പട്ടികജാതി വികസന വകുപ്പ് പട്ടികജാതി വിദ്യാര്‍ഥികള്‍ക്കായി എസ്.സി.എ-എസ്.സി.പി പദ്ധതി പ്രകാരം മുള ഉത്പ്പന്ന നിര്‍മ്മാണം, ഗ്യാസ് സ്റ്റൗ റിപ്പയറിംഗ്  തൊഴിലധിഷ്ഠിത കോഴ്സുകളിലേക്ക് അപേക്ഷ ക്ഷണിച്ചു. എസ്.എസ്.എല്‍.സിയാണ് യോഗ്യത. ഓരോ കോഴ്സിനും 50 വിദ്യാര്‍ഥികള്‍ക്കാണ് പ്രവേശനം. പ്രായപരിധി 18-25. താത്പ്പര്യമുള്ളവര്‍ ജാതി, വരുമാനം, വിദ്യാഭ്യാസ യോഗ്യത എന്നീ സര്‍ട്ടിഫിക്കറ്റുകളുടെ പകര്‍പ്പ്, ഫോട്ടോ സഹിതം ഫെബ്രുവരി 25 നകം ജില്ലാ പട്ടികജാതി വികസന ഓഫീസില്‍ അപേക്ഷ നല്‍കണം. കൂടുതല്‍ വിവരങ്ങളും അപേക്ഷ ഫോമും ജില്ലാ /ബ്ലോക്ക് / നഗരസഭാ പട്ടികജാതി വികസന ഓഫീസില്‍ ലഭിക്കും. ഫോണ്‍ - 0491 2505005.

കുഴല്‍മന്ദം സാമൂഹികാരോഗ്യ കേന്ദ്രത്തില്‍ ലിപ്പിഡ് പ്രൊഫൈല്‍ ടെസ്റ്റ് സ്ട്രിപ്സ് വിതരണം ചെയ്യുന്നതിന് യോഗ്യരായ സ്ഥാപനങ്ങള്‍, വ്യക്തികളില്‍ നിന്നും ക്വട്ടേഷന്‍ ക്ഷണിച്ചു. 4,90,000 രൂപയാണ് നിരതദ്രവ്യം. ക്വട്ടേഷനുകള്‍ ഫെബ്രുവരി 26 ന് ഉച്ചയ്ക്ക് 12.30 വരെ സ്വീകരിക്കും. അന്നേ ദിവസം 1.30 ന് തുറക്കും
ഫോണ്‍ - 04922 274350

ഫിഷറീസ് വകുപ്പ് ജനകീയ മത്സ്യകൃഷി പദ്ധതിയിലേക്ക് അക്വാകള്‍ച്ചര്‍ പ്രൊമോട്ടര്‍മാരെ കരാര്‍ അടിസ്ഥാനത്തില്‍ നിയമിക്കുന്നു. യോഗ്യത - വി.എച്ച്.എസ്.സി (ഫിഷറീസ്) / ഫിഷറീസ് വിഷയത്തിലോ സുവോളജിയിലോ ഉള്ള ബിരുദം / എസ്.എസ്.എല്‍.സിയും അക്വാകള്‍ച്ചര്‍ മേഖലയില്‍ മൂന്ന് വര്‍ഷത്തെ പ്രവൃത്തി പരിചയവും. പട്ടാമ്പി, മണ്ണാര്‍ക്കാട് താലൂക്കില്‍ ഉള്‍പ്പെട്ടവര്‍ക്ക് മുന്‍ഗണന. താത്പ്പര്യമുള്ളവര്‍ ഫെബ്രുവരി 20 ന് 11 ന് മലമ്പുഴ ഫിഷറീസ് ഡെപ്യൂട്ടി ഡയറക്ടറുടെ ഓഫീസില്‍ കൂടിക്കാഴ്ചക്ക് എത്തണം. ഫോണ്‍: 0491-2815245.

