സംസ്ഥാന യുവജന കമ്മീഷന്‍ ജില്ലയില്‍ മലപ്പുറം ഗസ്റ്റ് ഹൗസ് കോണ്‍ഫറന്‍സ് ഹാളില്‍ അദാലത്ത് നടത്തി. യുവജന കമ്മീഷന്‍ അധ്യക്ഷ ചിന്ത ജെറോമിന്റെ നേതൃത്വത്തില്‍ നടത്തിയ അദാലത്തില്‍ പത്ത് പരാതികള്‍ തീര്‍പ്പാക്കി. 11 പരാതികള്‍ തിരുവനന്തപുരത്ത് നടക്കുന്ന അദാലത്തിലേക്ക് മാറ്റി. മുന്‍കൂട്ടി രജിസ്റ്റര്‍ ചെയ്ത 21 പരാതികളും പുതുതായി ലഭിച്ച പത്ത് പരാതികളുമാണ് അദാലത്തില്‍ പരിഗണിച്ചത്. കോവിഡ് മാനദണ്ഡങ്ങള്‍ പാലിച്ച് ആളുകളുടെ എണ്ണം കുറക്കുന്നതിനായി അടിയന്തര പ്രാധാന്യമുള്ള പരാതികളാണ് അദാലത്തില്‍ പരിഗണിച്ചതെന്ന് യുവജന കമ്മീഷന്‍ അധ്യക്ഷ അറിയിച്ചു.

ഭിന്നശേഷിക്കാരുടെ നിർധനരായ അമ്മമാർക്ക് ഉപജീവനത്തിന് ഇലക്ട്രിക് ഓട്ടോ സൗജന്യമായി നൽകുന്നതിന് ഭരണാനുമതി നൽകിയതായി ആരോഗ്യ സാമൂഹ്യനീതി വകുപ്പ് മന്ത്രി കെ.കെ. ശൈലജ ടീച്ചർ അറിയിച്ചു. നാഷണൽ ട്രസ്റ്റ് നിയമത്തിൽ ഉൾപ്പെടുന്ന ഭിന്നശേഷിക്കാരുടെ സാമ്പത്തികമായി പിന്നാക്കം നിൽക്കുന്നവരും മറ്റ് വരുമാന മാർഗങ്ങൾ ഇല്ലാത്തവരുമായ അമ്മമാർക്ക് സ്ഥിരം വരുമാനം സാധ്യമാക്കുന്നതിനായാണ് ഒരു ഇലക്ട്രിക് ഓട്ടോ സൗജന്യമായി നൽകുന്ന പദ്ധതി ആവിഷ്‌ക്കരിച്ചത്. ആദ്യ ഘട്ടം ഒരു ജില്ലയിൽ 2 അമ്മമാർക്ക് വീതം 28 അമ്മമാർക്കാണ് ഇലക്ട്രിക് ഓട്ടോ നൽകുന്നത്. ഇതിനായി 49 ലക്ഷം രൂപയുടെ ഭരണാനുമതി നൽകിയതായും മന്ത്രി വ്യക്തമാക്കി.

കേരളത്തിൽ സർവീസ് നടത്തുന്ന സർക്കാർ യാത്രാ ബോട്ടുകളെല്ലാം ആധുനിക സൗകര്യത്തോടുകൂടിയ കറ്റാമറൈൻ ബോട്ടുകളാക്കുന്നു. ആദ്യ ഘട്ടത്തിൽ എറണാകുളം മേഖലയിലാണ് മാറ്റം. ഫോർട്ട് കൊച്ചി, മട്ടാഞ്ചേരി, വൈപ്പിൻ റൂട്ടുകളിലെ ബോട്ടുകളെല്ലാം കറ്റാമറൈൻ ബോട്ടുകളാകും. നേരത്തെ ആലപ്പുഴയിൽ ഒരു കറ്റാമറൈൻ ബോട്ട് സർവീസ് ആരംഭിച്ചിരുന്നു.
നൂതന സാങ്കേതിക വിദ്യയോടു കൂടിയ കറ്റാമറൈൻ ബോട്ടുകളിൽ 100 പേർക്ക് യാത്ര ചെയ്യാനാവും. നിലവിലെ ബോട്ടുകളിലെ യാത്രാ നിരക്ക് തന്നെയാവും ഇതിലും. സുരക്ഷയും യാത്രാസുഖവും ഉറപ്പ് നൽകുന്നവയാണ് കറ്റാമറൈൻ ബോട്ടുകൾ. എൻജിന്റെ കടുത്ത ശബ്ദം ഇത്തരം ബോട്ടുകൾക്കില്ലെന്നതാണ് മറ്റൊരു പ്രത്യേകത.

പട്ടിക വർഗ്ഗ വികസന വകുപ്പ് സെന്റർ ഫോർ മാനേജ്മെന്റ് ഡവലപ്പ്മെന്റ് മുഖേന നടപ്പാക്കുന്ന ഗോത്രജീവിക ലേബർ കോൺട്രാക്ട് സൊസൈറ്റി, ഗോത്രജീവിക രണ്ടാം ഘട്ടം, ഹരിതരശ്മി, തൊഴിലുപകരണങ്ങളുടെ വിതരണം എന്നിവയുടെ സംസ്ഥാനതല പ്രവർത്തനോത്ഘാടനം നാളെ (ഫെബ്രുവരി 12 ) രാവിലെ 11 ന് പട്ടിക വർഗ്ഗ വികസന മന്ത്രി എ. കെ ബാലൻ ഓൺലൈനായി നിർവഹിക്കും.
പി.എൻ.എക്സ്. 731/2021

