തീരദേശ വേലിയേറ്റ രേഖയില്‍ നിന്ന് 50 മീറ്റര്‍ ദൂരപരിധിക്കുള്ളില്‍ താമസിക്കുന്ന മത്സ്യത്തൊഴിലാളി കുടുംബങ്ങളെ സുരക്ഷിത കേന്ദ്രങ്ങളിലേക്ക്  പുനരധിവസിപ്പിക്കാന്‍ സംസ്ഥാന സര്‍ക്കാര്‍ നടപ്പാക്കുന്ന പുനര്‍ഗേഹം പദ്ധതിയില്‍ ഉള്‍പ്പെടുത്തി പൊന്നാനിയില്‍ 40 മത്സ്യത്തൊഴിലാളി കുടുംബങ്ങള്‍ക്ക് കൂടി വീടും സ്ഥലവും. മാറിതാമസിക്കുന്നതിനായി സ്ഥലം കണ്ടെത്തി ഫിഷറീസ് വകുപ്പ് അധികൃതരെ രേഖാമൂലം അറിയിച്ച മത്സ്യത്തൊഴിലാളികള്‍ക്കാണ് സ്ഥലം വാങ്ങി വീടുവയ്ക്കാന്‍ 10 ലക്ഷം രൂപ വീതം സാമ്പത്തിക സഹായം അനുവദിച്ചത്. പൊന്നാനിയിലെ അദാലത്തില്‍ പരിഗണിച്ച 40 അപേക്ഷകളും ഒന്നിച്ച് തീര്‍പ്പാക്കുകയായിരുന്നു.

സാന്ത്വന സ്പര്‍ശം അദാലത്തില്‍ പരാതികളുമായെത്തിയവര്‍ക്ക് കരുതലിന്റെ ഊഷ്മളത പകര്‍ന്ന് പൊന്നാനി എം.ഇ.എസ് ആര്‍ട്സ് ആന്‍ഡ് സയന്‍സ് കോളജിലെ വിദ്യാര്‍ഥികള്‍ മാതൃകയായി. എന്‍.സി.സി കേഡറ്റുകളും എന്‍.എസ്.എസ് വളണ്ടിയര്‍മാരുമാണ് അദാലത്തില്‍ നിറസാന്നിധ്യമായി കയ്യടി നേടിയത്. അവശരായവര്‍ക്കും മുതിര്‍ന്ന പൗരന്മാര്‍ക്കും കുട്ടികള്‍ക്കുമെല്ലാം ആവശ്യമായ സഹായങ്ങളൊരുക്കാന്‍ വിദ്യാര്‍ഥി സംഘം മുന്നിട്ടിറങ്ങി. പ്രവേശന കവാടത്തില്‍ തന്നെ സേവന സജ്ജരായി എന്‍.സി.സി കേഡറ്റുകളുണ്ടായിരുന്നു. ഭിന്നശേഷിക്കാരായവരെ പ്രത്യേക കരുതലോടെയാണിവര്‍ രജിസ്ട്രേഷന്‍ കൗണ്ടറിലും ബന്ധപ്പെട്ട പരാതി പരിഹാര കൗണ്ടറുകളിലുമെത്തിച്ചത്.
 

ജനകീയ പ്രശ്്നങ്ങളില്‍ പരാതിയുമായി അദാലത്തിനെത്തിയ പൊന്നാനി നഗരസഭ കൗണ്‍സിലര്‍ക്ക് സന്തോഷം. പുഴയോര ഭിത്തി കെട്ടി കുടുംബങ്ങളുടെ സുരക്ഷ ഉറപ്പാക്കണമെന്നത് അടക്കമുള്ള ആവശ്യങ്ങള്‍ ഉന്നയിച്ചാണ് പൊന്നാനി നഗരസഭയിലെ  പത്താം ഡിവിഷന്‍ കൗണ്‍സിലര്‍ കെ.വി ബാബു അദാലത്തില്‍ നിവേദനങ്ങളുമായെത്തിയത്. ചമ്രവട്ടം കടവ് മുതല്‍ ചമ്രവട്ടം പാലം വരെയുള്ള മേഖലകളില്‍ പുഴയോര ഭിത്തി ഇടിയുന്നത് സമീപത്തെ വീടുകള്‍ക്ക് ഭീഷണിയാണെന്നും അതിനാല്‍ എത്രയവും വേഗം സുരക്ഷ ഭിത്തി പുനര്‍നിര്‍മിക്കണമെന്നായിരുന്നു ആവശ്യം. ഇക്കാര്യത്തില്‍ റിവര്‍ മാനേജ്മെന്റ് ഫണ്ടില്‍ നിന്ന് തുകയെടുത്ത് വിനിയോഗിക്കാന്‍ തീരുമാനമാകുകയായിരുന്നു.

