സപ്ലൈകോയുടെ ജില്ലാതല ഓണം-ബക്രീദ് മേള ഇന്നു (ആഗസ്റ്റ് 10) മുതല്‍. കണ്ണൂര്‍ മുന്‍സിപ്പല്‍ ഹയര്‍ സെക്കന്ററി സ്‌കൂളിന്റെ ജൂബിലി ഹാളില്‍ രാവിലെ 11 മണിക്ക് തുറമുഖ-പുരാവസ്തു വകുപ്പ് മന്ത്രി മന്ത്രി രാമചന്ദ്രന്‍ കടന്നപ്പള്ളിയാണ് മേള ഉദ്ഘാടനം ചെയ്യുക. കോര്‍പ്പറേഷന്‍ മേയര്‍ ഇ പി ലത അധ്യക്ഷയാകുന്ന ചടങ്ങില്‍ ജില്ലാ പഞ്ചായത്ത് പ്രസിഡന്റ് കെ വി സുമേഷ് ആദ്യവില്‍പ്പന  നടത്തും. മേളയോടൊപ്പം ഹോര്‍ട്ടി കോര്‍പ്പിന്റെ പച്ചക്കറി വില്‍പ്പനയും കയര്‍ കോര്‍പ്പറേഷന്റെ കയര്‍ ഉല്‍പ്പന്നങ്ങളുടെ വില്‍പ്പനയും ഉണ്ടാകും.

    പ്ലസ് വണ്‍, പ്ലസ് ടു ക്ലാസുകളില്‍ പഠിക്കുന്ന പട്ടികജാതി വിഭാഗത്തില്‍ പെട്ട വിദ്യാര്‍ത്ഥികള്‍ക്ക് തുടര്‍ പഠനം സംബന്ധിച്ച ധാരണ ഉണ്ടാക്കുന്നതിന്  ജില്ലാതല കരിയര്‍ ഗൈഡന്‍സ് ശില്‍പ്പശാല നടത്തുന്നു. ജില്ലാ പ്ലാനിംഗ് ഓഫീസിന്റെ പ്രധാന ഹാളില്‍ ആഗസ്റ്റ് 12 ന് രാവിലെ ഒമ്പത് മണി മുതലാണ് ശില്‍പ്പശാല നടക്കുക. ഫോണ്‍: 0497 2700596.
 

    കണ്ണൂര്‍ ഗവ. ഐ ടി ഐയും ഐ എം സിയും സംയുക്തമായി നടത്തുന്ന സ്‌പോക്കണ്‍ ഇംഗ്ലീഷ് കോഴ്‌സിന് അപേക്ഷ ക്ഷണിച്ചു. കോഴ്‌സ് ഫീസ് 2,000 രൂപ. അപേക്ഷിക്കേണ്ട അവസാന തിയ്യതി ആഗസ്റ്റ് 17. ഫോണ്‍: 9207999811.

    ജില്ലാവെറ്ററിനറി കേന്ദ്രം ക്യാമ്പസിലെ രണ്ട് മഴമരങ്ങളും  മഴമരത്തിന്റെ ഒരു ശിഖരവും കെട്ടിടങ്ങള്‍ക്ക് കേടുപാടുകള്‍ വരുത്താതെ മുറിച്ചെടുത്തു കൊണ്ടുപോകുന്നതിന് ജില്ലാ മൃഗാശുപത്രി പരിസരത്ത് ആഗസ്റ്റ് 13 ന് വൈകിട്ട് 2.30 ന് ലേലം നടത്തും.  താല്‍പര്യമുള്ളവര്‍ ആഗസ്റ്റ് 13 ന് ഉച്ച 12 ന് മുമ്പ് അപേക്ഷ നല്‍കണം.

