ജില്ലാ സാക്ഷരതാ മിഷന്റെ കീഴില്‍ രജിസ്റ്റര്‍ ചെയ്ത പത്താംതരം ഹയര്‍ സെക്കണ്ടറി തുല്യതാ കോഴ്‌സ് പഠിതാക്കളുടെ പഠന പുരോഗതി വിലയിരുത്തുന്നതിനായി അവലോകനയോഗം ചേരും. ഇന്ന് (ജൂലൈ 27) രാവിലെ 10 മണിക്ക് ജില്ലാ പഞ്ചായത്ത് ഹാളില്‍ പ്രസിഡണ്ട് കെ.വി. സുമേഷ് ഉദ്ഘാടനം ചെയ്യും. വൈസ് പ്രസിഡണ്ട് പി.പി.ദിവ്യ അധ്യക്ഷതവഹിക്കും.  സമ്പര്‍ക്ക പഠനകേന്ദ്രം കോ-ഓര്‍ഡിനേറ്റര്‍മാര്‍ ക്ലാസ് ലീഡര്‍മാര്‍ യോഗത്തില്‍ പങ്കെടുക്കും. നിരന്തര മൂല്യനിര്‍ണയത്തിന്റെ ഭാഗമായി നടത്തുന്ന സാമൂഹ്യസാക്ഷരത പരിപാടികളുടെ പുരോഗതിയും വിലയിരുത്തും.

കേരള സംസ്ഥാന സാക്ഷരതാ മിഷന്‍ അതോറിറ്റി നടത്തുന്ന ഭാഷാ സര്‍ട്ടിഫിക്കറ്റ് കോഴ്‌സിന്റെ ഒന്നാം ബാച്ചില്‍ പഠനം പൂര്‍ത്തിയാക്കിയവര്‍ക്ക് ജൂലൈ 29 ന്  രാവിലെ 10 മണി മുതല്‍ 11.30 വരെ എഴുത്ത് പരീക്ഷ നടത്തും. 24 പഠന കേന്ദ്രങ്ങളിലായി 591 പഠിതാക്കളാണ് പരീക്ഷ എഴുതുന്നത്. ഇതില്‍ 535 പേര്‍ ഗുഡ് ഇംഗ്ലീഷ് കോഴ്‌സിനും 39 പേര്‍ അച്ഛി ഹിന്ദി കോഴ്‌സിനും 17 പേര്‍ പച്ചമലയാളം കോഴ്‌സിനുമാണ് പഠിക്കുന്നത്. ജൂലൈ 15, 22 തീയതികളില്‍ നടന്ന വാചാ പരീക്ഷയുടെ മാര്‍ക്കും വിജയത്തിന് പരിഗണിക്കും. 

    കല്യാശ്ശേരി ബ്ലോക്ക് പഞ്ചായത്തിന്റെ വ്യവസായ സംരംഭങ്ങള്‍ക്ക് വ്യവസായ വകുപ്പിന്റെ പദ്ധതികള്‍ പരിചയപ്പെടുത്താനും പുതിയ സംരംഭങ്ങള്‍ തുടങ്ങാനുള്ള മാര്‍ഗനിര്‍ദേശങ്ങള്‍ നല്‍കുന്നതിനുമായുള്ള സംരംഭകത്വ സെമിനാര്‍ ഇന്ന് (ജൂലൈ 28)രാവിലെ 9.30 ന് കണ്ണപുരം ഗ്രാമപഞ്ചായത്ത് സെമിനാര്‍ ഹാളില്‍ ബ്ലോക്ക് പഞ്ചായത്ത് പ്രസിഡന്റ് വി വി പ്രീത ഉദ്ഘാടനം ചെയ്യും. വൈസ് പ്രസിഡന്റ് പി ഗോവിന്ദന്‍ അധ്യക്ഷത വഹിക്കുന്ന ചടങ്ങില്‍ ജില്ലാ വ്യവസായ കേന്ദ്രം ജനറല്‍ മാനേജര്‍ ടി. അബ്ദുള്‍ വഹാബ് മുഖ്യപ്രഭാഷണം നടത്തും.

