പുസ്തകങ്ങളിലൂടെ മാത്രം വായിച്ചറിഞ്ഞ കഥാകാരന്‍ എം മുകുന്ദനെ നേരിട്ടു കണ്ടതിലും അദ്ദേഹത്തിന്റെ നോവലുകളിലെ ഭാഷയെകുറിച്ച് പുസ്തകത്തില്‍ ഉള്‍പ്പെടുത്താന്‍ സാധിച്ചതിലുമുള്ള സന്തോഷത്തിലാണ് 'ഒപ്പരം' പുസ്തകം തയ്യാറാക്കിയ വിദ്യാര്‍ത്ഥികള്‍. സമഗ്ര ശിക്ഷാ കേരളം കണ്ണൂര്‍, തലശ്ശേരി സൗത്ത് ബി.ആര്‍.സി എന്നിവയുടെ നേതൃത്വത്തിലാണ് തലശ്ശേരിയിലെ പ്രാദേശിക ഭാഷാപ്രയോഗങ്ങളെക്കുറിച്ചുള്ള പഠനം പുസ്തകമാക്കിയത്. വിദ്യാര്‍ഥികള്‍ തയാറാക്കിയ ലഘു ഗവേഷണ ഗ്രന്ഥം 'ഒപ്പരം' സാഹിത്യകാരന്‍ എം.മുകുന്ദന്‍ തലശ്ശേരി നഗരസഭ ചെയര്‍പേഴ്‌സണ്‍ കെ.എം ജമുനാ റാണി ടീച്ചര്‍ക്ക് നല്‍കി പ്രകാശനം ചെയ്തു.

നെറ്റ് സീറോ കാര്‍ബണ്‍ പദ്ധതിയുടെ ഭാഗമായി കണ്ണപുരം ഗ്രാമപഞ്ചായത്ത് നടപ്പിലാക്കുന്ന മുള വല്‍ക്കരണത്തിന്റെ നടീല്‍ ഉദ്ഘാടനം എം വിജിന്‍ എം എല്‍ എ നിര്‍വഹിച്ചു. കണ്ണപുരം ഗ്രാമപഞ്ചായത്ത് പ്രസിഡന്റ് കെ രതി അധ്യക്ഷയായി. ഹരിത കേരള മിഷനുമായി സഹകരിച്ചാണ് പഞ്ചായത്തില്‍ മുളവല്‍ക്കരണം നടപ്പാക്കുന്നത്. കണ്ണപുരം ഗ്രാമപഞ്ചായത്തില്‍ നിലവില്‍ ഏഴ് പച്ചതുരുത്തുകളാണുള്ളത്. ഹരിത ഗൃഹ വാതകങ്ങളുടെ അളവ് കുറച്ച് 2050 ഓടെ കേരളത്തെ സീറോ കാര്‍ബണ്‍ അവസ്ഥയില്‍ എത്തിക്കുക എന്നതാണ് പദ്ധതിയുടെ ലക്ഷ്യം. ജില്ലയില്‍ ഏറ്റവും മികച്ച രീതിയില്‍ നെറ്റ് സീറോ കാര്‍ബണ്‍ പദ്ധതി നടപ്പാക്കുന്ന ഗ്രാമപഞ്ചായത്താണ് കണ്ണപുരം.

രാജ്യ വ്യാപകമായി തൊഴിലവസരങ്ങൾ സൃഷ്ടിക്കുന്നതിനും തൊഴിലവസര ക്ഷമതയും സാമൂഹ്യ സുരക്ഷയും വർധിപ്പിക്കുന്നതും ലക്ഷ്യമിട്ടുള്ള എംപ്ലോയ്‌മെന്റ് ലിങ്ക്ഡ് ഇൻസെന്റീവ് സ്‌കീം പദ്ധതി ഇപിഎഫ്ഒ മുഖേന പ്രവർത്തികമാക്കുന്നു. 2025 ആഗസറ്റ് ഒന്നിനും 2027 ജൂലൈ 31 നുമിടയിൽ സൃഷ്ടിക്കപ്പെടുന്ന തൊഴിലവസരങ്ങൾക്കും പദ്ധതിയുടെ ആനുകൂല്യങ്ങൾ ബാധകമാകും. ആദ്യമായി ജോലിയിൽ പ്രവേശിക്കുന്ന തൊഴിലാളികൾ ഇപിഎഫ്ഒയിൽ രജിസ്റ്റർ ചെയ്യുന്നതോടെ ഒരു മാസത്തെ വേതനം രണ്ടു ഘട്ടങ്ങളായി ലഭിക്കും.

അസാപ്പ് കേരളയുടെ തവനൂർ കമ്യൂണിറ്റി സ്‌കിൽ പാർക്ക് നടത്തുന്ന ഇലക്ട്രിക് വെഹിക്കിൾ സർവീസ് ടെക്നീഷ്യൻ കോഴ്സിലേക്ക് അപേക്ഷ ക്ഷണിച്ചു. പ്ലസ് ടു, ഐ.ടി.ഐ, ഡിപ്ലോമ യോഗ്യതയുള്ള ഉദ്യോഗാർഥികൾക്ക് https://forms.gle/8EVX4SvCL7jdvPh79 മുഖേന രജിസ്റ്റർ ചെയ്യാം. ഫോൺ- 9495999658, 9072370755.
 

