മാത്തറ കോഴിക്കോട് ബ്ലോക്ക് ഓഫീസ് കോമ്പൗണ്ടില്‍ പ്രവര്‍ത്തിക്കുന്ന കനറാ ബാങ്ക് സ്വയംതൊഴില്‍ പരിശീലന കേന്ദ്രത്തില്‍ ബ്യൂട്ടീഷ്യന്‍ കോഴ്‌സില്‍ സൗജന്യ പരിശീലനം നല്‍കും. താല്‍പര്യമുളള 18 നും 45 നും ഇടയിലുളള യുവതികള്‍ക്ക് അപേക്ഷിക്കാം. അപേക്ഷഫോം പരിശീലന കേന്ദ്രത്തില്‍ ലഭിക്കും. ഫോട്ടോ പതിച്ച അപേക്ഷ ആഗസ്റ്റ് 10 ന് അഞ്ച് വരെ സ്വീകരിക്കും. ഫോണ്‍ : 9447276470, 0495 2432470.
 

ഗവ വനിതാ പോളിടെക്നിക് കോളേജിലെ പ്രൊഡക്ഷന്‍ & ട്രെയിനിങ് സെന്ററിലേക്കു ഒരു ട്രെയിനറെ താല്‍ക്കാലികാടിസ്ഥാനത്തില്‍ നിയമിക്കും. യോഗ്യത :ഇലക്ട്രോണിക്‌സ്, ഇലക്ട്രോണിക്‌സ് & കമ്മ്യൂണിക്കേഷന്‍ എഞ്ചിനീയറിംഗ്  ഡിപ്ലോമ, ഇലക്ട്രോണിക്‌സ് ഗാഡ്‌ജെറ്റ്‌സ് നിര്‍മാണത്തില്‍ പ്രവൃത്തി പരിചയമു ണ്ടായിരിക്കണം. ഉദ്യോഗാര്‍ഥികള്‍ അസ്സല്‍ സര്‍ട്ടിഫിക്കറ്റുമായി കൂടിക്കാഴ്ചക്ക്  ഈ മാസം 30 ന് രാവിലെ 10.30 മണിക്ക് ഓഫീസില്‍ ഹാജരാകണം.

    പനങ്ങാട് ഗ്രാമ പഞ്ചായത്ത് ഹരിതകേരളമിഷന്‍ പ്രവര്‍ത്തനത്തിന്റെ ഗ്രാമ പഞ്ചായത്ത് തല അവലോകന യോഗം ഇ.എം.എസ് ഹാളില്‍   നടന്നു. ഗ്രാമ പഞ്ചായത്ത് പ്രസിഡന്റ്  വി.എം.കമലാക്ഷി അധ്യക്ഷത വഹിച്ചു. ഹരിത കേരളം ജില്ലാ മിഷന്‍ കോഡിനേറ്റര്‍ പ്രകാശ്.പി, ജനകീയാസൂത്രണം ജില്ലാ കോഡിനേറ്റര്‍ ഇ.പി.രത്‌നാകരന്‍, ജില്ലാ ശുചിത്വ മിഷന്‍ അസി. കോഡിനേറ്റര്‍ കെ. കുഞ്ഞിരാമന്‍, അസംബ്ലി മണ്ഡലം വികസന സമിതി കണ്‍വീനര്‍ വി.എം.കുട്ടികൃഷ്ണന്‍, നിറവ് വേങ്ങേരി പ്രോജക്ട് മാനേജര്‍ ടി.കെ.മോഹനന്‍ എന്നിവര്‍  ഹരിത കേരളം പ്രവര്‍ത്തനങ്ങളെ വിലയിരുത്തി ചര്‍ച്ച നടത്തി. 

വനിതാ ശിശു വികസന വകുപ്പിന്റെ ആഭിമുഖ്യത്തില്‍ ജില്ലാ ചൈല്‍ഡ് പ്രൊട്ടക്ഷന്‍ യൂണിറ്റ് മുഖേന ഒ.ആര്‍.സി പദ്ധതിയുടെ സ്‌കൂള്‍ തല പ്രവര്‍ത്തനങ്ങള്‍ നടപ്പാക്കുന്ന  കോര്‍ ടീം അംഗങ്ങള്‍ക്കായി ശില്പശാലയും സ്‌കൂള്‍ പ്രൊട്ടക്ഷന്‍ ഗ്രൂപ്പ് ചര്‍ച്ചയും നടത്തി. നളന്ദ ഓഡിറ്റോറിയത്തില്‍ ഡിസ്ട്രിക്ട്  ലീഗല്‍ സര്‍വീസ് അതോറിറ്റി സെക്രട്ടറി എം.പി ജയരാജന്‍ പരിപാടി ഉദ്ഘാടനം ചെയ്തു. ജില്ലാ ചൈല്‍ഡ് പ്രൊട്ടക്ഷന്‍ ഓഫീസര്‍ ജോസഫ് റിബല്ലോ അധ്യക്ഷത വഹിച്ചു. 

