ചുങ്കം - കുട്ടിക്കല്ലത്താണി പി.ഡബ്ല്യൂ.ഡി റോഡ് പ്രവൃത്തിയുമായി ബന്ധപ്പെട്ട് ജല വിതരണ പൈപ്പ് ലൈനിൽ അടിയന്തര അറ്റകുറ്റപണി നടത്തേണ്ടതിനാൽ തിരുന്നാവായ, ആതവനാട് , മാറക്കര,  കുറ്റിപ്പുറം  പഞ്ചായത്തുകളിൽ  ഇന്നും ( ഫെബ്രുവരി ഏഴ്) നാളെയും (ഫെബ്രുവരി എട്ട്)

 കുടിവെള്ള വിതരണം മുടങ്ങുമെന്ന് കേരള വാട്ടർ അതോറിറ്റി തിരൂർ അസിസ്റ്റന്റ് എഞ്ചിനിയർ അറിയിച്ചു.

മാറഞ്ചേരി മഠത്തിൽ തോടിന് കുറുകെ  വിസിബി നിർമാണത്തിന് അനുമതി ലഭിച്ചു. നിരവധി കുടുംബങ്ങൾക്ക് ഉപ്പുവെള്ളം കലരാതെ കുടിവെള്ളം സംരക്ഷിക്കാനും  കൃഷി നടത്തുന്നതിനും സഹായകമാകുന്ന പുറങ്ങ് മഠത്തിൽ തോടിന് കുറുകെയാണ് വിസിബി യുടെ ഡി പി ആർ അംഗീകരിച്ച് ഭരണാനുമതി ലഭിച്ചത്. 75 ലക്ഷം രൂപയാണ് പദ്ധതിയുടെ അടങ്കൽ തുക. മൈനർ ഇറിഗേഷൻ എക്സിക്യൂട്ടീവ് എഞ്ചിനീയറിനോട് സാങ്കേതിക അനുമതി നൽകി ടെൻഡർ  നടത്താൻ സ്പീക്കർ പി.ശ്രീരാമകൃഷ്ണൻ നിർദേശം  നൽകി.

പത്ത് സംസ്ഥാന കായകല്‍പ്പ് അവാര്‍ഡ് സ്വന്തമാക്കുന്നതിന് സ്തുത്യര്‍ഹമായ സേവനം കാഴ്ചവെക്കുകയും ആരോഗ്യമേഖലയിലെ സമഗ്രപുരോഗതിക്ക് ഉതകുന്ന വിധം പ്രവര്‍ത്തിക്കുകയും ചെയ്ത ജില്ലയിലെ ആരോഗ്യപ്രവര്‍ത്തകരെ ജില്ലാ പഞ്ചായത്ത് പ്രസിഡന്റ് എം.കെ. റഫീഖ, ജില്ലാ കലക്ടര്‍ കെ. ഗോപാലകൃഷ്ണന്‍, ജില്ലാ മെഡിക്കല്‍ ഓഫീസര്‍ ഡോ. കെ. സക്കീന, എന്‍.എച്ച്.എം പ്രോഗ്രാം മാനേജര്‍ ഡോ. ഷിബുലാല്‍ എന്നിവര്‍ അഭിനന്ദിച്ചു.

പെരിന്തല്‍മണ്ണ താലൂക്കില്‍ നെന്മിനി വില്ലേജില്‍ താമസിക്കുന്ന വ്യക്തിയുടെ  പേരിലുള്ള ബാങ്ക് ലോണ്‍ കുടിശികയായ 81008 രൂപയും  14 ശതമാനം പലിശയും സി.സിയും മറ്റ് ചെലവുകളും ഈടാക്കുന്നതിനായി വ്യക്തിയുടെ കൈവശമുള്ള നെന്മിനി വില്ലേജില്‍പ്പെട്ട സ്ഥലം ഫെബ്രുവരി 27ന് രാവിലെ 11.30ന് വില്ലേജില്‍ ലേലം ചെയ്യും.

