ആലപ്പുഴ ജനറല്‍ ആശുപത്രിയില്‍ നിര്‍മാണം പൂര്‍ത്തീകരിച്ച ബഹുനില മന്ദിരത്തിന്റെ ഉദ്ഘാടനം ഇന്ന് (ഞായറാഴ്ച) ഉച്ചക്ക് 2.30 ന്  മുഖ്യമന്ത്രി പിണറായി വിജയന്‍ നിര്‍വഹിക്കും. സംസ്ഥാനസര്‍ക്കാരിന്റെ മൂന്നാം വാര്‍ഷികത്തിന്റെ ഭാഗമായ നൂറുദിന കര്‍മപരിപാടിയോടനുബന്ധിച്ചാണ് പുതിയ ഏഴു നില ബ്ലോക്ക് ഉദ്ഘാടനം ചെയ്യുന്നത്. കിഫ്ബി ഫണ്ടായ 117 കോടി രൂപ ചെലവഴിച്ചാണ് അത്യാധുനിക ചികില്‍സാ ഉപകരണങ്ങളടക്കം ഒരുക്കി നിര്‍മാണം പൂര്‍ത്തീകരിച്ചത്.

വെള്ളപ്പൊക്ക പ്രതിരോധ പ്രവർത്തനങ്ങളുടെ ഭാഗമായി സംസ്ഥാന ദുരന്ത നിവാരണ അതോറിറ്റി, ജില്ലാ ദുരന്തനിവാരണ അതോറിറ്റി, കില എന്നിവ സംയുക്തമായി ചമ്പക്കുളം പഞ്ചായത്തിലെ നെടുമുടി ബോട്ട് ജെട്ടിക്ക് സമീപം മോക് ഡ്രിൽ സംഘടിപ്പിച്ചു. തദ്ദേശസ്വയംഭരണ സ്ഥാപനങ്ങളുടെ ദുരന്ത തയ്യാറാടെപ്പും കാര്യശേഷിയും വർധിപ്പിക്കുന്നതിനായി പമ്പാ നദീതട ജില്ലകളിൽ റീ ബിൽഡ് കേരള പ്രോഗ്രം ഫോർ റിസൾട്ട്സ്  പദ്ധതിയുടെ ഭാഗമായാണ്  മോക്ക് ഡ്രിൽ നടത്തിയത്. ജില്ലയിലെ ചമ്പക്കുളം, നെടുമുടി, കൈനകരി, പുളിങ്കുന്ന് പഞ്ചായത്തുകൾ, ആലപ്പുഴ നഗരസഭ എന്നീ തദ്ദേശ സ്ഥാപനങ്ങളെ ഉൾപെടുത്തിക്കൊണ്ടുള്ള മോക്ക് ഡ്രിൽ പരിശീലനമാണ് സംഘടിപ്പിച്ചത്.

നവംബര്‍ 15 മുതല്‍ 18 വരെ ആലപ്പുഴയില്‍ നടക്കുന്ന സംസ്ഥാന ശാസ്‌ത്രോത്സവത്തിന്റെ സംഘാടക സമിതി ഓഫീസ് ആലപ്പുഴ എസ് ഡി വി ഗേള്‍സ് ഹൈസ്‌കൂളില്‍ ചെയര്‍മാന്‍ കൂടിയായ സാംസ്‌കാരിക വകുപ്പ് മന്ത്രി സജി ചെറിയാന്‍ ഉദ്ഘാടനം ചെയ്തു. സംസ്ഥാന സ്‌കൂള്‍ ശാസ്‌ത്രോത്സവം മികവുറ്റ രീതിയിലും നൂതനാശയങ്ങള്‍ ഉള്‍പ്പെടുത്തിയും സംഘടിപ്പിക്കുമെന്ന് മന്ത്രി സജി ചെറിയാന്‍ പറഞ്ഞു. സെന്റ് ജോസഫ് സ്‌കൂളായിരിക്കും ശാസ്ത്രമേളയുടെ പ്രധാന വേദി. ലിയോ തേര്‍ട്ടീന്‍ത് സ്‌കൂള്‍, ഗേള്‍സ് സ്‌കൂള്‍, എസ് ഡി വി സ്‌കൂള്‍, ലജനത്തുല്‍ മുഹമ്മദീയ എച്ച്എസ്എസ് തുടങ്ങിയ ഏഴോളം വേദികളുണ്ടാവും. 

