• പഞ്ചായത്തിനെ കേരഗ്രാമം പദ്ധതിക്കായി തിരഞ്ഞെടുത്തു

കൊച്ചി: സംസ്ഥാനത്തുടനീളം കൃഷി വകുപ്പ് നടപ്പിലാക്കുന്ന കേരഗ്രാമം പദ്ധതിയിലേക്ക് മൂവാറ്റുപുഴ ബ്ലോക്ക് പഞ്ചായത്തിലെ പായിപ്ര ഗ്രാമപഞ്ചായത്തിനെ തിരഞ്ഞെടുത്തതായി എല്‍ദോ എബ്രഹാം എം.എല്‍. എ അറിയിച്ചു. സംസ്ഥാനത്തെ നാളികേര ഉത്പാദനം വര്‍ധിപ്പിക്കുന്നതിനായി കൃഷി വകുപ്പ് നടപ്പിലാക്കുന്ന പദ്ധതിയാണ് കേരഗ്രാമം പദ്ധതി. 74 നിയോജകമണ്ഡലങ്ങളിലെ തിരഞ്ഞെടുക്കപ്പെട്ട പഞ്ചായത്തുകളിലാണ് പദ്ധതി നടപ്പിലാക്കുന്നത്. പദ്ധതിക്കായി 50.17 ലക്ഷം രൂപ അനുവദിച്ചിട്ടുണ്ട്.

കൊച്ചി: ജില്ലയിലെ അന്‍പതോളം പഞ്ചായത്തുകളിലായി 4030 കന്നുകാലികള്‍ക്ക് കുളമ്പുരോഗം സ്ഥിരീകരിച്ചു. ജന്തുരോഗനിയന്ത്രണ പ്രോജക്ട് കോര്‍ഡിനേറ്ററാണ് ഇതുസംബന്ധിച്ച് റിപ്പോര്‍ട്ട് സമര്‍പ്പിച്ചത്. രോഗം ബാധിച്ച കന്നുകാലികളെ കുറഞ്ഞവിലയ്ക്ക് വില്‍ക്കുന്നതും  രോഗബാധയുള്ള കന്നുകാലികളെ  കശാപ്പ് ചെയ്ത്, അവശിഷ്ടങ്ങള്‍ പൊതുസ്ഥലങ്ങളിലും ജലാശയങ്ങളിലും ഉപേക്ഷിക്കുന്നതും രോഗം പടരുന്നതിന് കാരണമാകും. 

കൊച്ചി: ജില്ലാ പഞ്ചായത്തിന്റെ സഹായത്തോടെ മുളന്തുരുത്തി ബ്ലോക്ക് പഞ്ചായത്തിലെ അംഗന്‍വാടികളില്‍ നടപ്പാക്കുന്ന നിരീക്ഷാ, അക്ഷരം പദ്ധതികള്‍ക്ക് തുടക്കം. കുട്ടികളുടെ ഭാരവും ഉയരവും അളക്കാനുള്ള പദ്ധതിയായ നിരീക്ഷയുടെ ഉദ്ഘാടനം ജില്ലാ പഞ്ചായത്ത് പ്രസിഡന്റ് ആശാ സനില്‍ നിര്‍വ്വഹിച്ചു. അംഗന്‍വാടികളില്‍ ലൈബ്രറി ഒരുക്കുന്ന അക്ഷരം പദ്ധതിയുടെ ഉദ്ഘാടനം ജില്ലാ പഞ്ചായത്ത് അംഗം എ.പി സുഭാഷ് നിര്‍വ്വഹിച്ചു. 

കൊച്ചി: ജൈവ വൈവിധ്യത്തിന്റെ കലവറകളായ കാവുകള്‍ സംരക്ഷിക്കണമെന്ന് ദേവസ്വം വകുപ്പ് മന്ത്രി കടകംപള്ളി സുരേന്ദ്രന്‍. കൊച്ചിന്‍ ദേവസ്വം ബോര്‍ഡ് ഹരിത ക്ഷേത്രം ശില്‍പ്പശാല എറണാകുളത്തപ്പന്‍ ഹാളില്‍ ഉദ്ഘാടനം ചെയ്യുകയായിരുന്നു അദ്ദേഹം. പ്രകൃതിയുടെ സന്തുലിതാവസ്ഥ നിലനിര്‍ത്തുന്നതിന് കാവുകള്‍ അത്യന്താപേക്ഷിതമാണ്. വൃക്ഷങ്ങള്‍ നടുക മാത്രമല്ല അത് പരിപാലിക്കുക കൂടി ചെയ്യണം. ക്ഷേത്രങ്ങളോടനുബന്ധിച്ചുള്ള തരിശ്ഭൂമി കൃഷിക്കും മറ്റ്  ക്ഷേത്രാവശ്യങ്ങള്‍ക്കുമുള്ള സസ്യങ്ങളും വിളയിച്ചെടുക്കാനുള്ള കൊച്ചി ദേവസ്വം ബോര്‍ഡിന്റെ പ്രവര്‍ത്തനം അഭിനന്ദനാര്‍ഹമാണെന്ന് അദ്ദേഹം പറഞ്ഞു. 

