2020-21 അധ്യയന വര്‍ഷം പത്താംതരം മുതല്‍ ഉന്നത വിദ്യാഭ്യാസത്തിനുള്ള സ്‌കോളര്‍ഷിപ്പ് അപേക്ഷ ഫെബ്രുവരി 15 വരെ ദീര്‍ഘിപ്പിച്ചതായി കോഴിക്കോട് ജില്ലാ ഭാഗ്യക്കുറി ക്ഷേമനിധി ഓഫീസര്‍ അറിയിച്ചു. 2019 ജനുവരി മുതല്‍ അംശാദായ കുടിശ്ശികമൂലം അംഗത്വം റദ്ദായവര്‍ക്ക്  ഫെബ്രവരി 28 വരെ അംഗത്വം പുതുക്കാനുള്ള അവസരം ലഭ്യമാണ്. ഫോണ്‍ : 0495-2378222.

തൃശൂർ കോർപറേഷൻ 47-ാം ഡിവിഷൻ പുല്ലഴിയിലെ വോട്ടർമാർ വ്യാഴാഴ്ച (21/01) പോളിങ് ബൂത്തിലേക്ക്‌. എൽ ഡി എഫ്   സ്ഥാനാർഥി അഡ്വ. എം കെ മുകുന്ദന്റെ അകാല നിര്യാണത്തെ തുടർന്ന് മാറ്റിവെച്ച തദ്ദേശ  പൊതു തിരഞ്ഞെടുപ്പാണിത്. 

6 സ്ഥാനാർഥികളാണ് മത്സര രംഗത്തുള്ളത്. അഡ്വ. മഠത്തിൽ രാമൻ കുട്ടി (എൽ ഡി എഫ് ), കെ രാമനാഥൻ(യു ഡി എഫ് ), സന്തോഷ്‌ പുല്ലഴി( എൻ ഡി എ ) , ജോഗിഷ് എ ജോൺ (ആം ആദ്മി ), ആന്റണി പുല്ലഴി (സ്വതന്ത്രൻ), ജോഷി തൈക്കാടൻ (സ്വതന്ത്രൻ) തുടങ്ങിയവരാണ് സ്ഥാനാർഥികൾ.

പൊതുവിദ്യാഭ്യാസ സംരക്ഷണയജ്ഞത്തിന്റെ ഭാഗമായി കിഫ്ബി പദ്ധതിയിൽ ഉൾപ്പെടുന്ന ജില്ലയിലെ അഞ്ച് സ്കൂളുകളുടെയും പ്ലാൻ ഫണ്ടിൽ ഉൾപ്പെടുന്ന അഞ്ചു സ്കൂളുകളുടേയും നിർമാണം ഈ മാസം പൂർത്തീകരിക്കാൻ നിർമാണ ഏജൻസികൾക്ക് എ ഡി എം റെജി പി ജോസഫ് നിർദേശം നൽകി.  എ ഡി എമ്മിൻ്റെ അധ്യക്ഷതയിൽ ചേർന്ന റിവ്യൂ മീറ്റിങ്ങിലാണ് നിർദ്ദേശമുണ്ടായത്.  

യോഗത്തിൽ അഞ്ചുകോടി, മൂന്നുകോടി, പ്ലാൻ ഫണ്ട് പദ്ധതികളിൽപ്പെടുന്ന വിദ്യാലയങ്ങളുടെ നിർമാണം ഫെബ്രുവരിയിൽ തന്നെ പൂർത്തീകരിക്കാനുള്ള ശ്രമങ്ങൾ  ഊർജിതമാക്കണമെന്നും അദ്ദേഹം നിർദ്ദേശിച്ചു. 

പഴയന്നൂർ ഗ്രാമപഞ്ചായത്തിൽ  പ്രിയദർശിനി ബഡ്സ് റീഹാബിലിറ്റേഷൻ സെന്ററിന്റെ ആഭിമുഖ്യത്തിൽ സ്‌പെഷ്യൽ ലൈവ് ലി ഹുഡ് പ്രോഗ്രാം ആരംഭിച്ചു. കുടുംബശ്രീയുടെ ഫണ്ട് ഉപയോഗിച്ചാണ് പരിപാടി സംഘടിപ്പിച്ചത്.

