പാലാ കെ.എസ്.ആര്‍.ടി.സി ജംഗ്ഷനു സമീപം ഓട പുനരുദ്ധാരണം നടക്കുന്നതിനാല്‍ നഗരത്തില്‍ ജൂലൈ 26ന് ഗതാഗത നിയന്ത്രണം ഏര്‍പ്പെടുത്തിയതായി കെ.എസ്.റ്റി.പി എക്‌സിക്യൂട്ടീവ് എഞ്ചിനീയര്‍ അറിയിച്ചു. സ്റ്റാന്റിനു മുന്‍ഭാഗത്തുകൂടി ഈരാറ്റുപേട്ട, കോട്ടയം, പൊന്‍കുന്നം ഭാഗങ്ങളിലേക്ക് പോകുന്ന വാഹനങ്ങള്‍ കെ.സി സെബാസ്റ്റ്യന്‍സ് സ്‌ക്വയറില്‍ നിന്നും ബൈപാസിലുടെ  കുരിശുപള്ളി ജംഗ്ഷന്‍ വഴി  പോകണം. 

വെള്ളമിറങ്ങിയതിനെ തുടര്‍ന്ന് അന്തേവാസികള്‍ ക്യാമ്പ് വിട്ടതോടെ ജില്ലയില്‍ പ്രവര്‍ത്തിച്ചിരുന്ന 23 ക്യാമ്പുകള്‍  കൂടി പിരിച്ചു വിട്ടു. ഇപ്പോള്‍ 47 ക്യാമ്പുകളാണ് ജില്ലയിലുള്ളത്. കോട്ടയത്ത് 13,  വൈക്കത്ത്  8, ചങ്ങനാശ്ശേരിയില്‍ 26  ക്യാമ്പുകളുമാണ് പ്രവര്‍ത്തിക്കുന്നത്.  

കുറുവ ഗ്രാപഞ്ചായത്തിലെ രണ്ടാം ഘട്ട റേഷന്‍ കാര്‍ഡ് സംബന്ധമായ അപേക്ഷകള്‍ ജൂലൈ 26 ന് പെരിന്തല്‍മണ്ണ താലൂക്ക് സപ്ലൈ ഓഫീസില്‍ സ്വീകരിക്കുവാന്‍ തീരുമാനിച്ചത് മാറ്റി,  പൊതുജനങ്ങളുടെ സൗകര്യാര്‍ത്ഥം അന്നേ ദിവസം തന്നെ കുറുവ ഗ്രാമപഞ്ചായത്ത് ഹാളില്‍ വെച്ച് സ്വീകരിക്കുമെന്ന് താലൂക്ക് സപ്ലൈ ഓഫീസര്‍ അറിയിച്ചു.

തിരൂര്‍: മലയാളസര്‍വകലാശാല വിവിധ എം.എ കോഴ്‌സുകളിലേക്ക് നടത്തിയ പ്രവേശന പരീക്ഷയുടെ റാങ്ക് ലിസ്റ്റ് പ്രസിദ്ധീകരിച്ചു. ംംം.ാമഹമ്യമഹമാൗിശ്‌ലൃശെ്യേ.ലറൗ.ശി  എന്ന വെബ് സൈറ്റില്‍ ഫലം പരിശോധിക്കാം. ആദ്യഘട്ട അലോട്ട്‌മെന്റ് ലിസ്റ്റ് ഇന്ന് (ജൂലൈ 25) പ്രസിദ്ധീകരിക്കും.  ഇതില്‍  ഉള്‍പ്പെട്ട വിദ്യാര്‍ത്ഥികള്‍ ജൂലൈ 30ന്  പ്രവേശനം നേടേണ്ടതാണ്. ആഗസ്റ്റ് 17ന് ഒന്നാംവര്‍ഷ ക്ലാസ്സുകള്‍ ആരംഭിക്കും.