    കെ എസ് എഫ് ഇയുടെ ബ്രാന്‍ഡഡ് ചിട്ടിയായ 'പൊന്നോണ ചിട്ടികള്‍'  ആകര്‍ഷകമായ സമ്മാന ഘടനയോടെ ആരംഭിച്ചു. കണ്ണൂര്‍ മേഖലയിലെ 45 ഓളം ശാഖകളിലെ പൊന്നോണ ചിട്ടികളില്‍ ചേരുന്ന വരിക്കാര്‍ക്ക് സമ്മാന പദ്ധതികളില്‍ അംഗമാകാന്‍ അവസരമുണ്ടായിരിക്കുമെന്ന് കണ്ണൂര്‍ മേഖലാ അസിസ്റ്റന്റ് ജനറല്‍ മാനേജര്‍ സികെ മധു മോഹന്‍ അറിയിച്ചു. 25, 15, 10 പവന്‍ സ്വര്‍ണ്ണമാണ് ആദ്യ മൂന്ന് സമ്മാനങ്ങള്‍. മേഖലാതല സമ്മാനമായി റോയല്‍ എന്‍ഫീല്‍ഡ് ബുള്ളറ്റ്, ശാഖാതല സമ്മാനമായി ഒരു ഗ്രാം സ്വര്‍ണ്ണ നാണയം (ഓരോ ചിട്ടിയിലും ഒന്നു വീതം ഒരാള്‍ക്ക്) എന്നിവയും നല്‍കും. 

    മലപ്പുറം ജില്ലാ മെഡിക്കല്‍ ഓഫീസില്‍ ഇന്ന് (ആഗസ്റ്റ് 10) നടത്താനിരുന്ന ഗ്രേഡ് രണ്ട് അറ്റന്റര്‍ തസ്തികയിലേക്കുള്ള കൂടിക്കാഴ്ച മാറ്റിയതായി മലപ്പുറം ജില്ലാ മെഡിക്കല്‍ ഓഫീസര്‍ അറിയിച്ചു. പുതുക്കിയ തിയ്യതി പിന്നീട് അറിയിക്കും. 

    അടുത്ത 24 മണിക്കൂര്‍ നേരം സംസ്ഥാനത്തെ ഒറ്റപ്പെട്ട സ്ഥലങ്ങളില്‍ കനത്ത മഴയ്ക്ക് സാധ്യതയുളളതായി കാലാവസ്ഥ നിരീക്ഷണ കേന്ദ്രം അറിയിച്ചു. ഏഴു മുതല്‍ 11 സെന്റിമീറ്റര്‍ വരെ മഴ പെയ്യാനാണ് സാധ്യത. 

    കേരള, ലക്ഷദ്വീപ് തീരങ്ങളില്‍ പടിഞ്ഞാറന്‍ ദിശയില്‍ മണിക്കൂറില്‍ 35 കിലോമീറ്റര്‍ മുതല്‍ 55 കിലോമീറ്റര്‍ വരെ വേഗതയില്‍ കാറ്റു വീശാന്‍ സാധ്യതയുള്ളതിനാല്‍ മത്സ്യത്തൊഴിലാളികള്‍ അടുത്ത 24 മണിക്കൂര്‍ കടലില്‍ പോകരുതെന്ന് കണ്ണൂര്‍ ഫിഷറീസ് കണ്‍ട്രോള്‍ റൂം മുന്നറിയിപ്പ് നല്‍കി. 

    കണ്ണൂര്‍ ജില്ല സ്‌പോര്‍ട്‌സ് കൗണ്‍സിലിന്റേയും കണ്ണൂര്‍ ഷട്ടില്‍ ബാഡ്മിന്റണ്‍ അസോസിയേഷന്റേയും സംയുക്താഭിമുഖ്യത്തില്‍ മുണ്ടയാട് ഇന്‍ഡോര്‍ സ്‌റ്റേഡിയത്തില്‍ ഷട്ടില്‍ പരിശീലന ക്യാമ്പ് നടത്തുന്നു. 17 വയസു വരെയുള്ള കുട്ടികള്‍ക്കാണ് വിദഗ്ധ പരിശീലകരുടെ സേവനം ലഭ്യമാക്കുക. ക്യാമ്പില്‍ പങ്കെടുക്കാന്‍ താല്‍പ്പര്യമുള്ളവര്‍ ആഗസ്റ്റ് 15 ന് ഉച്ചയ്ക്ക് രണ്ടു മണിക്ക് ഇന്‍ഡോര്‍ സ്‌റ്റേഡിയത്തില്‍ എത്തിച്ചേരണം. ഫോണ്‍: 9388706124, 9895830264.