ലോക്‌സഭ തെരഞ്ഞെടുപ്പിനോടനുബന്ധിച്ച് ജില്ലയിലെ മൈക്രോ ഒബ്‌സര്‍വര്‍മാരായി നിയോഗിക്കപ്പെട്ട ജീവനക്കാര്‍ക്ക് പരിശീലനം നല്‍കി. ജില്ലാ പഞ്ചായത്ത് കോണ്‍ഫറന്‍സ് ഹാളില്‍ നടന്ന പരിശീലന പരിപാടിയില്‍ 200 ലധികം ജീവനക്കാര്‍ പങ്കെടുത്തു. രണ്ട് സെഷനുകളിലായാണ് ക്ലാസുകള്‍ സംഘടിപ്പിച്ചത്. തെരഞ്ഞെടുപ്പ് പ്രക്രിയ സംബന്ധിച്ച നിര്‍ദ്ദേശങ്ങളും, ഇവിഎം-വിവിപാറ്റ് മെഷീനുകളെ കുറിച്ചും ക്ലാസില്‍ വിശദീകരിച്ചു. 

ലോക്സഭ തെരഞ്ഞെടുപ്പുമായി ബന്ധപ്പെട്ട് സ്ഥാനാര്‍ത്ഥികളുടെ പ്രചാരണത്തിനായി ചെലവഴിക്കുന്ന തുക ബാങ്ക് അക്കൗണ്ടില്‍ നിന്ന് പിന്‍പലിച്ചതായിരിക്കണമെന്ന് എക്സ്പെന്റീച്ചര്‍ മോണിറ്ററിംഗ് നോഡല്‍ ഓഫീസര്‍ പി വി നാരായണന്‍ പറഞ്ഞു. ഇതിനായി നാമനിര്‍ദ്ദേശ പത്രിക സമര്‍പ്പിക്കുന്നതിന് മുമ്പ് സ്ഥാനാര്‍ത്ഥിയുടെ പേരിലോ സ്ഥാനാര്‍ത്ഥിയുടെയും ഏജന്റിന്റെയും പേരിലോ ആരംഭിച്ച അക്കൗണ്ട് ഉപയോഗിക്കണം.

ലോക്‌സഭാ തെരഞ്ഞെടുപ്പുമായി ബന്ധപ്പെട്ട് പോളിങ് ഉദ്യോഗസ്ഥര്‍ക്കുള്ള രണ്ടാംഘട്ട പരിശീലനത്തിനുള്ള  നിയമന ഉത്തരവുകള്‍ ഇന്നും നാളെയും (ഏപ്രില്‍ ഒന്‍പത്, 10) വിതരണം ചെയ്യും.  വിതരണം സുഗമമാക്കുന്നതിന്റെ ഭാഗമായി ജില്ലയിലെ എല്ലാ സര്‍ക്കാര്‍ സ്ഥാപനങ്ങളും ഇന്നും നാളെയും (ഏപ്രില്‍ ഒന്‍പത്, 10)  രാവിലെ ഒന്‍പത് മുതല്‍ തുറന്ന് പ്രവര്‍ത്തിക്കണമെന്ന്  ജില്ലാകലക്ടര്‍ അമിത് മീണ അറിയിച്ചു.

ജില്ലയില്‍ തെരഞ്ഞെടുപ്പ് ചിത്രം തെളിഞ്ഞു. മലപ്പുറം, പൊന്നാനി  ലോക്സഭാ മണ്ഡലങ്ങളിലേക്കായി 20 സ്ഥാനാര്‍ത്ഥികള്‍ മത്സരരംഗത്തുണ്ടാവും.   പത്രിക സമര്‍പ്പിച്ച 22 സ്ഥാനാര്‍ത്ഥികളില്‍ രണ്ടു പേര്‍ ഇന്നലെ (ഏപ്രില്‍ എട്ട് ) നാമനിര്‍ദേശപത്രിക പിന്‍വലിച്ചു. പൊന്നാനിയിലെ  ഖലിമുദ്ദീന്‍, നൗഷാദ് തുടങ്ങിയ രണ്ട് സ്ഥാനാര്‍ത്ഥികളാണ്  പത്രിക പിന്‍വലിച്ചത്. മലപ്പുറത്ത് എട്ട് സ്ഥാനാര്‍ത്ഥികളും പൊന്നാനിയില്‍ 12 സ്ഥാനാര്‍ത്ഥികളുമാണ് ഇപ്പോള്‍ മത്സര രംഗത്തുള്ളത്. ഏപ്രില്‍ 23 നാണ് തെരഞ്ഞെടുപ്പ്.

വിഷു പ്രമാണിച്ച് ഖാദി ഗ്രാമവ്യവസായ ബോര്‍ഡിന്റെ മലപ്പുറം കോട്ടപ്പടി മുനിസിപ്പല്‍ ബസ് സ്റ്റാന്‍ഡിലുള്ള  ഖാദി ഗ്രാമസൗഭാഗ്യയിലും, ബോര്‍ഡിന്റെ മറ്റു ഖാദി ഷോറൂമുകളിലും വില്‍ക്കപ്പെടുന്ന ഖാദി തുണിത്തരങ്ങള്‍ക്ക് ഏപ്രില്‍ മൂന്നു മുതല്‍ 13 വരെയുള്ള  11 ദിവസങ്ങളിലേക്ക് 30 ശതമാനം റിബേറ്റ് ഉണ്ടായിരിക്കുന്നതാണ് പ്രൊജക്ട് ഓഫീസര്‍ അറിയിച്ചു.