രക്തദാനത്തിന്റെ മഹാസന്ദേശം നല്‍കിക്കൊണ്ട് ചേളന്നൂരില്‍ രക്തദാന ക്യാമ്പ് സംഘടിപ്പിച്ചു. ഇ.എം.എസ് ചാരിറ്റബിള്‍ സൊസൈറ്റി വെസ്റ്റ് ബദിരൂര്‍ മക്കട യൂണിറ്റും കോട്ടപ്പറമ്പ് ഗവണ്‍മെന്റ് ഹോസ്പിറ്റലും സംയുക്തമായി നടത്തിയ ക്യാമ്പ് ചേളന്നൂര്‍ ബ്ലോക്ക് പഞ്ചായത്ത് പ്രസിഡന്റ് ഒ.പി ശോഭന ഉദ്ഘാടനം ചെയ്തു.

ജില്ലയിലെ മത്സ്യത്തൊഴിലാളികളുടെ മക്കള്‍ക്ക് പ്രീമെട്രിക് വിദ്യാഭ്യാസാനുകൂല്യത്തിന് അപേക്ഷയോടൊപ്പം വിദ്യാര്‍ത്ഥികളുടെ ബാങ്ക് അക്കൗണ്ട് പാസ്സ്ബുക്കിന്റെ പകര്‍പ്പും ഫോണ്‍ നമ്പരും കൂടി ഉള്‍പ്പെടുത്തണം. അപേക്ഷ ലഭിക്കേണ്ടണ്‍ അവസാന തീയതി ആഗസ്റ്റ് 31. 2017-18 സാമ്പത്തിക വര്‍ഷം അനുവദിക്കപ്പെട്ട തുകയുടെ ട്രഷറി റീകണ്‍സിലിയേഷന്‍ സ്റ്റേറ്റ്‌മെന്റ് ഈ മാസം 28 നകം ഓഫീസില്‍ ലഭ്യമാക്കണമെന്നും ഫിഷറീസ് ഡെപ്യൂട്ടി ഡയറക്ടര്‍ അറിയിച്ചു. ഫോണ്‍ നമ്പര്‍: 04952383780. 
 

    ഹരിത കേരള മിഷന്‍ പ്രവര്‍ത്തനത്തിന്റെ ഭാഗമായി അഴിയൂര്‍ ഗ്രാമ പഞ്ചായത്തില്‍ കല്യാണ പരിപാടികളില്‍ ഗ്രീന്‍പ്രോട്ടോക്കോള്‍ നടപ്പിലാക്കി ഹരിത കല്യാണം നടപ്പിലാക്കുന്ന പ്രവര്‍ത്തനം ആസൂത്രണം ചെയ്യുന്നതിന് വേണ്ടി ബന്ധപ്പെട്ടവരുടെ യോഗം ജൂലൈ 30 തിങ്കളാഴ്ച രാവിലെ 10.30 ന് പഞ്ചായത്ത് ഓഫീസില്‍ ചേരും.
 

    എടച്ചേരി ഗ്രാമപഞ്ചായത്തില്‍ ഗൃഹ ചൈതന്യം പദ്ധതിയുടെ ഭാഗമായി എല്ലാ വീട്ടിലും ഒരു ആര്യവേപ്പും കറിവേപ്പും നവംബര്‍ ഒന്നിന് എത്തിക്കും. സംസ്ഥാന ഔഷധ സസ്യബോര്‍ഡാണ് ഇത്തരമൊരു പ്രവര്‍ത്തനത്തിന് മുന്‍കയ്യെടുത്തത്.
    സുസ്ഥിര വികസനത്തിന്റെ സാധ്യതകളെ മനസ്സിലാക്കി കൊണ്ട് ഭാവിതലമുറയുടെ ആവശ്യങ്ങള്‍ നിറവേറ്റാനുളള അവരുടെ ശേഷി ചോര്‍ത്താതെ ഇന്നത്തെ ആവശ്യങ്ങളെ സാധിക്കാനാണ് പഞ്ചായത്ത് ലക്ഷ്യം വെക്കുന്നത്. ആരോഗ്യപൂര്‍ണ്ണമായ പരിസ്ഥിതി, ആരോഗ്യമുളള ജനത ഈ മാര്‍ഗ്ഗത്തിലേക്ക് എടച്ചേരി പഞ്ചായത്തും ഇത്തരമൊരു പ്രവര്‍ത്തനത്തിന് നേതൃത്വം നല്കുകയാണ്. 

    എടച്ചേരി ഗ്രാമപഞ്ചായത്തില്‍ അജൈവ മാലിന്യ സംസ്‌കരണത്തിന്റെ ഭാഗമായി പ്ലാസ്റ്റിക്ക് ഉള്‍പ്പെടെയുളള പാഴ് വസ്തുക്കള്‍ ശേഖരിച്ച് സംസ്‌കരണ ശാലകളിലേക്ക് അയക്കുന്നതിനുളള ഹരിതസേനാംഗങ്ങള്‍ക്കുളള പരിശീലനം ഓഗസ്റ്റ് ആറിന് ന് പഞ്ചായത്ത് ഹാളില്‍ നടക്കും. 34 ഹരിതസേനാംഗങ്ങള്‍ പങ്കെടുക്കും.