കോവിഡ് -19 ന്റെ പശ്ചാത്തലത്തില്‍ തിരുവനന്തപുരം ജില്ലാ സാമൂഹ്യനീതി ഓഫിസ് മുഖേന ജില്ലയിലെ 160 ട്രാന്‍സ്ജന്‍ഡര്‍ വ്യക്തികള്‍ക്ക്  നല്‍കുന്ന ഭക്ഷ്യ കിറ്റ് വിതരണത്തിന്റെ രണ്ടാം ഘട്ടം പുരോഗമിക്കുന്നു. ഇനിയും ഭക്ഷ്യ കിറ്റുകള്‍ കൈപറ്റാത്ത ലിസ്റ്റില്‍ ഉള്‍പ്പെട്ട ട്രാന്‍സ്‌ജെന്‍ഡര്‍ വ്യക്തികള്‍ നിര്‍ബന്ധമായും 2021 ഫെബ്രുവരി അഞ്ചിന് മുമ്പായി പൂജപ്പുരയുള്ള ജില്ലാ സാമൂഹ്യ നീതി ഓഫിസില്‍ നിന്നും കിറ്റുകള്‍ കൈപ്പറ്റേണ്ടതാണെന്ന് ജില്ലാ സാമൂഹ്യനീതി ഓഫിസര്‍ അറിയിച്ചു. കൂടുതല്‍ വിവരങ്ങള്‍ക്ക് 0471-2343241

ആലപ്പുഴ: ജനങ്ങളുടെ പ്രശ്നങ്ങള്‍ക്കും പരാതികള്‍ക്കും പെട്ടെന്ന് പരിഹാരം കാണുന്നതിന് മന്ത്രിമാരുടെ നേതൃത്വത്തില്‍ നടക്കുന്ന സാന്ത്വന സ്പര്‍ശം അദാലത്തിലേക്ക്  ജനുവരി 28ന് കൂടി അപേക്ഷിക്കാം.

പരാതികള്‍ സ്വന്തം നിലയില്‍ ഓണ്‍ലൈനായോ (www.cmo.kerala.gov.in) അക്ഷയ കേന്ദ്രങ്ങള്‍ വഴിയോ സമര്‍പ്പിക്കാം. അപേക്ഷാഫീസ് ഈടാക്കുന്നതല്ല. നേരത്തെ പരാതി നല്‍കിയിട്ടും തീര്‍പ്പാകാതെയുള്ളവയും പുതിയ പരാതികളും സ്വീകരിക്കും. ഫെബ്രുവരി 1, 2, 4 തീയതികളിലാണ് ജില്ലയിലെ അദാലത്ത്. മുഖ്യമന്ത്രിയുടെ ദുരിതാശ്വാസനിധിയിൽ നിന്നുള്ള ധനസഹായത്തിനുള്ള അപേക്ഷകളും അദാലത്തിൽ പരിഗണിക്കും.

ആലപ്പുഴ : മത്സ്യഫെഡിന്റെ ആലപ്പുഴ ജില്ലയിലെ 2020-2021 വർഷത്തെ പദ്ധതി അവലോകനം നടന്നു. ആലപ്പുഴ ബ്രദേഴ്‌സ് ആഡിറ്റോറിയത്തിൽ നടന്ന അവലോകന യോഗം മത്സ്യഫെഡ് ചെയർമാൻ പി. പി. ചിത്തരഞ്ജൻ ഉദ്ഘാടനം ചെയ്തു. മത്സ്യഫെഡ് ഭരണസമിതിയംഗം പി. എം. മിനി അധ്യക്ഷത വഹിച്ചു. ജില്ലയിലെ വിവിധ മത്സ്യത്തൊഴിലാളി സഹകരണ സംഘം ഭാരവാഹികൾ യോഗത്തിൽ പങ്കെടുത്തു. മത്സ്യഫെഡ് ജില്ലാ മാനേജർ കെ. സജീവൻ സ്വാഗതം പറഞ്ഞു. മത്സ്യഫെഡ് പ്രൊജക്ട് ഓഫീസർ ദിവ്യ പി. എസ് നന്ദി പറഞ്ഞു.

