പന്ന്യന്നൂർ ഗവ.ഐ ടി ഐ യിൽ ഡ്രാഫ്റ്റ്‌സ്മാൻ സിവിൽ, മെക്കാനിക്ക് മോട്ടോർ വെഹിക്കിൾ എന്നീ ട്രേഡുകളിൽ ഗസ്റ്റ് ഇൻസ്ട്രക്ടർമാരെ നിയമിക്കുന്നു.  യോഗ്യത: ബന്ധപ്പെട്ട വിഷയത്തിൽ ഡിഗ്രിയും ഒരു വർഷത്തെ പ്രവൃത്തി പരിചയവും അല്ലെങ്കിൽ ഡിപ്ലോമയും രണ്ടു വർഷത്തെ പ്രവൃത്തി പരിചയവും അല്ലെങ്കിൽ എൻ ടി സി യും എൻ എ സി യും മൂന്ന് വർഷത്തെ പ്രവൃത്തി പരിചയവും.  ഉദേ്യാഗാർഥികൾ എല്ലാ അസ്സൽ സർട്ടിഫിക്കറ്റുകളും സഹിതം ആഗസ്ത് മൂന്നിന് ഉച്ചക്ക് 2 മണിക്ക് പ്രിൻസിപ്പൽ മുമ്പാകെ ഹാജരാകേണ്ടതാണ്.

പട്ടികവർഗ്ഗ യുവതീ യുവാക്കൾക്ക് ഓൺലൈൻ അപേക്ഷകൾ സമർപ്പിക്കുന്നതിനും പിഎസ്‌സി രജിസ്‌ട്രേഷൻ തുടങ്ങിയവയ്ക്കും വേണ്ടി ഐടിഡിപി പ്രൊജക്ട് ഓഫീസിലും ട്രൈബൽ എക്സ്റ്റൻഷൻ ഓഫീസുകളിലും 2018-19 സാമ്പത്തിക വർഷം പട്ടികവർഗ്ഗക്കാരായ യുവതീ യുവാക്കളെ കരാറടിസ്ഥാനത്തിൽ ഓൺലൈൻ സഹായികളെ നിയമിക്കുന്നു. ഇതിനുള്ള വാക്-ഇൻ ഇന്റർവ്യൂ ആഗസ്റ്റ് നാലിന് രാവിലെ 11 മണിക്ക് കണ്ണൂർ സിവിൽ സ്റ്റേഷൻ അഡീഷണൽ ബ്ലോക്കിൽ പ്രവർത്തിക്കുന്ന ഐടിഡിപി ഓഫീസിൽ നടത്തുന്നു. ആകെ ഒഴിവുകൾ അഞ്ച്. പ്രായം 18 നും 36 നും ഇടയിൽ. യോഗ്യത ഏതെങ്കിലും വിഷയത്തിൽ ബിരുദം, ഡിപ്ലോമ ഇൻ കമ്പ്യൂട്ടർ ആപ്ലിക്കേഷൻ (ഡിസിഎ), ഇംഗ്ലീഷ്, മലയാളം ടൈപ്പിംഗ്.

കണ്ണൂർ ജില്ലാ സൈനിക ക്ഷേമഓഫീസിൽ നിന്നും പ്രതിമാസം സാമ്പത്തിക സഹായം കൈപ്പറ്റുന്ന രണ്ടാം ലോക മഹായുദ്ധസേനാനികൾ, അവരുടെ വിധവകൾ എന്നിവർ ഏപ്രിൽ മുതൽ എല്ലാ മൂന്നു മാസം കൂടുമ്പോഴും ലൈഫ് സർട്ടിഫിക്കറ്റ് ഹാജരാക്കേണ്ടതാണെന്ന് ജില്ലാ സൈനിക ക്ഷേമ ഓഫീസർ അറിയിച്ചു. ജൂലൈ മാസത്തെ ലൈഫ് സർട്ടിഫിക്കറ്റ് ഇതുവരെ ഹാജരാക്കാത്തവർ തുടർന്നും പ്രതിമാസ സാമ്പത്തിക സഹായം ലഭിക്കണമെങ്കിൽ ആഗസ്റ്റ് പത്തിന് മുൻപ് തന്നെ ഹാജരാക്കണം. 

