ആലപ്പുഴ: ആര്‍ദ്രം മിഷനിലൂടെ മൂന്നാം ഘട്ടത്തില്‍ 212 പ്രാഥമിക ആരോഗ്യ കേന്ദ്രങ്ങളെ കുടുംബാരോഗ്യ കേന്ദ്രങ്ങളാക്കുമെന്ന് മുഖ്യമന്ത്രി പിണറായി വിജയന്‍ പറഞ്ഞു. ആദ്യഘട്ടത്തില്‍ 170 പ്രാഥമിക ആരോഗ്യ കേന്ദ്രങ്ങളെ കുടുംബാരോഗ്യ കേന്ദ്രങ്ങളാക്കി ഉയര്‍ത്തി. രണ്ടാം ഘട്ടത്തില്‍ 504 പ്രാഥമികാരോഗ്യ കേന്ദ്രങ്ങളില്‍ 461 എണ്ണം കുടുംബാരോഗ്യ കേന്ദ്രങ്ങളായി മാറി. ജില്ലയിലെ ഭരണിക്കാവ്, രാമങ്കരി, തോട്ടപ്പള്ളി, പുറക്കാട്, അമ്പലപ്പുഴ, വയലാര്‍, കാര്‍ത്തികപ്പള്ളി, കടപ്പ് എന്നിവ ഉള്‍പ്പെടെയുള്ള സംസ്ഥാനത്തെ 64 കുടുംബാരോഗ്യ കേന്ദ്രങ്ങളുടെ ഉദ്ഘാടനം ഓണ്‍ലൈനിലൂടെ നിര്‍വഹിക്കുകയായിരുന്നു അദ്ദേഹം. 

ആലപ്പുഴ: ചകിരി ചോറില്‍ നിന്നും നിര്‍മ്മിച്ച തടിയെ വെല്ലുന്ന കട്ടിയുള്ള പലക പരിചയപ്പെടുത്തി മന്ത്രി ഡോ. ടി.എം. തോമസ് ഐസക്. കയര്‍ കേരള വേദിയിലാണ് മന്ത്രി പുതിയ കയര്‍ ഉല്‍പ്പന്നം പരിചയപ്പെടുത്തിയത്. 
കുറഞ്ഞ ചിലവില്‍ നൂതന സാങ്കേതിക വിദ്യയുടെ സഹായത്തോടെ ചകിരി ചോറ് സംസ്‌കരിച്ചാണ് കട്ടിയുള്ള പലക നിര്‍മ്മിക്കുന്നത്. ചകിരി ചോറ് സംസ്‌കരണത്തിലൂടെ നിര്‍മ്മിക്കപ്പെടുന്ന പലക തടിയോട് കിടപിടിക്കുന്ന ഉല്‍പ്പന്നമാണ്. ഇത് നിര്‍മ്മിക്കാനുള്ള യന്ത്രം ഉള്‍പ്പെടെ എത്തിച്ച് ഉല്‍പ്പാദനം വേഗത്തിലാക്കാനുള്ള നടപടികളിലാണ് കയര്‍ വകുപ്പ്.

ആലപ്പുഴ: അമ്പലപ്പുഴ പോലീസ് സ്റ്റേഷനില്‍ പുതുതായി നിര്‍മിച്ച സ്ത്രീ സൗഹൃദ വിശ്രമ കേന്ദ്രത്തിന്റെ ഉദ്ഘാടനം പൊതുമരാമത്തു വകുപ്പ് മന്ത്രി ജി. സുധാകരന്‍ നിര്‍വഹിച്ചു. പൊതുസ്ഥാപനങ്ങളില്‍ ആവശ്യങ്ങള്‍ക്കായി എത്തുന്നവര്‍ക്കും ജോലി ചെയ്യുന്നവര്‍ക്കും ജെന്‍ഡര്‍ ബഡ്ജറ്റിന്റെ ഭാഗമായി നിര്‍മിക്കുന്ന സ്ത്രീ സൗഹൃദ കേന്ദ്രങ്ങള്‍ ഏറെ ആശ്വാസകരമാണെന്ന് മന്ത്രി പറഞ്ഞു. കൂടുതല്‍ കേന്ദ്രങ്ങള്‍ കായംകുളത്താണ് നിര്‍മിച്ചിരിക്കുന്നത്. അമ്പലപ്പുഴ മണ്ഡലത്തില്‍ 10 എണ്ണം അനുവദിച്ചിട്ടുണ്ട്. അതില്‍ എട്ടെണ്ണത്തിന്റെ നിര്‍മാണം അവസാന ഘട്ടത്തിലാണെന്നും മന്ത്രി പറഞ്ഞു.

ആലപ്പുഴ:  ഹൗസ്ബോട്ടുകളില്‍ സൗരോര്‍ജ്ജ പദ്ധതി നടപ്പാക്കുന്നത് ഹരിത ടൂറിസത്തിന് മുതല്‍ക്കൂട്ടാകുമെന്ന് വൈദ്യുതി വകുപ്പ് മന്ത്രി എം.എം. മണി പറഞ്ഞു. സൗരോര്‍ജ്ജത്താല്‍ പ്രവര്‍ത്തിക്കുന്ന പരിസ്ഥിതി സൗഹൃദ ഹൗസ് ബോട്ട് പദ്ധതിയുടെ ഉദ്ഘാടനം നിര്‍വഹിക്കുകയായിരുന്നു മന്ത്രി. ഹൗസ് ബോട്ടുകളില്‍ സൗരോര്‍ജ്ജം ഉപയോഗിക്കുന്നതോടെ കുടുതല്‍ ഊര്‍ജ്ജം ലാഭിക്കാനും മലിനീകരണം കുറയ്ക്കാനും സാധിക്കും. ഇതു ഹൗസ് ബോട്ട് ടൂറിസം മേഖലയിലെ പുതിയ തുടക്കമാകുമെന്നും മന്ത്രി പറഞ്ഞു.

ആലപ്പുഴ : കാര്‍ഷിക മേഖലയ്ക്ക് പ്രത്യേക പരിഗണന നല്‍കി കഞ്ഞിക്കുഴി ബ്ലോക്ക് പഞ്ചായത്തിന്റെ 2021-22 ലെ ബജറ്റ് വൈസ് പ്രസിഡന്റ് ബിജി അനില്‍കുമാര്‍ അവതരിപ്പിച്ചു. പരമ്പരാഗത നെല്‍വിത്തുകള്‍ക്കൊപ്പം ജനപ്രിയ നെല്‍വിത്തിനങ്ങള്‍ കൃഷി ചെയ്യുന്നതിനുള്ള പദ്ധതിയാണ് ബജറ്റില്‍ വിഭാവനം ചെയ്തിട്ടുള്ളത്. 65.44 കോടി രൂപയുടെ വരവും 65.54 കോടി രൂപയുടെ ചെലവും പ്രതീക്ഷിക്കുന്നു.