സംസ്ഥാന സർക്കാരിന്റെ രണ്ടാം വാർഷികത്തോടനുബന്ധിച്ച് ജില്ലയിൽ സംഘടിപ്പിക്കുന്ന എന്റെ കേരളം പ്രദർശന വിപണന മേള സർക്കാരിന്റെ വികസന കുതിപ്പിന്റെ നേർക്കാഴ്ചയാകും. 'യുവതയുടെ കേരളം, കേരളം ഒന്നാമത്' എന്ന വിഷയത്തിൽ മെയ് 12 മുതൽ 18 വരെ കോഴിക്കോട് ബീച്ചിലാണ് മേള സംഘടിപ്പിക്കുന്നത്. ഇതിനായി വിശാലമായ സൗകര്യങ്ങളാണ് ബീച്ചിൽ ഏർപ്പെടുത്തുക. 

മുള്ളൂർക്കര ഗ്രാമപഞ്ചായത്ത് പരിധിയിൽ വിവിധ പ്രദേശങ്ങളിൽ മാലിന്യം വലിച്ചെറിയുകയും പ്ലാസ്റ്റിക് മാലിന്യം കത്തിക്കുകയും ചെയ്തവർക്കെതിരെ ജില്ലാതല എൻഫോഴ്സ്മെന്റ്  സ്ക്വാഡിന്റെ നിർദ്ദേശപ്രകാരം പഞ്ചായത്ത് നടപടി സ്വീകരിച്ചു.

പുകയില ഉൾപ്പടെയുള്ള ലഹരി വസ്തുക്കളിൽ നിന്ന് മോചനം തേടുന്നവർക്കായി ബീച്ച് ആശുപത്രിയിൽ പ്രത്യേക പുകയില നിയന്ത്രണ ക്ലിനിക് പ്രവർത്തനമാരംഭിച്ചു. ജീവിതശൈലീ രോഗ നിയന്ത്രണ പരിപാടിയുടെ ഭാഗമായി ആരംഭിച്ച ക്ലിനിക്കിൽ പുകവലി, ഗുഡ്ക ഉപയോഗം, മദ്യപാനം, മയക്കുമരുന്നുകളുടെ ഉപയോഗം തുടങ്ങിയവ പൂർണ്ണമായി ഉപേക്ഷിക്കാനും ജീവിതത്തിലേക്ക് മടങ്ങിവരാനും സഹായകമാകുന്ന രീതിയിലുള്ള ചികിത്സ സംവിധാനമാണ് സജ്ജീകരിച്ചിട്ടുള്ളത്.

2022 -23 വാർഷിക പദ്ധതി വിഹിതം 100 ശതമാനം ഫലപ്രദമായി വിനിയോഗിച്ച ഇരിഞ്ഞാലക്കുട ബ്ലോക്ക് പഞ്ചായത്ത് ഭരണസമിതിയ്ക്ക് തദ്ദേശ സ്വയംഭരണ വകുപ്പിൻ്റെ ആദരം. ജില്ലാ അടിസ്ഥാനത്തിലുള്ള വിലയിരുത്തലിലാണ് ഒന്നാം സ്ഥാനം. ദീർഘവീക്ഷണത്തോടെയുള്ള ആസൂത്രണഫലമാണ് വികസന ഫണ്ട് വിനിയോഗത്തിൽ പ്രതിഫലിച്ചതെന്ന്  പ്രസിഡന്റ് ലളിത ബാലൻ പറഞ്ഞു.

കൊടുങ്ങല്ലൂർ നഗരസഭയിലെ കുടുംബശ്രീ നമ്പർ രണ്ടിന്റെ ആഭിമുഖ്യത്തിൽ വിഷു വിപണനമേള ആരംഭിച്ചു. നഗരസഭ കമ്മ്യൂണിറ്റി ഹാൾ പരിസരത്ത് നടക്കുന്ന വിപണന മേള ആക്ടിങ് ചെയർമാൻ കെ ആർ ജൈത്രൻ ഉദ്ഘാടനം ചെയ്തു. വിവിധ പച്ചക്കറികളും വനിത യൂണിറ്റുകൾ നിർമ്മിച്ച ഭക്ഷ്യ ഉൽപ്പന്നങ്ങളും കുറഞ്ഞ വിലയിൽ മേളയിൽ ലഭ്യമാകും.
 
 സ്റ്റാൻഡിങ് കമ്മിറ്റി ചെയർമാൻ കെ എസ് കൈസാബ് അധ്യക്ഷനായ ചടങ്ങിൽ കൗൺസിലർമാരായ ലീല കരുണാകരൻ, രമദേവി, സി ഡി എസ് ചെയർപേഴ്സൺ ശാലിനി ദേവി, ടി എ റജീന, ഹസീന യൂസഫ് തുടങ്ങിയവർ പങ്കെടുത്തു.