മൃഗസംരക്ഷണ വകുപ്പിലെ സീനിയർ സൂപ്രണ്ട്/സീനിയർ സൂപ്രണ്ട് (അക്കൗണ്ട്‌സ്), അഡ്മിനിസ്ട്രേറ്റീവ് അസിസ്റ്റന്റ്/ അക്കൗണ്ട്സ് ഓഫീസർ തസ്തികകളിലെ 2020  ജൂലൈ ഒന്നിലെ നിലവെച്ചുള്ള അന്തിമ മുൻഗണനാ പട്ടിക www.ahdkerala.gov.in ൽ പ്രസിദ്ധീകരിച്ചു.
പി.എൻ.എക്സ്. 730/2021

മലയാളം ഔദ്യോഗിക ഭാഷയായി പ്രഖ്യാപിച്ച വിവിധ സർക്കാർ,അർദ്ധ സർക്കാർ സ്ഥാപനങ്ങൾ, പൊതുമേഖല സ്ഥാപനങ്ങൾ, മറ്റിതര സ്ഥാപനങ്ങൾ മുതലായവ നൽകുന്ന സർട്ടിഫിക്കറ്റുകൾ, ഉത്തരവുകൾ, കത്തുകൾ, സർക്കുലറുകൾ, അപേക്ഷ ഫോം, മാർഗ്ഗ നിർദ്ദേശം തുടങ്ങിയവയിൽ മലയാളം ഉപയോഗിക്കാത്തത് സംബന്ധിച്ച പരാതികളും നിർദ്ദേശങ്ങളും നിയമസഭാ ഔദ്യോഗിക ഭാഷ സംബന്ധിച്ച സമിതിക്ക് നൽകാം. വ്യക്തികൾക്കും സംഘടനകൾക്കും പരാതിയും നിർദ്ദേശങ്ങൾ നൽകാം.
വിലാസം : സെക്രട്ടറി, ഔദ്യോഗിക ഭാഷ സംബന്ധിച്ച സമിതി, നിയസഭാ മന്ദിരം, തിരുവനന്തപുരം. ഇ-മെയിൽ: ofl@niyamasabha.nic.in
പി.എൻ.എക്സ്. 729/2021

നേരിട്ടുള്ള സമ്പര്‍ക്കത്തിലൂടെ 476 പേര്‍ക്ക്
24 പേര്‍ക്ക് ഉറവിടമറിയാതെ രോഗബാധ
രോഗബാധിതരായി ചികിത്സയില്‍ 3,601 പേര്‍
ആകെ നിരീക്ഷണത്തിലുള്ളത് 22,912 പേര്‍

വട്ടംകുളം സ്വദേശിനിയായ 70 വയസുകാരി ഓമല പൊന്നാനിയിലെ അദാലത്തിലെത്തിയത് തന്റെ ബി.പി.എല്‍ വിഭാഗത്തിലെ റേഷന്‍കാര്‍ഡ് അന്ത്യോാദയ വിഭാഗത്തിലേക്ക് മാറ്റണമെന്ന ആവശ്യവുമായിട്ടായിരുന്നു. സാന്ത്വന സ്പര്‍ശം അദാലത്തിലൂടെ ഇവരുടെ ആവശ്യം കയ്യോടെ പരിഗണിച്ച് മന്ത്രി ടി.പി രാമകൃഷ്ണനാണ് ഇവര്‍ക്കുള്ള റേഷന്‍കാര്‍ഡ് കൈമാറിയത്. നാല് പെണ്‍മക്കളാണ് ഓമലയ്ക്കുള്ളത്. തലയില്‍ രക്തം കട്ടപിടിച്ചതിനെ തുടര്‍ന്ന് നേരത്തെ ചികിത്സ നടത്തിയിരുന്നു. ബി.പി.എല്‍ വിഭാഗത്തിലായിരുന്ന ഇവരുടെ റേഷന്‍ കാര്‍ഡ് അന്ത്യോദയ വിഭാഗത്തിലേക്ക് മാറിയതോടെ ഇവര്‍ക്ക് കൂടുതല്‍ ആനുകൂല്യങ്ങള്‍ ലഭ്യമാകും.

സാന്ത്വന സ്പര്‍ശം അദാലത്തിലൂടെ അന്ത്യോദയ അന്നയോജന കാര്‍ഡ് സ്വന്തമായതിന്റെ സന്തോഷത്തിലാണ് കോട്ടക്കല്‍ കോഴിച്ചന സ്വദേശി ജാനു.  ഇതു വരെ റേഷന്‍ കാര്‍ഡ് മുന്‍ഗണന വിഭാഗത്തിലായിരുന്നു. നിരവധി തവണ റേഷന്‍ കാര്‍ഡ് മാറ്റുവാന്‍ ശ്രമിച്ചെങ്കിലും മാറിയിരുന്നില്ല. അദാലത്തില്‍ പരിഹാരം കാണുമെന്ന ഉറപ്പിലാണ് പരാതി നല്‍കിയത്. ഉന്നത വിദ്യാഭ്യാസ വകുപ്പ് മന്ത്രി ഡോ കെ.ടിജലീല്‍   ജാനുവിന് അന്ത്യോദയ അന്നയോജന കാര്‍ഡ് നല്‍കിയത്. വരുമാനമൊന്നുമില്ലാതെ സഹോദരുടെ സഹായത്തോടെ കഴിയുന്ന ജാനുവിന് അദാലത്തില്‍ പുതിയ റേഷന്‍ കാര്‍ഡ്   ലഭിച്ചത് ജീവിതത്തില്‍ ഏറെ പ്രതീക്ഷയാണ് നല്‍കുന്നത്.