നവോദയ വിദ്യാലയത്തില്‍ ആറാം ക്ലാസ് പ്രവേശനത്തിന് നടത്തിയ പരീക്ഷയുടെ ഫലം പ്രസിദ്ധീകരിച്ചു. പ്രവേശനത്തിന് അര്‍ഹരായ വിദ്യാര്‍ത്ഥികളുടെ ലിസ്റ്റ് പരിശോധനക്കായി ജില്ലാ ഇന്‍ഫര്‍മേഷന്‍ ഓഫീസില്‍ ലഭിക്കും. 

വെള്ളപ്പൊക്കത്തെ തുടര്‍ന്ന് വയറിളക്കം, മഞ്ഞപ്പിത്തം, എലിപ്പനി, ഡെങ്കിപ്പനി തുടങ്ങിയ പകര്‍ച്ചവ്യാധികള്‍ പടരുന്നത് തടയാന്‍ ആരോഗ്യ വകുപ്പ് ശക്തമായ പ്രതിരോധ - ബോധവത്കരണ നടപടികള്‍ ആരംഭിച്ചു എന്ന് ജില്ലാ മെഡിക്കല്‍ ഓഫീസര്‍ ഡോ: ജേക്കബ് വര്‍ഗീസ് അറിയിച്ചു.

വെള്ളമിറങ്ങിയതിനെ തുടര്‍ന്ന് അന്തേവാസികള്‍ ക്യാമ്പ് വിട്ടതോടെ ജില്ലയില്‍ പ്രവര്‍ത്തിച്ചിരുന്ന 16 ക്യാമ്പുകള്‍  കൂടി പിരിച്ചു വിട്ടു. ഇപ്പോള്‍ 31 ക്യാമ്പുകളാണ് ജില്ലയിലുള്ളത്. കോട്ടയത്ത് 9 ക്യാമ്പുകളിലായി 161 കുടുംബങ്ങളും   വൈക്കത്ത്  5 ക്യാമ്പുകളിലായി  154 കുടുംബങ്ങളും ചങ്ങനാശ്ശേരിയില്‍ 17 ക്യാമ്പുകളിലായി 777 കുടുംബങ്ങളുമാണ് ഉള്ളത്.   

ദുരിതാശ്വാസ ക്യാമ്പുകള്‍ പ്രവര്‍ത്തിക്കുന്ന സ്‌കൂളുകള്‍ക്ക് ഇന്ന് (ജൂലൈ 26) ജില്ലാ കളക്ടര്‍ അവധി പ്രഖ്യാപിച്ചു.