ജില്ലയില്‍ തെരഞ്ഞെടുപ്പ് ചിത്രം തെളിഞ്ഞു. മലപ്പുറം, പൊന്നാനി  ലോക്സഭാ മണ്ഡലങ്ങളിലേക്കായി 20 സ്ഥാനാര്‍ത്ഥികള്‍ മത്സരരംഗത്തുണ്ടാവും.   പത്രിക സമര്‍പ്പിച്ച 22 സ്ഥാനാര്‍ത്ഥികളില്‍ രണ്ടു പേര്‍ ഇന്നലെ (ഏപ്രില്‍ എട്ട് ) നാമനിര്‍ദേശപത്രിക പിന്‍വലിച്ചു. പൊന്നാനിയിലെ  ഖലിമുദ്ദീന്‍, നൗഷാദ് തുടങ്ങിയ രണ്ട് സ്ഥാനാര്‍ത്ഥികളാണ്  പത്രിക പിന്‍വലിച്ചത്. മലപ്പുറത്ത് എട്ട് സ്ഥാനാര്‍ത്ഥികളും പൊന്നാനിയില്‍ 12 സ്ഥാനാര്‍ത്ഥികളുമാണ് ഇപ്പോള്‍ മത്സര രംഗത്തുള്ളത്. ഏപ്രില്‍ 23 നാണ് തെരഞ്ഞെടുപ്പ്.

വിഷു പ്രമാണിച്ച് ഖാദി ഗ്രാമവ്യവസായ ബോര്‍ഡിന്റെ മലപ്പുറം കോട്ടപ്പടി മുനിസിപ്പല്‍ ബസ് സ്റ്റാന്‍ഡിലുള്ള  ഖാദി ഗ്രാമസൗഭാഗ്യയിലും, ബോര്‍ഡിന്റെ മറ്റു ഖാദി ഷോറൂമുകളിലും വില്‍ക്കപ്പെടുന്ന ഖാദി തുണിത്തരങ്ങള്‍ക്ക് ഏപ്രില്‍ മൂന്നു മുതല്‍ 13 വരെയുള്ള  11 ദിവസങ്ങളിലേക്ക് 30 ശതമാനം റിബേറ്റ് ഉണ്ടായിരിക്കുന്നതാണ് പ്രൊജക്ട് ഓഫീസര്‍ അറിയിച്ചു.

തെരഞ്ഞെടുപ്പിന്റെ പ്രചാരണ പ്രവര്‍ത്തനങ്ങള്‍ സജീവമായതോടെ   നിയമവിരുദ്ധമായി സ്ഥാപിച്ച പ്രചാരണ സാമഗ്രികള്‍ നീക്കം ചെയ്യുന്നതിനുള്ള നടപടികള്‍ ഊര്‍ജ്ജിതമാക്കി ആന്റി ഡിഫേസ്‌മെന്റ് സ്‌ക്വാഡ്. ജില്ലയിലെ മുഴുവന്‍ മണ്ഡലങ്ങളിലും  നടന്ന പരിശോധനയില്‍ ഇതുവരെ നീക്കം ചെയ്തത്  77,932 നിരോധിത പ്രചരണ സാമഗ്രികളാണ്.  പൊതു സ്ഥലങ്ങളില്‍ നിന്ന് 77129 ഉം സ്വകാര്യ സ്ഥലങ്ങളില്‍ 803 ഉം  പ്രചരണ സാമഗ്രികള്‍ സ്‌ക്വാഡ് നീക്കം ചെയ്തു.  ഇതില്‍ പൊതു- സ്വകാര്യ സ്ഥലങ്ങളില്‍ നിന്നായി  2042 ചുവരെഴുത്തുകള്‍ , 63874 പോസ്റ്ററുകള്‍, 5243 ബാനറുകള്‍, വിവിധ പാര്‍ട്ടികളുടെ 6583 കൊടികള്‍  എന്നിവയാണ് നീക്കം ചെയ്തത്.

പതിനേഴാം ലോക്‌സഭാ തെരഞ്ഞെടുപ്പില്‍ എല്ലാ ബൂത്തുകളിലും വി.വി പാറ്റ് മെഷീന്‍ വരുന്നതോടെ ഒരാള്‍ക്ക് വോട്ട് ചെയ്യാന്‍ വേണ്ടിവരുന്നത് 12 സെക്കന്‍ഡ് സമയം. ഇലക്ട്രോണിക് വോട്ടിങ് മെഷീന്‍ ഉപയോഗിക്കുമ്പോള്‍ ഒരാളുടെ വോട്ടിങ് പ്രക്രിയ പൂര്‍ത്തിയാകാന്‍ അഞ്ച് സെക്കന്റാണ് വേണ്ടത്. എന്നാല്‍ വോട്ടിങ് യന്ത്രത്തില്‍ തങ്ങള്‍ ശരിയായ രീതിയിലാണോ വോട്ട് ചെയ്തതെന്നു സമ്മതിദായകര്‍ക്ക് ഉറപ്പുവരുത്തുന്നതിനുള്ള വി.വി.പാറ്റ് യന്ത്രത്തില്‍ ഏഴ് സെക്കന്റാണ് വോട്ട് വിവരം തെളിഞ്ഞ് നില്‍ക്കുക. ഇതോടെ ഒരാള്‍ക്ക് വേണ്ടി വരുന്ന സമയം നേരത്തെയുള്ള അഞ്ച് സെക്കന്റില്‍ നിന്ന് 12 സെക്കന്റായി ഉയരും.

കേരള കര്‍ഷക തൊഴിലാളി ക്ഷേമനിധി ബോര്‍ഡില്‍ 2012 വര്‍ഷത്തില്‍ അതിവര്‍ഷാ നുകൂല്യത്തിന് അപേക്ഷിച്ചിട്ട് ആനുകൂല്യം ലഭിക്കാത്തവര്‍ ആധാര്‍ കാര്‍ഡിന്റെ പകര്‍പ്പ്, ബാങ്ക് പാസ്ബുക്കിന്റെ പകര്‍പ്പ്, അപേക്ഷിച്ച തിയതി എന്നിവയുമായി ഏപ്രില്‍ 22നകം കല്‍പ്പറ്റ എമിലി റോഡിലുളള ക്ഷേമനിധി ഓഫീസില്‍ നേരിട്ട് ഹാജരാകണം. ഫോണ്‍ 04936204602.