ആര്‍ദ്രം പദ്ധതിയില്‍ ഉള്‍പ്പെടുത്തി 2018-19 വര്‍ഷത്തില്‍ കുടുംബാരോഗ്യ കേന്ദ്രങ്ങളായി വികസിപ്പിക്കുന്ന പ്രാഥമികാരോഗ്യ കേന്ദ്രങ്ങളിലെ ആദ്യഘട്ട പ്രവര്‍ത്തികള്‍ ജനുവരിയോടെ പൂര്‍ത്തീകരിക്കാനാവണമെന്ന്‌ കെ. രാജന്‍ എം.എല്‍.എ. ആര്‍ദ്രം പദ്ധതി സംബന്ധിച്ച ജനപ്രതിനിധികളുടെയും ഉദ്യോഗസ്ഥരുടെയും അവലോകന യോഗത്തില്‍ സംസാരിക്കുകയായിരുന്നു അദ്ദേഹം. ജില്ലയിലെ 48 പ്രാഥമികാരോഗ്യ കേന്ദ്രങ്ങളെയാണ്‌ ഈ വര്‍ഷം ആര്‍ദ്രം പദ്ധതിയില്‍ ഉള്‍പ്പെടുത്തി കുടുംബാരോഗ്യ കേന്ദ്രങ്ങളായി വികസിപ്പിക്കുന്നത്‌. പദ്ധതി നിര്‍വഹണത്തിന്‌ ഒരു മാസ്‌റ്റര്‍ പ്ലാന്‍ വേണം.

ഇന്ത്യന്‍ രാഷ്‌ട്രപതി രാംനാഥ്‌ കോവിന്ദിന്റെ ഓഗസ്റ്റ്‌ ഏഴിലെ ജില്ലയിലെ സന്ദര്‍ശനവുമായി ബന്ധപ്പെട്ട്‌ തൃശൂര്‍ സെന്റ്‌ തോമസ്‌ കോളേജില്‍ ജില്ലാ കളക്‌ടര്‍ ടി വി അനുപമയുടെ അദ്ധ്യക്ഷതയില്‍ യോഗം ചേര്‍ന്നു. കോളേജില്‍ രാഷ്‌ട്രപതി സന്ദര്‍ശനവുമായി ബന്ധപ്പെട്ട്‌ ഒരുക്കേണ്ട സൗകര്യങ്ങള്‍ വിശദീകരിച്ചു. എ.ഡി.എം സി ലതിക, സബ്‌ കളക്‌ടര്‍ ഡോ. രേണുരാജ്‌, പോലീസ്‌ ഉദ്യോഗസ്ഥര്‍, മറ്റ്‌ വിവിധ വകുപ്പു മേധാവികള്‍ യോഗത്തില്‍ പങ്കെടുത്തു. രാഷ്‌ട്രപതിയുടെ പരിപാടി നടക്കുന്ന സെന്റ്‌ തോമസ്‌ കോളേജ്‌ ഓഡിറ്റോറിയവും സന്ദര്‍ശിച്ചു.

മഴയെ തുടര്‍ന്ന്‌ പ്രക്ഷുബ്‌ധമാവുന്ന കടല്‍, ഡാം മുതലായ ഇടങ്ങളില്‍ വിനോദ സഞ്ചാരികള്‍ക്കുളള പ്രവേശനം അനുവദിക്കരുതെന്ന്‌ ജില്ലാ കളക്‌ടര്‍ ടി.വി. അനുപമ നിര്‍ദേശിച്ചു. ജില്ലയിലെ ഡാമുകളുടെ പരിസരത്തുനിന്നു ജനങ്ങളെ മാറ്റിപ്പാര്‍പ്പിക്കേണ്ട അവസ്ഥയില്ലെന്നും ചേംബറില്‍ നടന്ന ജില്ലാ ദുരന്തനിവാരണ അവലോകന യോഗത്തില്‍ ജില്ലാ കളക്‌ടര്‍ അറിയിച്ചു. ജില്ലയിലെ കടലേറ്റമുള്ള ഭാഗങ്ങള്‍, ഡാം പരിസരങ്ങള്‍ മുതലായ പ്രദേശങ്ങളില്‍ ജനങ്ങള്‍ക്ക്‌ കര്‍ശന പ്രവേശന നിയന്ത്രണം ഏര്‍പ്പെടുത്തും. ഇതിനായി പ്രത്യേക സജ്ജീകരണങ്ങള്‍ ഒരുക്കാന്‍ ബന്ധപ്പെട്ടവരോട്‌ കളക്‌ടര്‍ നിര്‍ദ്ദേശിച്ചു.