കാടാച്ചിറ ഇലക്ട്രിക്കൽ സെക്ഷൻ പരിധിയിലെ ചാല ബൈപാസ്, ഈരാണിപാലം,  ഒ കെ യു പി സ്‌കൂൾ, മാതൃഭൂമി, ഫോക്‌സ് വാഗൺ, ഊർപ്പള്ളിക്കാവ് ഭാഗങ്ങളിൽ നാളെ (ആഗസ്ത് 2) രാവിലെ 9 മുതൽ വൈകിട്ട് 5 മണി വരെ വൈദ്യുതി മുടങ്ങും.

ചക്കരക്കൽ ഇലക്ട്രിക്കൽ സെക്ഷൻ പരിധിയിലെ മനയത്താംപറമ്പ്, പറമ്പ്കരി, തലക്കോട് ഭാഗങ്ങളിൽ നാളെ (ആഗസ്ത് 2) രാവിലെ 10 മുതൽ വൈകിട്ട് 5 മണി വരെ വൈദ്യുതി മുടങ്ങും.

സംസ്ഥാന സർക്കാർ സ്ഥാപനമായ ഐഎച്ച്ആർഡിയുടെ കീഴിൽ പട്ടുവം കയ്യംതടത്തിൽ പ്രവർത്തിക്കുന്ന കോളേജ് ഓഫ് അപ്ലൈഡ് സയൻസിൽ എംഎസ്‌സി കംപ്യൂട്ടർ സയൻസ്, എംഎസ്‌സി ഇലക്ട്രോണിക്‌സ് എന്നീ കോഴ്‌സുകളിൽ ഏതാനും സീറ്റുകൾ ഒഴിവുണ്ട്. എസ്‌സി/എസ്ടി, ഒഇസി വിഭാഗത്തിൽ പെട്ടവർക്ക് ഫീസ് ആനുകൂല്യം ലഭിക്കും. അപേക്ഷാ ഫോറം കോളേജ് ഓഫീസിൽ ലഭ്യമാണ്. ഫോൺ: 0460 2206050.

സംസ്ഥാനത്തെ സർക്കാർ / എയ്ഡഡ് സ്‌കൂളുകളിൽ 2017-18 വർഷം ഒന്നു മുതൽ പത്തുവരെ ക്ലാസുകളിൽ പഠിച്ചിരുന്ന ഒബിസി പ്രീമെട്രിക് സ്‌കോളർഷിപ്പിന് അർഹരായ വിദ്യാർത്ഥികളുടെ ബാങ്ക് അക്കൗണ്ട് ലൈവ് ആണെന്ന് ഉറപ്പാക്കുന്നതിന് വിദ്യാർത്ഥികൾക്ക് സ്‌കൂൾ പ്രധാനാധ്യാപകർ നിർദ്ദേശം  നൽകേണ്ടതാണെന്ന് പിന്നോക്ക വിഭാഗവികസന വകുപ്പ് മേഖലാ ഡെപ്യൂട്ടി ഡയറക്ടർ അറിയിച്ചു. 

ജില്ലയിലെ മൊബൈൽ ഫോൺ ടവറുകൾ ഉൾപ്പെടെ ടെലികോം പശ്ചാത്തല വികസനവുമായി ബന്ധപ്പെട്ട് പൊതുജനങ്ങളിൽ നിന്നും സേവനദാതാക്കളിൽ നിന്നും ലഭിച്ച പരാതികൾ ചർച്ച ചെയ്യാനും തീരുമാനങ്ങളെടുക്കാനുമായി ജില്ലാതല ടെലകോം കമ്മിറ്റിയുടെ യോഗം ഇന്ന് (ആഗസ്റ്റ് രണ്ട്) വൈകിട്ട് 3:30 ന് ജില്ലാ കലക്ടറുടെ ചേമ്പറിൽ ചേരും. പരാതിക്കാരും ടെലികോം സേവനദാതാക്കളും ബന്ധപ്പെട്ട തദ്ദേശസ്വയംഭരണ സ്ഥാപന മേധാവികളും ടെലകോം എൻഫോഴ്‌സ്‌മെന്റ് റിസോഴ്‌സ് ആൻഡ് മോണിറ്ററിംഗ് സെൽ (TERM Cell) പ്രതിനിധിയും ഹാജരാകണമെന്ന് ജില്ലാ കലക്ടർ അറിയിച്ചു.

