സംസ്ഥാന ഹജ്ജ് കമ്മിറ്റിയുടെ ഈ വര്‍ഷത്തെ ആദ്യഘട്ട പരിശീലനം മലപ്പുറം ടൗണ്‍ ഹാളില്‍ നടന്നു. ജില്ലാപഞ്ചായത്ത് പ്രസിഡന്റ് എ.പി ഉണ്ണികൃഷ്ണന്‍ പരിശീലനപരിപാടി ഉദ്ഘാടനം ചെയ്തു. ജില്ലാകളക്ടര്‍ അമിത് മീണ മുഖ്യപ്രഭാഷണം നടത്തി. നഗരസഭാ കൗണ്‍സിലര്‍ ഹാരിസ് അമിയാന്‍, ഹജ്ജ് കമ്മിറ്റി അംഗങ്ങളായ ടി.കെ അബ്ദുറഹ്മാന്‍, ഷാജഹാന്‍, കണ്ണിയന്‍ മുഹമ്മദലി തുടങ്ങിയവര്‍ പങ്കെടുത്തു.
കോട്ടക്കല്‍, മലപ്പുറം, മങ്കട, പെരിന്തല്‍മണ്ണ നിയോജക മണ്ഡലങ്ങളില്‍ നിന്നുള്ളവരാണ് പരിശീലനപരിപാടിയില്‍ പങ്കെടുത്തത്. മൊയ്തീന്‍ മാസ്റ്റര്‍, ഇബ്രാഹിംകുട്ടി, നൂറുദ്ദീന്‍, ഹംസ ലാഹിക് എന്നിവര്‍ പരിശീലനത്തിന് നേതൃത്വം നല്‍കി.

    പാലക്കാട് ഗവ. മെഡിക്കല്‍ കോളെജില്‍ പ്രൊജക്റ്റ് എഞ്ചിനീയര്‍, സൈറ്റ് എഞ്ചിനീയര്‍ തസ്തികകളിലേക്ക് കരാറടിസ്ഥാനത്തില്‍ നിയമനം നടത്തും. ബയോഡാറ്റയും സര്‍ട്ടിഫിക്കറ്റുകളുടെ പകര്‍പ്പും സഹിതമുളള അപേക്ഷ മാര്‍ച്ച് 16 ന് വൈകിട്ട് അഞ്ചിനകം മെഡിക്കല്‍ കോളെജില്‍ ലഭിക്കണം. സര്‍ക്കാര്‍ ജോലിയില്‍ നിന്നും വിരമിച്ച എക്സിക്യൂട്ടീവ് എഞ്ചിനീയര്‍ക്ക് പൊരജക്റ്റ് എഞ്ചിനീയര്‍ തസ്തികയിലേക്കും, ബി.ടെക് സിവില്‍, സിവില്‍ എഞ്ചിനീയറിങ് ഡിപ്ലൊമയുളളവര്‍ക്ക് സൈറ്റ് എഞ്ചിനീയര്‍ തസ്തികയിലേക്കും അപേക്ഷിക്കാം. ഫോണ്‍ 0491 2000644

യുവകര്‍ഷകര്‍ക്കായി സംസ്ഥാന ഹോര്‍ട്ടികള്‍ച്ചര്‍ മിഷന്‍ പ്രാപ്തി വികസനം ലക്ഷ്യമാക്കി നഴ്‌സറി, പൂന്തോട്ട നിര്‍മ്മാണ പരിശീലന പരിപാടി സംഘടിപ്പിക്കും.   18നും 40നും ഇടയില്‍ പ്രായമുള്ളവര്‍ക്കും മുന്‍പരിചയമുള്ള തൊഴില്‍ രഹിതര്‍ക്ക് അപേക്ഷിക്കാം.  പരിശീലന കാലാവധി 30 ദിവസം.  അപേക്ഷ മാര്‍ച്ച് 31ന് വൈകുന്നേരം അഞ്ചിനകം ജില്ലാ ഹോര്‍ട്ടികള്‍ച്ചറല്‍ മിഷന്‍ ഓഫീസില്‍ നല്‍കണം.  പരിശീനം ലഭിച്ചാല്‍ സ്ഥിരമായി തൊഴിലില്‍ നിലനില്‍ക്കുമെന്ന സമ്മതപത്രവും നല്‍കണം.  ഫോണ്‍ 9496002968.

പെരിന്തല്‍മണ്ണ അഡീഷണല്‍ ഐ.സി.ഡി.എസ് പ്രോജക്ട് ഓഫീസിന് പരിധിയിലുള്ള അങ്കണവാടികളില്‍ കണ്ടിജന്‍സി സാധനങ്ങള്‍ വിതിരണം ചെയ്യുന്നതിന് റീ-ടെണ്ടര്‍ ക്ഷണിച്ചു.  ടെണ്ടര്‍ സ്വീകരിക്കുന്ന അവസാന തിയ്യതി മാര്‍ച്ച് 18 ഉച്ചക്ക് 12. കൂടുതല്‍ വിവരങ്ങള്‍ക്ക് പട്ടിക്കാട് - ചുങ്കത്തുള്ള ഓഫീസുമായി ബന്ധപ്പെടാം.  ഫോണ്‍ 04933 235580.