    കണ്ണൂര്‍ ഗവ.എഞ്ചിനീയറിങ് കോളേജിലെ ഇലക്‌ട്രോണിക്‌സ് ആന്റ് കമ്യൂണിക്കേഷന്‍ ലാബിലേക്കാവശ്യമായ ഉപകരണങ്ങള്‍ വിതരണം ചെയ്യുന്നതിന് ക്വട്ടേഷന്‍ ക്ഷണിച്ചു.  ആഗസ്ത് 10 ന് ഉച്ചക്ക് 2 മണിവരെ ക്വട്ടേഷന്‍ സ്വീകരിക്കും.  ഫൊണ്‍: 0497 2780226.

    ഡിഫന്‍സ് പെന്‍ഷന്‍ അദാലത്ത് എല്ലാ മാസവും അവസാനത്തെ പ്രവൃത്തി ദിവസം 10 മണി മുതല്‍ വൈകിട്ട് വൈകിട്ട് 5 മണി വരെ ഡി പി ഡി ഒ കണ്ണൂര്‍ ഓഫീസില്‍ നടത്തുമെന്ന് ജില്ലാ സൈനിക ക്ഷേമ ഓഫീസര്‍ അറിയിച്ചു.  ഡി പി ഡി ഒ യില്‍ നിന്നും ബാങ്കില്‍ നിന്നും പെന്‍ഷന്‍ വാങ്ങുന്നവര്‍ക്ക് പെന്‍ഷന്‍  കാര്യത്തില്‍ പരാതികളുണ്ടെങ്കില്‍ ഡി പി ഡി ഒ/സൈനിക ക്ഷേമ ഓഫീസില്‍ ലഭ്യമായ അപേക്ഷ പൂരിപ്പിച്ച് ജൂലൈ 31 ന് ഡി പി ഒ യില്‍ നേരിട്ട് സമര്‍പ്പിക്കണം.  സര്‍ക്കാരിന്റെ പെന്‍ഷന്‍ നയങ്ങളെക്കുറിച്ച് പരാതിയുള്ളവരോ കോടതിയില്‍ വ്യവഹാരങ്ങളുള്ളവരോ പരാതികള്‍ സമര്‍പ്പിക്കേണ്ടതില്ല.

    കണ്ണൂര്‍ ഗവ:വനിതാ ഐടിഐ കമ്പ്യൂട്ടര്‍ ഓപ്പറേറ്റര്‍ & പ്രോഗ്രാമിങ്ങ് അസിസ്റ്റന്റ് ്‌ട്രേഡില്‍ താല്‍ക്കാലിക ഒഴിവില്‍ ഗസ്റ്റ് ഇന്‍സ്ട്രക്ടററെ നിയമിക്കുന്നു. താല്‍പര്യമുള്ള ഉദ്യോഗാര്‍ഥികള്‍ വയസ്സ്, വിദ്യാഭ്യായ യോഗ്യത, പ്രവൃത്തി പരിചയം എന്നിവ തെളിയിക്കുന്ന അസ്സല്‍ സര്‍ട്ടിഫിക്കറ്റുകള്‍ സഹിതം ആഗസ്ത് മൂന്നിന് രാവിലെ 10.30 ന് കണ്ണൂര്‍ ഗവ: വനിതാ ഐ.ടി.ഐ.യില്‍ നേരിട്ട് ഹാജരാകണം. ഫോണ്‍:0497 2835987.

