വേനല്‍ കടുത്തതോടെ കന്നുകാലികള്‍ക്ക്‌ സൂര്യാഘാതമേല്‍ക്കാനുളള സാധ്യതകള്‍ ഏറെയെന്നു മുന്നറിയിപ്പു നല്‍കി ജില്ലാ മൃഗസംരക്ഷണ വകുപ്പ്‌. വേനലില്‍ വിവിധ രോഗസാധ്യതകള്‍ കൂടുന്നതിനാല്‍ കന്നുകാലികളെ പരിചരിക്കുന്നതില്‍ കൂടുതല്‍ ശ്രദ്ധചെലുത്താനും മൃഗസംരക്ഷണ വകുപ്പ്‌ കര്‍ഷകര്‍ക്ക്‌ നിര്‍ദ്ദേശം നല്‍കി. വേനലിലെ ഉയര്‍ന്ന താപനിലയും അന്തരീക്ഷ ഈര്‍പ്പവും മൂലം അസുഖങ്ങള്‍ വരാതിരിക്കാന്‍ മൃഗങ്ങള്‍ക്ക്‌ പ്രത്യേക പരിചരണം നല്‍കണം. സ്ഥിരമായ പാലുല്‍പ്പാദനവും രോഗപ്രതിരോധ ശേഷിയും നിലനിര്‍ത്താന്‍ കര്‍ഷകര്‍ പരിപാലന രീതിയില്‍ കൂടുതല്‍ ശ്രദ്ധ ചെലുത്തണമെന്നും ജില്ലാ മൃഗസംരക്ഷണ ഓഫീസര്‍ അറിയിച്ചു.

കോടതി കുടിശ്ശിക ഈടാക്കുന്നതിന്‌ പെരുമ്പിലാവ്‌ വില്ലേജ്‌ സര്‍വെ 770/2 ല്‍ ഉള്‍പ്പെട്ട 0.0162 ഹെക്‌ടര്‍ ഭൂമി മാര്‍ച്ച്‌ 27 രാവിലെ 11 ന്‌ കരിക്കാട്‌ വില്ലേജ്‌ ഓഫീസില്‍ ലേലം ചെയ്യും. കൂടുതല്‍ വിവരങ്ങള്‍ക്ക്‌ ഫോണ്‍ : 04885-225700. 

കോടതി കുടിശ്ശിക ഈടാക്കുന്നതിന്‌ പെരുമ്പിലാവ്‌ വില്ലേജ്‌ സര്‍വെ 630 ല്‍ ഉള്‍പ്പെട്ട 0.0202 ഹെക്‌ടര്‍ ഭൂമി മാര്‍ച്ച്‌ 27 രാവിലെ 11 ന്‌ കരിക്കാട്‌ വില്ലേജ്‌ ഓഫീസില്‍ ലേലം ചെയ്യും. കൂടുതല്‍ വിവരങ്ങള്‍ക്ക്‌ ഫോണ്‍ : 04885-225700.
 

ജലരക്ഷ ജീവരക്ഷ പദ്ധതിയുടെ ഭാഗമായി മണലിപ്പുഴ പുന:രുദ്ധാരണ ഉദ്‌ഘാടനം ഇന്ന്‌ (മാര്‍ച്ച്‌ 6) രാവിലെ 9 ന്‌ പീച്ചി ഡാം പരിസരത്ത്‌ അഡ്വ. കെ രാജന്‍ എംഎല്‍എ നിര്‍വഹിക്കും. ജില്ലാ പഞ്ചായത്ത്‌ പ്രസിഡണ്ട്‌ മേരി തോമസ്‌ അദ്ധ്യക്ഷത വഹിക്കും. ജില്ലാ പഞ്ചായത്ത്‌ വൈസ്‌ പ്രസിഡണ്ട്‌ എന്‍ കെ ഉദയപ്രകാശ്‌ മുഖ്യപ്രഭാഷണം നടത്തും. ജില്ലാ കളക്‌ടര്‍ ടി വി അനുപമ, വികസന കാര്യസ്ഥിരം സമിതി ചെയര്‍പേഴ്‌സണ്‍ ജെന്നി ജോസഫ്‌ തുടങ്ങിയവര്‍ മുഖ്യാതിഥികളായിരിക്കും. ജില്ലാ മണ്ണുസംരക്ഷണ ഓഫീസര്‍ പദ്ധതി വിശദീകരിക്കും.

