പ്രളയം ദുരന്തംവിതച്ച കേരളത്തിന്റെ പുന:സൃഷ്ടിക്ക് മുഖ്യമന്ത്രിയുടെ ദുരിതാശ്വാസനിധിയിലേയ്ക്കു മന്ത്രിയുടെ നേതൃത്വത്തില്‍ കാസര്‍കോട് ജില്ലയിലെ രണ്ടാം ഘട്ടം ധനസമാഹരണ യജ്ഞം ഇന്ന്(സെപ്തംബര്‍ 15) നടക്കും. ഹോസ്ദുര്‍ഗ് താലൂക്കില്‍ രാവിലെ 10.30 മുതല്‍ ഒന്നുവരെയും ഉച്ചകഴിഞ്ഞു രണ്ടുമുതല്‍ അഞ്ചുവരെ മംഗല്‍പാടി ഗ്രാമപഞ്ചായത്ത് ഹാളിലുമാണു ധനസമാഹരണം നടക്കുന്നത്.  ദുരിതാശ്വാസനിധിയിലേക്ക് പണമായി സംഭാവന എത്തിക്കുന്നത് ഡിഡിയായും നെഫ്റ്റായും മാറ്റുന്നതിന് സംവിധാനമൊരുക്കിയിട്ടുണ്ട്. വിവിധ ബാങ്കുകളുടെ കൗണ്ടറുകള്‍ ഇതിനായി സജ്ജീകരിച്ചിട്ടുണ്ട്. 

എന്‍ഡോസള്‍ഫാന്‍ ദുരിതബാധിതര്‍ക്കായി കാസര്‍കോട് ജില്ലയിലെ മുളിയാറില്‍ വരുന്നത് രാജ്യാന്തര നിലവാരത്തില്‍ പ്രകൃതിക്ക് ഇണങ്ങുന്നതരത്തിലുളള പുനരധിവാസ കേന്ദ്രം. ഇതു സംബന്ധിച്ച പ്രാഥമിക റിപ്പോര്‍ട്ട് കളക്ടറേറ്റില്‍ നടന്ന എന്‍ഡോസള്‍ഫാന്‍ സെല്‍ യോഗത്തില്‍ ഊരാളുങ്കല്‍ ലേബര്‍ കോണ്‍ട്രാക്ട് സൊസൈറ്റി അവതരിപ്പിച്ചു.

2017-ലെ മെഡിക്കല്‍ ക്യാമ്പില്‍ പങ്കെടുത്തവരില്‍ എന്‍ഡോസള്‍ഫാന്‍ ദുരിതബാധിതരുടെ പട്ടികയില്‍പ്പെടാത്തവര്‍ക്കായി നടത്തിയ പുന:പരിശോധനയില്‍ 77 പേരെകൂടി ഉള്‍പ്പെടുത്താന്‍ തീരുമാനിച്ചു. കളക്ടറേറ്റില്‍ റവന്യുവകുപ്പ് മന്ത്രി ഇ.ചന്ദ്രശേരന്റെ അധ്യക്ഷതയില്‍ ചേര്‍ന്ന എന്‍ഡോസള്‍ഫാന്‍ സെല്‍ യോഗമാണ് 77 പേരെ കൂടി പട്ടികയില്‍ ഉള്‍പ്പെടുത്താന്‍ സര്‍ക്കാരിനോട് ശുപാര്‍ശ ചെയ്തത്. 

 അരനൂറ്റാണ്ടിലേറെ പഴക്കമുള്ള നെയ്യാറ്റിന്‍കര നഗരസഭ ലൈബ്രറി ഇ-ലൈബ്രറി ആകുന്നു. നഗരസഭയുടെ പദ്ധതി വിഹിതം ഉപയോഗിച്ചാണ് ശ്രീ വാസുദേവന്‍ സ്മാരക ലൈബ്രറിയുടെ മുഖച്ഛായ മാറ്റുന്നത്. 1965 ല്‍ ആരംഭിച്ച ലൈബ്രറിയില്‍ പതിനാറായിരം പുസ്തകങ്ങളുണ്ട്. കാലപഴക്കം ചെന്ന് ഉപയോഗശൂന്യമായ പുസ്തകങ്ങളും അല്ലാത്തവയും ആദ്യ ഘട്ടത്തില്‍ വേര്‍തിരിക്കും.