വടകര താലൂക്ക് സപ്ലൈ ഓഫീസ്  സിവിൽ സ്റ്റേഷനിലെ നവീകരിച്ച ഓഫീസിലേക്ക് ജനുവരി 29  മാറുകയാണ്. ഓഫീസ് മാറ്റത്തിന്റെ ഭാഗമായി കമ്പ്യൂട്ടറുകളും മറ്റ് ഫർണിച്ചറുകളും ഫയലുകളും പുതിയ ഓഫീസിലേക്ക് മാറ്റേണ്ടതിനാൽ ഇന്ന് (ജനുവരി 28)  റേഷൻ കാർഡ് സംബന്ധമായ അപേക്ഷകൾ സ്വീകരിക്കുന്നതല്ലെന്ന് വടകര താലൂക്ക് സപ്ലൈ ഓഫീസർ അറിയിച്ചു.

കോഴിക്കോട് വിമൻ ആൻഡ്് ചിൽഡ്രൻ ഹോം (നിർഭയ ഷെൽട്ടർ ഹോം) സെക്യൂരിറ്റി (1) തസ്തികയിലേക്ക് ഒരു വർഷത്തെ കരാറടിസ്ഥാനത്തിൽ നിയമനത്തിനായി എസ്എസ്എൽസി പാസായ സ്ത്രീകളിൽ നിന്നു അപേക്ഷ ക്ഷണിച്ചു.  താൽപര്യമുള്ളവർ ഫെബ്രുവരി 10 ന് രാവിലെ 9.30 ന്് കോഴിക്കോട് ഗവ. ചിൽഡ്രൻസ് ഹോം വെളളിമാട്കുന്നിലുളള ഗേൾസ് ഹോം ഓഡിറ്റോറിയത്തിൽ എത്തിചേരുവാൻ ജില്ലാ ചൈൽഡ് പ്രോട്ടക്ഷൻ ഓഫീസർ അറിയിച്ചു.  ഫോൺ : 9496386933

അന്യം നിന്നുപോവുന്ന വടക്കൻ കേരളത്തിലെ മികച്ചയിനം നാട്ടുമാവിനങ്ങളെ സംരക്ഷിക്കുന്നതിന് പടന്നക്കാട് കാർഷിക കോളേജിൽ സൗകര്യമൊരുക്കുന്നു.  സംസ്ഥാന സർക്കാരിന്റെ ഈ വർഷത്തെ പദ്ധതിയിൽ ഉൾപ്പെടുത്തിയാണ് നാടൻ മാവിനങ്ങളുടെ ഫീൽഡ് ജീൻബാങ്ക് ഉണ്ടാക്കുന്നത്. പൊതുജനങ്ങൾക്കും ഈ പദ്ധതിയിൽ ഭാഗമാകാം. തങ്ങളുടെ വീട്ടുവളപ്പിൽ കാണപ്പെടുന്ന മികച്ചതും സവിശേഷ ഗുണങ്ങളോടുകൂടിയതുമായ മാവിനങ്ങളെക്കുറിച്ച്  9447788288, 9061277471,  (തനൂജ.ടി.ടി),    7561816498 (തസ്നി) എന്നീ നമ്പറിൽ അറിയിക്കണമെന്ന്  കേരള കാർഷിക സർവകലാശാല ഡീ്ൻ ഡോ.പി.ആർ. സുരേഷ് അറിയിച്ചു.
 

തീവ്ര ശാരീരിക മാനസിക വെല്ലുവിളി നേരിടുന്ന  വ്യക്തികളെ സംരക്ഷിക്കേണ്ടി വരുന്ന മാതാവിന്/രക്ഷാകർത്താവിന് സ്വയംതൊഴിൽ ചെയ്യുന്നതിന് സാമൂഹ്യനീതി വകുപ്പ് മുഖേന സ്‌കോളർഷിപ്പ് അനുവദിക്കുന്ന സ്വാശ്രയ പദ്ധതിയിലേക്ക് അപേക്ഷ ക്ഷണിച്ചു.