ആലപ്പുഴ: ചെങ്ങന്നൂരിലെ മിത്രക്കടവ് ആറാട്ടുപുഴ കടവിൽ ബാരിക്കേട്  കെട്ടി തീർത്ഥാടകർക്ക് സംരക്ഷണം ഉറപ്പാക്കാനുള്ള നടപടികൾ വേഗത്തിൽ സ്വീകരിക്കുമെന്ന് ദേവസ്വം സഹകരണ വകുപ്പ് മന്ത്രി വി.എൻ. വാസവൻ. മുഴുവൻ തീർത്ഥാടകർക്കും സുഗമമായ തീർത്ഥാടനം ഉറപ്പാക്കുന്നതിന് വകുപ്പുകൾ  ഏകോപനത്തോടെ പ്രവർത്തിക്കണം. ചെങ്ങന്നൂരിൽ ശബരിമല തീർഥാടനകാലം അവലോകനയോഗം ഉദ്ഘാടനം ചെയ്ത് സംസാരിക്കുകയായിരുന്നു മന്ത്രി. സാംസ്കാരിക ഫിഷറീസ് വകുപ്പ് മന്ത്രി സജി ചെറിയാൻ  അധ്യക്ഷത വഹിച്ചു.
  

ആലപ്പുഴ ജില്ലാ വിദ്യാഭ്യാസ ഓഫീസിന്റെ പരിധിയില്‍ കെ.ടെറ്റ് പരീക്ഷയില്‍ വിജയികളായ പരീക്ഷാര്‍ത്ഥികളുടെ സര്‍ട്ടിഫിക്കറ്റ് വെരിഫിക്കേഷന്‍ ഒക്ടോബര്‍ 28, 29 തീയതികളിലായി രാവിലെ 10.30 മുതല്‍ ജില്ലാ വിദ്യാഭ്യാസ ഓഫീസില്‍ വെച്ച് നടത്തും. ഈ തീയതിക്ക് ശേഷം ഓണ്‍ലൈന്‍ വെരിഫിക്കേഷന്‍ സൈറ്റ് ക്ലോസ് ചെയ്യുന്നതാണ്.

ആലപ്പുഴ ജില്ലാ വനിതാ ശിശു വികസന ഓഫീസും സങ്കല്‍പ്പ് ഹബ്ബ് ഫോര്‍ എംപവര്‍മെന്റ് ഓഫ് വിമണും റോട്ടറി ക്ലബ്ബ് ഓഫ് ആലപ്പി ഈസ്റ്റും സംയുക്തമായി നടപ്പിലാക്കുന്ന മൂന്ന് മാസം ദൈര്‍ഘ്യമുള്ള തയ്യല്‍ പരിശീലന ക്ലാസിലേക്ക് പരിശീലകയെ താത്കാലിക അടിസ്ഥാനത്തില്‍ തിരഞ്ഞെടുക്കുന്നതിന് അപേക്ഷ ക്ഷണിച്ചു. തയ്യല്‍ പരിശീലനത്തില്‍ പ്രാവീണ്യമുള്ളവരും മൂന്നു വര്‍ഷത്തില്‍ കുറയാത്ത പ്രവൃത്തിപരിചയമുള്ളവരും 18നും 45നും മദ്ധ്യേ പ്രായമുള്ളവരുമായ വനിതകള്‍ക്ക് അപേക്ഷിക്കാം. താത്പര്യമുള്ളവര്‍ മതിയായ രേഖകള്‍ സഹിതം നവംബര്‍ 10ന് മുന്‍പായി dwcdoalpy@gmail.com  എന്ന e-mail വിലാസത്തില്‍ അപേക്ഷ സമര്‍പ്പിക്കേണ്ടതാണ്.

