ഭിന്നശേഷിക്കാര്‍ക്കായി നടന്ന നാഷണന്‍ ട്രസ്റ്റ് ഓണ്‍ലൈന്‍ ഹിയറിംഗില്‍  നിയമപരമായ 45 പേര്‍ക്ക് രക്ഷാകര്‍തൃ സര്‍ട്ടിഫിക്കറ്റ് നല്‍കുന്നതിന് അനുമതിയായി. മുന്‍കൂട്ടി നിശ്ചയിച്ച 45 പേര്‍ക്കാണ്  ഓണ്‍ലൈന്‍ ഹിയറിംഗിലൂടെ രക്ഷാകര്‍തൃത്വത്തിന് അനുവാദം നല്‍കിയത്. ഭിന്നശേഷിക്കാരായ കുട്ടികള്‍ക്കുള്ള നിരാമയ ഇന്‍ഷുറന്‍സിന് അപേക്ഷിച്ച മുഴുവന്‍ പേരേയും പരിഗണിച്ചു.

വരും വര്‍ഷത്തെ പദ്ധതികളില്‍ തണ്ണീര്‍ത്തട സംരക്ഷണത്തിന് മികച്ച പ്രാധാന്യം നല്‍കാനും കാട്ടാമ്പള്ളി പ്രദേശവുമായി ബന്ധപ്പെട്ടു വരുന്ന തണ്ണീര്‍ത്തടങ്ങള്‍ സംരക്ഷിക്കാനും ജില്ലാ ആസൂത്രണ സമിതി യോഗത്തില്‍ നിര്‍ദ്ദേശം. അഡ്‌ഹോക് ഡിപിസി യോഗത്തില്‍ ചെയര്‍പേഴ്‌സണ്‍ കൂടിയായ ജില്ലാപഞ്ചായത്ത് പ്രസിഡണ്ട് പി പി ദിവ്യയാണ് ഈ നിര്‍ദ്ദേശം വെച്ചത്. കാട്ടാമ്പള്ളി തണ്ണീര്‍ത്തട പ്രദേശം ഉള്‍പ്പെടുന്ന ഗ്രാമപഞ്ചായത്തുകളും കോര്‍പറേഷന്‍ ഡിവിഷനും പഠനം നടത്തി കയ്യേറ്റം നടന്ന സ്ഥലങ്ങള്‍ കണ്ടെത്തുകയും കൃഷി സാധ്യതകള്‍ പഠിക്കുകയും വേണമെന്നും നിര്‍ദ്ദേശവുമുണ്ട്.

നിയമസഭ തെരഞ്ഞെടുപ്പിന് മുന്നോടിയായി ജില്ലാതല മാസ്റ്റര്‍ ട്രെയിനികള്‍ക്ക് പത്തനംതിട്ട കളക്ടറേറ്റില്‍ പരിശീലനം നല്‍കി. ജില്ലാ തെരഞ്ഞെടുപ്പ് ഓഫീസറും ജില്ലാ കളക്ടറുമായ ഡോ. നരസിംഹുഗാരി തേജ് ലോഹിത് റെഡ്ഡിയുടെ നേതൃത്വത്തിലായിരുന്നു പരിശീലനം.  സ്‌പെഷ്യല്‍ പോസ്റ്റല്‍ ബാലറ്റ് നല്‍കേണ്ടവരെ സംബന്ധിച്ചും ഓക്‌സിലറി ബൂത്തുകളെ സംബന്ധിച്ചും ജില്ലാ കളക്ടര്‍ വിശദീകരിച്ചു. 

സർക്കാരിൻ്റെ അഞ്ചു വർഷത്തെ വികസനനേട്ടങ്ങൾ ജനങ്ങളിലെത്തിക്കുന്നതിനായി തൃശൂർ ജില്ലാ ഇൻഫർമേഷൻ ഓഫീസ് സംഘടിപ്പിക്കുന്ന  ഫോട്ടോ പ്രദർശനം ഇന്നും നാളെയും (ഫെബ്രുവരി 9,10) കുന്നംകുളത്ത് നടക്കും. പഴയ ബസ് സ്റ്റാൻഡ് പരിസരത്ത് രാവിലെ 9 മുതൽ വൈകീട്ട് 5 വരെയാണ് പ്രദർശനം സംഘടിപ്പിക്കുന്നത്.

തദ്ദേശ സ്വയംഭരണ വകുപ്പു മന്ത്രി എ സി മൊയ്തീൻ, നഗരസഭ ചെയർപേഴ്സൺ സീതാ രവീന്ദ്രൻ, സ്ഥിരം സമിതി അധ്യക്ഷന്മാർ തുടങ്ങിയവർ ഫോട്ടോ പ്രദർശനത്തിൽ പങ്കെടുക്കും.