    സംസ്ഥാന അസംഘടിത തൊഴിലാളി സാമൂഹ്യ സുരക്ഷാ പദ്ധതിയില്‍ പുതുതായി ഉള്‍പ്പെടുത്തിയ തൊഴില്‍ മേഖലകളായ എല്‍.ഐ.സി ഏജന്റുമാര്‍, ആശാ വര്‍ക്കര്‍മാര്‍, പാലിയേറ്റീവ് കെയര്‍ നഴ്‌സുമാര്‍, പാചകതൊഴിലാളികള്‍ എന്നീ വിഭാഗങ്ങളില്‍പെട്ട അസംഘടിത തൊഴിലാളികള്‍ക്കുള്ള അംഗത്വ വിതരണത്തിന്റേയും ബോധവത്കരണ പരിപാടിയുടേയും ഉദ്ഘാടനം ജൂലൈ 28 ന് രാവിലെ പത്തു മണിക്ക് കണ്ണൂര്‍ സി. കൃഷ്ണന്‍ സ്മാരക മന്ദിരത്തില്‍ തൊഴില്‍-എക്‌സൈസ് വകുപ്പ് മന്ത്രി ടി.പി രാമകൃഷ്ണന്‍ നിര്‍വ്വഹിക്കും. തുറമുഖ-പുരാവസ്തു വകുപ്പു മന്ത്രി രാമചന്ദ്രന്‍ കടന്നപ്പള്ളി അധ്യക്ഷത വഹിക്കും. 

 ഒ.ബ.സി., മതന്യൂനക്ഷ വിഭാഗത്തില്‍പ്പെട്ടവരും ചുരുങ്ങിയത് രണ്ടു വര്‍ഷമെങ്കിലും വിദേശത്ത് ജോലി ചെയ്തതിനുശേഷം മടങ്ങിയയെത്തിയവരുമായ പ്രവാസികളില്‍ നിന്നും കേരള സംസ്ഥാന പിന്നോക്ക വിഭാഗ വികസന കോര്‍പ്പറേഷന്‍ റീ-ടേണ്‍ പദ്ധതി പ്രകാരം വായ്പാ അപേക്ഷ ക്ഷണിച്ചു. 

കാസര്‍കോട് താലൂക്ക് വികസന സമിതിയോഗം ആഗസ്റ്റ് നാലിന് രാവിലെ 10.30ന് താലൂക്ക് ഓഫീസ് കോണ്‍ഫറന്‍സ് ഹാളില്‍ ചേരും.   

ജില്ലാ പോലീസ് മേധാവിയുടെ അധീനതയിലുള്ള സായുധ സേനാ ക്യാമ്പില്‍ സൂക്ഷിച്ചിരിക്കുന്ന ഡിപ്പാര്‍ട്ട്‌മെന്റിന് ഉപയോഗമില്ലാത്തതുമായ സ്‌പെയര്‍ പാര്‍ട്‌സുകളും വെയിസ്റ്റ് ഓയിലും ടയറുകളും സെപ്തംബര്‍ 25ന് രാവിലെ 11ന് ക്യാമ്പില്‍ ലേലം ചെയ്യും. ഫോണ്‍: 04994 230088        

 കേരള കള്ള് വ്യവസായ തൊഴിലാളി ക്ഷേമനിധിയില്‍ അംഗങ്ങളായ തൊഴിലാളികളുടെ മക്കള്‍ക്ക് 2018-19 അധ്യയന വര്‍ഷത്തേക്ക് സ്‌കോളര്‍ഷിപ്പ് നല്‍കുന്നതിന് അപേക്ഷ ക്ഷണിച്ചു.

 കാസര്‍കോട് ജില്ലയില്‍ ജില്ലാതലത്തില്‍ തയ്യാറാക്കുന്ന 1-1-2014 മുതല്‍ 31-12-2016 വരെയുള്ള പാര്‍ട്ട് ടൈം കണ്ടീജന്റ് വര്‍ക്കര്‍മാരുടെ കോമണ്‍ സീനിയോറിട്ടി ലിസ്റ്റ് 20-07-2018 ന് പ്രസിദ്ധീകരിച്ചു. kasargod.gov.in, gspeak.gov.in എന്നീ വെബ്‌സൈറ്റുകളില്‍ ഈ സീനിയോറിട്ടി ലിസ്റ്റ് പരിശോധനയ്ക്കായി ലഭിക്കും. ഈ താല്‍ക്കാലിക സീനിയോറിട്ടി ലിസ്റ്റിനെക്കുറിച്ച് അക്ഷേപങ്ങളോ അവകാശവാദങ്ങളോ ഉള്ളവര്‍ ബന്ധപ്പെട്ട രേഖകളുടെ സാക്ഷ്യപ്പെടുത്തിയ പകര്‍പ്പുകള്‍ സഹിതം ആഗസ്റ്റ് 11നകം ബന്ധപ്പെട്ട ഓഫീസ് മേധാവികള്‍ക്ക് സമര്‍പ്പിക്കണം.