സംസ്ഥാനത്ത് അമീബിക് മസ്തിഷ്‌ക ജ്വരം വർധിച്ചുവരുന്ന സാഹചര്യം പരിഗണിച്ച് സുരക്ഷിതമായ ജലലഭ്യത ഉറപ്പാക്കുന്നതിനായ് ജലമാണ് ജീവൻ എന്ന പേരിൽ സംസ്ഥാനത്തുടനീളം നടത്തുന്ന ക്യാമ്പയിനിന് പാട്യം പഞ്ചായത്തിൽ തുടക്കമായി. ക്യാമ്പയിനിന്റെ ഒന്നാംഘട്ട പ്രവർത്തനത്തിന്റെ ഭാഗമായി ഹരിത കേരള മിഷന്റെയും തദ്ദേശസ്വയംഭരണ സ്ഥാപനങ്ങളുടെ നേതൃത്വത്തിൽ രണ്ടു ദിവസങ്ങളിലായി എല്ലാ വീടുകളിലെയും സ്ഥാപനങ്ങളിലെയും കിണറുകൾ ക്ലോറിനേറ്റ് ചെയ്യും. പാട്യം ആയുർവേദ ആശുപത്രിയിൽ നടന്ന പഞ്ചായത്ത് തല ഉദ്ഘാടനം പഞ്ചായത്ത് പ്രസിഡന്റ് എൻ.വി ഷിനിജ നിർവഹിച്ചു. ആരോഗ്യ വിദ്യാഭ്യാസ സ്റ്റാന്റിംഗ് കമ്മിറ്റി ചെയർപേഴ്സൺ ശോഭ കോമത്ത് അധ്യഷയായി.

ഇലക്ടറൽ രജിസ്‌ട്രേഷൻ ഓഫീസർ ആൻഡ് ഡെപ്യൂട്ടി കലക്ടർ (എൽ ആർ) കണ്ണൂരിന് കീഴിലുള്ള പയ്യന്നൂർ നിയോജക മണ്ഡലത്തിലെ ബൂത്ത് ലെവൽ ഓഫീസർമാർക്ക് തിരിച്ചറിയൽ കാർഡ് തയ്യാറാക്കി നൽകുന്നതിന് ക്വട്ടേഷൻ ക്ഷണിച്ചു. 181 കാർഡും ടാഗുമാണ് വേണ്ടത്. ക്വട്ടേഷനുകൾ സെപ്റ്റംബർ എട്ടിന് വൈകീട്ട് നാലിനകം പയ്യന്നൂർ ഇലക്ടറൽ രജിസ്‌ട്രേഷൻ ഓഫീസർ ആൻഡ് ഡെപ്യൂട്ടി കലക്ടർ (എൽ ആർ) എന്ന വിലാസത്തിൽ ലഭിക്കണം.

സെപ്റ്റംബർ ഒൻപതിന് നടത്താനിരുന്ന കേരള ആരോഗ്യ ശാസ്ത്ര സർവകലാശാലയുടെ 21-ാമത് ബിരുദദാനചടങ്ങ് മാറ്റിയതായി രജിസ്ട്രാർ അറിയിച്ചു. പുതുക്കിയ തീയതി പിന്നീട് അറിയിക്കും.

വയോജന മേഖലയിൽ മികച്ച പ്രവർത്തനങ്ങൾ കാഴ്ചവെച്ച വ്യക്തികൾക്കും സ്ഥാപനങ്ങൾക്കും മികച്ച തദ്ദേശ സ്വയംഭരണ സ്ഥാപനങ്ങൾക്കും സാമൂഹ്യനീതി വകുപ്പ് ഏർപ്പെടുത്തിയ 'സംസ്ഥാന വയോസേവന അവാർഡ് 2025' ന് നാമനിർദേശം ക്ഷണിച്ചു. വയോജന മേഖലയിൽ മികച്ച പ്രകടനം കാഴ്ചവെച്ച കോർപറേഷൻ, മുനിസിപ്പാലിറ്റി, ജില്ലാ പഞ്ചായത്ത്, ബ്ലോക്ക് പഞ്ചായത്ത്, ഗ്രാമപഞ്ചായത്ത്, എൻ ജി ഒ, മെയിന്റനൻസ് ട്രൈബ്യൂണൽ, ഗവ. വൃദ്ധസദനം, കായികതാരം, കല, സാഹിത്യ, സാംസ്‌കാരിക മേഖലയിലെ പ്രവർത്തനം, ആജീവനാന്ത ബഹുമതി മേഖലകളിലാണ് പുരസ്‌കാരം. ഓരോ വിഭാഗത്തിലുമുള്ള നിർദിഷ്ട മാനദണ്ഡ പ്രകാരമാണ് അപേക്ഷിക്കേണ്ടത്.

