ജില്ലാ പോലീസ് പരാതി പരിഹാര  അതോറിറ്റി അദാലത്ത്: 11 പരാതികൾ തീർപ്പാക്കി 

തൃശൂർ ജില്ലാ പോലീസ് കംപ്ലയിന്റ് അതോറിറ്റിയുടെ നേതൃത്വത്തിൽ  കലക്ടറേറ്റ്  കോൺഫറൻസ് ഹാളിൽ പരാതി പരിഹാര അദാലത്ത് നടത്തി.  ലഭിച്ച 60 പരാതികളിൽ 11 എണ്ണം തീർപ്പാക്കി. 22 പരാതികൾ തുടർ നടപടികൾക്കായി മാറ്റിവച്ചു. 

രണ്ട് ദിവസമായാണ്
പരാതി പരിഹാര അദാലത്ത് നടത്തിയത്. പോലീസ് കംപ്ലയിന്റ് അതോറിറ്റി ചെയർമാൻ റിട്ട. ജില്ലാ ജഡ്ജ് 
പി എസ് ദിവാകരൻ അദാലത്തിന് നേതൃത്വം നൽകി.

കാർഷിക ടൂറിസം ഹബ്ബായി പുത്തൂർ മാറും - ചീഫ് വിപ്പ് കെ രാജൻ 

കൃഷി, മൃഗസംരക്ഷണം, മത്സ്യകൃഷി, സുവോളജിക്കൽ പാർക്ക്, കായൽ സൗന്ദര്യവൽക്കരണം തുടങ്ങിയ വികസന പദ്ധതികളിലൂടെ പൂത്തൂർ ഗ്രാമപഞ്ചായത്ത് സമഗ്ര കാർഷിക ടൂറിസം ഹബ്ബായി മാറുമെന്ന് ഗവ. ചീഫ് വിപ്പ് കെ രാജൻ. പുത്തൂർ ഗ്രാമപഞ്ചായത്തിലെ തുളിയാൻകുന്ന് ചിറ മുതൽ പുത്തൂർ കായൽ വരെയുള്ള ഇറിഗേഷൻ കനാലിന്റെ നവീകരണവും പുത്തൂർ കായലിന്റെ ജലസംഭരണശേഷി വർധിപ്പിക്കുന്നതിന്റെയും നിർമാണോദ്‌ഘാടന ചടങ്ങിൽ അധ്യക്ഷത വഹിച്ച് സംസാരിക്കുകയായിരുന്നു അദ്ദേഹം. പദ്ധതികളുടെ ശിലാസ്ഥാപനവും അദ്ദേഹം നിർവഹിച്ചു.

ചേലക്കരയിലെ റോഡു നവീകരണത്തിന് 1.8 കോടി രൂപ

പ്രളയത്തിൽ തകർന്ന ചേലക്കര ബ്ലോക്ക് പഞ്ചായത്തിലെ റോഡുകൾ പുതുക്കി പണിയാൻ തുക അനുവദിച്ചു.
കാലവര്‍ഷത്തിൽ  തകര്‍ന്ന  റോഡുകൾ പുനർ നിർമിക്കാൻ  1.8 കോടി രൂപ യാണ് അനുവദിച്ചത്. സർക്കാരിന്റെ  ദുരന്തനിവാരണ വകുപ്പാണ്  ചേലക്കര നിയോജക മണ്ഡലത്തിലെ 18 റോഡുകളുടെ  അറ്റകുറ്റപ്പണികൾക്ക്  തുക അനുവദിച്ചത്.