മന്ത്രി എ.കെ ബാലന്റെ എം.എല്‍.എ ഫണ്ടും ആസ്തിവികസന ഫണ്ടും അംബേദ്കര്‍ സ്വയംപര്യാപ്ത ഗ്രാമഫണ്ടും ഉപയോഗിച്ച് നിര്‍മ്മാണം ആരംഭിക്കുന്നതും പൂര്‍ത്തിയായതുമായ പദ്ധതികളുടെ ഉദ്ഘാടനവും ശിലാസ്ഥാപനവും ഇന്ന് (ഫെബ്രുവരി 18) രാവിലെ 11.30 ന് പട്ടികജാതി- പട്ടികവര്‍ഗ- പിന്നാക്കക്ഷേമ- നിയമ- സാംസ്‌കാരിക- പാര്‍ലമെന്ററികാര്യ മന്ത്രി എ.കെ ബാലന്‍ വീഡിയോ കോണ്‍ഫറന്‍സിലൂടെ നിര്‍വഹിക്കും. ജില്ലാ പഞ്ചായത്ത് വൈസ് പ്രസിഡന്റ് സി. കെ ചാമുണ്ണി അധ്യക്ഷനാവും.

തരൂര്‍ അസംബ്ലി മണ്ഡലത്തിലെ വിവിധ റോഡുകളുടേയും പാലങ്ങളുടേയും പൂര്‍ത്തീകരണോദ്ഘാടനവും നിര്‍മ്മാണോദ്ഘാടനവും ഇന്ന് (ഫെബ്രുവരി 18) രാവിലെ 11 ന് പൊതുമരാമത്ത് -രജിസ്ട്രേഷന്‍ വകുപ്പ് മന്ത്രി ജി സുധാകരന്‍ വീഡിയോ കോണ്‍ഫറന്‍സിലൂടെ നിര്‍വഹിക്കും. പട്ടികജാതി- പട്ടികവര്‍ഗ- പിന്നാക്കക്ഷേമ- നിയമ- സാംസ്‌കാരിക- പാര്‍ലമെന്ററികാര്യ മന്ത്രി എ.കെ ബാലന്‍ അധ്യക്ഷനാകും. രമ്യ ഹരിദാസ് എം.പി, കെ.ഡി പ്രസേനന്‍ എം.എല്‍.എ എന്നിവര്‍ മുഖ്യാഥികളാവും.

ജില്ലയില്‍ 10 പുതിയ സ്‌കൂള്‍ കെട്ടിടങ്ങളുടെ ഉദ്ഘാടനവും മൂന്ന് സ്‌കൂളുകളുടെ തറക്കല്ലിടലും നവീകരിച്ച ഹയര്‍ സെക്കന്ററി ലാബിന്റെ ഉദ്ഘാടനവും മുഖ്യമന്ത്രി പിണറായി വിജയന്‍ ഇന്ന് (ഫെബ്രുവരി 18) രാവിലെ 10 ന് വീഡിയോ കോണ്‍ഫറന്‍സിലൂടെ നിര്‍വഹിക്കും. വിദ്യാഭ്യാസ മന്ത്രി പ്രൊഫ. സി. രവീന്ദ്രനാഥ് അധ്യക്ഷനാകും. സര്‍ക്കാരിന്റെ 100 ദിന കര്‍മ്മ പദ്ധതിയുടെ ഭാഗമായി കിഫ്ബി, നബാര്‍ഡ്, പ്ലാന്‍, മറ്റ് ഫണ്ടുകള്‍ എന്നിവ പ്രയോജനപ്പെടുത്തി നിര്‍മ്മിച്ച സ്‌കൂള്‍ കെട്ടിടങ്ങള്‍, ഹയര്‍ സെക്കന്ററി വിഭാഗം ലാബുകള്‍ എന്നിവയുടെ ഉദ്ഘാടനവും സ്‌കൂള്‍ കെട്ടിടങ്ങളുടെ ശിലാസ്ഥാപനവുമാണ് നടക്കുക.  

കര്‍ഷകര്‍ക്ക് അവരുടെ ഉത്പന്നങ്ങളില്‍ അവകാശ ലാഭം ഉറപ്പാക്കുന്ന സംസ്ഥാന കര്‍ഷക ക്ഷേമ ബോര്‍ഡിന്റെ പ്രവര്‍ത്തനം ഉടന്‍ ആരംഭിക്കുമെന്ന്
ജലവിഭവ വകുപ്പ് മന്ത്രി കെ. കൃഷ്ണന്‍കുട്ടി പറഞ്ഞു. പന്നിപെരുന്തല ക്ഷീരോത്പാദക സഹകരണ സംഘത്തിന്റെ ക്ഷീര സംഘം കെട്ടിടവും ഫാര്‍മേഴ്സ് ഫെസിലിറ്റേഷന്‍ സെന്ററിന്റെ ഉദ്ഘാടവും നിര്‍വഹിച്ച് സംസാരിക്കുകയായിരുന്നു മന്ത്രി.