ഒന്‍പതാമത് ദേശീയ ആയൂര്‍വേദ ദിനാചരണത്തോടനുബന്ധിച്ച് ഭാരതീയ ചികിത്സാ വകുപ്പ് ജില്ലയില്‍ വിവിധ പരിപാടികള്‍ സംഘടിപ്പിക്കുന്നു. ഒക്ടോബര്‍ 28ന് ഐസിഡിഎസ് ജീവനക്കാര്‍ക്കായി ആരോഗ്യ പാചക മത്സരവും ഭാരതീയ ചികിത്സാ വകുപ്പ് ജീവനക്കാര്‍ക്കുള്ള പാചക മത്സരവും നടത്തും.  ഒക്ടോബര്‍ 29 ന് മാധ്യമപ്രവര്‍ത്തകര്‍ക്ക് മാധ്യമ രംഗത്തെ മാനസിക സമ്മര്‍ദ്ദവും ആയൂര്‍വേദവും എന്ന വിഷയത്തില്‍ സെമിനാര്‍ ജില്ലാ പഞ്ചായത്ത് പ്രസിഡന്റ് കെ.ജി.രാജേശ്വരി ഉദ്ഘാടനം ചെയ്യും. ഒക്ടോബര്‍ 30 ന് ആയൂര്‍വേദ ദിന സന്ദേശ റാലിയും പൊതുജനങ്ങള്‍ക്കായി സെമിനാറും പ്രദര്‍ശനവും നടത്തും.

കുമ്പളം-തുറവൂര്‍ റെയില്‍വേ സ്റ്റേഷനുകള്‍ക്കിടയിലുള്ള ലെവല്‍ ക്രോസ് നമ്പര്‍ 14 (ചന്തിരൂര്‍ ഗേറ്റ്) ഒക്ടോബര്‍ 27 ന് പകല്‍ 2 മണി മുതല്‍ 30 ന് വൈകീട്ട് 6 മണിവരെ അറ്റകുറ്റപ്പണികള്‍ക്കായി അടച്ചിടും. വാഹനങ്ങള്‍ മേല്‍പറഞ്ഞ സമയം ലെവല്‍ ക്രോസ് നമ്പര്‍ 16 (ശ്രീനാരായണപുരം റോഡ് ഗേറ്റ്)  വഴി പോകണം.
 (പി.ആര്‍./എ.എല്‍.പി./2193)

ആലപ്പുഴ ജില്ലയില്‍ ഹോണറേറിയം അടിസ്ഥാനത്തില്‍ കുടുംബശ്രീ മൈക്രോ എന്റര്‍പ്രൈസസ് കണ്‍സള്‍ട്ടന്റിനെ നിയമിക്കുന്നതിന് അയല്‍ക്കൂട്ട, ഓക്സിലറി ഗ്രൂപ്പ്, അയല്‍ക്കൂട്ട കുടുംബാംഗങ്ങളില്‍ നിന്നും അപേക്ഷ ക്ഷണിച്ചു.  നിലവില്‍ കുത്തിയതോട്, തുറവൂര്‍, തൃക്കുന്നപ്പുഴ, പള്ളിപ്പാട് എന്നീ പഞ്ചായത്തുകളിലാണ് ഒഴിവുകള്‍ ഉള്ളത്. യോഗ്യത ബിരുദവും കമ്പ്യൂര്‍ പരിജ്ഞാനവും.  പ്രായപരിധി 25 നും 45 നും മധ്യേ. വിദ്യാഭ്യാസ യോഗ്യത തെളിയിക്കുന്ന സര്‍ട്ടിഫിക്കറ്റുകളുടെ പകര്‍പ്പുകള്‍ സഹിതമുള്ള അപേക്ഷ നവംബര്‍ 4 ന് വൈകിട്ട് 5 മണിക്കുള്ളില്‍ അതത് സിഡിഎസ് ഓഫീസില്‍ സമര്‍പ്പിക്കണം.
 (പി.ആര്‍./എ.എല്‍.പി./2192)

വനിത ശിശുവികസന വകുപ്പിലെ ഭരണിക്കാവ് ഐ.സി.ഡി.എസ് പ്രോജക്ടിലെ 173 അങ്കണവാടികളിലേക്ക് 2023-24 സാമ്പത്തിക വര്‍ഷം അങ്കണവാടി കണ്ടിജന്‍സി സാധനങ്ങള്‍ വിതരണം ചെയ്യുതിന് താല്‍പര്യമുള്ള വ്യക്തികള്‍, സ്ഥാപനങ്ങള്‍ എന്നിവരില്‍ നിന്നും മത്സരാടിസ്ഥാനത്തില്‍ ടെന്‍ഡര്‍ ക്ഷണിച്ചു. ടെന്‍ഡര്‍ സ്വീകരിക്കുന്ന അവസാന തീയതി നവംബര്‍ 12 ന് ഉച്ചക്ക് 1 മണി. വിശദവിവരങ്ങള്‍ക്ക് ഫോണ്‍: 9446853900.**