സംസ്ഥാനത്തെ വിവിധ വകുപ്പുകള്‍, പൊതുമേഖലാ സ്ഥാപനങ്ങള്‍, സ്വയംഭരണ സ്ഥാപനങ്ങള്‍, സര്‍വകലാശാലകള്‍ എന്നിവിടങ്ങളില്‍ ഡിജിലോക്കര്‍ സംവിധാനം പ്രാവര്‍ത്തികമാക്കുന്നതിന് അനുമതി നല്‍കി സര്‍ക്കാര്‍ ഉത്തരവായി. വകുപ്പുകളും സ്ഥാപനങ്ങളും സോഫ്റ്റുവെയറുകള്‍ ഡിജിലോക്കറുമായി സംയോജിപ്പിക്കുന്നതിന് നടപടി സ്വീകരിക്കണം.

വകുപ്പുകള്‍/സ്ഥാപനങ്ങള്‍ നല്‍കുന്ന സര്‍ട്ടിഫിക്കറ്റുകളുടെ പകര്‍പ്പ് ഗുണഭോക്താവിന്റെ ഡിജിലോക്കര്‍ അക്കൗണ്ടില്‍ സൂക്ഷിക്കണം. സര്‍ട്ടിഫിക്കറ്റ് പരിശോധന ആവശ്യമായി വരുന്ന വകുപ്പുകള്‍/ സ്ഥാപനങ്ങള്‍ അക്കൗണ്ടില്‍ സൂക്ഷിച്ചിട്ടുളള ഡിജിറ്റല്‍ പകര്‍പ്പ് പരിശോധിക്കണം.

പ്രളയബാധിത മേഖലകളിലെ ആയിരക്കണക്കിന് മനുഷ്യരെ ദുരിതമുഖത്തു നിന്നും രക്ഷിച്ച മത്സ്യത്തൊഴിലാളികളെ ആയുഷ് വകുപ്പ് ആദരിക്കും. ഇതിന്റെ ഭാഗമായി മത്സ്യത്തൊഴിലാളികളുടെ ആരോഗ്യ സംരക്ഷണത്തിനും രോഗ പ്രതിരോധത്തിനും ആയുഷ് മെഗാ മെഡിക്കല്‍ ക്യാമ്പും ഔഷധ വിതരണവും ഇന്ന് രാവിലെ   (സെപ്റ്റംബര്‍ 15) രാവിലെ എട്ട് മുതല്‍ വേളി സെന്റ്‌തോമസ് ചര്‍ച്ച് ഹാളില്‍ നടക്കും. 

അരിവാള്‍ രോഗം അഥവാ അരിവാള്‍ കോശ വിളര്‍ച്ച ബാധിതരായ ഒ.ബി.സി. വിഭാഗത്തില്‍പെട്ട രക്ഷിതാക്കള്‍ക്ക് സ്വയംതൊഴിലിനായി ധനസഹായം നല്‍കുന്ന പദ്ധതിക്ക് പിന്നാക്ക വിഭാഗ വികസന വകുപ്പ് അപേക്ഷ ക്ഷണിച്ചു. അപേക്ഷയും അനുബന്ധ രേഖകളും www.bcdd.kerala.gov.in ല്‍   ലഭ്യമാണ്. പൂരിപ്പിച്ച അപേക്ഷയും അനുബന്ധരേഖകളും മേഖലാ ഡെപ്യൂട്ടി ഡയറക്ടര്‍, പിന്നാക്ക വിഭാഗ വികസന വകുപ്പ്, ഒന്നാം നില, സിവില്‍ സ്റ്റേഷന്‍, കോഴിക്കോട്-673020 എന്ന വിലാസത്തില്‍ അയക്കണം. കൂടുതല്‍ വിവരങ്ങള്‍ക്ക് 0495-2377786.     

പി.എന്‍.എക്‌സ്.4060/18