പാട്ടും കഥയും കളികളുമായി കുരുന്നുകൾ പഠനം ആഘോഷമാക്കുമ്പോൾ, ക്ലാസ് റൂമിൽ സജ്ജമാക്കിയ സ്മാർട്ട് ടിവിയിലൂടെ കുട്ടികൾക്കു മുന്നിൽ പാഠഭാഗങ്ങൾ അവതരിപ്പിച്ച് അധ്യാപകരും അറിവിന്റെ ആധുനിക കാലത്തേക്ക് അവരെ നയിക്കുന്നു. കാട്ടാമ്പള്ളി ഗവ. മാപ്പിള യു.പി സ്‌കൂളിൽ പഠനം വേറെ ലെവലാണ്. മികച്ച ഭൗതികസാഹചര്യം, മികവാർന്ന ഗുണമേന്മാ വിദ്യാഭ്യാസം എന്നത് നാടിന്റെയും കുട്ടിയുടെയും അവകാശമാണെന്ന് അടിവരയിടുകയാണ് ഈ സർക്കാർ സ്‌കൂൾ. സ്‌കൂൾ കെട്ടിടങ്ങളെയും ഇടങ്ങളെയും പഠനോപകരണങ്ങളാക്കി മാറ്റുകയും സാങ്കേതികവിദ്യാ സൗഹൃദ ക്ലാസ് മുറികൾ ഉറപ്പാക്കുകയും ചെയ്തുകൊണ്ടാണ് ഇവിടെ വൈജ്ഞാനിക മുന്നേറ്റം സാധ്യമാക്കുന്നത്.

കെട്ടിടങ്ങളുടെ സുരക്ഷ ഉറപ്പാക്കുന്നതിന്റെ ഭാഗമായി ജില്ലയിലെ മുഴുവൻ സ്‌കൂളുകളിലും കെ.എസ്.ഇ.ബി, എൽ.എസ്.ജി.ഡി, റവന്യൂ, പൊതുമരാമത്ത് വകുപ്പുകൾ പരിശോധന നടത്തി സെപ്റ്റംബർ 25 നകം റിപ്പോർട്ട് സമർപ്പിക്കാൻ ജില്ലാ വികസന സമിതി യോഗം ആവശ്യപ്പെട്ടു. സ്‌കൂളുകളിൽ വിദ്യാഭ്യാസ വകുപ്പിന്റെ സുരക്ഷ ഓഡിറ്റ് പൂർത്തിയായതായി വിദ്യാഭ്യാസ ഉപ ഡയറക്ടർ ഡി ഷൈനി അറിയിച്ചു. 

അമീബിക് മസ്തിഷ്‌കജ്വരം റിപ്പോർട്ട് ചെയ്യപ്പെടുന്ന സാഹചര്യത്തിൽ സുരക്ഷിത ജല ലഭ്യതയും ജലജന്യ രോഗപ്രതിരോധവും ലക്ഷ്യമിട്ട് സംസ്ഥാന വ്യാപകമായി നടത്തുന്ന 'ജലമാണ് ജീവൻ' ജനകീയ തീവ്ര കർമപരിപാടിയുടെ ഭാഗമായി കിണറുകൾ ക്ലോറിനേറ്റ് ചെയ്യുന്ന ആദ്യഘട്ട പ്രവർത്തനത്തിന് ജില്ലയിൽ തുടക്കമായി.

