സംസ്ഥാനപാതയിലെ കക്കട്ടില്‍ ടൗണ്‍ നവീകരണ പ്രവൃത്തികള്‍ പൂര്‍ത്തിയായി. കരാറുകാരന്റെ അനാസ്ഥ കാരണം പാതിവഴിയില്‍ മുടങ്ങിയ പ്രവൃത്തി പൊതുമരാമത്ത് വകുപ്പിന്റെ നേതൃത്വത്തില്‍ പുതിയ കരാര്‍ നല്‍കിയാണ്   പൂര്‍ത്തീകരിച്ചത്. നവീകരണത്തിന്റെ ഭാഗമായി ടൗണില്‍ ഇന്റര്‍ലോക്ക് വിരിച്ച നടപ്പാതകള്‍, ഓവുചാല്‍, സുരക്ഷാ വേലികള്‍ എന്നിവ ഒരുക്കിയിട്ടുണ്ട്. ടൗണ്‍ നവീകരണവുമായി ബന്ധപ്പെട്ട് നിയമസഭയിലും ജില്ലാതല, മണ്ഡലംതല യോഗങ്ങളിലും കെ പി കുഞ്ഞമ്മദ്കുട്ടി മാസ്റ്റര്‍ എംഎല്‍എ നടത്തിയ നിരന്തര ഇടപെടലിലൂടെയാണ് പാതിയില്‍ മുടങ്ങിയ പദ്ധതി പൂര്‍ത്തിയാക്കാനായത്.

 വിനോദസഞ്ചാരികൾക്ക് അതുല്യമായ യാത്രാനുഭവം നൽകുന്ന കാരവൻ ടൂറിസത്തെ അടുത്തറിയാൻ എന്റെ കേരളം പ്രദർശന വിപണന മേളയിൽ അവസരം.   ജനങ്ങൾക്ക് പുതിയൊരു വിനോദസഞ്ചാര അനുഭവമാണ് ജില്ലാ ടൂറിസം പ്രമോഷൻ കൗൺസിൽ ഒരുക്കിയിരിക്കുന്നത്.
നാല് സോഫ, ടിവി, മെക്രോവേവ് അവൻ, ഇൻഡക്ഷൻ അടുപ്പ്, കബോർഡുകൾ, ജനറേറ്റർ, ഫ്രിഡ്ജ്, ഹീറ്റർ സംവിധാനത്തോടുകൂടിയ കുളിമുറി, കിടക്കാനുള്ള ബെർത്തുകൾ എന്നിവ കാരവനിലുണ്ട്. സ്വകാര്യ വിശ്രമകേന്ദ്രം, ഹൗസ് കീപ്പിങ് സംവിധാനം, മുഴുവൻ സമയ വ്യക്തിഗത സേവനം എന്നിവ ഇതിന്റെ സവിശേഷതകളാണ്. യാത്രയെ ഇഷ്ടപ്പെടുന്നവർക്ക് ഒരു പുത്തൻ അനുഭവമായിരിക്കും കാരവനിലെ യാത്ര.

ജില്ലയില്‍ ജല്‍ജീവന്‍ മിഷന്‍ പദ്ധതിയുടെ ഭാഗമായ പൈപ്പിടല്‍ പ്രവൃത്തി കാലവര്‍ഷത്തിന് മുമ്പ് പൂര്‍ത്തിയാക്കാന്‍ ജില്ല വികസന സമിതി യോഗത്തില്‍ നിര്‍ദേശം. സച്ചിന്‍ദേവ് എംഎല്‍എയാണ് ഈ ആവശ്യം ഉന്നയിച്ചത്. രണ്ട് കോടി രൂപ ചെലവില്‍ തോണിക്കടവില്‍ നടക്കുന്ന ടൂറിസം പ്രവൃത്തികളുടെ ഡിപിആര്‍ തയാറാക്കല്‍ നടപടികള്‍ വേഗത്തിലാക്കണം. കിലയുടെ നേതൃത്വത്തില്‍ കിഫ്ബി ഫണ്ടില്‍ ഉള്‍പ്പെടുത്തി നടക്കുന്ന നിര്‍മാണ പ്രവൃത്തികള്‍ മോണിറ്റര്‍ ചെയ്യാന്‍ ജില്ലാതലത്തില്‍ നടപടികള്‍ വേണമെന്നും എംഎല്‍എ ആവശ്യപ്പെട്ടു.