ജില്ലാ പഞ്ചായത്ത് 2025-26 വാർഷിക പദ്ധതി പ്രകാരം ദേശീയ, അന്തർദേശീയ തലത്തിലെ കലാ കായിക മത്സര പങ്കാളിത്തത്തിന് ധനസഹായ പദ്ധതിയിൽ അപേക്ഷ ക്ഷണിച്ചു. 2024-2025, 2025-26 വർഷങ്ങളിൽ ദേശീയ, അന്തർദേശീയ തലങ്ങളിലേക്ക് കലാ, കായിക മത്സരങ്ങളിൽ പങ്കെടുത്ത/ പങ്കെടുക്കുന്ന പട്ടികജാതി വിഭാഗത്തിൽപ്പെട്ട 18 മുതൽ 30 വയസുവരെ പ്രായമുള്ളവർക്ക് അപേക്ഷിക്കാം. അപേക്ഷയോടൊപ്പം അംഗീകാരം/ മികവ് / പ്രവേശനം തെളിയിക്കുന്ന സർട്ടിഫിക്കറ്റിന്റെ പകർപ്പ്, ജാതി വരുമാനം (വരുമാന പരിധി- മൂന്ന് ലക്ഷം) നേറ്റിവിറ്റി തെളിയിക്കുന്ന രേഖകളുടെ പകർപ്പുകൾ, ആധാർ, ബാങ്ക് അക്കൗണ്ട് എന്നിവ ഉൾപ്പെടുത്തണം. അപേക്ഷ സ്വീകരിക്കുന്ന അവസാന തീയതി ജൂലൈ 31.

കെ എസ് ആർ ടി സി പയ്യന്നൂർ യൂണിറ്റ് ബജറ്റ് ടൂറിസം സെല്ലിന്റെ നേതൃത്വത്തിൽ ജൂലൈ 20 ന് കണ്ണൂർ നാലമ്പല തീർത്ഥയാത്ര സംഘടിപ്പിക്കുന്നു. കണ്ണൂർ ജില്ലയിലെ നീർവേലി ശ്രീരാമ സ്വാമി ക്ഷേത്രം, എളയാവൂർ ഭരത സ്വാമി ക്ഷേത്രം, പെരിഞ്ചേരി ലക്ഷ്മണ സ്വാമി ക്ഷേത്രം, കാടമുണ്ട ശത്രുഘ്‌ന സ്വാമി ക്ഷേത്രം എന്നിവയാണ്് തീർഥയാത്രയിൽ ഉൾപ്പെടുത്തിയിരിക്കുന്നത്. രാവിലെ ആറ് മണിയോടെ പയ്യന്നൂരിൽ നിന്നും പുറപ്പെട്ട് രാത്രി തിരിച്ചെത്തും. ഫോൺ: 9495403062, 9745534123 

കേരള വനിതാ കമ്മീഷൻ മെഗാ അദാലത്ത് ജൂലൈ 22ന് രാവിലെ പത്ത് മണി മുതൽ കണ്ണൂർ കലക്ടറേറ്റ് ഓഡിറ്റോറിയത്തിൽ നടക്കും. 
 

മലബാര്‍ റിവര്‍ ഫെസ്റ്റിനോടനുബന്ധിച്ച് കേരള ചിത്രകലാ പരിഷത്ത് ഹണി റോക്ക് റിസോര്‍ട്ടിന്റെ സഹകരണത്തോടെ സംഘടിപ്പിച്ച കയാക്കിങ് ബ്രഷ് സ്‌ട്രോക്‌സ് ചിത്രകാരന്‍ കെ ആര്‍ ബാബു ഉദ്ഘാടനം ചെയ്തു. തുഷാരഗിരി ഇക്കോ ടൂറിസം സെന്ററില്‍ നടന്ന പരിപാടിയില്‍ കോടഞ്ചേരി ഗ്രാമപഞ്ചായത്ത് പ്രസിഡന്റ് അലക്‌സ് തോമസ് ചെമ്പകശ്ശേരി, കേരള ചിത്രകലാ പരിഷത്ത് പ്രസിഡന്റ് സി കെ ഷിബുരാജ്, സെക്രട്ടറി ഷാജു നെരവത്ത്, തുഷാരഗിരി ഡിടിപിസി സെന്റര്‍ മാനേജര്‍ ഷെല്ലി മാത്യു, ഉപസമിതി അംഗങ്ങളായ സി എസ് ശരത്, എം എസ് ഷെജിന്‍ എന്നിവര്‍ സംസാരിച്ചു. 35 ചിത്രകാരന്മാര്‍ പങ്കാളികളായി.

കണ്ണൂർ ആസ്ഥാനമായ കേരള ഫോക്‌ലോർ അക്കാദമിയുടെ ജനറൽ കൗൺസിലും എക്‌സിക്യുട്ടീവ് ബോർഡും സർക്കാർ പുനഃസംഘടിപ്പിച്ചു. ഒ എസ് ഉണ്ണികൃഷ്ണൻ ചെയർമാനായും എ വി അജയകുമാർ സെക്രട്ടറിയായും തുടരും. ഡോ. വി ശിവദാസൻ എംപി, കെ വി സുമേഷ് എംഎൽഎ, മുൻ എംഎൽഎ കെ വി കുഞ്ഞിരാമൻ, നാടൻപാട്ട് കലാകാരി പ്രസീത ചാലക്കുടി, അഡ്വ. സുരേഷ് സോമ, ഫിറോസ് ബാബു, ബാപ്പു, എ നിയാസ്, സാംസ്‌കാരിക വകുപ്പ് സെക്രട്ടറി, ധനകാര്യ വകുപ്പ് സെക്രട്ടറി, സാംസ്‌കാരിക വകുപ്പ് ഡയറക്ടർ, കേരള സാഹിത്യ അക്കാദമി, കേരള സംഗീത നാടക അക്കാദമി, കേരള ലളിതകലാ അക്കാദമി പ്രതിനിധികൾ എന്നിവർ അംഗങ്ങളായിരിക്കും. മൂന്ന് വർഷമാണ് കാലാവധി.