കൊച്ചി: ശിശുക്ഷേമസമിതിയുടെ കീഴിലുള്ള എറണാകുളം-കുട്ടികളുടെ പാര്‍ക്ക് നവീകരണ പ്രവൃത്തികളുടെ ഉദ്ഘാടനം വിനോദ സഞ്ചാര വകുപ്പ് മന്ത്രി കടകംപള്ളി സുരേന്ദ്രന്‍ നിര്‍വഹിച്ചു. അടുത്ത ഫെബ്രുവരിയില്‍ തന്നെ നവീകരണ പ്രവര്‍ത്തനങ്ങള്‍ പൂര്‍ത്തിയാക്കി പൊതു ജനങ്ങള്‍ക്ക് തുറന്നുകൊടുക്കാനാകുമെന്നാണ് പ്രതീക്ഷയെന്ന് മന്ത്രി പറഞ്ഞു. പാര്‍ക്ക് നവീകരണ പ്രവര്‍ത്തനങ്ങള്‍ക്കാവശ്യമായ ഫണ്ടിന്റെ കാര്യത്തില്‍ ആശങ്കപ്പെടേണ്ടതില്ല. പണികള്‍ പൂര്‍ത്തീകരിക്കുന്ന മുറയ്ക്ക് ഫണ്ടുകള്‍ പാസാക്കി നല്‍കുമെന്നും മന്ത്രി ഉറപ്പുനല്‍കി.

കൊച്ചി: വെളളപ്പൊക്ക ദുരിതം പകര്‍ത്തുന്നതിനിടെ മുങ്ങിമരിച്ച  മാധ്യമപ്രവര്‍ത്തകരായ കടുത്തുരുത്തി പൂഴിക്കോല്‍ പട്ടശ്ശേരില്‍ കെ.കെ.സജി, ബിപിന്‍ ബാബു എന്നിവരുടെ കുടുംബങ്ങള്‍ക്ക് ഒരു ലക്ഷം രൂപ വീതം ധനസഹായം നല്‍കുന്നതിന് കേരള മീഡിയ അക്കാദമി എക്‌സിക്യൂട്ടീവ് യോഗം തീരുമാനിച്ചു. തിരുവനന്തപുരത്ത് നടന്ന യോഗത്തില്‍ അക്കാദമി ചെയര്‍മാന്‍ ആര്‍.എസ്.ബാബു അധ്യക്ഷത വഹിച്ചു.  ഐ&പി.ആര്‍.ഡി ഡയറക്ടര്‍ സുഭാഷ് ടി.വി., അക്കാദമി സെക്രട്ടറി കെ.ജി.സന്തോഷ് കമ്മറ്റിയംഗങ്ങള്‍ തുടങ്ങിയവര്‍ പങ്കെടുത്തു.

കൊച്ചി: കൊച്ചി ശാസ്ത്ര സാങ്കേതിക സര്‍വ്വകലാശാലയുടെ  ബി.ടെക്ക് കോഴ്‌സുകളിലേക്കുള്ള അവസാന ഘട്ട സ്‌പോട്ട് അഡ്മിഷന്‍ ജൂലൈ 30-ന് നടക്കും. സര്‍വ്വകലാശാല നടത്തിയ ക്യാറ്റ്- 2018 റാങ്ക് ലിസ്റ്റില്‍ ഉള്‍പ്പെട്ടവര്‍ക്കു പങ്കെടുക്കാം. അപേക്ഷകര്‍ 30 ന് രാവിലെ ഒന്‍പതു മണിക്ക് പത്താം ക്ലാസ്സ് മുതലുള്ള എല്ലാ ഒറിജിനല്‍ സര്‍ട്ടിഫിക്കറ്റുകളും മറ്റു രേഖകളുമായി സര്‍വ്വകലാശാലയുടെ തൃക്കാക്കര ക്യാംപസിലുള്ള സെമിനാര്‍ കോംപ്ലക്‌സില്‍ റിപ്പോര്‍ട്ട് ചെയ്യണം. പത്തു മണിക്കു ശേഷം രജിസ്‌ട്രേഷന്‍ അനുവദിക്കുകയില്ല. സ്‌പോട്ട് അഡ്മിഷനു മുന്‍പായി അതു വരെയുള്ള വെയിറ്റിങ്ങ് ലിസ്റ്റുകളും ഓപ്ഷനുകളും കാന്‍സല്‍ ചെയ്യും.