വണ്ടൂര്‍ അംബേദ്കര്‍ കോളജ് ഓഫ് ആര്‍ട്‌സ് ആന്‍ഡ് സയന്‍സില്‍ പുതുതായി അനുവദിച്ച  എം.എ ഡവലപ്‌മെന്റ് എക്കണോമിക്‌സ് കോഴ്‌സിന് എസ്. സി, എസ്.ടി, കമ്മ്യൂണിറ്റി ക്വാട്ട (എസ് സി) എന്നീ  വിഭാഗങ്ങളില്‍  ഏതാനും സീറ്റ് ഒഴിവുണ്ട്.  താത്പര്യമുള്ളവര്‍ ഫെബ്രുവരി എട്ടിന് ഉച്ചക്ക് രണ്ടിനകം കോളജില്‍ റിപ്പോര്‍ട്ട് ചെയ്യണം. ഫോണ്‍: 04931 249666.

സംസ്ഥാന യുവജന കമ്മീഷന്‍ ചെയര്‍പേഴ്‌സണ്‍ ചിന്താ ജെറോമിന്റെ അധ്യക്ഷതയില്‍ ഫെബ്രുവരി എട്ടിന് രാവിലെ 11 മുതല്‍ മലപ്പുറം ഗസ്റ്റ് ഹൗസ് കോണ്‍ഫറന്‍സ് ഹാളില്‍ അദാലത്ത് നടത്തുന്നു. 18 വയസിനും 40 വയസിനും ഇടയില്‍ പ്രായമുള്ളവര്‍ക്ക് പരാതികള്‍ കമ്മീഷന്‍ മുമ്പാകെ സമര്‍പ്പിക്കാം.

ദേശീയ ആരോഗ്യ ദൗത്യത്തിനു കീഴില്‍ നടന്ന മിഡില്‍ ലെവല്‍ സര്‍വീസ് പ്രൊവൈഡര്‍മാരുടെ ഇന്റര്‍വ്യൂമായി ബന്ധപ്പെട്ട ഷോര്‍ട്ട് ലിസ്റ്റ് arogyakeralam.gov.in വെബ് സൈറ്റില്‍ പ്രസിദ്ധപ്പെടുത്തിയിട്ടുണ്ട്. ലിസ്റ്റില്‍ ഉള്‍പ്പെട്ടവര്‍ക്കുളള ഇന്റര്‍വ്യൂ ഫെബ്രുവരി ഒന്‍പത്,10,11,12 തീയതികളില്‍ രാവിലെ ഒന്‍പത് മുതല്‍ മലപ്പുറം എം.എസ്.പി സ്‌കൂളില്‍ നടക്കും. ക്രമനമ്പര്‍ അടിസ്ഥാനത്തില്‍    ഓരോ ദിവസത്തെയും രാവിലെ മുതല്‍ ഉച്ചവരെ  ഉച്ച മുതല്‍ വൈകീട്ട് വരെ എന്ന രീതിയിലുള്ള ലിസ്റ്റാണ് പ്രസിദ്ധീകരിച്ചിട്ടുളളത്.

സംസ്ഥാന കായകല്‍പ്പ് അവാര്‍ഡ് ആരോഗ്യ വകുപ്പ് മന്ത്രി കെ.കെ. ശൈലജ ടീച്ചര്‍ പ്രഖ്യാപിച്ചു. ജില്ല ഇത്തവണ 10 അവാര്‍ഡുകള്‍ സ്വന്തമാക്കി. ജില്ലാതല ആശുപത്രികളില്‍ ജില്ലാതലത്തില്‍ 70 ശതമാനത്തില്‍ കൂടുതല്‍ മാര്‍ക്ക് നേടിയ ആശുപത്രികള്‍ക്കുളള മൂന്ന്  ലക്ഷം രൂപയുടെ കമന്റേഷന്‍ അവാര്‍ഡ് ജില്ലയില്‍ നിലമ്പൂര്‍ ജില്ലാ ആശുപത്രി (83.7), തിരൂര്‍ ജില്ലാ ആശുപത്രി (83.5) എന്നീ ആരോഗ്യ സ്ഥാപനങ്ങള്‍  നേടി.  സബ് ജില്ലാതലത്തില്‍ 77 ശതമാനം മാര്‍ക്കി നേടി പൊന്നാനി താലൂക്ക് ഹെഡ് ക്വാര്‍ട്ടേഴ്‌സ് ആശുപത്രി ഒരു ലക്ഷം രൂപയുടെ കമന്റേഷന്‍ അവാര്‍ഡ് സ്വന്തമാക്കി.