അർത്തുങ്കൽ : തോട്ടപ്പള്ളി ,അർത്തുങ്കൽ ഫിഷിങ് ഹാർബറുകൾ ഉടൻ തന്നെ ടെൻഡർ നടപടികളിലേക്ക് നീങ്ങുമെന്ന് ഫിഷറീസ് വകുപ്പ് മന്ത്രി ജെ മേഴ്‌സിക്കുട്ടിയമ്മ പറഞ്ഞു. അർത്തുങ്കൽ ഫിഷിംഗ് ഹാർബർ രണ്ടാംഘട്ട നിർമാണ പ്രഖ്യാപനവും അർത്തുങ്കൽ  മത്സ്യഭവൻ,  മത്സ്യഫെഡ് നടപ്പിലാക്കുന്ന നൂതന പദ്ധതികളുടെ ഉദ്ഘാടനം എന്നിവ നിർവഹിച്ച് സംസാരിക്കുകയായിരുന്നു മന്ത്രി. ഈ സർക്കാരിന്റെ കാലത്തുതന്നെ അർത്തുങ്കൽ ഹാർബർ പൂർത്തിയാക്കണമെന്നാണ് ആഗ്രഹിക്കുന്നത്.

കാലാവസ്ഥ വ്യതിയാനം നിമിത്തം അന്തരീക്ഷ ഊഷ്മാവ് ക്രമാതീതമായി ഉയർന്ന സാഹചര്യത്തിൽ സൂര്യാതാപം കൊണ്ടുണ്ടാകുന്ന ആരോഗ്യ പ്രശ്നങ്ങൾ നേരിടാൻ ആരോഗ്യ വകുപ്പ് മന്ത്രി കെ.കെ. ശൈലജ ടീച്ചറുടെ നേതൃത്വത്തിൽ ഉന്നതതല യോഗം കൂടി. ആരോഗ്യ വകുപ്പ് സ്വീകരിച്ചതും ഇനി സ്വീകരിക്കേണ്ടതുമായ മുൻകരുതലുകളെക്കുറിച്ച് യോഗം ചർച്ച ചെയ്തു. ആരോഗ്യ വകുപ്പ് പ്രിൻസിപ്പൽ സെക്രട്ടറി ഡോ. രാജൻ എൻ. ഖോബ്രഗഡെ, ആരോഗ്യ വകുപ്പ് ഡയറക്ടർ ഡോ. ആർ.എൽ. സരിത, അഡീഷണൽ ഡയറക്ടർ ഡോ. മീനാക്ഷി എന്നിവർ യോഗത്തിൽ പങ്കെടുത്തു.

കാരുണ്യ ആരോഗ്യസുരക്ഷാപദ്ധതിയുടെ (കെ.എ.എസ്.പി.) ചികിത്സാകാർഡ് വിതരണത്തിന്റെ സംസ്ഥാനതല ഉദ്ഘാടനം മുഖ്യമന്ത്രി പിണറായി വിജയൻ നിർവഹിച്ചു. പൂവച്ചൽ സ്വദേശികളായ റെജിൻ, ഇന്ദിര എന്നിവർക്കാണ് ആദ്യ ചികിത്സാകാർഡ് നൽകിയത്. ആരോഗ്യ, സാമൂഹ്യനീതി, വനിത ശിശുവികസന മന്ത്രി കെ.കെ. ശൈലജ ടീച്ചർ അധ്യക്ഷത വഹിച്ച ചടങ്ങിൽ ധനമന്ത്രി ഡോ.ടി.എം.തോമസ് ഐസക് മുഖ്യാതിഥിയായിരുന്നു. ആരോഗ്യ വകുപ്പ് അഡീഷണൽ ചീഫ് സെക്രട്ടറി രാജീവ് സദാനന്ദൻ, പ്രിൻസിപ്പൽ സെക്രട്ടറി ഡോ. രാജൻ എൻ. ഖോബ്രഗഡെ, കെ.എ.എസ്.പി. സ്പെഷ്യൽ ഓഫീസർ ഡോ. രത്തൻ ഖേൽക്കർ, ചിയാക് എക്സിക്യൂട്ടീവ് ഡയറക്ടർ അശോക് കുമാർ എന്നിവർ പങ്കെടുത്തു. 