    തൊഴിലും നൈപുണ്യവും വകുപ്പിന്റെ ആഭിമുഖ്യത്തില്‍ ഇതര സംസ്ഥാനത്ത നിന്നും തൊഴിലിനായി കുടിയേറിയ കണ്ണൂര്‍ ജില്ലയിലെ അതിഥി തൊഴിലാളികള്‍ക്കായി  കേരളത്തിലെ എന്റെ തൊഴില്‍ അനുഭവം എന്ന വിഷയത്തില്‍ അനുഭവ കുറിപ്പ് മത്സരം സംഘടിപ്പിക്കുന്നു.  ഒരു പേജില്‍ കുറയാത്ത ഹിന്ദി ഭാഷയിലുളള രചനകള്‍ നേരിട്ടോ ജോലി ചെയ്യുന്ന സ്ഥാപന മേധാവികള്‍/കോണ്‍ട്രാക്ടര്‍മാര്‍ മുഖേനയോ ജില്ല ലേബര്‍ ഓഫീസ്/അസിസ്റ്റന്റ് ലേബര്‍ ഓഫീസുകളില്‍ ആഗസ്ത് 14 നുളളില്‍ സമര്‍പ്പിക്കണം.  തൊഴിലാളിയുടെ പൂര്‍ണ വിലാസം, ഫോണ്‍ നമ്പര്‍, സ്ഥാപനത്തിന്റെ വിലാസം, ഫോണ്‍ നമ്പര്‍ എന്നിവ സഹിതമാണ്  കുറിപ്പുകള്‍ സമര്‍പ്പിക്കേണ്ടത്.

    പൊതുവിദ്യാഭ്യാസ സംരക്ഷണ യജ്ഞത്തിന്റെ ഭാഗമായി ജില്ലയിലെ മുഴുവന്‍ സ്‌കൂളുകളെയും മികവിന്റെ കേന്ദ്രങ്ങളാക്കി മാറ്റുകയെന്ന ലക്ഷ്യത്തോടെ ജില്ലാ പഞ്ചായത്തിന്റെ നേതൃത്വത്തില്‍ നടക്കുന്ന മികവുല്‍സവം- 2018 ശില്‍പശാല ആഗസ്ത് ഒന്നിന് രാവിലെ 10ന് നടക്കും. ജില്ലാ പഞ്ചായത്ത് ഹാളില്‍ കണ്ണൂര്‍ സര്‍വകലാശാല വൈസ് ചാന്‍സിലര്‍ പ്രഫ. ഗോപിനാഥ് രവീന്ദ്രന്‍ ഉദ്ഘാടനം ചെയ്യും. അസിസ്റ്റന്റ് കലക്ടര്‍ അര്‍ജുന്‍ പാണ്ഡ്യ മുഖ്യാതിഥിയാവും. 

    കണ്ണൂര്‍ അഴീക്കല്‍ ഗവ.റീജിയണല്‍ ഫിഷറീസ് ടെക്‌നിക്കല്‍ ഹൈസ്‌കൂളില്‍ ഒഴിവുള്ള കെയര്‍ടേക്കര്‍(പുരുഷന്‍) തസ്തികയിലേക്ക് ദിവസവേതനാടിസ്ഥാനത്തില്‍ താല്‍ക്കാലിക  നിയമനം നടത്തുന്നു.  യോഗ്യത: ഏതെങ്കിലും വിഷയത്തില്‍ ഡിഗ്രിയും ബി എഡും.   35 വയസിന് മുകളില്‍ പ്രായമുള്ളവരും സ്ഥായിയായ രോഗങ്ങളില്ലെന്ന് മെഡിക്കല്‍ ഓഫീസര്‍ സാക്ഷ്യപ്പെടുത്തിയവരുമായിരിക്കണം.  നിശ്ചിത യോഗ്യതയുള്ള അപേക്ഷകര്‍ ബയോഡാറ്റയും സര്‍ട്ടിഫിക്കറ്റുകളുടെ കോപ്പിയും സഹിതം ആഗസ്ത് മൂന്നിന് രാവിലെ 11 മണിക്ക് സ്‌കൂളില്‍ നേരിട്ട് ഹാജരാകണം.  ഫോണ്‍: 0497 2770474.

    കേരളാ ലക്ഷദ്വീപ് തീരങ്ങളില്‍ വടക്ക് പടിഞ്ഞാറ് ദിശയില്‍ നിന്നും മണിക്കൂറില്‍ 35-55 കീലോമീറ്റര്‍ വേഗതയില്‍  കാറ്റ് വീശാനൂം ശക്തമായ മഴക്കൂം സാധ്യതയുള്ളതിനാല്‍ മത്സ്യത്തൊഴിലാളികള്‍  കടലില്‍ പോകരുതെന്ന്  ഫിഷറീസ് കണ്‍ട്രോള്‍ റൂം കണ്ണൂരില്‍ നിന്നും അറിയിച്ചു.