കേരള വനിതാ കമ്മിഷന്‍ കോട്ടയം ജില്ലാ സാഹിത്യ പ്രവര്‍ത്തക സഹകരണ സംഘം ഓഡിറ്റോറിയത്തില്‍ സംഘടിപ്പിച്ച മെഗാ അദാലത്തില്‍ 13 പരാതികളില്‍ തീര്‍പ്പായി. കക്ഷികള്‍ ഹാജരാകാത്തതുള്‍പ്പെടെയുള്ള കാരണങ്ങളാല്‍ 43 പരാതികള്‍ അടുത്ത അദാലത്തിലേക്ക് മാറ്റി. കോട്ടയം ജില്ലയിലെ 56 പരാതികളാണ് പരിഗണനയ്‌ക്കെടുത്തത്. വനിതാ കമ്മിഷന്‍ അംഗം ഇ.എം.രാധ, ഡയറക്ടര്‍ വി.യു.കുര്യാക്കോസ് എന്നിവര്‍ പരാതികള്‍ കേട്ടു.

നവീകരിച്ച എലത്തൂര്‍ പോലീസ് സ്‌റ്റേഷന്‍ കെട്ടിടം ഗതാഗതമന്ത്രി എ.കെ ശശീന്ദ്രന്‍ ഉദ്ഘാടനം ചെയ്തു. പോലീസ് മുറയോടുള്ള ജനങ്ങളുടെ ഭീതി അകറ്റാനും അവരുടെ പ്രശ്‌നങ്ങള്‍ മനസിലാക്കി സഹായിക്കാനുള്ള ധാര്‍മ്മിക ബാധ്യത പോലീസ് സേനക്കുണ്ട് എന്ന് തെളിയിക്കാനും   കഴിഞ്ഞ അഞ്ച് വര്‍ഷത്തിനിടെ സാധിച്ചതായി മന്ത്രി പറഞ്ഞു. എം.എല്‍.എ ആസ്തി വികസന ഫണ്ടില്‍ നിന്നും 45 ലക്ഷം രൂപ വിനിയോഗിച്ച് പൈതൃകരീതിയിലാണ് കെട്ടിടം നവീകരിച്ചത്. ജില്ലാപോലീസ് മേധാവി എ.വി ജോര്‍ജ്ജ് ചടങ്ങില്‍ അധ്യക്ഷത വഹിച്ചു. 

കൊയിലാണ്ടി താലൂക്ക് ശ്രീ ആച്ചേരിതെരു മഹാഗണപതിക്ഷേത്രത്തിലെ പാരമ്പര്യേതര ട്രസ്റ്റിമാരുടെ ഒഴിവിലേയ്ക്ക് നിയമിക്കപ്പെടുന്നതിന് ഹിന്ദുമതധര്‍മ സ്ഥാപന നിയമപ്രകാരം അര്‍ഹരായ പ്രദേശവാസികളില്‍നിന്ന് അപേക്ഷ ക്ഷണിച്ചു. പൂരിപ്പിച്ച അപേക്ഷകള്‍ 26-02-21 വൈകീട്ട് അഞ്ച് മണിക്ക് മുമ്പായി കോഴിക്കോട് സിവില്‍ സ്റ്റേഷനിലുള്ള ഡി ബ്ലോക്കില്‍ പ്രവര്‍ത്തിക്കുന്ന മലബാര്‍ ദേവസ്വം ബോര്‍ഡ് കോഴിക്കോട് അസിസ്റ്റന്റ് കമ്മീഷണറുടെ ഓഫീസില്‍ ലഭിക്കണം.

സി.പി.ഒ. ട്രാഫിക്, വനിത പി.എസ്, പൂതേരി, ചിന്താവളപ്പ് കോമ്പൗണ്ടുകള്‍ എന്നിവിടങ്ങളിലെ ഫലവൃക്ഷങ്ങളില്‍നിന്ന് ആദായമെടുക്കുന്നതിനുള്ള അവകാശം 12-02-21 വെള്ളിയാഴ്ച രാവിലെ 11 മണിക്ക് എ.ആര്‍. ക്യാമ്പ് മാലൂര്‍ക്കുന്നില്‍ ലേലം ചെയ്തു കൊടുക്കും. സീല്‍ ചെയ്ത ക്വട്ടേഷനുകള്‍ 10 മുതല്‍ 10.45 വരെ എ.ആര്‍. ക്യാമ്പ് മാലൂര്‍ക്കുന്നില്‍ സ്വീകരിക്കും.

പന്തലായനി ബ്ലോക്ക് പഞ്ചായത്തിന്റെ 2020-21 വാര്‍ഷിക പദ്ധതിയിലുള്‍പ്പെടുത്തി പ്രവൃത്തി ഏറ്റെടുത്തു നടത്തുന്നതിന് അംഗീകൃത കരാറുകാരില്‍ നിന്ന് ടെണ്ടറുകള്‍ ക്ഷണിച്ചു. വിശദവിവരങ്ങള്‍  e-tenderskerala.gov.in സന്ദര്‍ശിച്ചാല്‍ ലഭ്യമാവും. അവസാനതീയതി 19-02-2021 വൈകീട്ട് അഞ്ചുവരെ.