വിഷു പ്രമാണിച്ച് കുടുംബശ്രീയുടെ നേതൃത്വത്തിൽ താന്ന്യം ഗ്രാമപഞ്ചായത്തിൽ ഒരുക്കിയ വിഷു ചന്ത പഞ്ചായത്ത് പ്രസിഡന്റ് രതി അനിൽകുമാർ ഉദ്ഘാടനം ചെയ്തു."വിഷു ആഘോഷിക്കാം കുടുംബശ്രീക്കൊപ്പം" എന്ന ആശയവുമായി പഞ്ചായത്തിൽ ഒരുങ്ങിയ വിഷു ചന്തയിൽ അന്തിക്കാട് ബ്ലോക്ക് പഞ്ചായത്ത് ആക്ടിംഗ് പ്രസിഡന്റ് മായ ടി ബി ആദ്യ വിൽപന നടത്തി.

കുടുംബശ്രീ സംരംഭകർക്ക് കൂടുതൽ സംരംഭ സാധ്യതകൾ ഒരുക്കുക എന്ന ലക്ഷ്യത്തോടെയാണ് പഞ്ചായത്തുകളിൽ വിഷു ചന്തകൾ ഒരുക്കുന്നത്. ജൈവ പച്ചക്കറികൾ, വിവിധതരം അച്ചാറുകൾ , പലഹാരങ്ങൾ തുടങ്ങി വിവിധ തരം  ഉത്പന്നങ്ങളാണ് വിപണനത്തിന് ഒരുക്കിയിരിക്കുന്നത്.

ജില്ലയിൽ നാഷണൽ ഹെൽത്ത് മിഷൻ നോർത്ത് ചാലക്കുടിയിൽ അനുവദിച്ച ആദ്യ  ഹെൽത്ത് ആൻഡ് വെൽനെസ് സെന്റർ ടി.ജെ സനീഷ്കുമാർ ജോസഫ് ഉദ്ഘാടനം ചെയ്ത് നാടിന് സമർപ്പിച്ചു. ഇതോടെ നിലവിൽ   വി.ആർ.പുരത്ത് പ്രവർത്തിക്കുന്ന അർബൻ കുടുംബാരോഗ്യ കേന്ദ്രം പോളി ക്ലിനിക്കായി ഉയർത്തും.

കുന്ദമംഗലം നിയോജക മണ്ഡലത്തില്‍ രണ്ട് റോഡ് പ്രവൃത്തികള്‍ക്ക് 24 ലക്ഷം രൂപയുടെ ഭരണാനുമതി ലഭിച്ചതായി പി.ടി.എ റഹീം എം.എല്‍.എ അറിയിച്ചു. കുന്ദമംഗലം ഗവ.കോളേജ് റോഡ് വീതികൂട്ടല്‍, പാച്ചാക്കല്‍ കാനങ്ങോട്ട് റോഡ് നവീകരണം എന്നീ പ്രവൃത്തികള്‍ക്കായി എം.എല്‍.എയുടെ മണ്ഡലം ആസ്തി വികസന പദ്ധതിയില്‍ ഉള്‍പ്പെടുത്തിയാണ് തുക അനുവദിച്ചതെന്നും എം.എല്‍.എ അറിയിച്ചു.

സാമൂഹ്യ സുരക്ഷ പദ്ധതികൾ  രാജ്യത്തെ ഓരോ കുടുംബത്തിലേക്കും    വ്യാപിപ്പിക്കുന്നതിൻ്റെ ഭാഗമായി കേന്ദ്ര സർക്കാർ ആഹ്വാനം ചെയ്ത മൂന്നുമാസം നീണ്ടുനിൽക്കുന്ന സാമൂഹ്യ സുരക്ഷാ പദ്ധതി അംഗത്വ ക്യാമ്പയിനിന്റെ ഭാഗമായി ജില്ലയിലെ  പ്രധാന ബാങ്കുകളുടെ പ്രതിനിധികളുടെ യോഗം കളക്ടറേറ്റ് കോൺഫറൻസ് ഹാളിൽ ജില്ലാ കളക്ടറുടെ നേതൃത്വത്തിൽ ചേർന്നു.