അടച്ചുറപ്പുള്ള വീട് എന്ന സ്വപ്നം അദാലത്തില്‍ സഫലമായതിന്റെ സന്തോഷത്തിലാണ് എടപ്പാള്‍ സ്വദേശി അരിയാടത്ത് അച്ചുതന്‍. അദാലത്തില്‍ വീട് നിര്‍മിച്ചു നല്‍കുമെന്ന് മന്ത്രി ടി.കെ രാമകൃഷ്ണന്‍ ഉറപ്പു നല്‍കി.  എടപ്പാള്‍ കോലളമ്പ് പൂക്കരത്തറയില്‍ പൊളിഞ്ഞു വീണ വീട്ടില്‍  മകള്‍ സുനിതയുമൊത്താണ് അച്യുതന്‍ താമസിക്കുന്നത്. രണ്ടു വര്‍ഷം മുമ്പുള്ള കാറ്റിലാണ് വീട് പൊളിഞ്ഞ് തകര്‍ന്നത്. 21 വര്‍ഷം മുമ്പാണ് അച്യുതന്റെ ഭാര്യ മരിച്ചത്. മറ്റു മൂന്ന് പെണ്‍മക്കളുടെയും വിവാഹം ചെയ്തു കൊടുത്ത അച്യുതന് സുരക്ഷിതമായ ഒരു വീടൊരുക്കുക എന്നത് ഏറെ പ്രയാസമാണ്. സര്‍ക്കാരിന്റെ വാര്‍ധക്യ പെന്‍ഷനാണ് അച്യുതന്റെ ഏക വരുമാന മാര്‍ഗം.

സഹോദരിമാരായ പാറമ്മലങ്ങാടി സ്വദേശിനി ഫാത്തിമ സുഹറയും പുത്തനത്താണി കന്മനത്തെ ആമിനക്കുട്ടിയും പൊന്നാനിയില്‍ നടന്ന അദാലത്തിലെത്തിയത് തങ്ങളുടെ ഭിന്നശേഷിക്കാരായ മക്കള്‍ക്ക് വേണ്ടിയായിരുന്നു. ഫാത്തിമ സുഹറയുടെ 18 വയസുള്ള മകന്‍ സുഹൈലിന് ഇടുപ്പെല്ലിന് ശസ്ത്രക്രിയ ഉള്‍പ്പെടുത്തിയിട്ടും നടക്കാന്‍ സാധിക്കാത്ത അവസ്ഥയിലാണുള്ളത്. എന്നാല്‍ ആമിനക്കുട്ടിയുടെ ഒമ്പത് വയസുള്ള മകന്‍ മുഹമ്മദ് ഉനൈസ് ഉമ്മ എന്ന് വിളിക്കാന്‍ പോലും തുടങ്ങിയത് അടുത്തിടെയാണ്. ഇരുവര്‍ക്കും സമ്പത്തിക സഹായമുള്‍പ്പടെ ഉറപ്പാക്കാന്‍ അദാലത്ത് വഴിയൊരുക്കുകയായിരുന്നു.

അപൂര്‍വ രോഗ ബാധിതനായതിനാല്‍ ജനിച്ച നാള്‍ മുതല്‍ ദുരിതം പേറുന്ന കുഞ്ഞുകുഞ്ഞിന്റെയും കുടുംബത്തിന്റെയും ദൈന്യത കണ്ടറിഞ്ഞ് സര്‍ക്കാര്‍ സഹായം. കാടാമ്പുഴ പൊലീസ് സ്റ്റേഷന് സമീപം മഠത്തില്‍ വീട്ടില്‍ മോഹന്‍ദാസിന്റെയും രജ്ഞിനിയുടെയും രണ്ടാമത്തെ മകന്‍ അഞ്ചുവയസ്സുകാരനായ അനയ്ദാസിന്റെ ദുരവസ്ഥ കണ്ടറിഞ്ഞാണ് അടിയന്തര സഹായമായി 20000 രൂപ അനുവദിച്ചത്. അനയ്ദാസിന് മികച്ച ചികിത്സ നല്‍കാനും കുടുംബത്തെ സഹായിക്കാനും ആവശ്യമായ നടപടികള്‍ സ്വീകരിക്കണമെന്ന് മന്ത്രി ഡോ.കെ.ടി ജലീല്‍ മാറാക്കര പഞ്ചായത്ത് സെക്രട്ടറിയ്ക്ക് നിര്‍ദേശവും നല്‍കി.

