പരിശീലന സർട്ടിഫിക്കറ്റ് വിതരണം ചെയ്തു

നൈപുണ്യ പരിശീലന പരിപാടിയിലൂടെ പിന്നാക്ക വിഭാഗത്തിലുള്ള കുട്ടികളെ സമൂഹത്തിന്റെ മുഖ്യധാരയിലേക്ക് കൊണ്ടുവരാനാണ് സംസ്ഥാന സർക്കാർ ശ്രമിക്കുന്നതെന്ന് പിന്നാക്ക ക്ഷേമ വകുപ്പ് മന്ത്രി ഒ.ആർ കേളു പറഞ്ഞു. പട്ടികജാതി വികസന വകുപ്പ് 'ബി.ഡബ്ല്യൂ.എഫ്.എസ്' (ബേർഡ് വേൾഡ് വൈഡ് ഫ്ലൈറ്റ് സർവീസ്) എന്ന സ്ഥാപനം മുഖേന നടത്തുന്ന എയർലൈൻ കസ്റ്റമർ സർവീസ് എക്സിക്യൂട്ടീവ് നൈപുണ്യ വികസന പരിശീലനം പൂർത്തീകരിച്ചവർക്കുള്ള സർട്ടിഫിക്കറ്റ് വിതരണം ഉദ്ഘാടനം ചെയ്ത് സംസാരിക്കുകയായിരുന്നു മന്ത്രി.

കളമശ്ശേരി കാർഷികോത്സവത്തിന് വർണാഭമായ ഓണാഘോഷങ്ങളോടെ കൊടിയിറക്കം. ഏഴ് ദിവസങ്ങൾ നീണ്ടുനിന്ന കാർഷികോത്സവത്തിൻ്റെ മൂന്നാം പതിപ്പ് നാടിന്റെ കാർഷിക പൈതൃകത്തിൻ്റെ നേർക്കാഴ്ചയായി.

സമാപന ചടങ്ങിൽ വ്യവസായ വകുപ്പ് മന്ത്രി പി. രാജീവ് മാവേലിയെ വേദിയിലേക്ക് ആനയിച്ച് ആഘോഷങ്ങൾക്ക് തുടക്കം കുറിച്ചു. 

തുടർന്ന് വിവിധതരം മത്സരങ്ങൾ അരങ്ങേറി. നാടൻ വിഭവങ്ങൾ നിരന്ന പാചകമത്സരവും, വടംവലി മത്സരവും അഘോഷ പരിപാടികൾക്ക് മാറ്റുകൂട്ടി. 

ഏറ്റവും മികച്ച പ്രദർശന സ്റ്റാളുകൾക്ക് സമാപന ചടങ്ങിൽ മന്ത്രി പി. രാജീവ് സർട്ടിഫിക്കറ്റുകൾ വിതരണം ചെയ്തു.

ഗാസയിലെ മാധ്യമ രക്തസാക്ഷികൾക്ക് ആദരമർപ്പിച്ചുകൊണ്ട് കേരള മീഡിയ അക്കാദമി ആലപ്പുഴയിൽ ഫോട്ടോപ്രദർശനം സംഘടിപ്പിക്കുന്നു.
 ആലപ്പുഴ ബീച്ചിൽ ഒരുക്കിയിട്ടുള്ള പ്രദർശന നഗരിയിൽ സെപ്റ്റംബർ 2 മുതൽ 12 വരെയാണ് ബിഗ് സല്യൂട്ട് എന്ന ഫോട്ടോ പ്രദർശനം നടക്കുന്നത്. സയണിസ്റ്റ് ക്രൂരതയിൽ കൊല്ലപ്പെട്ട ഫോട്ടോജേർണലിസ്റ്റുകൾ ഉൾപ്പെടെയുള്ളവർ പകർത്തിയ ഫോട്ടോകൾ പ്രദർശിപ്പിക്കും.