 എന്റെ കേരളം പ്രദർശന വിപണന മേളയിൽ സേവനരംഗത്ത് മാതൃകയായി പൊതുവിതരണ ഉപഭോക്ത്യകാര്യ  വകുപ്പ്. മേള കാണാനും ആസ്വദിക്കാനുമെത്തുന്നവർക്ക് പ്രയോജനകരമായി മാറുകയാണ് പൊതുവിതരണ ഉപഭോക്ത്യകാര്യ  വകുപ്പ്.  റേഷൻ മസ്റ്ററിംഗ് നടത്താത്ത എ.എ.വൈ . കാർഡുകാർക്കും പി.എച്ച്.എച്ച്. കാർഡുകാർക്കും മേളയിലെത്തിയാൽ സൗജന്യമായി ഈ സേവനം ലഭിക്കും. അതോടൊപ്പം റേഷൻ കാർഡ് സംബന്ധമായ ഏത് സംശയവും പരിഹരിച്ചു നൽകുന്നുമുണ്ട്. പുതിയ റേഷൻ കാർഡ് എടുക്കൽ, കാർഡ്  നഷ്ടപ്പെട്ടാൽ എന്തുചെയ്യണം എന്നിങ്ങനെയുള്ള ആവശ്യങ്ങൾക്ക് പൊതുവിതരണ ഓഫീസുകൾ കയറിയിറങ്ങേണ്ട ആവശ്യമില്ലെന്നും പകരം ഡിജിറ്റലായി ഇവയെങ്ങനെ നേടാമെന്നും സ്റ്റാളിൽ വിശദീകരിച്ചു നൽകും.

 എന്റെ കേരളം പ്രദർശന വിപണന മേളയിലെ മണർകാട് കോഴി വളർത്തൽ കേന്ദ്രത്തിനു  കീഴിൽ പ്രവർത്തിക്കുന്ന സ്രായിൽ എഗ്ഗർ നഴ്‌സറി സ്റ്റാളിൽ തിരക്കേറുന്നു. കോഴിക്കുഞ്ഞുങ്ങളും നാടൻ മുട്ടയും വാങ്ങാൻ ഒട്ടേറെപ്പേരാണ് ഇവിടെ എത്തുന്നത്. ഗ്രാമശ്രീ ഇനത്തിൽപ്പെട്ട സങ്കരയിനം കോഴികളാണ് വിൽപനയ്ക്കുള്ളത്. പൊതുജനങ്ങൾക്കും നഴ്സറികളിലേയ്ക്കും കുറഞ്ഞ നിരക്കിലാണ്  കോഴികൾ  നൽകുന്നത്. 45 ദിവസം പ്രായമായ കോഴിക്കുഞ്ഞുങ്ങളെ 130 രൂപ നിരക്കിലാണ് നഴ്‌സറിയിൽ നിന്ന് വിൽക്കുന്നത്.

കൂള്‍ റൂഫ് സാങ്കേതികവിദ്യ ഉപയോഗിച്ച് വീടുകളും കെട്ടിടങ്ങളും നിര്‍മിക്കുകയാണെങ്കില്‍ നഗരങ്ങളില്‍ വരാന്‍ പോകുന്ന അര്‍ബന്‍ ഹീറ്റ് ഐലന്‍ഡ് ഇംപാക്ട് പ്രതിഭാസത്തെ പരിധിവരെ നിയന്ത്രിക്കാനും പരിസ്ഥിതി സൗഹൃദമാക്കാനും കഴിയുമെന്നും അതിനനുയോജ്യമായ പദ്ധതികള്‍ തദ്ദേശ സ്ഥാപനങ്ങള്‍ ആസൂത്രണം ചെയ്യണമെന്നും വനംവന്യജീവി സംരക്ഷണ വകുപ്പ് മന്ത്രി എ കെ ശശീന്ദ്രന്‍. എനര്‍ജി മാനേജ്മെന്റ് സെന്ററിന്റെയും എന്റര്‍പ്രണര്‍ഷിപ് ഡെവലപ്പ്മെന്റ് സൊസെറ്റിയുടെയും ആഭിമുഖ്യത്തില്‍ സംഘടിപ്പിച്ച 'കുളിര്‍മ' ബോധവത്കരണ പരിപാടി ഉദ്ഘാടനം ചെയ്യുകയായിരുന്നു മന്ത്രി.