കേരള പുനര്‍നിര്‍മ്മാണ പദ്ധതി അഥവാ ആര്‍ കെ എ യിലേക്ക്‌ ജില്ലയില്‍ നിന്നും ഏകദേശം അമ്പത്‌ കോടി രൂപയിലേറെ ചെലവ്‌ വരുന്ന പദ്ധതികള്‍ സമര്‍പ്പിക്കാന്‍ ജില്ലാ ആസൂത്രണ സമിതി യോഗത്തില്‍ ധാരണയായി. ജില്ലാ പദ്ധതികളില്‍ നിന്നും തെരഞ്ഞെടുത്തതും സമിതി പുതുതായി മുന്നോട്ട്‌ വച്ചതുമായ പദ്ധതികളാണ്‌ സമര്‍പ്പിക്കുക. ഇവ സംബന്ധിച്ച എസ്റ്റിമേറ്റുകള്‍ പത്ത്‌ ദിവത്തിനകം സമര്‍പ്പിക്കാന്‍ ഡിപിസി നിര്‍ദ്ദേശിച്ചു.

കുടുംബശ്രീ ജില്ലാ മിഷന്‍ ഓഫീസില്‍ എംകെഎസ്‌പി ബ്ലോക്ക്‌ കോര്‍ഡിനേറ്റര്‍ തസ്‌തികയിലേക്ക്‌ താല്‍ക്കാലിക നിയമനം നടത്തുന്നു. അഗ്രികള്‍ച്ചര്‍ അല്ലെങ്കില്‍ അനിമല്‍ ഹസ്‌ബന്‍ഡറിയിലുളള വിഎച്ച്‌എസ്‌ഇ ആണ്‌ യോഗ്യത. അപേക്ഷ സ്വീകരിക്കുന്ന അവസാന തീയതി മാര്‍ച്ച്‌ 12. അപേക്ഷഫോറവും വിശദവിവരങ്ങളും www.kudumbashree.org എന്ന വെബ്‌ സൈറ്റില്‍ ലഭിക്കും. കൂടുതല്‍ വിവരങ്ങള്‍ക്ക്‌ ഫോണ്‍ : 0487-2362517.

ജില്ലാ നിയമ സേവന അതോറിറ്റി നാഷണല്‍ ലോക്‌ അദാലത്ത്‌ ജില്ലയില്‍ 5 താലൂക്കുകളില്‍ അദാലത്ത്‌ മാര്‍ച്ച്‌ 9 രാവിലെ 9 ന്‌ സംഘടിപ്പിക്കുന്നു. കോടതിയുടെ പരിഗണനയിലിരിക്കുന്ന ഇന്‍ഷൂറന്‍സ്‌ കേസുകള്‍, വൈവാഹിക തര്‍ക്കങ്ങള്‍, തൊഴില്‍ തര്‍ക്കങ്ങള്‍, സര്‍വീസ്‌ കേസുകള്‍, റവന്യൂ റിക്കവറി കേസുകള്‍ എന്നിവ അദാലത്തില്‍ പരിഗണിക്കും. ജില്ലാ ജഡ്‌ജി സോഫി തോമസ്‌, ജില്ലാ നിയമ സേവന അതോറിറ്റി സെക്രട്ടറി ജോയ്‌ കെ പി എന്നിവര്‍ അദാലത്തിന്‌ നേതൃത്വം നല്‍കും.
 