    പട്ടികവര്‍ഗ വികസന വകുപ്പിന് കീഴിലുളള മലമ്പുഴ ആശ്രമം സ്കൂളില്‍ വിവിധ അധ്യാപക ഒഴിവുകളിലേക്ക് കരാര്‍ അടിസ്ഥാനത്തില്‍  നിയമനം നടത്തും.  താത്പര്യമുളളവര്‍ ബയോഡാറ്റ, യോഗ്യത, ജാതി, പ്രവൃത്തിപരിചയ സര്‍ട്ടിഫിക്കറ്റ് എന്നിവയുടെ പകര്‍പ്പുകള്‍ സഹിതമുളള അപേക്ഷ മാര്‍ച്ച് 15 വൈകിട്ട് നാലിനകം ജില്ലാ പട്ടികവര്‍ഗ വികസന ഓഫീസില്‍ നല്‍കണം. കൂടിക്കാഴ്ചയുടേയും യോഗ്യതയുടേയും അടിസ്ഥാനത്തിലാണ് നിയമനം. ഫോണ്‍ - 0491 2815894.

സംസ്ഥാന വനിതാ കമ്മീഷന്‍ മാര്‍ച്ച് 23ന് രാവിലെ 10.30 മുതല്‍ കലക്‌ട്രേറ്റ് സമ്മേളന ഹാളില്‍ മെഗാ അദാലത്ത് നടത്തും.  അദാലത്തില്‍ നിലവിലുള്ള അപേക്ഷകള്‍ക്ക് പുറമെ പുതിയ അപേക്ഷകളും പരിഗണിക്കും.

സൂക്ഷ്മ-ചെറുകിട-ഇടത്തരം സംരംഭങ്ങള്‍ ആരംഭിക്കുന്നതിന്റെ ആവശ്യകതയെ കുറിച്ചും തദ്ദേശ ഭരണ സ്ഥാപനങ്ങളും മറ്റു ഏജന്‍സികളും വഹിക്കേണ്ട പങ്കിനെക്കുറിച്ചും ജില്ലാ വ്യവസായ കേന്ദ്രം മാര്‍ച്ച് 17ന് ഏകദിന ശില്‍പശാല സംഘടിപ്പിക്കും.  പൊന്നാനി റൗബ റസിഡന്‍സിയില്‍ രാവിലെ 10.30ന് നിയമസഭാ സ്പീക്കര്‍പി. ശ്രീരാമകൃഷ്ണന്‍ ശില്പശാല ഉദ്ഘാടനം ചെയ്യും.  പൊന്നാനി നഗരസഭാ ചെയര്‍മാന്‍ സി.പി. മുഹമ്മദ് കുഞ്ഞി അധ്യക്ഷത വഹിക്കും.  ജില്ലാ വ്യവസായ കേന്ദ്രം ജനറല്‍ മാനേജര്‍ ടി. അബുല്‍ വഹാബ്, ജില്ലാ പഞ്ചായത്ത് പ്രസിഡന്റ് എ.പി ഉണ്ണികൃഷ്ണന്‍ തുടങ്ങിവയര്‍ പങ്കെടുക്കും.

ജില്ലാവ്യവസായ കേന്ദ്രത്തിന്റെ ആഭിമുഖ്യത്തില്‍ മാര്‍ച്ച് 20ന് വ്യവസായ സംരംഭകര്‍ക്കായി ജില്ലാതല ഇന്‍വെസ്റ്റേഴ്‌സ് മീറ്റ് സംഘടിപ്പിക്കും. മുണ്ടുപറമ്പ് ബൈപ്പാസ് റോഡിലുളള ഹോട്ടല്‍ അവിയല്‍ കോണ്‍ഫറന്‍സ് ഹാളിലാണ് പരിപാടി. വ്യവസായ വാണിജ്യ രംഗങ്ങളില്‍ മുതല്‍ മുടക്കാന്‍ താല്‍പര്യമുളള സംരംഭകര്‍ക്ക് പങ്കെടുക്കാം. പങ്കെടുക്കാന്‍ ആഗ്രഹിക്കുന്നവര്‍  ജില്ലാവ്യവസായ കേന്ദ്രത്തിലോ താലൂക്ക് വ്യവസായ ഓഫീസുകളിലോ മാര്‍ച്ച് 17നകം അപേക്ഷ നല്‍കണം. ഫോണ്‍: 0483 2737405.  ഇ.മെയില്‍: dicmlp@yahoo.in