സംസ്ഥാന സര്‍ക്കാരിന്റെ ഓണം വാരാഘോഷത്തോടനുബന്ധിച്ച്  കനകക്കുന്നില്‍ ഒരുങ്ങുന്ന ട്രേഡ് ഫെയര്‍ ആന്‍ഡ് എക്‌സിബിഷന്‍ സെന്റര്‍ പൊതുവിദ്യാഭ്യാസവും തൊഴിലും വകുപ്പു മന്ത്രി വി ശിവന്‍കുട്ടി ഉദ്ഘാടനം ചെയ്തു.

ഓണം ട്രേഡ് ഫെയറിന്റെ ഭാഗമായി നൂറിലധികം സ്റ്റാളുകളാണ് ഇത്തവണ ഒരുക്കിയിരിക്കുന്നത്. സര്‍ക്കാര്‍ , പൊതുമേഖല ,സ്വകാര്യ സ്ഥാപനങ്ങളുടെ സ്റ്റാളുകള്‍, കൊമേര്‍ഷ്യല്‍ സ്റ്റാളുകള്‍ എന്നിവ ഇതില്‍ ഉള്‍പ്പെടും. .

ചടങ്ങില്‍ ഓണം ട്രേഡ് ഫെയര്‍ കമ്മിറ്റി ചെയര്‍മാന്‍ കെ. ആന്‍സലന്‍ എംഎല്‍എ, ടൂറിസം ഡയറക്ടര്‍ ശിഖ സുരേന്ദ്രന്‍, വാര്‍ഡ് കൗണ്‍സിലര്‍മാര്‍ മറ്റ് ഉദ്യോഗസ്ഥര്‍ തുടങ്ങിയവര്‍ പങ്കെടുത്തു.

'കെ സ്റ്റോര്‍' ആക്കുന്ന റേഷന്‍ കടകളില്‍ ഇനി മുതല്‍ പാസ്‌പോര്‍ട്ടിന്റെ അപേക്ഷയും അക്ഷയ സെന്ററുകള്‍ വഴിയുള്ള സേവനങ്ങളും ലഭിക്കുമെന്ന്  ഭക്ഷ്യ സിവില്‍ സപ്ലൈസ് വകുപ്പ് മന്ത്രി ജി ആര്‍ അനില്‍ . മഞ്ചാടിമൂട് കെ സ്റ്റോര്‍ ഉദ്ഘാടനം ചെയ്ത് സംസാരിക്കുകയായിരുന്നു അദ്ദേഹം.

ഗ്രാമ പ്രദേശത്ത് വസിക്കുന്ന സാധാരണക്കാര്‍ക്ക് അവശ്യ സേവനങ്ങള്‍ക്ക് വേണ്ടി പട്ടണങ്ങളിലേക്കുള്ള ദീര്‍ഘ ദൂര യാത്രകള്‍ ഒഴിവാക്കാന്‍ ഇതുവഴി സാധിക്കും . നിലവില്‍ 2300 ലധികം കടകള്‍ കേരളത്തില്‍   കെ സ്റ്റോര്‍ ആയി. ഓണം കഴിയുമ്പോള്‍ 14000 റേഷന്‍ കടകളും 'കെ സ്റ്റോര്‍' ആക്കുയാണ് ലക്ഷ്യം എന്നും മന്ത്രി പറഞ്ഞു.

സംസ്ഥാന സര്‍ക്കാരിന്റെ ഓണം വാരാഘോഷത്തോടനുബന്ധിച്ച്  പായസം മത്സരം സംഘടിപ്പിക്കുന്നു. ഫുഡ്  ഫെസ്റ്റിവലിന്റെ ഭാഗമായി സംഘടിപ്പിക്കുന്ന മത്സരം കുടുംബശ്രീയുടെ നേതൃത്വത്തില്‍നാളെ ഉച്ചയ്ക്ക്  ഒരു മണിക്ക്  കനക്കുന്നു സൂര്യകാന്തി ഗ്രൗണ്ടില്‍ വച്ച് നടക്കും.   പൊതു ജനങ്ങള്‍ക്ക് പങ്കെടുക്കാവുന്നതാണ്. മത്സരാര്‍ത്ഥികള്‍ ഉച്ചയ്ക്ക് 12 മണിക്ക് മുമ്പായി സൂര്യകാന്തി ഗ്രൗണ്ടില്‍ ഹാജരാകേണ്ടതാണ്.