പ്ലാസ്റ്റിക്കിനെ പടിയിറക്കി;
ആരോഗ്യ സർവകലാശാല ഇനി ഹരിത ക്യാംപസ്

ആരോഗ്യ സർവകലാശാല ക്യാംപസ് ഇനി മുതൽ പ്ലാസ്റ്റിക്, ഇതര മാലിന്യമുക്ത ഇടം. സർവകലാശാലയിലെ ശുചിത്വ പൂർണതയ്ക്ക് ഹരിതകേരള മിഷന്റെ എ ഗ്രേഡ് സർട്ടിഫിക്കറ്റും സർവകലാശാല സ്വന്തമാക്കി. സർക്കാർ ഓഫീസുകളെ മാലിന്യമുക്തമാക്കുന്നതിന്റെ ഭാഗമായിട്ടാണ് ഹരിത കേരള മിഷൻ ആദരവ് നൽകിയത്.
65 ഏക്കറിൽ വരുന്ന ക്യാംപസ് മുഴുവനായും പ്ലാസ്റ്റിക് മുക്തമായി.

ഡി സി ഡി ആർ സി കെട്ടിട നിർമാണവും മീഡിയേഷൻ സെൻ്ററിൻ്റെ ശിലാസ്ഥാപനവും ഇന്ന്

ക്വട്ടേഷൻ ക്ഷണിച്ചു

ഇൻസ്റ്റിറ്റ്യൂട്ട് ഓഫ് അഡ്വാൻസ്ഡ് സ്റ്റഡി ഇൻ എഡ്യൂക്കേഷൻ കോളേജിലേക്കയാവശ്യമായ കായികോപകരണങ്ങൾ  വാങ്ങുന്നതിനായി ക്വട്ടേഷൻ ക്ഷണിച്ചു. 2020-21 പ്ലാൻ ഫണ്ടിൽ നിന്നും കായികോപകരണങ്ങൾ വിതരണം ചെയ്യുന്നതിനുള്ള ക്വട്ടേഷൻ  എന്നെഴുതി പ്രിൻസിപ്പാൾ ഇൻസ്റ്റിറ്റ്യൂട്ട് ഓഫ് അഡ്വാൻസ് ഡ് സ്റ്റഡി ഇൻ എഡ്യൂക്കേഷൻ, തൃശൂർ 680020 എന്ന വിലാസത്തിൽ ഫെബ്രുവരി 11ന് ഉച്ചയ്ക്ക് 2 ന് മുമ്പായി അപേക്ഷിക്കണം. ഫോൺ: 0487-2331185.

ലൈഫ്മിഷൻ: രണ്ടാം ഘട്ടത്തിൽ
19 ഗ്രാമപഞ്ചായത്തുകളിൽ നൂറുമേനി വീടുകൾ

ഒന്നാം ഘട്ടത്തിൽ 97 ശതമാനം വീടുകളുടെ പൂർത്തീകരണം

ജില്ലയിലെ പത്തൊമ്പത് ഗ്രാമപഞ്ചായത്തുകൾ ലൈഫ്മിഷൻ രണ്ടാം ഘട്ടത്തിൽ 100 ശതമാനം വീടുകളുടെ നിർമാണം പൂർത്തിയാക്കി.
കോലഴി, അവണൂർ, മുളങ്കുന്നത്തുകാവ്, വെങ്കിടങ്ങ്, മണലൂർ, അവിണിശ്ശേരി, പാറളം, പറപ്പൂക്കര, പെരിഞ്ഞനം, കയ്പമംഗലം, അന്നമനട, കുഴൂർ, കാടുകുറ്റി, കൊരട്ടി, മുല്ലശ്ശേരി, നെന്മണിക്കര, പൊയ്യ, തോളൂർ, വെള്ളാങ്ങല്ലൂർ  ഗ്രാമപഞ്ചായത്തുകളാണ്  100 ശതമാനത്തിൽ എത്തിയത്.

സാന്ത്വന സ്പർശം :  പരാതി പരിഹാര അദാലത്ത്  ഫെബ്രു. 2 ന് കുന്നംകുളത്ത് 

ജില്ലയിലെ മൂന്ന് മന്ത്രിമാരും പങ്കെടുക്കും

ജില്ലയിൽ താലൂക്ക് അടിസ്ഥാനത്തിൽ നടത്തുന്ന സാന്ത്വനസ്പർശം പരാതിപരിഹാര അദാലത്ത് ഫെബ്രു. 2 ന് കുന്നംകുളത്ത് നടക്കും.  കുന്നംകുളം, തലപ്പിള്ളി, ചാവക്കാട് താലൂക്കുകളിലെ പരാതി പരിഹാര അദാലത്താണ് രാവിലെ മുതൽ കുന്നംകുളം നഗരസഭ ടൗൺ ഹാളിൽ നടക്കുക. 