ഗര്‍ഭിണികള്‍ക്കും കുഞ്ഞുങ്ങള്‍ക്കും സംരക്ഷണ വലയമൊരുക്കുകയാണ് ജില്ലയിലെ സര്‍ക്കാര്‍ ആശുപത്രികള്‍. മികച്ച പരിചരണം, ആരോഗ്യ പ്രവര്‍ത്തകരുടെ പിന്തുണ, വൃത്തിയുള്ള ശുചിമുറികള്‍, വാര്‍ഡുകള്‍ തുടങ്ങിയവയൊരുക്കിയാണ് സര്‍ക്കാര്‍ ആശുപത്രികള്‍ മികവിന്റ കേന്ദ്രങ്ങളായിരിക്കുന്നത്.

 ആടിയും പാടിയും ആശാവർക്കർമാരും ആരോഗ്യ പ്രവർത്തകരും എന്റെ കേരളം പ്രദർശനമേളയുടെ ഞായറാഴ്ച പകലിനെ ആവേശത്തിലാറാടിച്ചു. രണ്ടാം പിണറായി വിജയൻ മന്ത്രിസഭയുടെ നാലാം വാർഷികത്തിന്റെ ഭാഗമായി എന്റെ കേരളം പ്രദർശന വിപണന മേളയുടെ ഭാഗമായി ആരോഗ്യ വകുപ്പ് നടത്തിയ ആശ - ആരോഗ്യ പ്രവർത്തക സംഗമത്തിലാണ് ജീവനക്കാരും ആശാപ്രവർത്തകരും കലാവിരുന്നൊരുക്കിയത്. ജില്ലാ മെഡിക്കൽ ഓഫീസർ ഡോ. എൻ. പ്രിയ സംഗമം ഉദ്ഘാടനം ചെയ്തു.

 ഖാദിയെ അടുത്തറിയാനും ഖാദിവസ്ത്രങ്ങൾ വാങ്ങാനും അവസരമൊരുക്കി ഖാദി ബോർഡ്. എന്റെ കേരളം പ്രദർശന വിപണന മേളയിൽ വമ്പിച്ച  വിലക്കുറവാണ്  ഖാദിവകുപ്പ് ഒരുക്കിയിരിക്കുന്നത്. ഷർട്ടുകൾ, മുണ്ടുകൾ, സാരികൾ, ബെഡ് ഷീറ്റുകൾ എന്നിവ 30 ശതമാനം വിലക്കുറവിലാണ് ഇവിടെ ലഭിക്കുന്നത്.

 പഴയകാല സിനിമകൾ തിയേറ്റർ ആംബിയൻസിൽ വീണ്ടും കാണണോ? എങ്കിൽ ഇനി തീയേറ്റർ റീ റിലീസിങിനായി കാത്തിരിക്കേണ്ട. കോട്ടയം നാഗമ്പടത്തെ എന്റെ കേരളം പ്രദർശന വിപണനമേളയിലെത്തിയാൽ മതി. സംസ്ഥാന ചലച്ചിത്രവികസന കോർപറേഷന്റെ നേതൃത്വത്തിൽ മിനി തീയേറ്റർ ഇവിടെ ഒരുക്കിയിട്ടുണ്ട്. പുതിയ ടെക്‌നോളജിയിൽ പഴയകാല സിനിമകൾ പഴയ സിനിമാകൊട്ടകയുടെ ആംബിയൻസിൽ ഇരുന്ന് കാണം. അതും സൗജന്യമായി. രാവിലെ 9.30 മുതൽ വൈകീട്ട് 9.30 വരെ പ്രദർശനം ഉണ്ട്. ദിവസേന അഞ്ച് ഷോകളാണുള്ളത്. എൽ.ഇ.ഡി. വാളിലാണ് പ്രദർശനം.