ജില്ലാ കുടുംബശ്രീ മിഷനും വളാഞ്ചേരി നഗരസഭയും സംയുക്തമായി  സംഘടിപ്പിക്കുന്ന ജില്ലാ തല ഭക്ഷ്യമേള 'ഉമ്മാന്റെ വടക്കിനി' ക്ക് വളാഞ്ചേരിയില്‍ തുടക്കമായി. പ്രൊഫ: ആബിദ് ഹുസൈന്‍ തങ്ങള്‍ എം.എല്‍.എ മേള ഉദ്ഘാടനം ചെയ്തു. നഗരസഭാദ്ധ്യക്ഷ എം. ഷാഹിന ടീച്ചര്‍ അദ്ധ്യക്ഷത വഹിച്ചു. നഗസഭാ വൈസ് ചെയര്‍മാന്‍ കെ വി ഉണ്ണികൃഷ്ണന്‍, കൗണ്‍സിലര്‍ മൈമൂന, നഗരസഭാ സെക്രട്ടറി എ ഫൈസല്‍, ബെന്നിമാത്യു, കുടുംബശ്രീ ഡിപിഎം (മാര്‍ക്കറ്റിംഗ്) മൃദുല, എന്‍.യു.എല്‍.എം മാനേജര്‍ പി.കെ സുബൈറുല്‍ അവാന്‍, വ്യാപാരി വ്യവസായി യൂണിറ്റ് സെക്രട്ടറി കെ. മുഹമ്മദലി, സി.ഡി.എസ് ചെയര്‍പേഴ്‌സണ്‍ സുനിത രമേഷ് എന്നിവര്‍ സംസാരിച്ചു.

ബാങ്കിങ് തട്ടിപ്പുകള്‍ക്കെതിരായ 'മിണ്ടരുത്'  ഹ്രസ്വ ചിത്രത്തിന് ശേഷം സാമൂഹിക പ്രാധാന്യമുള്ള പുതിയ ചിത്രവുമായി ജില്ലാ പൊലീസ്. സ്ത്രീ സുരക്ഷയുടെ സന്ദേശവുമായി ഒരുക്കുന്ന 'സ്നേഹിപ്പിന്‍' ഡോക്യുഫിക്ഷന്‍' ചിത്രീകരണോദ്ഘാടനം ജില്ലാ പൊലീസ് മേധാവി പ്രതീഷ് കുമാര്‍ നിര്‍വഹിച്ചു.

താഴേക്കോട് ഗ്രാമ പഞ്ചായത്തിലെ ജി.എം.എല്‍.പി സ്‌കൂള്‍ മികവിന്റെ കേന്ദ്രമാകുന്നു. ഹൈടെക്ക് സംവിധാനത്തോടെ നവീകരിച്ച കെട്ടിടത്തിന്റെ ഉദ്ഘാടനം വ്യാഴാഴ്ച രാവിലെ 10 മണിക്ക് മഞ്ഞളാംകുഴി അലി എം.എല്‍.എ നിര്‍വ്വഹിക്കും.
പൊതുവിദ്യാലയങ്ങളെ മികവിന്റെ കേന്ദ്രമാക്കി ഉയര്‍ത്തുന്ന പദ്ധതിയില്‍ സംസ്ഥാന സര്‍ക്കാര്‍ 1 കോടി രൂപയാണ് താഴേക്കോട് ജി.എം.എല്‍.പി സ്‌കൂളിന് അനുവദിച്ചത്. എം.പി ഫണ്ടും എംഎല്‍എ ഫണ്ടും പഞ്ചായത്ത് ഫണ്ടും കൂടാതെ നാട്ടുകാര്‍ കണ്ടെത്തിയ പണവും കൂടിയായതോടെയാണ് സ്‌കൂളില്‍ മികച്ച കെട്ടിടവും ഉയര്‍ന്ന പഠനാന്തരീക്ഷവും ഒരുങ്ങിയത്.