കോഴിക്കോട് ജില്ലാ ഭരണകൂടം,  ഹരിത കേരളം മിഷന്‍,  ശുചിത്വ മിഷന്‍ എന്നിവയുടെ നേതൃത്വത്തില്‍ പരിസ്ഥിതി സൗഹൃദ ഇലക്ഷന്‍ ക്യാമ്പയിന്റെ ഭാഗമായി ഗ്രീന്‍ ഇലക്ഷന്‍ ക്‌ളീന്‍ ഇലക്ഷന്‍ സ്റ്റിക്കറുകള്‍ ബസുകളില്‍ പതിപ്പിച്ചുളള പ്രചരണ പരിപാടി നടത്തി. പരിപാടിയുടെ ഉദ്ഘാടനം ജില്ലാ ഹരിതകേരളം മിഷന്‍ കോര്‍ഡിനേറ്റര്‍ പി. പ്രകാശ്, ശുചിത്വ മിഷന്‍ കോര്‍ഡിനേറ്റര്‍ സി. കബനി എന്നിവര്‍ ചേര്‍ന്ന് പുതിയ ബസ് സ്റ്റാന്‍ഡ് പരിസരത്ത് നിര്‍വഹിച്ചു. ലോക്‌സഭാ തെരഞ്ഞെടുപ്പ് 2019 നോടനുബന്ധിച്ച് ഹരിത കേരളം മിഷന്‍ പുറത്തിറക്കിയ ഹരിത,ചട്ട പാലനം സംശയങ്ങളും മറുപടികളും എന്ന കൈപ്പുസ്തകവും വിതരണം ചെയ്തു. 

കോഴിക്കോട് ഭൂജലവകുപ്പ് ജില്ലാ ഓഫീസിലെ കുഴല്‍കിണര്‍ നിര്‍മ്മാണത്തിന് ആവശ്യമായ ഡ്രില്ലിംഗ് സാമഗ്രികള്‍ വിതരണം ചെയ്യുന്നതിന് ദര്‍ഘാസുകള്‍ ക്ഷണിച്ചു. ദര്‍ഘാസ് സ്വീകരിക്കുന്ന അവസാന തീയതി  മെയ് 22 ഉച്ച മൂന്ന് മണി വരെ. ഫോണ്‍  0495 2370016.

സ്റ്റാറ്റിക് സര്‍വൈലന്‍സ് കോഴിക്കോട് സൗത്ത് സ്‌ക്വാഡ് 1.40 ലക്ഷം രൂപ പിടിച്ചെടുത്ത് കലക്ടറേറ്റ് സീനിയര്‍ ഫിനാന്‍സ് ഓഫീസറുടെ നേതൃത്വത്തിലുളള അപ്പീല്‍ കമ്മറ്റിക്ക്  കൈമാറി. ഇതുവരെ 59.91 ലക്ഷം രൂപ പിടിച്ചെടുത്തിട്ടുണ്ടെന്ന് ജില്ലാ തിരഞ്ഞെടുപ്പ് ഓഫീസര്‍ അറിയിച്ചു.

ലോക്സഭാ തിരഞ്ഞെടുപ്പ് സുഗമമാക്കാന്‍ ജില്ലാ തിരഞ്ഞെടുപ്പ് ഓഫിസര്‍ കൂടിയായ ജില്ലാ കളക്ടര്‍ എസ്.സാംബശിവറാവുവിന്റെ നേതൃത്വത്തില്‍ ഇ-ദൂത് മൊബൈല്‍ ആപ്ലിക്കേഷന്‍ പുറത്തിറക്കി. കളക്ടറുടെ ചേംബറില്‍ നടന്ന ചടങ്ങില്‍, തെരഞ്ഞെടുപ്പ് നിരീക്ഷക കവിതാ രാമു ഉദ്ഘാടനം നിര്‍വഹിച്ചു. ബോധവത്കരണപരിപാടിയായ സ്വീപ് സെല്ലിന്റെ ആഭിമുഖ്യത്തില്‍ തയാറാക്കിയ പ്രമോ വിഡിയോ വടകര മണ്ഡലത്തിന്റെ ചുമതലയുള്ള തെരഞ്ഞെടുപ്പ് നിരീക്ഷക ഭൂപീന്ദര്‍ കൗര്‍ ഔലക് ഉദ്ഘാടനം ചെയ്തു.

മെയ് മാസം നടക്കുന്ന 109-ാമത് അഖിലേന്ത്യാ അപ്രന്റീസ്ഷിപ്പ് ട്രേഡ് ടെസ്റ്റ് ഓണ്‍ലൈന്‍ അപേക്ഷ സമര്‍പ്പിക്കുന്ന തീയതി ഈ മാസം 22 വരെ നീട്ടി. 

        (പിഎന്‍പി 1016/19)

അന്തരീക്ഷ താപനില ക്രമാതീതമായി ഉയരുന്ന സാഹചര്യത്തില്‍ സംസ്ഥാന ദുരന്ത നിവാരണ അതോറിറ്റി പത്തനംതിട്ട ജില്ലയിലുള്‍പ്പെടെ സംസ്ഥാനത്ത് അതീവ ജാഗ്രത മുന്നറിയിപ്പ് പുറപ്പെടുവിച്ചു. കേന്ദ്ര കാലാവസ്ഥ വകുപ്പിന്റെ കാലാവസ്ഥാ വിശകലനത്തിന്റെ അടിസ്ഥാനത്തിലാണ്  അതീവ ജാഗ്രതാ മുന്നറിയിപ്പ് പുറപ്പെടുവിച്ചത്. പത്തനംതിട്ട ജില്ലയില്‍ ഏപ്രില്‍ 11 മുതല്‍ 13 വരെ താപനില രണ്ട് മുതല്‍ നാല് ഡിഗ്രി വരെ ഉയരുവാന്‍ സാധ്യതയുണ്ട്. ഇത് സൂര്യഘാത സാധ്യതകള്‍ക്ക് ഇടവരുത്തിയേക്കും. ഈ സാഹചര്യം കണക്കിലെടുത്ത് പൊതുജനങ്ങള്‍ സുരക്ഷാ നിര്‍ദേശങ്ങള്‍ കര്‍ശനമായി പാലിക്കണമെന്ന് ജില്ലാ കളക്ടര്‍ പി.ബി.നൂഹ് അഭ്യര്‍ഥിച്ചു. 

ലോക്‌സഭാ തെരഞ്ഞെടുപ്പ് പ്രചാരണത്തിനായി കുടുംബശ്രീ, തൊഴിലുറപ്പ് പ്രവര്‍ത്തകരെ ഉപയോഗിക്കാന്‍ പാടില്ലെന്ന് ജില്ലാ കളക്ടര്‍ പി ബി നൂഹ് അറിയിച്ചു. തൊഴിലുറപ്പ് പ്രോജക്ട് ഡയറക്ടര്‍ എന്‍ ഹരി,  കുടുംബശ്രീ ജില്ലാ മിഷന്‍ കോര്‍ഡിനേറ്റര്‍ കെ.വിധു എന്നിവര്‍ക്കാണ് നിര്‍ദേശം നല്‍കിയത്. കുടുംബശ്രീ പ്രവര്‍ത്തകരെ  രാഷ്ട്രീയപാര്‍ട്ടികളുടെ പ്രചാരണത്തിന് ഉപയോഗിക്കുന്നതായി ശ്രദ്ധയില്‍പെട്ട സാഹചര്യത്തിലാണ് നിര്‍ദേശം.