കൊച്ചി: റേഷന്‍ വിതരണം സുതാര്യമാക്കുവാന്‍ കൊണ്ടു വന്ന ഇ-പോസ് സംവിധാനത്തില്‍ തിരിമറി നടത്തിയ റേഷന്‍ കടകള്‍ക്ക് എതിരെ നിയമ നടപടികള്‍ ആരംഭിച്ചതായി എറണാകുളം സിറ്റി റേഷനിംഗ് ഓഫീസര്‍ അറിയിച്ചു. കേരള സര്‍ക്കാറിന്റെ www.epos.kerala.gov.in എന്ന വെബ് പോര്‍ട്ടലില്‍ Beneficiary Details എന്ന ലിങ്കില്‍ ക്ലിക്ക് ചെയ്ത കിട്ടുന്ന പേജില്‍ റേഷന്‍ കാര്‍ഡ് നമ്പര്‍ രേഖപ്പെടുത്തി Submit എന്ന് എഴുതിയിട്ടുളളതിനു മേല്‍ ക്ലിക്ക് ചെയ്താല്‍ ഇ-പോസ്‌മെഷിന്‍ സ്ഥാപിച്ചതിനു ശേഷം ആ കാര്‍ഡിനു നല്‍കിയിട്ടുളള റേഷന്‍ സാധനങ്ങളുടെ വിവരങ്ങള്‍ ലഭിക്കും.

കൊച്ചി: ഒ.ബി.സി./മതന്യൂനപക്ഷ വിഭാഗത്തില്‍പ്പെട്ടവരും ചുരുങ്ങിയത് രണ്ട് വര്‍ഷമെങ്കിലും വിദേശത്ത് ജോലി ചെയ്തതിനുശേഷം മടങ്ങിയയെത്തിയവരുമായ പ്രവാസികളില്‍ നിന്നും കേരള സംസ്ഥാന പിന്നാക്ക വിഭാഗ വികസന കോര്‍പ്പറേഷന്‍ റീ-ടേണ്‍ പദ്ധതി പ്രകാരം വായ്പാ അപേക്ഷ ക്ഷണിച്ചു.

രാഷ്‌ട്രീയ മാധ്യമക്‌ ശിക്ഷാ അഭിയാന്‍ ഗേള്‍സ്‌ ഹോസ്റ്റല്‍ നിര്‍മ്മാണത്തിന്റേയും ചാലക്കുടി നഗരസഭ വിജയോത്സവം 2018 ന്റേയും ഉദ്‌ഘാടനം ജൂലായ്‌ 28 ഉച്ചയ്‌ക്ക്‌ 2 ന്‌്‌ വിദ്യാഭ്യാസ മന്ത്രി പ്രൊഫ. കെ രവീന്ദ്രനാഥ്‌ നിര്‍വ്വഹിക്കും. ചടങ്ങില്‍ ബി ഡി ദേവസ്സി എം.എല്‍.എ അദ്ധ്യക്ഷത വഹിക്കും. ഇന്നസെന്റ്‌ എം.പി മുഖ്യാതിഥിയാകും. പൊതുവിദ്യാഭ്യാസ സെക്രട്ടറി എ.ഷാജഹാന്‍, പൊതുവിദ്യാഭ്യാസ ഡയറക്‌ടര്‍ കെ.വി മോഹന്‍കുമാര്‍, ഹയര്‍സെക്കണ്ടറി ഡയറക്‌ടര്‍ സുധീര്‍ ബാബു., ആര്‍.എം.എസ്‌.എ സ്റ്റേറ്റ്‌ പ്രോജക്‌ട്‌ ഡയറക്‌ടര്‍ ആര്‍ രാഹുല്‍ എന്നിവര്‍ പങ്കെടുക്കും.