തൃത്താല ഗവ ആര്‍ട്സ് ആന്റ് സയന്‍സ് കോളേജില്‍ പുതുതായി അനുവദിച്ച ബിരുദാനന്തര ബിരുദ കോഴ്സായ എം എസ് സി മാത്തമാറ്റിക്സ് വിത്ത് ഡാറ്റ സയന്‍സ് കോഴ്സിലേക്കുളള പ്രവേശനത്തിന് യോഗ്യരായവരില്‍ നിന്ന് അപേക്ഷ ക്ഷണിക്കുന്നു.  അപേക്ഷാ ഫോം ഇന്ന് (ഫെബ്രുവരി 9) മുതൽ കോളേജ് ഓഫീസില്‍ നിന്നും മുതല്‍ വിതരണം ചെയ്യും.  പൂരിപ്പിച്ച അപേക്ഷകള്‍ ഫെബ്രുവരി 11 ന്  ഉച്ചയ്ക്ക് ഒന്ന് വരെ ഓഫീസില്‍ സ്വീകരിക്കും.  അപേക്ഷയോടൊപ്പം യോഗ്യത, വയസ്സ്, ജാതി, വരുമാനം എന്നിവ തെളിയിക്കുന്ന സാക്ഷ്യപത്രങ്ങളുടെ പകര്‍പ്പ് ഉളളടക്കം ചെയ്യണം.  കൂടുതല്‍ വിവരങ്ങള്‍ക്ക്  ഫോണ്‍-0466 2270335, 0466 2270353.

ജില്ലയിലെ വിവിധ ഇൻഡസ്ട്രിയൽ ട്രെയിനിങ് ഇന്സ്ടിട്യൂട്ടുകളിൽ നിന്നും പഠിച്ചിറങ്ങിയവർക്ക് തൊഴിൽ അവസരമൊരുക്കാൻ സ്പെക്ട്രം 2021 തൊഴിൽ മേള സംഘടിപ്പിക്കുന്നു. ഇന്ന്  രാവിലെ 9 മുതൽ ചാലക്കുടി ഐടിഐയിൽ നടക്കുന്ന  തൊഴിൽ മേള ബി ഡി ദേവസ്സി എംഎൽഎ ഉദ്ഘാടനം ചെയ്യും.

കേരള സർക്കാരിന്റെ തൊഴിൽ നൈപുണി വകുപ്പാണ്  ഐടിഐ പാസായവർക്ക് തൊഴിലവസരങ്ങൾ നൽകാൻ  ജില്ലാടിസ്ഥാനത്തിൽ സ്പെക്ട്രം തൊഴിൽമേള നടത്തുന്നത്. മേളയിൽ പങ്കെടുക്കുന്ന ജില്ലയിലെ ഐടിഐ കളിൽ നിന്നും പാസായിട്ടുള്ള തൊഴിൽരഹിതർക്ക്  കേരളത്തിനകത്തും പുറത്തുമുള്ള പ്രമുഖ കമ്പനികളിൽ ജോലിനേടാൻ അവസരം ലഭിക്കും.

ഭിന്നശേഷിക്കാരായ വിദ്യാർത്ഥികൾക്ക് പ്രോത്സാഹനം നല്കുന്ന  വിജയാമൃതം പദ്ധതിയിലേക്ക് അപേക്ഷ ക്ഷണിച്ചു.

വൈഗ 2021 നോടനുബന്ധിച്ച് ഫെബ്രുവരി 11 മുതൽ 13 വരെ നടത്തുന്ന വൈഗ അഗ്രി  ഹാക്കത്തോൺ തൃശൂർ സെൻറ് തോമസ് കോളേജിൽ നടക്കും. കാർഷിക മേഖലയിലെ സാമൂഹികവും സാങ്കേതികവുമായ പ്രശ്നങ്ങൾക്കുള്ള പരിഹാരം നൂതന സാങ്കേതിക വിദ്യയും ആശയങ്ങളും ഉപയോഗിച്ച് കണ്ടെത്തുന്നതിനുള്ള മത്സരാധിഷ്ഠിത പരിപാടിയാണിത്.വളർന്നു വരുന്ന തലമുറക്ക്‌ കാർഷിക മേഖലയിൽ നൽകാവുന്ന ആശയപരമായ സംഭാവനകളാണ് ലക്ഷ്യം. പൊതുജനങ്ങൾ, സ്കൂൾ-കോളേജ് വിദ്യാർഥികൾ, സാങ്കേതിക വിദഗ്ധർ, സ്റ്റാർട്ടപ്പുകൾ എന്നിവർ പരിപാടിയിൽ  മാറ്റുരയ്ക്കും.  നിർമ്മിതബുദ്ധി, റോബോട്ടിക്സ്, ഐ ഓ ടി  സാങ്കേതികവിദ്യകൾ ഉപയോഗിച്ചാണ്  പ്രശ്ന പരിഹാരങ്ങൾ കാണുന്നത്.

പാലക്കാട് ഇന്ദിരാഗാന്ധി മുനിസിപ്പൽ സ്റ്റേഡിയത്തിൽ  ഇന്ന് (ഫെബ്രുവരി 8 ) രാവിലെ 10 ന് ആരംഭിച്ച സാന്ത്വനസ്പർശം ജില്ലാതല പരാതിപരിഹാര അദാലത്ത് റിപ്പോർട്ട് ചെയ്യാനെത്തുന്ന മാധ്യമ പ്രവർത്തകർക്കായി ജില്ലാ ഇൻഫർമേഷൻ ഓഫീസ് മീഡിയ സെൻറർ സജ്ജീകരിച്ചിട്ടുണ്ട്. മീഡിയ സെൻ്ററിൽ ലഘുഭക്ഷണവും ഉച്ചഭക്ഷണവും സജ്ജമാക്കിയിട്ടുണ്ട്. നടക്കാനിരിക്കുന്ന രണ്ട് അദാലത്തുകളിലും ഇത്തരത്തിൽ മീഡിയ സെൻ്റർ സജ്ജീകരിക്കുന്നതാണ്. പ്രിയപ്പെട്ട മാധ്യമ പ്രവർത്തകരുടെ സാന്നിധ്യം പ്രതീക്ഷിക്കുന്നു.