കായികയുവജനകാര്യാലയത്തിന്റെ കീഴിലുള്ള കുമാരപുരം ടെന്നിസ് അക്കാദമിയിൽ ദിവസ വേതനാടിസ്ഥാനത്തിൽ ഒരു മെയിൻ ട്രയിനർ, ഒരു അസിസ്റ്റന്റ് ട്രയിനർ എന്നിവരെ തെരഞ്ഞെടുക്കുന്നതിനുള്ള ഇന്റർവ്യൂ ഏഴിന് വൈകിട്ട് മൂന്നിന് രാജീവ് ഗാന്ധി മെഡിസിൻ സെന്ററിൽ പ്രവർത്തിക്കുന്ന ഹൈ ആൾറ്റിറ്റിയൂഡ് ട്രെയിനിംഗ് സെന്ററിൽ നടത്തും. മെയിൻ ട്രയിനർമാർ എൻ.ഐ.എസ്. യോഗ്യതയുള്ളവരും അസിസ്റ്റന്റ് ട്രയിനർമാർ എ.ഐ.ടി.എ., സ്റ്റേറ്റ്/നാഷണൽ ലവൽ ചാമ്പ്യൻമാരുമായിരിക്കണം. ഇന്റർവ്യൂവിൽ പങ്കെടുക്കുന്ന ഉദ്യോഗാർത്ഥികൾ സർട്ടിഫിക്കറ്റുകളുടെ അസൽ ഹാജരാക്കണം.

പി.എൻ.എക്സ്. 850/19

സർക്കാർ ഹയർ സെക്കൻഡറി സ്‌കൂൾ അദ്ധ്യാപകരുടെ 2019-20 ലെ പൊതുസ്ഥലംമാറ്റത്തിന് അപേക്ഷകൾ ഓൺലൈനായി ഈ മാസം 22 മുതൽ സ്വീകരിക്കുമെന്ന് ഹയർ സെക്കൻഡറി വിദ്യാഭ്യാസ ഡയറക്ടർ അറിയിച്ചു.

പി.എൻ.എക്സ്. 849/19

തിരുവനന്തപുരം റീജിയണൽ ക്യാൻസർ സെന്ററിൽ മെഡിക്കൽ ഡോക്യുമെന്റേഷൻ ട്രെയിനിംഗ് പ്രോഗ്രാമിലേക്ക് അപേക്ഷകൾ ക്ഷണിച്ചു. മാർച്ച് 15 വൈകിട്ട് നാല് മണിയ്ക്കകം അപേക്ഷിക്കണം. വിശദവിവരങ്ങൾക്കും അപേക്ഷാഫോറത്തിനും www.rccctvm.gov.in/www.rcctvm.org.

പി.എൻ.എക്സ്. 848/19

ഇ-ഹെൽത്ത് പ്രൊജക്റ്റ് മാനേജ്‌മെന്റ് യൂണിറ്റിൽ ഒഴിവുള്ള ഫിനാൻസ് മാനേജർ, അസിസ്റ്റന്റ് മാനേജർ (പ്രൊക്വയർമെന്റ്), അസിസ്റ്റന്റ് മാനേജർ (ധനകാര്യം) തസ്തികകളിലേക്ക് കരാർ അടിസ്ഥാനത്തിൽ നിയമനത്തിന് അപേക്ഷ ക്ഷണിച്ചു. വിശദ വിവരങ്ങൾക്ക് www.arogyakeralam.gov.in.

പി.എൻ.എക്സ്. 847/19