വഴിയോര ഭാഗ്യക്കുറി വിൽപ്പനക്കാരായ സംസ്ഥാന ഭാഗ്യക്കുറി ക്ഷേമനിധി അംഗങ്ങൾക്ക് സൗജന്യമായി ബീച്ച് അംബ്രല്ലകൾ നൽകുന്നു. അപേക്ഷകൾ ആഗസ്റ്റ് 31 വരെ ജില്ലാ ഭാഗ്യക്കുറി ക്ഷേമനിധി ഓഫീസിൽ സ്വീകരിക്കും. 

സംസ്ഥാന ഭാഗ്യക്കുറി ക്ഷേമനിധിയിൽ അംഗത്വമുള്ളവരിൽ പത്താം തരം പഠനം പൂർത്തിയാക്കാൻ താൽപര്യമുള്ളവർക്ക് കേരള സംസ്ഥാന സാക്ഷരത മിഷൻ അതോറിറ്റിയുമായി സംയോജിച്ച് പത്താം തരം തുല്യതാ പഠനത്തിനും പരീക്ഷയ്ക്കുമായി സൗജന്യ പ്രവേശനത്തിന് അവസരം നൽകുന്നു. അപേക്ഷ സമർപ്പിക്കേണ്ട അവസാന തിയ്യതി ആഗസ്റ്റ് 31. 

സംസ്ഥാന ഭാഗ്യക്കുറി ക്ഷേമനിധിയിൽ അംഗമായ ആറു മാസത്തിൽ കൂടുതൽ അംശദായ കുടിശ്ശിക കാരണം അംഗത്വം റദ്ദായവർക്ക് കുടിശ്ശികത്തുക പിഴ സഹിതം ഒടുക്കി റദ്ദായ അംഗത്വം പുനഃസ്ഥാപിക്കാൻ അവസരം നൽകുമെന്ന് ജില്ലാ ഭാഗ്യക്കുറി ക്ഷേമ ഓഫീസർ അറിയിച്ചു. അവസാന തിയ്യതി ആഗസ്റ്റ് 16. ഈ അവസരം വിനിയോഗിക്കാൻ കുടിശ്ശിക ഒടുക്കുന്നതിന്റെ മുൻമാസത്തിൽ പതിനായിരം രൂപ മുഖവിലയുള്ള ഭാഗ്യക്കുറി ടിക്കറ്റുകൾ വാങ്ങിയതിന്റെ അംഗീകൃത ബില്ലുകളും വിൽപ്പന കണക്കും ഹാജരാക്കേണ്ടതും അംശദായ കുടിശ്ശിക തുക പിഴ സഹിതം ഒടുക്കേണ്ടതുമാണ്. 

കണ്ണൂർ ജില്ലാ ആശുപത്രിയിൽ താൽക്കാലികാടിസ്ഥാനത്തിൽ സ്റ്റാഫ് നഴ്‌സ് നിയമനം നടത്തുന്നതിന് ആഗസ്റ്റ് പത്തിന് രാവിലെ പത്തു മണിക്ക് വാക്-ഇൻ ഇന്റർവ്യൂ നടത്തും. യോഗ്യത: ഡിപ്ലോമ ഇൻ ജിഎൻഎം, കെഎൻഎംസി രജിസ്‌ട്രേഷൻ. യോഗ്യത തെളിയിക്കുന്ന സർട്ടിഫിക്കറ്റുകളും പകർപ്പുകളും സഹിതം ഉദ്യോഗാർഥികൾ അന്നു രാവിലെ 09:30 ന് ഓഫീസിൽ ഹാജരാകേണ്ടതാണ്. ഫോൺ: 0497 2731234.