സാന്ത്വന സ്പര്‍ശം അദാലത്തില്‍ 29 വര്‍ഷം മുമ്പ് ലഭിച്ച മിച്ചഭൂമിയ്ക്ക് പട്ടയം ലഭിച്ച സന്തോഷത്തിലാണ് കുഞ്ഞാത്ത എന്ന ഫാത്തിമ്മ എരഞ്ഞോളി.  പട്ടയം ലഭ്യമാക്കുമെന്ന് അദാലത്തില്‍ മന്ത്രി എ.കെ ശശീന്ദ്രന്‍ ഉറപ്പു നല്‍കി. 10 ദിവസം കഴിഞ്ഞ് തിരൂര്‍ താലൂക്കില്‍ എത്തണമെന്നും നിര്‍ദേശിച്ചു. വളാഞ്ചേരി മൈലാടിക്കുന്നില്‍ 29 വര്‍ഷം മുമ്പ് ലഭിച്ച മിച്ചഭൂമിയിലാണ്  16 വര്‍ഷമായി ഫാത്തിമ്മ താമസിക്കുന്നത്. 67 വയസുകാരിയായ ഫാത്തിമ്മ  മകള്‍ മുംതാസും അവരുടെ രണ്ട് പെണ്‍മക്കള്‍ക്കൊപ്പവുമാണ്  കഴിയുന്നത്. മറ്റു രണ്ട് പെണ്‍മക്കളും വിവാഹിതരാണ്.

പൊന്നാനി എം.ഇ.എസ് കോളജില്‍ സാന്ത്വന സ്പര്‍ശം അദാലത്ത് നടന്നത് പൂര്‍ണമായും ഹരിത ചട്ടം പാലിച്ച്. വിവിധ സമയങ്ങളിലായി ആയിരക്കണക്കിനു പേര്‍ വന്നു പോയ അദാലത്തില്‍ പ്ലാസ്റ്റിക് ഉള്‍പ്പടെയുള്ള മാലിന്യങ്ങള്‍ ഒരിടത്തുമുണ്ടായിരുന്നില്ല. ഹരിത ചട്ടപാലനം ഉറപ്പു വരുത്താന്‍ പൊന്നാനി നഗരസഭയിലെ ഹരിത കര്‍മ്മ സേനാംഗങ്ങള്‍ മുഴുവന്‍ സമയവും സജീവമായിരുന്നു. പരാതിയുമായെത്തുന്നവര്‍ കയ്യില്‍ കരുതിയിരുന്ന വെള്ള കുപ്പികളും മറ്റ് മാലിന്യങ്ങളും 17 അംഗ സംഘം കൃത്യമായ ഇടവേളകളില്‍ നീക്കം ചെയ്തുകൊണ്ടിരുന്നു.

അദാലത്ത് കഴിഞ്ഞ് 22 വയസുള്ള മകള്‍ ഷാഹിദയെ കോരിയെടുത്ത് തോളിലേക്കിടുന്നത് കണ്ട ആരും പറയും ഉമ്മ സാജിദയ്ക്ക് അവളൊരിക്കലുമൊരു ഭാരമാകില്ലെന്ന്. സ്വയം എഴുന്നേറ്റ് നടക്കാനോ മൂക്കിന് താഴെക്ക് നീങ്ങിയ മാസ്‌ക് ഒന്നുയര്‍ത്താനോ പോലും അവള്‍ക്കാവില്ല. എങ്കിലും സ്വന്തമായി ഒരു സംരംഭം തുടങ്ങി കുടുംബത്തിന് താങ്ങാകണമെന്ന അവളുടെ ആഗ്രഹത്തിന് സര്‍ക്കാരിന്റെ പിന്തുണ കൂടിയായപ്പോള്‍ ഒരു പുതുജീവിതത്തിനാണ് പൊന്നാനിയില്‍ നടന്ന സാന്ത്വനസ്പര്‍ശം അദാലത്ത് വേദിയായത്.