കഞ്ചിക്കോട്- കൊട്ടേക്കാട് റെയില്‍വെ സ്റ്റേഷനുകള്‍ക്കിടയില്‍ ഉള്ള 156-ാം നമ്പര്‍ ലെവല്‍ ക്രോസിംഗ് ഗേറ്റ് അറ്റകുറ്റപ്പണികള്‍ക്കായി ഇന്ന് (ഏപ്രില്‍ മൂന്ന്) രാവിലെ ഏഴ് മുതല്‍ വൈകിട്ട് ആറ് വരെ  അടച്ചിടും. ഇതിനാല്‍ റോഡ് ഗതാഗതം പുത്തൂര്‍- കടുക്കാംകുന്നം -മന്തക്കാട് -മലമ്പുഴ വഴി തിരിച്ചുവിടുമെന്ന് സതേണ്‍ റെയില്‍വേ പാലക്കാട് അസി. ഡിവിഷനല്‍ എന്‍ജിനീയര്‍ അറിയിച്ചു.

മലമ്പുഴ പോലീസ് സ്റ്റേഷന്‍ കോമ്പൗണ്ടിനുള്ളില്‍ മറിഞ്ഞുകിടക്കുന്ന തേക്ക് തടി ഏപ്രില്‍ 17ന് 11 മണിക്ക് ലേലം ചെയ്യും.  താല്‍പര്യമുള്ളവര്‍ക്ക് മലമ്പുഴ സ്റ്റേഷനില്‍ ലേലം തുടങ്ങുന്നതിന് ഒരു മണിക്കൂര്‍ മുന്‍പ്  500 രൂപ നിതതദ്രവ്യം കെട്ടിവച്ച് ലേലത്തില്‍ പങ്കെടുക്കാം. ദര്‍ഘാസുകള്‍ ലേല തലേന്ന് 16ന് ഉച്ചയ്ക്ക് ഒന്ന് വരെ പാലക്കാട് ജില്ലാ പൊലീസ് മേധാവിയുടെ ഓഫീസില്‍ സ്വീകരിക്കും. കവറിനു മുകളില്‍ 'മലമ്പുഴ പോലീസ് സ്റ്റേഷന്‍ കോമ്പൗണ്ടില്‍ മറിഞ്ഞു വീണു കിടക്കുന്ന മരം ലേലം ചെയ്യുന്നതിനുള്ള ദര്‍ഘാസ്' എന്ന് പ്രത്യേകം എഴുതണം.

പാലക്കാട് വിദ്യാഭ്യാസ ജില്ലയിലെ പരീക്ഷാ സെന്‍ററുകളില്‍ മുന്‍വര്‍ഷങ്ങളില്‍ നടന്ന കെ-ടെറ്റ് പരീക്ഷ വിജയിച്ച് സര്‍ട്ടിഫിക്കറ്റ് പരിശോധന പൂര്‍ത്തിയാക്കിയവര്‍ക്കായി ഇന്ന് (ഏപ്രില്‍ മൂന്ന്) രാവിലെ 10.30 മുതല്‍ സര്‍ട്ടിഫിക്കറ്റ് വിതരണം ചെയ്യും. അര്‍ഹരായവര്‍ ഹാള്‍  ടിക്കറ്റ് സഹിതം ജില്ലാ വിദ്യാഭ്യാസ ഓഫീസില്‍ എത്തണമെന്ന് ജില്ലാ വിദ്യാഭ്യാസ ഓഫീസര്‍ അറിയിച്ചു.

സ്കൂള്‍ കുട്ടികളെ ബസ്സില്‍ കയറ്റാതെ പൊരിവെയിലത്ത് നിര്‍ത്തിയതിനെതിരെ വീണ്ടും ബസ് കണ്ടക്ടറുടെ ലൈസന്‍സ് അസാധുവാക്കാനുള്ള നടപടിയെടുത്തു. പട്ടാമ്പി ബസ് സ്റ്റാന്‍ഡില്‍ കഴിഞ്ഞ ദിവസം കുട്ടികളെ ബസ്സിന് സമീപത്തായി നിര്‍ത്തിയ ദൃശ്യം സമൂഹ മാധ്യമങ്ങളില്‍ പ്രചരിച്ചതിന്‍റെ അടിസ്ഥാനത്തിലാണ് നടപടി. എന്‍ഫോഴ്സ്മെന്‍റ് ആര്‍.ടി.ഓ പി.ശിവകുമാറിന്‍റെ നിര്‍ദ്ദേശപ്രകാരം എം.വി.ഐ ജോയ്സണ്‍, എ.എം.വി.ഐ സിമോദ് എന്നിവരാണ് പരിശോധന നടത്തിയത്.  

കഞ്ചിക്കോട് ഗവ. ഹൈസ്കൂളിന്‍റെ 2018 -19 വര്‍ഷത്തെ പ്രവര്‍ത്തനങ്ങള്‍ ഉള്‍പ്പെടുത്തിയ ബുള്ളറ്റിന്‍ 'മര്‍മ്മരം 2019' സ്കൂളില്‍ നടന്ന പരിപാടിയില്‍ അഡീഷണല്‍ ഡിസ്ട്രിക്ട് മജിസ്ട്രേറ്റ് എന്‍.എം മെഹറലി പ്രകാശനം ചെയ്തു.

പൊതു തിരഞ്ഞെടുപ്പ് മാതൃകാ പെരുമാറ്റച്ചട്ടം നടപ്പാക്കുന്നതിന്‍റെ ഭാഗമായി രൂപീകരിച്ച ആന്‍റി ഡീഫെയ്സ്മെന്‍റ് സ്ക്വാഡ് ഇതുവരെ 32203 നിരോധിത പ്രചരണ സാമഗ്രികള്‍ നീക്കി. ഇതില്‍ പൊതുയിടങ്ങളില്‍ നിന്നും 27516 പോസ്റ്റര്‍, 1065 ബാനറുകള്‍, 3430 കൊടികള്‍, 192 ചുവരെഴുത്തുകള്‍ ഉള്‍പ്പെടുന്നു. ഇന്നലെ (ഏപ്രില്‍ രണ്ട്) മാത്രം കേന്ദ്ര- സംസ്ഥാന സര്‍ക്കാരുകളുടെ അധീനതയിലുള്ള സ്ഥലങ്ങളിലെ 3194 നിരോധിത സാമഗ്രികളാണ് നീക്കം ചെയ്തത്.