 കേരളത്തിൽ സാമൂഹ്യ സുരക്ഷ പദ്ധതികളുടെ പ്രാധാന്യം ജനങ്ങളിലെത്തിക്കൻ ഒറ്റകെട്ടയി പ്രവർത്തിക്കണമെന്നും മലയോര, തീരദേശ ജനങ്ങളെ പദ്ധതികളുടെ ഭാഗമാക്കാൻ ശ്രമിക്കണമെന്നും അതിനായി താൻ ഒപ്പമുണ്ടെന്നും ജില്ലാ കളക്ടർ വി ആർ കൃഷ്ണതേജ അഭിപ്രായപ്പെട്ടു

നിലാവെട്ടം 2023 ഉദ്ഘാടനം ഇന്ന് (ഏപ്രിൽ 13 )

ദശപുഷ്പം  ചൂടി ലാസ്യരസത്തിൽ അണി നിരന്ന് ആയിരം മങ്കമാർ."മഞ്ജുളാംഗിമാരേ വരുവിൻ മാധുര്യമേറും ചിന്തുകൾ പാടിക്കളിക്കുവാൻ " എന്ന മനോഹരഗാനത്തിൽ അംഗനമാരുടെ ലളിതമാർന്ന ചുവടു ലയിച്ചപ്പോൾ മെഗാ തിരുവാതിര  കാണികൾക്കും നവ്യാനുഭവമായി.നിലാവെട്ടം 2023 വിളംബരത്തിന്റെ ഭാഗമായി ബഥനി സെന്റ് ജോൺസ് ഇംഗ്ലീഷ് ഹയർ സെക്കൻഡറി സ്കൂൾ ഗ്രൗണ്ടിൽ അരങ്ങേറിയ മെഗാ തിരുവാതിര കുന്നംകുളത്തിന്റെ ഹൃദയം കവർന്നു.സിനിമ-സീരിയൽ താരം രശ്മി സോമൻ ഭദ്രദീപം കൊളുത്തിയതോടെ സാംസ്കാരികോത്സവത്തിന്റെ അരങ്ങുണർന്നു.

സംസ്ഥാന സർക്കാരിന്റെ രണ്ടാം വാർഷികത്തോടനുബന്ധിച്ച് ജില്ലയിൽ സംഘടിപ്പിക്കുന്ന എന്റെ കേരളം പ്രദർശന വിപണന മേള സർക്കാരിന്റെ വികസന കുതിപ്പിന്റെ നേർക്കാഴ്ചയാകും. 'യുവതയുടെ കേരളം, കേരളം ഒന്നാമത്' എന്ന വിഷയത്തിൽ മെയ് 12 മുതൽ 18 വരെ കോഴിക്കോട് ബീച്ചിലാണ് മേള സംഘടിപ്പിക്കുന്നത്. ഇതിനായി വിശാലമായ സൗകര്യങ്ങളാണ് ബീച്ചിൽ ഏർപ്പെടുത്തുക. 

മുള്ളൂർക്കര ഗ്രാമപഞ്ചായത്ത് പരിധിയിൽ വിവിധ പ്രദേശങ്ങളിൽ മാലിന്യം വലിച്ചെറിയുകയും പ്ലാസ്റ്റിക് മാലിന്യം കത്തിക്കുകയും ചെയ്തവർക്കെതിരെ ജില്ലാതല എൻഫോഴ്സ്മെന്റ്  സ്ക്വാഡിന്റെ നിർദ്ദേശപ്രകാരം പഞ്ചായത്ത് നടപടി സ്വീകരിച്ചു.

പുകയില ഉൾപ്പടെയുള്ള ലഹരി വസ്തുക്കളിൽ നിന്ന് മോചനം തേടുന്നവർക്കായി ബീച്ച് ആശുപത്രിയിൽ പ്രത്യേക പുകയില നിയന്ത്രണ ക്ലിനിക് പ്രവർത്തനമാരംഭിച്ചു. ജീവിതശൈലീ രോഗ നിയന്ത്രണ പരിപാടിയുടെ ഭാഗമായി ആരംഭിച്ച ക്ലിനിക്കിൽ പുകവലി, ഗുഡ്ക ഉപയോഗം, മദ്യപാനം, മയക്കുമരുന്നുകളുടെ ഉപയോഗം തുടങ്ങിയവ പൂർണ്ണമായി ഉപേക്ഷിക്കാനും ജീവിതത്തിലേക്ക് മടങ്ങിവരാനും സഹായകമാകുന്ന രീതിയിലുള്ള ചികിത്സ സംവിധാനമാണ് സജ്ജീകരിച്ചിട്ടുള്ളത്.

2022 -23 വാർഷിക പദ്ധതി വിഹിതം 100 ശതമാനം ഫലപ്രദമായി വിനിയോഗിച്ച ഇരിഞ്ഞാലക്കുട ബ്ലോക്ക് പഞ്ചായത്ത് ഭരണസമിതിയ്ക്ക് തദ്ദേശ സ്വയംഭരണ വകുപ്പിൻ്റെ ആദരം. ജില്ലാ അടിസ്ഥാനത്തിലുള്ള വിലയിരുത്തലിലാണ് ഒന്നാം സ്ഥാനം. ദീർഘവീക്ഷണത്തോടെയുള്ള ആസൂത്രണഫലമാണ് വികസന ഫണ്ട് വിനിയോഗത്തിൽ പ്രതിഫലിച്ചതെന്ന്  പ്രസിഡന്റ് ലളിത ബാലൻ പറഞ്ഞു.