ചങ്ങരോത്ത് പഞ്ചായത്തിന്റെയും ഒരുമ കൂട്ടായ്മയുടെയും ആഭിമുഖ്യത്തില്‍ വിഷു-റംസാന്‍ ചന്ത പ്രവര്‍ത്തനമാരംഭിച്ചു. ഉത്സവനാളുകളില്‍ വിലക്കുറവിൽ പൊതുജനങ്ങള്‍ക്ക് പച്ചക്കറിയും ഉണക്കമത്സ്യവും ലഭ്യമാക്കുക എന്ന ലക്ഷ്യത്തോടെയാണ് ചന്ത പ്രവര്‍ത്തനമാരംഭിച്ചത്. ചന്തയുടെ ഉദ്ഘാടനം ഗ്രാമപഞ്ചായത്ത് പ്രസിഡന്റ് ഉണ്ണി വേങ്ങേരി നിർവഹിച്ചു. ഗ്രാമപഞ്ചായത്ത് അംഗം കെ.എം. ബഷിറ ആദ്യവില്‍പ്പന ഏറ്റുവാങ്ങി.

അപാരൽ ട്രെയിനിങ് ആൻഡ് ഡിസൈനിങ് സെന്ററും രാജീവ് ഗാന്ധി നാഷണൽ ഇൻസ്റ്റിറ്റ്യൂട്ട് ഓഫ് യൂത്ത് ഡെവലപ്മെന്റും സംയുക്തമായി നടത്തുന്ന ബി വോക് ഡിഗ്രി ഇൻ ഫാഷൻ ഡിസൈൻ ആൻഡ് റീട്ടെയിൽ കോഴ്സിലേക്കും ഒരു വർഷം ദൈർഘ്യമുള്ള ഫാഷൻ ഡിസൈൻ ടെക്നോളജി ഡിപ്ലോമ കോഴ്സിലേക്കും അപേക്ഷ ക്ഷണിച്ചു. പ്ലസ് ടു യോഗ്യത ഉള്ളവർക്ക് അപേക്ഷിക്കാം. ഫോൺ: 0460 2226110, 8301030362

അന്തിക്കാട് ശിശുവികസന പദ്ധതി ഓഫീസിലേക്ക് ടാക്സി പെർമിറ്റുള്ള ഏഴ് വർഷത്തിൽ കുറവ് പഴക്കമുള്ള വാഹനം വാടകയ്ക്ക് ലഭിക്കുവാൻ ദർഘാസുകൾ ക്ഷണിച്ചു. ടാക്സ് പെർമിറ്റ് ഉൾപ്പെടെ എല്ലാ രേഖകളും വാഹനത്തിന് ഉണ്ടായിരിക്കണം. 2023 മെയ് രണ്ടിന് ഉച്ചയ്ക്ക് രണ്ട് മണി വരെ ദർഘാസ് സ്വീകരിക്കും. കൂടുതൽ വിവരങ്ങൾക്ക് അന്തിക്കാട് ശിശു വികസന പദ്ധതി ഓഫീസുമായി ബന്ധപ്പെടുക. ഫോൺ: 0487 - 2638800

തൊഴിലാളികളുടേയും തൊഴിൽ മേഖലയുടേയും ഉന്നമനത്തിനായി പ്രവർത്തിക്കുന്ന സർക്കാർ സ്വയംഭരണ സ്ഥാപനമായ കേരള ഇൻസ്റ്റിറ്റ്യൂട്ട് ഓഫ് ലേബർ ആന്റ് എംപ്ലോയ്മെന്റ് (കിലെ) - മാധ്യമ അവാർഡ് 2023ന് അപേക്ഷ ക്ഷണിച്ചു. കേരളത്തിലെ തൊഴിൽ മേഖലയെയും തൊഴിലാളികളെയും സംബന്ധിച്ച് കഴിഞ്ഞ ഒരു വർഷകാലയളവിൽ പത്രങ്ങൾ, വാരികകൾ എന്നിവയിൽ പ്രസിദ്ധീകരിച്ച സാമൂഹിക പ്രസക്തിയുള്ള മികച്ച ലേഖനങ്ങൾക്കാണ് അവാർഡ്.

കൊടുങ്ങല്ലൂർ വടക്കേനടയിലെ താലൂക്ക് ആശുപത്രിയോട് ചേർന്നുള്ള ആശുപത്രി റോഡ് നിർമ്മാണം പൂർത്തീകരിച്ച് നാടിന് സമർപ്പിച്ചു. ആശുപത്രി റോഡിന്റെ ഉദ്ഘാടനം അഡ്വ. വി ആർ സുനിൽകുമാർ എംഎൽഎ നിർവഹിച്ചു. കൊടുങ്ങല്ലൂർ നഗരസഭ 10 ലക്ഷം രൂപ ചെലവഴിച്ചാണ് റോഡ് നിർമ്മിച്ചത്.   പൂർണ്ണമായും കട്ട വിരിച്ച് നിർമ്മിച്ച റോഡിന് 120 മീറ്റർ നീളമുണ്ട്.