കെയര്‍ ഹോം പദ്ധതിയില്‍ ഉള്‍പ്പെടുത്തി സഹകരണ വകുപ്പ്‌ പ്രളയത്തില്‍ വീട്‌ നഷ്ടപ്പെട്ടവര്‍ക്കായി നല്‍കുന്ന 2000 വീടുകളുടെ നിര്‍മ്മാണം ഏപ്രില്‍ മാസത്തില്‍ പൂര്‍ത്തിയാക്കുമെന്ന്‌ സഹകരണ വകുപ്പ്‌ മന്ത്രി കടകംപ്പള്ളി സുരേന്ദ്രന്‍ പറഞ്ഞു. നവീകരിച്ച തൃശൂര്‍ സഹകരണ സംഘം ജോയിന്റ്‌ രജിസ്‌ട്രാര്‍ (ജനറല്‍) ഓഫീസ്‌ ഉദ്‌ഘാടനവും 39 മത്‌ നിക്ഷേപ സമാഹരണ യജ്ഞത്തിന്റെ സംസ്ഥാന തല ഉദ്‌ഘാടനവും സിവില്‍ സ്റ്റേഷന്‍ കോമ്പൗണ്ടില്‍ നിര്‍വഹിച്ചു സംസാരിക്കുകയായിരുന്നു അദ്ദേഹം. പരസ്‌പര വിശ്വാസവും സഹകരണ മനോഭാവവുമാണ്‌ പ്രളയത്തെ അതിജീവിക്കാന്‍ മലയാളിയെ സഹായിച്ചത്‌.

കഴിഞ്ഞ ഓഖിയിലും പ്രളയത്തിലും കടല്‍മണ്ണുകള്‍ വന്നടിഞ്ഞ്‌ ഉപയോഗശൂന്യമായ ബ്ലാങ്ങാച്ചാല്‍ അറപ്പത്തോട്ടിലെ മണ്ണുകള്‍ റവന്യൂ വകുപ്പിന്റെ സഹായത്തോടെ നീക്കം ചെയ്യും. ഇതിന്‌ വേണ്ട സാമ്പത്തിക സഹായവും റവന്യൂ വകുപ്പ്‌ നല്‍കും. തോട്ടിലെ മണ്ണുകള്‍ നീക്കം ചെയ്യുന്നത്‌ സംബന്ധിച്ച്‌ എം.എല്‍.എ ഇ.ടി.ടൈസണ്‍ മാസ്റ്റരുടെ നേതൃത്വത്തില്‍ ചേര്‍ന്ന സര്‍വ്വകക്ഷിയോഗത്തിലാണ്‌ തീരുമാനം. നീക്കം ചെയ്യുന്ന മണ്ണുകള്‍ പഞ്ചായത്തിന്റെ നേതൃത്വത്തില്‍ വലിയ പ്ലാസ്റ്റിക്‌ ചാക്കുകളില്‍ നിറച്ച്‌, പഞ്ചായത്തിലെ താഴ്‌ച്ചയുള്ള ഭാഗങ്ങളില്‍ തിരമാലകളെ പ്രതിരോധിക്കാനായി വീടുകള്‍ക്ക്‌ അരുകില്‍ സ്ഥാപിക്കും.

ദേശീയ ഗ്രാമവികസന മന്ത്രാലയത്തിന്റെ സഹകരണത്തോടെ കുടുംബശ്രീയുടെ നേതൃത്വത്തില്‍ സംസ്ഥാന സര്‍ക്കാര്‍ സംഘടിപ്പിക്കുന്ന ദേശീയ സരസ്സ്‌ മേള മാര്‍ച്ച്‌ 28 മുതല്‍ ഏപ്രില്‍ 7 വരെ കുന്നംകുളത്ത്‌ നടക്കും. നഗരത്തിലെ ചെറുവത്തൂര്‍ ഗ്രൗണ്ടിലാണ്‌ മേള. ഇന്ത്യയിലെ വിവിധ സംസ്ഥാനങ്ങളില്‍ നിന്നുള്ള ലഘു സംരഭകരുടെ 250 സ്റ്റാളുകള്‍, 15 സംസ്ഥാനങ്ങളിലെ രുചി വൈവിധ്യവുമായി ഫുഡ്‌ കോര്‍ട്ട്‌, വൈകീട്ട്‌ കലാപരിപാടികള്‍ എന്നിവയാണ്‌ സരസ്സ്‌ മേളയുടെ മുഖ്യ ആകര്‍ഷണങ്ങള്‍. 90 ലക്ഷം രൂപ ചെലവിലാണ്‌ മേള സംഘടിപ്പിക്കുന്നത്‌.