തദ്ദേശ സ്വയംഭരണ വകുപ്പു മന്ത്രി എ സി മൊയ്തീൻ, കൃഷി വകുപ്പു മന്ത്രി വി എസ് സുനിൽകുമാർ, പൊതുവിദ്യാഭ്യസ വകുപ്പു മന്ത്രി പ്രൊഫ. സി രവീന്ദ്രനാഥ്, ഗവ. ചീഫ് വിപ്പ് കെ രാജൻ തുടങ്ങിയവർ കുന്നംകുളം ടൗൺ ഹാളിൽ പരാതി കേൾക്കാനെത്തും. 

റോഡ് സുരക്ഷ ഉറപ്പാക്കണം: ജില്ലാ കലക്ടർ

റോഡ് സുരക്ഷ ഉറപ്പാക്കാൻ എല്ലാവരും ശ്രദ്ധിക്കണമെന്ന് ജില്ലാ കലക്ടർ എസ് ഷാനവാസ് പറഞ്ഞു. റോഡ് സുരക്ഷാ മാസാചരണത്തിൻ്റെ ഭാഗമായി നടത്തിയ പാർലമെൻ്ററി  റോഡ് സുരക്ഷാസമിതി യോഗത്തിലാണ് കലക്ടർ ഇക്കാര്യം വ്യക്തമാക്കിയത്. ദേശീയ പാതയിലും സാധാരണ റോഡിലുമെല്ലാം അപകടങ്ങൾ വർധിച്ചു വരുന്ന സാഹചര്യങ്ങൾ മോട്ടോർ വാഹന വകുപ്പ് ഗൗരവമായെടുക്കണം. രാത്രികാലങ്ങളിൽ തൃശൂർ നഗരത്തിലടക്കം സൈലൻസർ പോലും ഇല്ലാത്ത ഇരുചക്രവാഹനങ്ങൾ അമിത വേഗതയിൽ ഓടി അപകടമുണ്ടാക്കുന്നുണ്ട്. ഒരാഴ്ചക്കകം ഇതിനെതിരെ നടപടിയെടുണമെന്ന് ബന്ധപ്പെട്ടവരോട് കലക്ടർ നിർദ്ദേശിച്ചു.

* പത്ത്, പ്ലസ്ടു റിവിഷൻ ക്ലാസുകൾ ഞായർ മുതൽ
കൈറ്റ് വിക്ടേഴ്സിലൂടെയുള്ള ഫസ്റ്റ്ബെൽ ഡിജിറ്റൽ ക്ലാസുകളിൽ പ്ലസ്ടു ക്ലാസുകളുടെ സംപ്രേഷണം നാളെ (ജനുവരി 30) പൂർത്തിയാകും. പൊതുപരീക്ഷ ലക്ഷ്യമാക്കി രണ്ട് മുതൽ നാല് വരെ എപ്പിസോഡുകളുള്ള പത്ത്, പ്ലസ്ടു ക്ലാസുകളുടെ റിവിഷൻ ക്ലാസുകൾ ഞായറാഴ്ച മുതൽ സംപ്രേഷണം ആരംഭിക്കുമെന്ന് കൈറ്റ് സി.ഇ.ഒ കെ. അൻവർ സാദത്ത് അറിയിച്ചു. തുടർന്ന് തിങ്കളാഴ്ച മുതൽ രാവിലെ ഓരോ ക്ലാസുകളായാണ് ഫോക്കസ് ഏരിയ അടിസ്ഥാനമാക്കിയുള്ള റിവിഷൻ ക്ലാസുകളുടെ സംപ്രേഷണം.