കെട്ടിടനിര്‍മാണ ക്ഷേമനിധി ബോര്‍ഡില്‍ 2017 നവംബര്‍ മാസം ആധാര്‍ കാര്‍ഡിന്റെ പകര്‍പ്പും ലൈഫ് സര്‍ട്ടിഫിക്കറ്റിന്റെ പകര്‍പ്പും ഹാജരാക്കാത്ത കാരണത്താല്‍ ഏപ്രില്‍ 2018 മുതല്‍ പെന്‍ഷന്‍ ലഭിക്കാത്ത അംഗങ്ങള്‍ പെന്‍ഷന്‍ ബുക്ക്, ആധാര്‍ കാര്‍ഡിന്റെ പകര്‍പ്പ്, ബാങ്ക് ബാസ്ബുക്കിന്റെ പകര്‍പ്പ്, ലൈഫ് സര്‍ട്ടിഫിക്കറ്റ് (പെന്‍ഷണര്‍ ഹാജരാകാത്ത സാഹചര്യത്തില്‍) എന്നിവ ഈ മാസം 22ന് മുമ്പായി ജില്ലാ ഓഫീസില്‍ ലഭ്യമാക്കണമെന്ന് എക്‌സിക്യൂട്ടീവ് ഓഫീസര്‍ അറിയിച്ചു.          (പിഎന്‍പി 2896/18)

ജില്ലാ നെഹ്രു യുവകേന്ദ്രത്തിന്റെയും മര്‍ത്തോമ ഹയര്‍ സെക്കന്‍ഡറി സ്‌കൂളിന്റെയും സംയുക്താഭിമുഖ്യത്തില്‍ നടത്തുന്ന ജില്ലാതല ഹിന്ദിപക്ഷാചരണ പരിപാടികളുടെ ഉദ്ഘാടനം പത്തനംതിട്ട മര്‍ത്തോമ ഹയര്‍ സെക്കന്‍ഡറി സ്‌കൂളില്‍ ജില്ലാ ലീഗല്‍ സര്‍വീസസ് അതോറിറ്റി സെക്രട്ടറി ആര്‍.ജയകൃഷ്ണന്‍ നിര്‍വഹിച്ചു. പ്രിന്‍സിപ്പല്‍ എം.ജോസ് പോള്‍, ഹെഡ്മാസ്റ്റര്‍ ജോണ്‍സ് വര്‍ഗീസ്, എസ്.കൃഷ്ണകുമാര്‍, ഷീബ ഉമ്മന്‍, ബേബി സി.മിനി, എം.ശ്രീകാന്ത് തുടങ്ങിയവര്‍ പങ്കെടുത്തു. ഈ മാസം 14 മുതല്‍ 28 വരെ ജില്ലയിലെ വിവിധ ഭാഗങ്ങളില്‍ ഹിന്ദിപക്ഷാചരണത്തിന്റെ ഭാഗമായുള്ള പരിപാടികള്‍ നടക്കും. 

       (പിഎന്‍പി 2895/18)

ജില്ലയെ വിറപ്പിച്ച് ഒഴുകിയെത്തിയ മഹാപ്രളയത്തിന് ശേഷം ഒരു മാസം പിന്നിടുമ്പോള്‍ സര്‍ക്കാരിന്റെയും സന്നദ്ധസംഘടനകളുടെയും പൊതുജനങ്ങളുടെയും പങ്കാളിത്തത്തോടെ ജില്ല ദുരിതക്കയത്തില്‍ നിന്നും കരകയറുന്ന കാഴ്ചയാണ് കാണുന്നത്. ആഗസ്റ്റ് 15ന് വെളുപ്പിന് റാന്നിയില്‍ ആരംഭിച്ച പ്രളയം അടുത്ത ദിവസങ്ങളില്‍ ആറന്മുളയിലും തിരുവല്ലയിലും വന്‍നാശനഷ്ടങ്ങളുണ്ടാക്കി ജനങ്ങളെ ദുരിതക്കയത്തിലാഴ്ത്തിയിരുന്നു. മത്സ്യബന്ധന ബോട്ടുകളുടെയും കര,നാവിക,വേ്യാമ സേനകളുടെയും കോസ്റ്റ് ഗാര്‍ഡിന്റെയും എന്‍ഡിആര്‍എഫിന്റെയും ഫയര്‍ഫോഴ്‌സിന്റെയും പ്രദേശവാസികളുടെയും സഹായത്തോടെ ആളുകളെ സുരക്ഷിത സ്ഥാനങ്ങളിലേക്ക് മാറ്റി. 

പ്രകൃതി ക്ഷോഭത്തില്‍ കനത്തനാശം നേരിട്ട സംസ്ഥാനത്തിന്റെ പുനര്‍നിര്‍മാണത്തിനായി മുഖ്യമന്ത്രിയുടെ ദുരിതാശ്വാസ നിധിയിലേക്ക് ഫണ്ട് ശേഖരിക്കുന്നതിന് നാളെ മൈലപ്ര ഗ്രാമപഞ്ചായത്തിലെ എല്ലാ വാര്‍ഡുകളിലും പ്രതേ്യക ഗ്രാമസഭ ചേരുമെന്ന് സെക്രട്ടറി അറിയിച്ചു.                                     (പിഎന്‍പി 2892/18)

പ്രളയത്തില്‍ ദുരിതമനുഭവിക്കുന്നവര്‍ക്കായി സംഭാവന ചെയ്ത് നാരങ്ങാനം സാവിയോ ഇംഗ്ലീഷ് സ്‌കൂളിലെ വിദ്യാര്‍ത്ഥികള്‍. 41000 രൂപ കഴിഞ്ഞ ദിവസം ജില്ലാ കളക്ടര്‍ പി.ബി നൂഹിന് സ്‌കൂള്‍ പ്രിന്‍സിപ്പിള്‍ സിസ്റ്റര്‍ സോളി കൈമാറി. സ്‌കൂളിലെ മൂന്ന് അധ്യാപകരുടേയും, അന്‍പത് വിദ്യാര്‍ത്ഥികളുടേയും വീടുകള്‍ പ്രളയത്തില്‍ മുങ്ങിപ്പോയിരുന്നു. അവര്‍ക്ക് വേണ്ട ഭക്ഷണസാധനങ്ങളും തുണികളും വീട്ടുപകരണങ്ങളുമെല്ലാം സ്‌കൂളിലെ വിദ്യാര്‍ത്ഥികളും അധ്യാപകരും ചേര്‍ന്ന് എത്തിച്ചിരുന്നു. സ്‌കൂള്‍ മാനേജര്‍ സിസ്റ്റര്‍ അന്നക്കുട്ടി, വിദ്യാര്‍ത്ഥികളായ ഷാലക്ക് സാം വര്‍ഗീസ്, അലിന ഷിജി ഏബ്രഹാം എന്നിവരും പങ്കെടുത്തു.