മാനസിക വെല്ലുവിളി നേരിടുന്നവർക്ക് പരിചരണം നൽകുന്നതിനായി സംസ്ഥാനത്ത്  നിലവിലുള്ള സംവിധാനത്തിന്റെ ഭാഗമായുള്ള  കുടുംബശ്രീ സംരംഭങ്ങളാണ് ബഡ്‌സ് റീഹാബിലിറ്റേഷൻ സെന്ററുകൾ. 

കൊടകര ബ്ലോക്ക് പഞ്ചായത്തിൽ മത്സ്യകർഷകർക്കായുള്ള ഏകദിന പരിശീലന പരിപാടി സംഘടിപ്പിച്ചു. ഫിഷറീസ് വകുപ്പ് എക്സ്റ്റൻഷൻ ഓഫീസർ ഡോക്ടർ ജോയിനി ജേക്കബ്, ഫിഷറീസ് അസിസ്റ്റന്റ് ഡയറക്ടർ ടി ടി ജയന്തി എന്നിവർ മത്സ്യ കൃഷിയെക്കുറിച്ചുള്ള ക്ലാസുകൾക്ക്‌ നേതൃത്വം നൽകി. കൊടകര ബ്ലോക്കിലെ 35 കർഷകരാണ് പരിശീലന പരിപാടിയിൽ പങ്കെടുത്തത്. 

സാമൂഹ്യനീതി വകുപ്പ്, നാഷണല്‍ ട്രസ്റ്റ് ജില്ലാതല സമിതി എന്നിവ മസ്തിഷ്‌ക ഭിന്നശേഷി വിഭാഗക്കാര്‍ക്കായി നടപ്പാക്കുന്ന സൗജന്യ ആരോഗ്യ സുരക്ഷാ പദ്ധതി നിരാമയ ഇന്‍ഷുറന്‍സില്‍ അര്‍ഹരെ അംഗമാക്കുന്നു. 

ഗുരുവായൂരിലെ ഗതാഗതക്കുരുക്കിനും  യാത്രാക്ലേശത്തിനും അറുതി. ഗുരുവായൂർ റെയിൽവേ മേൽപ്പാലത്തിന്റെ നിർമ്മാണോദ്ഘാടനം ജനുവരി 23ന് രാവിലെ 11ന് മുഖ്യമന്ത്രി പിണറായി വിജയൻ ഓൺലൈനായി നിർവഹിക്കും. ലെവൽക്രോസ് മുക്തകേരളം എന്ന ലക്ഷ്യത്തിനായി സംസ്ഥാന സർക്കാർ നടത്തുന്ന തടസ്സരഹിത റോഡ് ശൃംഖല പദ്ധതിയുടെ ഭാഗമായാണ് സംസ്ഥാനത്ത് 10 റെയിൽവേ മേൽപ്പാലങ്ങൾ വിവിധ ജില്ലകളിലായി നിർമ്മിക്കുന്നത്. പൊതുമരാമത്ത് വകുപ്പ് മന്ത്രി ജി സുധാകരന്റെ അധ്യക്ഷതയിൽ നടക്കുന്ന ചടങ്ങിൽ ധനകാര്യമന്ത്രി തോമസ് ഐസക് മുഖ്യാതിഥിയാകും. 

പട്ടികവർഗ്ഗ വിദ്യാർത്ഥികൾക്ക് നൽകുന്ന മെറിറ്റോറിയൽ സ്കോളർഷിപ്പിന് അപേക്ഷ ക്ഷണിച്ചു. തൃശൂർ ജില്ലാ പഞ്ചായത്ത് പരിധിയിൽ താമസിച്ചു വരുന്നവരും മെഡിക്കൽ എഞ്ചിനീയറിംഗ് കോഴ്സ്, ബിരുദം, ബിരുദാനന്തര ബിരുദം, ഗവേഷണ വിദ്യാർത്ഥികൾ, പോളിടെക്നിക്, സർക്കാർ അംഗീകൃത റഗുലർ കോഴ്സുകൾ, സംസ്ഥാനത്തിനു പുറത്തുള്ള അംഗീകൃത സർവകലാശാലകളുടെ റെഗുലർ കോഴ്സുകൾ, പ്രൊഫഷണൽ കോഴ്സുകളിലേക്കുള്ള എൻട്രൻസ് കോച്ചിംഗ് എന്നിവ പഠിക്കുന്ന വിദ്യാർഥികൾക്ക് സ്കോളർഷിപ്പിനായി അപേക്ഷിക്കാം.